KEJADIAN 18
18
Uisneno anta'en li'anmone mese neu Nai Abraham
1 Uisneno natonon neu Nai Abraham anhaumak hau le'u bale fuat anbi Mamre. Anbi tabu nane manas maputu nae le'uf, ma Nai Abraham antoko anbi in um-ume enon. 2Leka in na'aiti in nakan, in nit atoni tenu anhake anbi in matan. Nai Abraham in nao nok manapat he naeku nok sin. 3In nabes ma namolok nak, “Au Usi ki, kaisa amfini au um-ume mes amtam aim fe; he nati' au tuthae au Usi ki. 4Maut he au aiti oe ma au boe au Usi ki hi haem. Au Usi ki amtunom ma misnas fe anbi hau le i in hafon. 5Of au uloitan bukae kle'o-kle'o, he nati' au Usi ki mipeni matani fe'u nalali te na' him nao amfini. Au Usi ki hi miupab milali kau ma amnao mituin hi ate au ume.”
Sin natae nak, “Haim simo ho nek alekot nane. Hai of antam.”
6Nok manapat Nai Abraham antam neu um-ume in nanan ma namolok neu bi Sara nak, “Maiti ut alekot, ma anmo'e utunu' lab-labah.” 7Nalali te in nao nok manapat neu bale le in mu'it sin anbine, in anbeti bijae apokat mese, le in sisin naleok ma anfe neu in ameput sin, le naloitan nok lab-labah. 8Nalali onane te Nai Abraham naiti susu, susu lite, ma sisi le nahan nalali nane ma nabalab neu in uisfin. Leka sin fe anbukae, Nai Abraham in es nek non ma antuthae sin anbi hau nane in hafon.
9Nalali te sin natoti nak, “Ho fenai, bi Sara, in es me ka?”
Nai Abraham natae nak, “In es, um-ume in nanan.”
10Es na'ko sin namolok nak, “Funan sio anteni of au fain aum. Ma anbi tabu nane bi Sara ho fenai of napeni li'anmone.”
Tabu nane bi Sara in natnin natuin um-ume in eno, anbi uisfin sin kotin. 11Tabu nane Nai Abraham ma bi Sara sin namnaisnen, ma bi Sara in ka napenin teni fa funan. 12Es nane te bi Sara in anmani anbi in nekan nanan ma nak, “Au le; umnasi ulali ma ka ube'i teni fa, onme ka au fe lomi he ubua teni oke au mone? – Sa' anteni au mone amsa in namnasien.”
13Oke te Uisneno natoti Nai Abraham nak, “Nansa' es bi Sara in anmani ma in nekan fe naoni nabe'i ka in fe nahonis li'ana anbi tabu in namnasi? 14Ai anmu'i lasi le Uisneno kan mo'e nabe'i fa? Onle Au uton ulali ak, funan sio of Au fain aum a'teni neu bale le i. Ma Anbi tabu nane bi Sara of nahonis li'anmone mese.”
15Natuin bi Sara in namtau, in natotan lasi nane ma in nak, “Au ka mani fa.”
Mes Uisneno natae nak, “Namneo lelon ho mani.”
Nai Abraham antoti sako sanat antom Sodom
16Oke onane te Nai Abraham nasain atoni tenu sin le nane natuin sin hen nao anfini. Oke te sin antia bale mese le na'kone sin ankiso neu Sodom. 17Uisneno natenab anbi In nekan nak, “Au ka nabe'i fa he u'tolo' sa' neu Nai Abraham le of Au he mo'e ani. 18Ai in sufan nane es of kan fani fa uf anaet ma ansimo kuasat? Ai ka naneta natuin fa in ale uf anbi pah pinan of napeni tetus? 19Au beti ulali in he nati' naplenat in anah sin ma in sufan he nati' na'ki neu Kau ma anmo'e sa' le alekot ma amneot. Leka sin anmo'e nani lasi nane, of Au utis ani ale Au han manta'en neu Nai Abraham.”
20Nalali te Uisneno namolok anteni neu Nai Abraham nak, “Anmu'i han mafena antom Sodom ma Gomora, ma namneo sin sanat nane nae le'uf kun. 21Es nane te Au he sanu neu bale nane he nati' Au kiso ale han mafena le Au nen ulali nane namneo ai kahaf.”
22Oke te tuaf nua na'ko uisfin nane sin nao anfin neu Sodom, mes Uisneno fe anhaek nabalah nok Nai Abraham. 23Nai Abraham anhaumak Uisneno ma natoti nak, “Namneo ka Uisneno Ho he mule'un atoni-atoni le kan mu'i fa sanat nok ale atoni anasat sin? 24Oin kalu anmu'i atoni bo'nim le kan mo'e fa sanat anbi kot nane in nanan, of Ho mule'un kot nane anfun natef ka Uisneno? Ai Uisneno Ho kam lomi fa hem sako sin sanat he nati' atoni bo'nim le nane sin napeni aomina? 25Kaisa atoni-atoni le sin ka nasanab fa nane Ho mumate sin nok atoni-atoni asanat. Kaisa koi Uisneno! Natuin leka Ho munaoba mani koi Uisneno, atoni le ka nasanab fa of Hom kas sin nok atoni asanat sin. Onme ka alef lasi neno tunan ma pah pinan ka naton fa amneot!”
26 Uisneno namolok nak, “Oin kalu Au upeni atoni bo'nim le ka nasanab fa anbi Sodom, of Au sako ani kot nane sin sanat noba tem-temen natuin sin.”
27Nai Abraham namolok anteni nak, “Amsako kau au sanat koi Uisneno natuin au he talu teni au molok. Au le i au mansian kau, ma ka nabe'i fa he umolok sa'-sa'. 28Mes oin al anmu'i atoni bo'ha am nim le ka nasanab fa, ma sin ka bo'nim fa. Nansa' ka Uisneno es Ho he mule'un kot nane anfun natef alkan te fa atoni nim?”
Uisneno namolok nak, “Oin kalu Au upeni atoni bo'ha am nim le ka nasanab fa, Au ka ule'un fa kot nane.”
29Nai Abraham namolok anteni nak, “Onme ka oin kalu alkun atoni bo'ha?”
Uisneno natae nak, “Natuin atoni bo'ha nane, Au ka unaoba fa Au salit.”
30Nai Abraham namolok nak, “Kaisa muto'an kau, koi Uisneno, leka au umolok ateni. Onme leka anmu'i alkun atoni bo'tenu?”
Uisneno namolok nak, “Kalu Au upeni atoni bo'tenu anbin, of Au eka Au salit.”
31Nai Abraham namolok nak, “Amsako kau au sanat koi Uisneno natuin Au he talu teni au molok. Oin kalu anmu'i alkun atoni bo'nua?”
Uisneno namolok nak, “Kalu Au upeni atoni bo'nua anbin, of Au ka ule'un fa kot nane.”
32Amsoput Nai Abraham namolok nak, “Kaisa muto'an kau, koi Uisneno, au al umolok ateni haef mese le i. Onme kalu anmu'i alkun atoni bo'mese?”
Uisneno namolok nak, “Kalu anmu'i atoni bo'mese le ka nasanab fa, Au of ka ule'un fa kot nane.” 33Leka namolok nalali nok Nai Abraham, Uisneno In nao ankon, ma Nai Abraham anfani neu in ume.
Currently Selected:
KEJADIAN 18: AOZ
Highlight
Share
Copy
Want to have your highlights saved across all your devices? Sign up or sign in
