KEJADIAN 19
19
Sanat anbi Sodom
1Leka sin anpoi nalali na'ko Nai Abraham in ume, ahake neno nua'eun nane sin anao neu Sodom ma sin antia nane nok fai. Nai Lot antok anbi kot in eno naek, ma leka in nit sin, in anfen ma naeku nok sin ma in nak, 2“Au Usi ki, au toti ki hem tam mok au ume. Nabe'i au Usi ki amboe hi haem ma amtup ambi au ume. Au Usi ki nabe'i him fen anbi nok-noka ma amnao amfini.”
Mes sin natae nak, “Haim simo ho nek alekot nane, mes maut, haim tup ambi le i, anbi mnela' na'ko kot le i.”
3Nai Lot antoti nok matani, ma anbi amsoput sin nok in antam anbi in ume. Nai Lot naloitan bukae aminat ma antunu utunu' namfau, oke te sin anbukae.
4Mes leka' uisfin nane fe ka nao fa hen tupan, atoni-atoni Sodom sin nem anfun natef ume nane. Ale atoni anbi kot nane, leko mnasi ma munif. 5Sin anhunun ma ankoa neu Nai Lot, ma sin natoti nak, “Atoni-atoni le nem ma antup anbi ho ume sin esme ka? Muna'at kai sin, he nati' hai mibua mok sin!”
6Nai Lot anpoi na'ko in ume, oke te in an ek in eno, 7in nak neu atoni-atoni Sodom nane nak, “Au bia-benu ki, au toti ki nok matani, kaisa anmo'e lasi maufinut nane! 8Ati him nen, au mu'i li'anfeto nua le fe ka nahin fa atoni. Maut he au una'at sin neu ki ma hi mo'e sa' le him lomi mok sin. Mes kaisa hi mo'e sa'-sa' neu au uisfin le i; natuin au mes he panat sin.”
9Mes atoni-atoni Sodom nane sin namolok neu Nai Lot nak, “Mnao nai! Ho atoni anao amnemat nane he muplenat kai? Neu, amnao nai! Kalu kahaf, of hai minoina ko nesin atoni nua'eun nane.” Oke te sin antite Nai Lot ma nasik he nale'un eno. 10Mes uisfin nua'eun nane anona sin niman ma antopu natam Nai Lot antam neu ume nanan, oke te sin anek eno. 11Sin nafolob ale atoni abit mone sin matan, talantia atoni-atoni nane ka nit fa eno anteni.
Nai Lot nasaitan pah Sodom
12Uisfin nua'eun nane namolok neu Nai Lot nak, “Kalu ho mu'i li'anmone, li'anfeto, ho moen feuf ma ho in-ini sin bian le namaika anbi kot le i in nanan, meki sin anpoi na'ko le i, 13natuin kot le i hai he mile'un. Uisneno In nen nalali sin han mafena neu atokos bale le i, ma In ansonu' nalali kai he mile'un kot Sodom.”
14Oke te Nai Lot in nao ma naeku nok in moen feuf sin nua sin ma in nak, “Ampoi labah mi'ko bale le i, natuin Uisneno he nale'un nani.” Mes sin natenab nak Nai Lot nalosi nok sin.
15Leka anhaumak hen meus, ahake neno nua'eun nane sin naseke Nai Lot he nati' sin anpoi he nao. Sin namolok nak, “Manap nai laba. Amnao nai mok ho fenai ma ho anfeto nua sin mi'ko bale i, he nati' kaisa hi mate leka kot le i nale'un nani.” 16Nai Lot nekan namneku. Mes Uisneno nekan anmof neune; es nane te ahake nua'eun nane sin antopu Nai Lot ma in fenai ma in anhenu nua sin anpoi nasaitan kot nane. 17Nalali onane te es na'ko ahake neno sin nane namolok nak, “Maen nai, mifetin nai hi smanam! Kaisa amkiso neu kotin ma kaisa misnas anbi nonof. Maen nai neu tubu, he nati' kaisa hi mate!”
18Mes Nai Lot natae nak, “Koi Usi, kaisa hom lenu kai he hai maen neu tubu. 19Namneo, Usi hom bab mulali kau ma muhoni au smanak. Mes tubu nane in na'lo kun; kaisa-kaisa snama nane napeni kau talantia au mate nahun na'ko utua bale nane. 20Amkiso, anbi ho matam nane anmu'i kot abaut mese le ka na'lo nis fa. Mufetin kau he au aen eune he nati' au ufetnok.”
21Ahake neno nane natae nak, “Leko, kot abaut nane of au ka ule'un fa. 22Maen, labah nai! Natuin of Au ka mo'e fa sa'-sa' nahun na'ko ho fe kam tia fa bale nane.”
Natuin Nai Lot antek kot nane abaut, es nane te nakanab kot nane nak Zoar.
Naskuku nani Sodom ma Gomora
23Nai Lot antia Zoar leka manas anpe'! 24Nok askeken Uisneno nasanut ul upat ma ai neu pah Sodom ma Gomora. 25Kot nua eun nane naskuku nani sin nok ale nonof amsa, ma ale' luet, ma ale amaika anbi nane. 26Mes Nai Lot in fenai in nik neu kotin, es nane te in nabaina ma anfani ni masi.
27Anbi nokfa, fe nok-noka, Nai Abraham in nao nok manapat neu bale le in anhake anbi Uisneno In matan anbi neno mese nahun na'kone. 28In na'aiti in matan ma ankiso neu Sodom ma Gomora ma neu nonof ok-oke, ma in nit masu ansae na'ko pah nane, onle masu na'ko tunaf ahaek. 29Onle nane, leka Uisneno nale'un kot-kot ma nonof le Nai Lot natua anbine, mes Uisneno namnau Nai Abraham ma In antuntaku ma nafetin Nai Lot.
Atoni Moab ma atoni Amon sin ukenu
30Natuin Nai Lot namtau he namaika nabalah anbi Zoar, es nane te in nao neu tubu nok in anfeto sin nua sin MA namaika anbi nuat mese in nanan. 31In anfeto naek nak neu in olif nak, “Hit ama in namnasien, ma anbi pah le i anfun natef kan mu'i fa atoni le nabe'i hen mafe nok kit he nati' hit tapeni li'ana. 32Aum, he tamafu hit ama, oke te hit atup tabua tok in he nati' hit tapeni li'ana.” 33Anbi fai nane sin nainut sin amaf tua min kase, oke te anfeto naek antup nabua nok in amaf; mes natuin in amaf anmafu anmate talantia in amaf ka nahin fa neu sa' es anbol nalali.
34Anbi nokfa anfeto naek nak neu in olif nak, “Afi fai au tup ulali oke hit ama! Hit tamafu ateni in anbi fai le i. Oke te hom tup mubua mok in. Ma hit es-es of tapeni li'ana.” 35Anbi fai nane sin namafu Nai Lot, ma in anfeto kliko antup nabua nok in. Ma natuin Nai Lot anmafu nae le'uf anteni talantia in ka nahin fa neu sa' es anbol nalali. 36Nalali onane Nai Lot in anfeto nua sin naapu natuin sin amaf kun. 37Li'anfeto naek nahonis li'anmone mese ma nakanab in Moab. In es anfani na'if neu atoni Moab tabu le i. 38Ma in anfeto kliko nahonis li'anmone mese amsa ma nakanab in Ben-Ami. In es anfani na'if neu atoni Amon tabu le i.
Currently Selected:
KEJADIAN 19: AOZ
Highlight
Share
Copy
Want to have your highlights saved across all your devices? Sign up or sign in
