KEJADIAN 25
25
Nai Abraham in sufan na'ko in fenai es anteni
(I Taw. 1:32-33)
1Nai Abraham in anmafe anteni bife mese in kanan bi Ketura. 2In fenai nane nahonis li'ana-li'ana le sin kanan: Nai Zimran, Nai Yoksan, Nai Medan, Nai Midian, Nai Isybak, ma Nai Suah. 3Nai Yoksan nane anfani amaf neu Syeba ma Dedan, ma Nai Dedan nane in sufan esle' atoni Asyur, atoni Letus, ma atoni Leum. 4Nai Midian in anah sin esle': Nai Efa, Nai Efer, Nai Henokh, Nai Abida, ma Nai Eldaa. Sin alsin nane bi Ketura in sufan.
5Maski nak Nai Abraham nasanut in bnak ma in mu'in nane neu Nai Ishak, 6mes anbi tabu in fe anmoni in anbati neu in anah-anah le in napeni sin na'ko fenai-fenai bian sin pa' mese-mese. Nalali te in anlenu li'ana-li'ana le nane sin natnani neu pah Kanaan in aon neno saen, he nati' sin na'lo Nai Ishak in anah.
Nai Abraham anmate ma ansub in
7-8Nai Abraham in anmate anbi ua mnanu, esle' in nan ton 175. 9In anah sin, esle' Nai Ishak ma Nai Ismael es ansub in anbi Nuat Makhpela anbi mnuke Mamre in aon neno saen. Anbi ahunut Nai Efron Nai Zohar anmone, atoni Het sin ini, 10mes Nai Abraham ansos nan nalali na'ko atoni Het nane. Bi Sara, Nai Abraham in fenai, ansub in anbi nane amsa. 11Leka Nai Abraham anmate, Uisneno anfe tetus neu Nai Ishak, Nai Abraham in anah. Anbi tabu nane Nai Ishak namaika anhaumak oe nopu le antek nak, “In es Anpanat Kau.”
Nai Ismael in sufan
(I Taw. 1:28-31)
12Nai Ismael nane anmone na'ko Nai Abraham ma bi Hagar, bife na'ko Mesir, bi Sara in ate nane. 13-16Nai Ismael in anah sin bo'es am nua le antek sin natuin tabu nahonis sin: Nai Nebayot, Nai Kedar, Nai Adbeel, Nai Mibsam, Nai Misyma, Nai Duma, Nai Masa, Nai Hadad, Nai Tema, Nai Yetur, Nai Nafis, ma Nai Kedma. Li'ana-li'ana le nane anfani amaf neu uf bo'es am nua, ma kuan ma um-ume antek sin natuin sin kanan. 17Nai Ismael in nan ton 137 anbi tabu in anmate. 18In sufan nane namaika anbi pah Hawila ma Syur sin atnanan anbi Mesir in aon neno saen lanan nao neu Asyur. Sin anmoni anpais na'ko Nai Abraham in sufan bian.
Nahonis Nai Esau ma Nai Yakub
19Le i nu'un antom Nai Ishak Nai Abraham in anah. 20Nai Ishak in nan ton bo'ha leka' in anmafe nok bi Ribka, Nai Laban in olif, Nai Betuel atoni Aram na'ko Mesopotamia nane in anah. 21Natuin bi Ribka ka nahoni fa anah, Nai Ishak an onen toti neu Uisneno antom neu in fenai. Uisneno ansimo Nai Ishak in onen totis, talantia bi Ribka naapu. 22In naapus ankuan li'ana, ma nahun na'ko nahonis li'ana-li'ana nane, sin anmaban anbi in apun. Bi Ribka in nak, “Nansa' es lasi le i anbol anbi au aok?” Oke te in antoti lekat lulut na'ko Uisneno.
23 Uisneno nak neune nak,
“Uf nua es ho apum in nanan;
ho of muhonis uf nua le anmamusun es nok es;
in olif of nabe'i nesin in tataf
ma le anae of antuthae le akliko.”
24Bi Ribka in tabu antia he nahoni, ma in nahonis li'anmone nua le ankuan sin. 25Le anaet in aon amtasa, ma in pasun onle sobalu ma'nafu. Es nane te nakanab in Nai Esau. 26Leka nahonis anmone kliko, in niman ana' Nai Esau in haen tikan. Es nane te nakanab in Nai Yakub. Nai Ishak in nan ton bo'ne anbi tabu nahonis sin.
Nai Esau nasosa in kanan anaet
27Li'anmone nua eun nane anfonat ma nanae piut. Nai Esau anfani ali'ut ahinet ma in anlomi he namaika anbi mnela hufui, mes Nai Yakub nane in atainine ma in lomi he namaika anbi ume. 28Nai Ishak in nekan nesin Nai Esau, natuin Nai Ishak anlomi hen bukae sisi mu'i fui. Mes bi Ribka in nekan nesin neu Nai Yakub.
29Anbi neno mese leka Nai Yakub fe nahan utan fua mtasa, Nai Esau in fani nem na'ko mnela. In namnah. 30Ma in nak neu Nai Yakub nak, “Au umnah is. Amfe man kau fa ho fua mtasa kle'o.” (Es nane te antek in nak Edom.)
31Nai Yakub natae nak, “Leko, mes hom fe muhunun neu kau ho kanam on anmone nael.”
32Nai Esau natae nak, “Kanaf nael nane in otan sa' neu kau. Au umnah nae le'uf kun!” 33Nai Yakub in namolok anteni nak, “Hom sup muhun fe mak hom fe ho kanan anmone nael nane neu kau.”
Nai Esau in ansup ma in anfe in kanan anmone nael neu Nai Yakub.
34Nalai onane te Nai Yakub anfe neune utunu' ma utan fua mtasa nane bian. Nai Esau in nah ma ninu oke te in nao kun. Onle nane Nai Esau in nanebet in kanan anmone nael.
Currently Selected:
KEJADIAN 25: AOZ
Highlight
Share
Copy
Want to have your highlights saved across all your devices? Sign up or sign in
