KEJADIAN 26
26
Nai Ishak namaika anbi Gerar
1Amhanas anaek anbol anteni anbi pah nane onle afi anbol anbi batan Nai Abraham. Nai Ishak in nao ma naeku nok Nai Abimelekh, kesel atoni Filistin, anbi Gerar ma antoti hen kolan sin he sin namaika anbi nane. 2Lasi nane in anmo'e natuin Uisneno naton nalali neune nak, “Kais amnao amfani neu Mesir; mumaika ambi pah le i, onle Au uplenat ulali neu ko. 3Au of uneo ma uhafo ko ma fe neu ko tetus. Pah le i anfun natef of Au fe ani neu ko ma neu ho sufam. Au of utis ani Au fef ba'an le Au mo'e ulali neu Nai Abraham ho amaf nane. 4Of Au fe neu ko ho sufam le namfau onle afkun anbi neno tnanan, ma of Au fe ani neu sin pah le i anfun natef. Ale uf anbi pah pinan of antoti neu Kau he nati' Au fe neu sin tetus, onle Au fe ani tetus neu ho sufam. 5Of Au fe tetus neu ki, natuin Nai Abraham in na'ki neu Kau ma anpanat ale Au lekat lulut ma Au plenat sin.”
6Es nane te Nai Ishak in namaika anbi Gerar. 7Leka atoni-atoni anbi nane sin natan neu bi Ribka, Nai Ishak in natae nak in le nane au fetof, ma ka au fenai fa. Nai Ishak in namtausan atoni-atoni nane of namate in he nati' sin naiti bi Ribka le mas le'uf nane. 8Leka Nai Ishak in namaika anbi nane aklobes, anbi neno mese Kesel Nai Abimelekh ankiso na'ko eno, ma in nit Nai Ishak maliabon nok bi Ribka. 9Ma in anboin Nai Ishak ma in nak, “Ai bife nane ka ho fenai fa ka? Nansa' es ho muton mak in le nane ho olif?”
Nai Ishak natae nak, “Anbi au tenab, of hi mimate kau leka au uton ak in le nane au fenai.”
10“Ho mo'e mulali sa' neu kai ka?” Nai Abimelekh namolok onane. “Atoni mese na'ko au to nabe'i antup nok ho fenai, ma leka lasi nane anbol, ho es of amsutai neu hai sanat nane.” 11Namuni onane te Nai Abimelekh namnaub in to sin nak, “Sekau es anmo'e bulalu neu atoni le i ai in fenai, of au umate in.”
12Nai Ishak ankifu fini ma anmo'e lene anbi pah nane, ma anbi ton nane in anseu in fuan kuni natun mese na'ko fini le in ankifu, natuin Uisneno anfe neune tetus. 13In bnak ma in mu'in nane ansato piut ma in anfani atoni amu'it. 14Atoni Filistin sin nek nanan in natuin in anmu'i ate namfau, pukan bibi kase ma bijae. 15Oke te sin ankub ale oe nopu le Nai Abraham in ate sin anhani anbi tabu in fe anmoni neki afu.
16Namuni te Nai Abimelekh nak neu Nai Ishak nak, “Ampoi musaitan hai pah. Hom kuas amnesin kai.” 17Es nane te Nai Ishak in nao ma nahakeb in um-ume anbi Nonof Gerar. Anbi nane in namaika anbi tabu fauk-fauk in nanan. 18In anhani nafani oe nopu-nopu le mahani anbi batan Nai Abraham ma le atoni Filistin sin ankub nani neki afu tabu Nai Abraham anmate nalali. Oe nopu-oe nopu nane in nakanab sin namnes nok onle afi in amaf nakanab nani sin.
19Nai Ishak in ate-ate sin anhani oe nopu anbi Nonof Gerar nane ma sin anhani napoitan oe nok athoes. 20Mes ale atukus mu'it anbi Gerar sin anmatoe nok Nai Ishak in atukus sin. Sin namolok nak, “Oe le i hai ini.” Es nane te Nai Ishak nakanab oe nopu nane nak, “Matoes.”
21Nai Ishak in ate sin anhani anteni oe nopu bian anteni, ma matoe anbol anteni natuin oe nopu nane amsa. Es nane te Nai Ishak nakanab anteni oe nopu nane nak, “Lasi mamusun.” 22Nalali onane te Nai Ishak in natnani anteni na'ko bale nane ma anhani anteni oe nopu no tenu. Haefes le i kan mu'i fa matoe anteni. Es nane te Nai Ishak nakanab oe nopu nane nak, “Lasi fetin.” In nak, “Tabu le i Uisneno nafetin nalali kit he tamaika anbi bale le i, ma hit atmoni nok athoes.”
23Nalali te Nai Ishak anfen ma nao ma antia Bersyeba. 24Anbi fai nane Uisneno natonon neu in ma nakua a'an nak, “Au le i ho Ama Nai Abraham in Uisneno. Kais mumtau; Au uneo ma uhafo ko. Of Au fe tetus neu ko ma of Au umfaub ho sufam natuin Au manta'en ulali oke Au ate Nai Abraham.” 25Oke te Nai Ishak nahakeb baki tulu ma nabes neu Uisneno anbi bale nane. In nahakeb in um-ume anbi nane ma in ate sin anhani oe nopu bian anteni.
Nai Ishak anmo'e lasi manta'en nok Nai Abimelekh
26Anbi neno mese Nai Abimelekh nem na'ko Gerar, nok Nai Ahuzat, in afainekat, ma Nai Pikhol, in meo nakaf, he naeku nok Nai Ishak. 27Nai Ishak natoti sin nak, “Nansa' es hi aim ma mieku mok kau anbi tabu le i, natuin anbi ahunut hi ala ki mimusu mok kau ma amli'u kau na'ko hi pah?”
28Ma sin natae nak, “Tabu le i hai mihin nak Uisneno naneo ma nahafo ko es nane te anbi hai tenab alekot kun leka hit atmo'e lasi manta'en. Amsup nai 29nak of ho ka mo'e fa amle'ut neu kai, onle hai amsa of ka mo'e fa amle'ut neu ko. Hai miton milali hai mo'et alekot neu ko ma hai mifetin ko he nati' hom fani nok halan. Hai mit ma mihin milali nak Uisneno anfe tetus neu ko.” 30Nalali te Nai Ishak antuthae sin, ma sin nah ma ninu. 31Anbi nokfa nok-noka sin anmanta'en es nok esle' namapen nani neki supat. Oke te Nai Ishak naseon sin ma sin anbaitsok on soba alekot.
32Anbi neno nane amsa Nai Ishak in ate-ate sin nem ma naton neune neu oe nopu le sin anhani nalali. Sin nak, “Hai mipeni milali oe.” 33Oke te Nai Ishak nakanab oe nopu nane nak, “Supat.” Nane anfani a'at nak anbi ahunut kot nane nakanab nak Bersyeba.
Nai Esau in fenai sin na'ko uf anao amnemat
34Leka Nai Esau in nan ton bo'ha, in anmafe nok fenai nua na'ko uf atoni Het, esle' bi Yudit Nai Beeri in anah, ma bi Basmat Nai Elon in anah. 35Bife nua eun nane sin nasusab Nai Ishak ma Ribka sin monin.
Currently Selected:
KEJADIAN 26: AOZ
Highlight
Share
Copy
Want to have your highlights saved across all your devices? Sign up or sign in
