KEJADIAN 33
33
Nai Yakub naeku nok Nai Esau
1Nai Yakub in ankiso te Nai Esau in nem nok in atoni sin natun ha. Es nane te in anbati in anah-anah sin neu bi Lea, bi Rahel ma in ate bife nua sin. 2In antao in ate bife nua sin nok sin anah anbi mat, nalali te bi Lea nok in anah sin, oke te bi Rahel ma Nai Yusuf anbi kotin. 3Nai Yakub in nao nahunun sin anbi sin matan, ma leka' in anhaumak in tataf in na'bes antia haef hitu. 4Mes Nai Esau in naen anhaumak Nai Yakub, oke te anho nan in ma in nek in. Ma atoni nua in nane sin ankaen. 5Leka Nai Esau na'aiti in matan ma ankiso ale bife ma li'ana-li'ana nane, in natoti nak, “Sekau sin es anao nok ko le i?” “Sin le nane au anah sin.” Nai Yakub in natae,
“Uisneno es anfe nalali li'ana-li'ana nane neu kau.” 6Nalali te ale in ate sin nao mat nok sin anah, oke te sin nabes. 7Okete te bi Lea in nem nok in anah sin, ma amsoput Nai Yusuf ma bi Rahel sin anhaumak ma sin alsin nabes.
8Nai Esau natoti nak, “Ho salit onme ka nok ale pukan le au u'eku sin anbi lelon?” Nai Yakub natae nak,
“He nati' au halin Tata ho nekam.”
9Mes Nai Esau nak, “Au maus nane namfau, kaisa amfe amteni tnatas neu kau.”
10Nai Yakub natae nak, “Kaisa! Kalu au halin ulali Tata ho nekam, amsimo au tulu sin le i. Neu kau, au kiso Tata ho human namnes onle au kiso Uisneno In human, natuin Tata ho nek mahoe nane neu kau. 11Au toti neu ko, amsimo man au tulu le' au eki ulali neu ko. Uisneno In nek kau ma anfe ale sa' le au toti.” Nai Yakub antoti pitu talantia anbi amsoput Nai Esau ansimo nani in atnatas nane.
12Oke te Nai Esau nak, “Aum he hit taloitan het nao nai, of au nao tomat uhunun ko.”
13Nai Yakub natae nak, “Tata ho muhin nak li'ana-li'ana le i sin an olen, ma au mes he panat ale mu'it le nasusu sin ana'. Kalu taseke sin maski neno mese amsa pukan mu'it nane of anmaten. 14Hom nao muhun, ma au nao kle'o-kle'o utuin ko. Of nok manapat au ma mu'it-mu'it sin le i ma au anah-anah sin, hai of mituin ko Tata anbi Edom.”
15Nai Esau nak, “Kalu onane, of au ani ko atoni fauk-fauk neu ko.” Mes Nai Yakub nak, “Kaisa ho mususbom, au sali he halinab Tata ho nekam.” 16Anbi neno nane amsa Nai Esau in nao anfani neu Edom. 17Mes Nai Yakub in nao Sukot ma nahakeb ume he namaika anbine ma bale hafot neu in mu'it sin. Es nane te bale nane nakanab nak Sukot.
18Anbi lanan na'ko Mesopotamia, Nai Yakub antia nok alekot anbi kot Sikhem pah Kanaan, ma nahakeb in um-ume anbi mnela mese anhamak nok kot. 19Mnela le' in um-ume balan nane in ansos na'ko atoni mese Nai Hemor sufan, Nai Sikhem in amaf, le in upan noni muti natun mese. 20Nalali te in nahakeb baki tulu anbi nane ma in nakanab nak, “El, Uisneno Israel!”
Currently Selected:
KEJADIAN 33: AOZ
Highlight
Share
Copy
Want to have your highlights saved across all your devices? Sign up or sign in
