KEJADIAN 34
34
Naseke ma nale'un bi Dina
1Anbi neno mese, bi Dina Nai Yakub ma bi Lea sin anfeto, in nao ma ansenu li'anfeto kanaan sin fauk-fauk. 2Leka Nai Sikhem, Nai Hemor atoni Hewi in anah le anfani kesel anbi pah nane in ankiso nit bi Dina, in naaenab neki li'feto nane ma naseke in ma antup nabua nok in. 3Mes in antao nekan nae le'uf neu bi Dina, talantia in nekan anmof neu in ma in nami lanan amsa he nati' li'anfeto nane an nek. 4Nai Sikhem nak neu in amaf nak, “Au toti neu ko Ama he ho mami lanan he mupeni li'anfeto nane neu kau. Au lomi he mafe okan.”
5Nai Yakub in nen nak nale'un nalali in anah, mes natuin in anah-anah in fe natuku sin mu'it-mu'it sin anbi mnela, es nane te in kan mo'e fa sa'-sa' nahun na'ko sin fe ka neman fa.
6Nai Hemor, Nai Sikhem amaf, nem neu Nai Yakub he namolok nok in. 7Mes anbi tabu nane Nai Yakub in anah-anah sin anfani nem na'ko mnela. Leka sin nen lasi nane, sin naskeken ma sin nato' nae le'uf. Natuin nale'un Nai Yakub in anah nane, Nai Sikhem in nale'uf ale' atoni Israel ok-oke. 8Nai Hemor nak neu Nai Yakub nak, “Au anah Nai Sikhem in nekan anmofu nalali neu ho anah; au toti ko he nati' ho mufetin au anah nane hen mafe nok ho anah. 9Aum he hit atmo'e lasi tfeka nak ho uf ma hai uf nabe'i mafe ma mone anselok. 10Nok nane nabe'i hi mitua mok kai anbi hai pah le i; anbi bale me le hom lomi. Of kan mu'i fa ekat ma nabe'i hi misosa ma mipeni amaus.”
11Nalali te Nai Sikhem nak neu bi Dina in amaf ma in tataf sin nak, “Amsimo au totis le i, ma of au fe neu ki sa' le him lomi. 12Miton neu kau sa' le him lomi, ma amlek mani in oko mama ai in belis. Of au fe neu ki sa' le him toti, so hi mifetin kau he au aiti li'feto nane.”
13Natuin Nai Sikhem nale'un nalali sin olif bi Dina, Nai Yakub in anah sin na mo'e Nai Sikhem ma in amaf Nai Hemor. 14Sin nak neu atoni nua in nane nak, “Hai mae neu he mifetin hai olif hen mamone nok atoni le ka maheli fa. 15Hai al nabe'i amsimo hi han totis nane nok lasi mese, esle': so him fani on hai amsa, esle' ale atoni anbi ki so maheli. 16Nalali onane te of haim simo hi salit neu het maselok anbi mafet ma monet. Hai of mimaika anbi hi sonam hi tnanam ma amfani uf mese mok ki. 17Mes leka hi kam lomi fa hem simo hai totis le i, ma kam lomi fa hen heli ki, hai of maiti mifani li'feto nane ma haim nao amteni.”
18Nai Hemor ma Nai Sikhem sin natenab nak han totis-han totis nane namneo, 19ma Nai Sikhem in lomi he nanokab lasi nane natuin in nek bi Dina. Anbi sin ume nanan nane Nai Sikhem es anfani atoni mateka. 20Nalali te Nai Hemor ma Nai Sikhem sin nao neu bale buat anbi eno naek ma sin namolok nok to anbi sin kot nak on i, 21“Atoni-atoni Israel nane hit soba sin. Es nane te mifetin sin he namaika anbi pah le i nok kit ma mifetin sin he nao neu me le sin anlomi. Pah le i menuan neu sin amsa. Hit nabe'i atmafe nok li'feto sin, ma sin amsa nabe'i anmafe nok hit li'feto sin. 22Mes atoni-atoni nane al anlomi he namaika nok kit ma anfani uf mese nok kit nok totis mese esle': ale atoni anbi hit atnanak so maheli onle sin. 23Mes ale sin pukan mu'it sin ma sin amaus nane anfani hit ini. Es nane te so hit atsimo sin totis nane he nati' sin namaika nok kit.” 24Ale to anbi kot nane in nanan ansimo salit na'ko Nai Hemor ma Nai Sikhem, esle' nane te atoni naek anbi kot nane maheli.
25Neno namoni te, leka atoni-atoni nane anmofu anbi menas natuin lasi helit, Nai Yakub in anah sin esle' bi Dina in tataf sin le sin kanan nane es Nai Simeon ma Nai Lewi, sin naiti sin suni, ma nok amnes-amnes sin antam neu kot in nanan. Nalali te sin namate atoni-atoni 26anbi nane, nok Nai Hemor ma Nai Sikhem amsa. Oke te sin napoitan bi Dina na'ko Nai Sikhem in ume ma sin nao kun. 27Leka malolot nane ankon Nai Yakub in anah bian sin anpukai kot le nane anfani on seunbanit natuin atoni sin nale'un nalali sin olif. 28Sin anhake pukan bibi kase ma bibi, bijae, bikase luke mnanu, ma ale sa' le anbi kot nane in nanan ma le anbi mnela. 29Sin naiti ale blua maupa, ma anheke ale bife ma li'ana, ma nasik nan ale sa' le anbi ume nanan anbi kot le nane.
30Nai Yakub nak neu Nai Simeon ma Nai Lewi nak, “Hi misusab kau. Tabu le i atoni Kanaan ma atoni Feris ma ale atokos anbi pah le i of sin nek nanan kau. Hit atoni sin ka namfau fa, leka atokos le i sin nek nanan ma anlaban kau, of sin nale'un nani hit ume nanan ok oke.”
31Mes sin natae nak, “Hai ka nabe'i fa he mifetin hai olif he namaeb in on bife amapaisa.”
Currently Selected:
KEJADIAN 34: AOZ
Highlight
Share
Copy
Want to have your highlights saved across all your devices? Sign up or sign in
