YouVersion Logo
Search Icon

LUKAS 2

2
Yesus ajisamse atakam
(Mat. 1:18-25)
1Emesare. Era bare ere, Kaisar Agustus, era tapirmi owe takes, juas sensus baeapom, atakam asakamtamen. 2Me Kirenius Siria tapirmi gubernur ipit aememen. Ere bonaknak sensus eraren. 3Owe takesam, aoememayes kota juas buku baeapom aesosteteresen.
4Yusufam, Daut wurpisin. Emesare are Galilea tapirmi kota juas Nasaret aewasite, wanam Yudea tapirmi kota juas Betlehem aesosen. 5Bonaknak ere, Dautam era kota Betlehem ajisamsen. Yusufam, era bataet aeme taot juas Mariaam, juas, era sensus buku baeapom aren. Era taot ere, jak aptamen. 6Erapu aemapes, armat taot jii bapeap bare aemansen. 7Are taowe jii jipitkor ajisipetiien. Are era jii, kain biramo ajikitiien. Are era jii binatang abanda pak peti bomon ataetiien. Era jaki owe tame baemap asan apoknak aporen.
Domba banamek batai owe atakam
8Era tapirmiam domba banamek batai owe, era takapin asan aemapesen. Era eam arawa, adomba takes banamek ataiompesen. 9Tuhan malaikat era owe bipu ametejisomen. Tuhan saream era owe afojiapes asaramdaemtiien. Era oweam ombare daytinak ambaresen. 10Era malaikat arawa, atakam era owe akoromen. “Ombare bas! Dere akot atakam tara baesimtamammin. Era atakam, ere jak akot pak. Owe takes era atakam jane ajitas, anom jak akot aememtemas. 11Waa ere, taBajortaer Ipit, Daut akota etejisamsar. Armat Ipit Allah Aeremtaere Ipit are. Are Tuhan! 12Tare era jii taka andimartaertemakam. Era jii, kain biramo bomon asinta. Era jii binatang abanda pak peti bomon asinta. Emes aportakam, tare era akoremin atakam, atakamnak aportemakam.” Era malaikat emes atakam aesimen. 13Surga oup wan malaikat owe tananenak, era malaikat takan ametejisesen. Are Allah tere aeomesen: 14“Owe Surga oupnak Allah tere baeomkoromtas. Me Allah akot apormar owe, ji baemtas.”
Emes atakam aesimesen.
15Emesare. Era malaikat owe, era owe beken ajioses, wanam Surga oup aotemetesen. Era domba banamek batai owerawa, atakam armamon ajamkoramesen. “Te! Dare Betlehem aesosamo. Era aemar pak, baporamo— ere Tuhan dara aesimtamaro atakam are.” Emes atakam aesimesen. 16Ararawa, ameteesoses, wanam are Mariaam, Yusufam, era binatang abanda pak peti bomon aemanse jiiam, andimartaeresen. 17Era owe era jii aporesen. Apores arawa, are era jii jane ajies atakam, era owe aesimtamesen. 18Era atakam jane ajies owe takes arawa, era domba banamek batai owe atakam, jinim daytu aeesen. 19Me Maria ere, era pak takes bimak binip ajanimompaaririn. Are era atakam, bimak binip daytu atetaramaaririn. 20Era domba banamek batai oweam, aasan aoesosesen. Era jane ajies atakamam, era apores pakam ere, akotnaken. Erarawa are Allah tere daytinak aeomesen. Era pak takes era malaikat owe tanane atakam jipu taka aren.
21Era jii, bare poman ban bamintep aemanse, owe, Armat Ipit tamane pitini basakamosom Yahudi owe pak tai aemesen. Era bare are juas Yesus aemtiiesen. Malaikat era juas bonak aesimtame atakam jipu taka aren— Maria jak basiap apok aemape aren.
Yusuf anama Maria Yesus Allah tame atoomjiiemis atakam
22Emesare. Me Yusuf anama Maria era tarai pak tai jipu boem bare aemansen. Era tarai pak tai jipu boem pak ere, Musa aeapome Basakamtam Atakam jipun. Me Yusuf anama Maria, ere jii, Tuhan batetam aemememisen. Erarawa are Yesus Yerusalem aesomasemisen. 23Ere Musa Basakamtam Atakam buku jipu. “Era biiti oorey jii takes, Tuhan ajii.” Ere Tuhan Basakamtam Atakam emes are. 24Me Yusuf anama Maria, pak, Tuhan bataetiitam aemememisen. Anom Musa Basakamtam Atakam jipu. “Sakao saii jamnuk apaye, sakao pari jii jamnuk apaye, emes pak ataetiitamey.” Me Musa Basakamtam Atakam emes are.
25Emesare. Owe juas Simeon kota Yerusalem aemapen. Armat ipit, turunak ipitin. Are agama bajamkai fiak ipitin. Are Israel bojorusum apok aemto bare, banamek ataiapaaririn. Me Allah Jipam, era ipit takan aemaaririn. 26Bonak ere, Allah Jip, atakam armat ipit akoremen. “Wore Tuhan Aeremtaere Ipit bonak aportemarem. Worarawa, dambir asep aemtemarem.” Emes atakam aesimen. 27Me Allah Jipam, armat ipit, Allah Tame bajii, bimak binip atetamen. Emesare are, era Tame ajiien. Yesus arsoot anama aritipit arawa, era jii atoomjiiemisen. Are Musa Basakamtam Atakam jipu baem aren. 28Me Simeon arawa, ara jii, ban to atuutaere, wanam Allah tere aeomen:
29“Tuhan! Wobambi karai baetam ipit, ere ji baem jak dambir baemto. Era bonak ataaji aeetamenim atakam jipu taka.
30Era ataemomem Bajortaer Ipit, ere, apormin.
31Wore era Bajortaer Ipit, era samaniin samaniin
takes bipu aeremtaerem.
32Armat Ipit Yahudi apok owe asare. Are bokotpu
era owe aporomtamtem.
Armat Ipit etedae. Emesare, owe Israel woowe tere aeomtemas.”
Simeon emes atakam aesimen. 33Era jii aritipit anama arsoot Simeon akore atakam takes, jinim aeemisen. 34Simeon arawa, Allah, era owe asan akot batetam, atakam ajanimen. Are atakam, era jii arsoot Maria, akoromen. “Baporey! Allah, ara aemansa jii, wan Israel owe tanane bajurusum aeremtaere. Are ara jii, wan Israel owe tanane jak akot bawasumtum, aeremtaere. Ara jii, Allah aakot pak baporomtam Ipit aememtem. Owe tananeam Armat Ipit atakam pota akoromtemas. 35Emesare, era owe abimak binip takes aportemas. Wonom jak potanak aememtemarem. Ere warim wojak bamitapom emes tamen are.” Simeon emes atakam aesimen.
36Emesare. Allah atakam bakoretam taot juas Hana era asan aememen. Are Asyer samane ipit juas Fanuel arerep aren. Are paituunaken. Bonak ere, are ai taot aemape, are oorey ajuuten. Are armo ipitatin tahun poman ban jamnuk aemapaarimisin. 37Ararawa, umur tahun 84 tano taot aemapaaririn. Are Allah Tame bojis apoken. Are jokam, eamam, Allah tere aeomaaririn. Are atakam Allah ajanimaaririn. Bare tanane ere, are banda pak ambaseaaririn. 38Era owe era asan aememes ere, armat taot era owepu aemtine, wanam “terima kasih” atakam Allah akoromen. Are, era Jii, atakam jirao, owe aokoromen. Me era atakam jane ajies owe, Allah, Yerusalem owe ajortaerto bare banamek bataiap owe eraren.
39Emesare. Yesus aritipit anama arsoot, Musa Basakamtam Atakam ji aekoromemis, are Galilea tapirmi akota juas Nasaret aoesosemisen. 40Era Jiiam sira awotemen. Are jak fiak aememen. Are bimak binip baso atetaramen. Allaham, Armat Ipit afaimomen.
Yesus umur tahun 12 aememe, Allah tame aesose atakam
41Emesare. Yesus aritipit anama arsoot, tahuniin, Paskah Pakambwi bameem, Yerusalem aesosa ajaiemisen. 42Yesusam umur tahun 12 aememe, armat owe era asan aesosesen. Era pakambwi ajamema ajaies. 43Era pakambwi aties arawa, aritipit anama arsoot atame bafasie, waut aemememisen. Me, Yesus ere, Yerusalem aemen. Aritipit anama arsoot bapor apoken. 44Are Yesus era ajamjares owe takan emes jiraomemisen. Emesare, are bare taka ajaremis, wanam are ajii ajoo owepuam, era amsam owepuam, andimaremisen. 45Me, era Jii bandimartaer apoken. Emesare are bandimarpor, Yerusalem aofasiosemisen. 46Bare bamintep arawa, are Armat Ipit Allah Tame bomon andimartaeremisen. Armat Ipit Allah atakam baememtam owe bomon aemapen. Are era owe aatakam jane bajie, wanam Ara bajatepor, emes aemapen. 47Me Yesus aatakam jane ajies owe takes, Armat Ipit bimak binip feronak aporesen. Atep ajite pakam amsamnak aporesen. Erarawa are jinim daytu aeesen. 48Aritipit anama arsoot Armat Ipit bi aporemis, wanam jinim daytinak aeemisen. Arsoot arawa, atakam akoromen. “DeTii! Wore ara aemaroam pak wama tamenem? Dotatin, dare jak sake, Wora andimarporomum.” Emes atakam aesimen. 49Armat Ipit arawa, atakam akoromen. “Tare wama tamen dimarmankum? Dere Deritipit tame bomon baemap amaye. Tare emes tamsam apokane?” Emes atakam aesimen. 50Aritipit anama arsoot ere, era akore atakam amsam apoken.
51Emesare. Armat Ipit aritipit anama arsoot Nasaret takan aoesosesen. Are aritipit anama arsoot atakam ji aeen. Arsootam era atakam kupis takes bimak binip ajanimompaaririn. 52Yesusam bimak binip baso betemoma betemoma ajiaaririn. Are Allah jakam, asamot jakam, akot betemoma betemoma ajiaaririn. Are owe daytinak aememen.

Currently Selected:

LUKAS 2: LAIASC

Highlight

Share

Copy

None

Want to have your highlights saved across all your devices? Sign up or sign in