LUKAS 3
3
Yohanes Owe Bwi Bakupimtaer Ipit atakam akoretame atakam
(Mat. 3:1-12; Mrk. 1:1-8; Yoh. 1:19-28)
1Emesare. Kaisar Tiberius raja daytu tahun 15 aememaaririn. Pontius Pilatusam, Yudea tapirmi gubernur ipitin. Herodesam, Galilea tapirmi raja kopeen. Areot Filipus arawa, Ituria tapirmi anama Trakonitis tapirmi, raja kopeen. Lisaniasam, Abilene tapirmi raja kopeen. 2Hanas anama Kayafas, Allah Tame pak baem daytinak ipit amnuken. Era owe emes aememes ere, Sakaria andep juas Yohanes, tame apok asan aememen. Allaham, Yohanes, aatakam bakoretam, atakam asakamtamen. 3Me Yohanes arawa, Yordan ju tapirmi takes ajaremen. Are atakam akoretamen. “Tanom tadosa takes bamakemteteray. Allah atakam ji aeay. Owerawa, bwi tara bakupimtaertetertan. Erarawa Allah tadosa bimak binip ajanimemtamteman.” Emes atakam aesimen. 4Era pak, Allah atakam bakoretam ipit juas Yesaya aeapome atakam jipu. Emesare, armat ipit emes atakam aeapome:
“Jipit taka, tame apok asan atakam afaketaatem. ‘Me Tuhan ajarto bokotpu akenemtiiay. Era bokotam imtuuar.
5Era fami atakuapaespu takes akakapiaptetertem. Era daytu fami takesam, era koser fami takesam, apandaetetertem.
Era jaos asan takes, turu aemamestem. Era bai asan tetakue takes, awar aemamestem.
6Asamot owe takesam Allah era owe ajortaerto pak aportemas.’ Era ipit emes atakam aesimtem.”
Yesaya emes atakam akoren.
7Owe tananenak Yohanes bwi aobakupimtaer ajukusirendaesen. Armat ipit arawa, atakam era owe akoromen. “Amber jii kosere! Tare Allah ajurusumto pak ombare baesos atakam tao koretaman? 8Baporay! Tare tadosa takes ambakemmakam apaye, ere Allah atakam ji aemakam, owe aporomtamay. Tanom, ‘Abraham darerokor,’ emes bimak binip batetaram bas. Baporay! Allah, ara aemansa eka, Abraham arurupis bajaorejim, emes fiak pak aoemommar. 9Emesare, waa, sai, wus tamao setepkope aemapem. Jipit taka era akot eek bape apok wus ambatiitem. Are era wus jisimak bomon akoromtukumtem.” Yohanes emes atakam aesimen.
10Era owe tananerawa, Yohanes ajateporesen. “Dare ere, wama akot pak emtam?” Emes atakam aesimesen. 11Armat ipit arawa, atep ajiten. “Era baju jamnuk owe, baju apok owe sai basaietamtas. Wanam era amos aptam owe, emes tamen baemtas.” Emes atakam aesimen. 12Pemerintah uang bataajanimtam karai oweam, Yohanes bwi aobakupimtaer ajinaomesen. Are atakam, armat ipit akoromesen. “Guru! Dare wama akot pak emtam?” Emes atakam aesimesen. 13Armat ipit arawa, “Tare pemerintah atakam tara asakamtaman uang taka ataajanimtamay. Bakakaim bas.” Emes atakam aesimen. 14Tentara oweam ajateporesen. “Dare ere, wama akot pak emtam?” Emes atakam aesimesen. Armat ipit arawa, “Owe pak, ban batatapimtaa bas. Owe pak bataer, pote atakam bakore bas. Me tagaji pak takes jak akot aemomatay.” Emes atakam aesimen.
15Emesare. Owe tanane Yohanes jiirey aeesen. “Me Yohanes, Allah Aeremtaere Ipit ar apaye.” Emes bimak binip atetaramesen. 16Yohanes arawa, atakam era owe takes aokoromen. “Dere bwi tara akupimtaermin. Me defe asaramtan Ipit ere, owe juas aptam Ipit. Dere juas apok. Erarawa dere Armat ipit sendal baemesurumtam asan apok. Me, Armat Ipit ere, Allah Jip anama jisimak tara akupimteman. 17Armat Ipit ofe pu aemapomum. Are amos apimi bafamdaemam, era amos tame batoomdaeam, aememem. Ararawa, era apimi, jisimak ambomtiitem. Era jisimak ere, baemesapiames asan apok.” Emes atakam aesimen.
18Emesare, armat ipit wan ataane tanane era owe aoweomen. Are Allah Akot Atakam era owe akoretamen. 19Yohanes, raja kope juas Herodes, era Herodes arepot aremo aeme pak aporen. Are Herodes aemaarir pota pak tananeam aporen. Erarawa are Herodes ajatemotaeren. 20Herodes arawa, wan pota pakam aokaimen. Era pota pak ere, are Yohanes buji tame bomon ajiitaapomen.
Yohanes, Yesus, bwi akupimtaere atakam
(Mat. 3:13-17; Mrk. 1:9-11)
21Bonak ere, Yohanes, era asan aememes owe takes, bwi akupimtaera ajaien. Era owe takes bwi akupimtaererawa, are Yesusam bwi akupimtaeren. Yesus, atakam Allah ajanime ere, era wonamo oup ambuetepen. 22Allah Jip arawa, sakao saii tamen, Yesus damo ten andaepiapen. Allaham atakam akorendaemen. “Wore deTii. Dere Wora afaimommin. Era aemmarem pak, ere akotnak.” Emes atakam aesimen.
Yesus arfais owe bajititimar atakam
(Mat. 1:1-17)
23Emesare. Yesus era bonaknak karai aeme, Armat Ipit aumur tahun 30 ajiire apaye aememen. Owe, Yesus, Yusuf andep emes aren. Me Yusuf arawa, Eli andepen. 24Me Eli, Matat andepen. Me Matat, Lewi andepen. Me Lewi, Malki andepen. Me Malki, Yanai andepen. Me Yanai, Yusuf andepen. 25Me Yusuf, Matica andepen. Me Matica, Amos andepen. Me Amos, Nahum andepen. Me Nahum, Hesli andepen. Me Hesli, Nagai andepen. 26Me Nagai, Maat andepen. Me Maat, Matica andepen. Me Matica, Simei andepen. Me Simei, Yosek andepen. Me Yosek, Yoda andepen. 27Me Yoda, Yohanan andepen. Me Yohanan, Resa andepen. Me Resa, Serubabel andepen. Me Serubabel, Sealtiel andepen. Me Sealtiel, Neri andepen. 28Me Neri, Malki andepen. Me Malki, Adi andepen. Me Adi, Kosam andepen. Me Kosam, Elmadam andepen. Me Elmadam, Er andepen. 29Me Er, Yesua andepen. Me Yesua, Elieser andepen. Me Elieser, Yorim andepen. Me Yorim, Matat andepen. Me Matat, Lewi andepen. 30Me Lewi, Simeon andepen. Me Simeon, Yehuda andepen. Me Yehuda, Yusuf andepen. Me Yusuf, Yonam andepen. Me Yonam, Elyakim andepen. 31Me Elyakim, Melea andepen. Me Melea, mina andepen. Me Mina, Matata andepen. Me Matata, Natan andepen. Me Natan, Daut andepen. 32Me Daut, Isai andepen. Me Isai, Obed andepen. Me Obed, Boas andepen. Me Boas, Salmon andepen. Me Salmon, Nahason andepen. 33Me Nahason, Aminadab andepen. Me aminadab, Admin andepen. Me Admin, Arni andepen. Me Arni, Hesron andepen. Me Hesron, Peres andepen. Me Peres, Yehuda andepen. 34Me Yehuda, Yakub andepen. Me Yakub, Ishak andepen. Me Ishak, Abraham andepen. Me Abraham, Terah andepen. Me Terah, Nahor andepen. 35Me Nahor, Serug andepen. Me Serug, Rehu andepen. Me Rehu, Peleg andepen. Me Peleg, Eber andepen. Me Eber, Salmon andepen. 36Me Salmon, Kenan andepen. Me Kenan, Arpaksad andepen. Me Arpaksad, Sem andepen. Me Sem, Nuh andepen. Me Nuh, Lamek andepen. 37Me Lamek, Metusalah andepen. Me Metusalah, Henok andepen. Me Henok, Yared andepen. Me Yared, Mahalaleel andepen. Me Mahalaleel, Kenan andepen. 38Me Kenan, Enos andepen. Me Enos, Set andepen. Me Set, Adam andepen. Me Adam, Allah andepen. Emesare.
Currently Selected:
LUKAS 3: LAIASC
Highlight
Share
Copy

Want to have your highlights saved across all your devices? Sign up or sign in
@LAI 1994