MATIUS 13
13
Eek bapatakum ipit baetaa atakam
(Mrk. 4:1-9; Luk. 8:4-8)
1Emesare. Era bare takaam Yesus era tame ajisen. Ararawa jupima andaeape. 2Owe tananenakam Yesuspu ajarisiapes. Erarawa Armat Ipit, ti bomon ajuape. Era owe tananerawa, fikin aememes. 3Armat Ipitam atakam kupis era owe aememtame. Era atakam aememtame ere, Are baetaa atakam akoretame.
“Kebun karai bae ipit, eek bapatakum ajisen. 4Era eek apatakume ere, wan ere bai asanpu andaeamesteteresen. Sakaorawa, era eek andakoromesen. 5Wan eek ere, eka tapirmipu andaeamesteteresen. Era asan ere, wapo daytu apoken. Emesare, era wapo koo apoken. Erarawa era eek ametejitteteresen. 6Me, era pak akene bimi daytu apoken. Erarawa jee oup atemetape ere, era pak akene sisin aemapteteresen. Are sa asapesen. 7Wan eekam fa aptam akene bomon andaeamesteteresen. Era fa aptam akene ere, daytu ajittemes, wanam era eek akene apurimompesen. Are era eek akene asanamimompesen. 8Wan eek arawa, tapirmi akotpu andaeamesteteresen. Are ajitteteresen. Me wan akene poreemapa ajie ere, eek 100 apeomtepteteresen. Wan akene poreemapa ajie ere, eek 60 apeomtepteteresen. Wan akene poreemapa ajie ere, eek 30 apeomtepteteresen. 9Jane fero owe ara atakam jane bajitas.” Yesus emes atakam aesime.
Yesus baetaa atakam akore atakam
(Mrk. 4:10-12; Luk. 8:9-10)
10Me Yesus bajamkai owerawa, Armat Ipit ambaromes. Are Armat Ipit ajatepores. “Wore ara owe baetaa atakam akoremarem ere, wama tamenem?” Emes atakam aesimes. 11Armat Ipit arawa, “Allah aowe baomep atakam, ere bomonnak atakam. Era bomonnak atakam jane bajiekorom, ere taatakam. Me, ere era owe aatakam apok. 12Era atakam jane ajiekoromtas owe, wan atakamam jane aojitemas. Are wan daytinak atakam jane aojiekoromtemas. Me, era atakam jane bajiekorom apok owe, era jane ajies atakam bimak binip ajanimemtemas. 13Era owe apormas. Me, are bapornak apok aemmas. Are jane ajimas. Me, are jane bajienak apok aemmas. Are bimak binip bajanimomem apok aemmas. Emesare, dere baetaa atakam era owe akoretammin. 14Era owe, Yesaya akoretame atakam jipu aemmas:
‘Tuhanam, Tare jane ajiaartemakam. Me, tare bimak binip bajanimomem apok aemtemakam.
Tanom aporaartemakam. Me, tare baporkorom apok aemtemakam.
15Emesare ara owe bimak binip jiiti aemapes. Are jane bire aemapes. Are abanamek akapiapes.
Me abanamek, anakot pak bapor-ombar. Me ajanemakam, jane bajie-ombar. Are bimak binip baso batetaram-ombar.
Are bimin Allah bawaiomem-ombar. Denom ara bajortaer-ombar. Tuhan emes atakam akorem.’
Yesaya emes atakam akoren. 16Tare ere, asan akot aememmakam. Me tabanamek, ere apormas. Me tajanemakam jane ajimas. 17Atakamnak, Allah atakam bakoretam owe tananeam, turu owe tananeam, era apormakam pak bapor jak aseseromesen. Are ere, era pak bapor apok. Are era jane ajimakam atakam jane bajie, jak aseseromesen. Are ere, era atakam jane bajie apok.”
Yesus, era eek bapatakum ipit baetaa atakam, baso akoretame atakam
(Mrk. 4:13-20; Luk. 8:11-15)
18“Emesare, tare era eek bapatakum ipit baetaa atakam, anakot pak, jane pajiay. 19Owe, Allah owe baomep atakam jane ajitas, ere, jane bajiekorom apok aemtas, era Jokoman Ipit ajinaomem. Are era owe, era jane ajitas atakam bimak binip ataerem. Ere era bai asan andaeamesteteres eek emes tamen are. 20Era eka tapirmi andaeamesteteres eek ere, era atakam jane ajitas wan owe emes tamen are. Are era atakam jane ajitas, jak akot aemememas. Are era atakam ji ameteeemas. 21Era owe ere, era atakam bajamkai fiak apok aememas. Erarawa are bare karokope ajamkaiemas. Owe era owe era atakam bajamkai aportas, wanam are era owe ajurusumtas apaye, aemsokomtas apaye, ere era owe Allah bajamkai ametebompimemas. 22Me fa aptam akene bomon andaeamesteteres eek ere, era atakam jane ajitas wan owe emes tamen are. Era owe ara aemansa tapirmi pak bimak binip daytu atetaramemas. Are pak tanane bataet jak aseseromemas. Erarawa are Allah atakam bimak binip kope asatakekemomemas. Are Allah karai baetamnak apok aememas. 23Me tapirmi akot andaeamesteteres eek ere, era atakam jane ajitas wan owe emes tamen ere. Are era atakam jane ajiekoromemas. Erarawa are eek 100 pii, Tuhan ambwemtamemas. Wan ere, eek 60 pii, Tuhan ambwemtamemas. Wan ere, eek 30 pii, Tuhan ambwemtamemas.” Yesus emes atakam aesime.
Takapin baetaa atakam
24Emesare. Armat Ipit, wan baetaa atakam era owe akoretamen “Me Allah aowe baomep atakam, ere jipit taka, akot eek, akebun ajapome tamen awar. 25Me, owe ise taomanses, ajii ipit ajinaoismapen. Are takapin eek, gandum bomon ajapomen. Ararawa, aoesosen. 26Emesare, gandum akene ajitteteresen. Ararawa, eek apeomtepteteresen. Takapin akeneam ajitteteresen. 27Karai baetam owerawa, kebun Armat ipitpu aesosesen. ‘Dot! Wore wokebun akot eek bajapom apaye? Era takapin akene ere, ete asana ejinaoe?’ Emes atakam aesimesen. 28Armat ipit arawa, Era pak jii ipit eme. Emes atakam aesimen. Era karai baetam oweam, ‘Wore, dare era takapin basusumtaa akot ape?’ Emes atakam aesimesen. 29Armat Ipit arawa, Basukumtaa bas. Era takapin asusumtaatakam, tare gandum akeneam takan asusumtaatemakam apeno. 30Gandum anama takapin takan emes bajapejitas. Era gandum eek akokomtaatakam bare ajiire. Era barerawa, dere atakam eek bakokomtaa owe asakamtamtemin. ‘Tare era takapin ato takamjanimapomay. Wanam biramo ajikteteray. Era takapin takes biramo ajiktetertakam, jis ambomosomkoromay. Era gandum arawa, asep ajanimapomay. Era eek degudang bomon ataapomay.’ Emes atakam aesimtemin.” Yesus emes atakam aesime.
Kopenak eek baetaa atakam
(Mrk. 4:30-32; Luk. 13:18-19)
31Armat Ipit wan baetaa atakamam era owe akoretame. “Allah aowe baomep ere, kopenak eek emes tamen are. Owe era eek akebun ajapommas. 32Era eek, ere kopenak. Wan eek takes ere daytu. Me, era eek ajitto, are akene daytinak ajitemem. Me wan pak taso akene takes, ere koser. Era eek koser akene, ere wus daytu ajitemem. Sakaoam to era awa aeemas.” Yesus emes atakam aesime.
Roti eek baetaa atakam
(Luk. 13:20-21)
33Armat Ipitam wan baetaa atakam era owe akoretame. “Me Allah aowe baomep atakam, ere roti eek awar. Taot taka roti eek ataeren. Are tepung daytu ataeren. Ararawa, era roti eek anama tepung takan ambetemtiien. Erarawa era tepung takes apepepietemeten.” Emes atakam aesime.
Yesus baetaa atakam tanane akoretame atakam
(Mrk. 4:33-34)
34Emesare, Yesus atakamiin takes baetaa atakam era owe tanane akoretame. Era atakamiin atakamiin akoretame ere, baetaa atakam akoretame. 35Ere Allah atakam bakoretam ipit akoretame atakam jipu. Era atakam:
“Dere atakam era owe akoromtey, Dere baetaa atakam akoretamtemin.
Allah ara tapirmi akenemapome baream, waa ajiiream, Armat Ipit era atakam atukumtiie. Dere ere, era atakam era owe akoretamtemin.”
Emes atakam akoren.
Yesus takapin baetaa atakam baso akoretame atakam
36Emesare. Yesus era owe tanane beken ajieme. Are tame ajiie. Me abajamkai oweam Armat Ipit ambaromes. “Kebun takapin baetaa atakam, boesimtamaro.” Emes atakam aesimes. 37Armat Ipit arawa, “Era akot eek bajapom ipit, ere Asamot Anakot Ajaoreme Ipit emes tamen are. 38Me kebun ere, ara aemansa tapirmi emes tamen are. Era akot eek, Allah aobaomep owe emes tamen are. Me takapin ere, era Bii Kapar Ipit ajamkaimas owe emes tamen are. 39Me takapin eek ajapome jii ipit, ere Bii Kapar Ipit emes tamen are. Era eek bakokomtaa ere, ere era asepnak bare emes tamen are. Era eek bakokomtaa owe ere, malaikat owe emes tamen are. 40Owe era takapin ajanimapomes, wanam jisimak ambomosomes, ere era asepnak bare pak tamen are. 41Asamot Anakot Ajaoreme Ipit aobaomep wan owe, ere owe dosa baem batatapimtaa owe are. Wan ere, era Ipit aatakam baoo owe. Me Armat Ipit ere, amalaikat owe atakam asakamtamtem. Me malaikat owerawa, emes owe takes jisimak ambomosomtemas. 42Ararawa, era owe, jisimak asan bomon ajiitaapomtemas. Era asan ere, owe bate ambattemas. Are damo jende atawuomtemas. 43Allah akot apormar pak baem owerawa, Aritipit Allah Ai Tapirmi, era jee tamen asaramemtemas. Emesare, jane fero owe ara atakam jane bajitas.”
Asaimapomes akotnak pak baetaa atakam
44“Allah aowe baomep atakam, ere owe akotnak pak kebun asaimapomes emes tamen are. Jipit takarawa, era pak aporen. Ararawa, era pak aopupurimtiien. Are jak akotnak aememen. Erarawa are aapak takes uang ajitamarkorome, wanam era kebun tapirmi ajititen.”
Akotnak eka juas mutiara baetaa atakam
45“Wanam, Allah aowe baomep atakam, ere akotnak eka juas mutiara bandimarpor pak bajitit ipit emes tamen are. 46Are mutiara eka takakope bambi akotnak aporen. Ararawa, aapak takes uang ajitamarkorome, wanam era mutiara eka ajititen.”
Jimi baetaa atakam
47“Wanam, Allah aowe baomep atakam, ere jimi emes tamen are. Owe jimi apiemas. Are atatkupis enamo apietaaemas. 48Are jimi enamo tanane aporemas, era jimi awasimtaeremas. Are enamo aeresusumemas. Era akot enamo, ese aoweapomemas. Era pota enamo ere, akoromosomemas. 49Emesare, era asepnak bare pakam emes tamen are. Malaikat oweam andaetemas. Are era asan pota oweam, era turunak oweam, apa asan ajimemomtemas. 50Are era asan pota owe jisimak asan akoromjiimtemas. Era asan ere, owe bate daytinak ambattemas. Are damo jende atawuomtemas.”
Ai pak anama tarai pak atakam
51“Tare ara atakam takes jane ajimakam apaye?” Yesus emes atakam aesimen. Era owerawa, “Ijee.” Emes atakam aesimes. 52Armat Ipit arawa, “Emesare, Musa Basakamtam Atakam baememtam owe, Allah aowe baomep atakam ji aetas, are tame armat ipit emes tamen are. Are tarai pakam, ai pakam, aapak tame ataejisimemas.” Yesus emes atakam aesimen.
Nasaret owe Yesus awotapemes atakam
(Mrk. 6:1-6; Luk. 4:16-30)
53Emesare. Yesus era baetaa atakam akoretamkorome. Atakam akoretamkoromerawa, aesose. 54Are atamsan aesose. Era asan ere, Yahudi owe samayen tame bomon, atakam aememtame. Erarawa era owe jinim daytu aees. Are atakam akores. “Me abimak binip basonak ere, tao tetame? Are jinim bae pak baem fiak pak ere, tao tetame? 55Ara aemema ipit, wus tukang ipit andep. Arsootam Maria. Areotais ere, Yakobus, Yusuf, Simon, Yudas, are. 56Me armasis takesam dare takan aemapmarom. Emesare, era pak takes, Armat Ipit tao tetame?” Emes atakam aesimes. 57Emesare, are bifane Yesus afeomesen. Me Yesus arawa, “Kaaowe, Allah atakam bakoretam ipit tere aeomemas. Me, asaman oweam, atame oweam, Allah atakam bakoretam ipit tere baeom apok.” Emes atakam aesime. 58Me, Armat Ipit era owe Ara bamesem apok apore. Erarawa Are era asan jinim bae pak tanane baem apok.
Currently Selected:
MATIUS 13: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994
