MATIUS 14

Yohanes Bwi Bakupimtaer Ipit atatiies atakam

(Mrk. 6:14-29; Luk. 9:7-9)

1Emesare. Era bare ere, Herodes Antipas Yesus atakam jane ajien. Me Herodes Galilea tapirmi owe baomep ipit takakopeen. 2Armat Ipit atakam akarai baetam owe akoromen. “Yesus ere, Yohanes Owe Bwi Bakupimtaer Ipit. Me Yohanes etejaorwasite. Erarawa are era jinim bae pak daytu aememe.” Emes atakam aesimen. 3,4Bonaknak ere, Herodes, areot juas Filipus aremo aotaeten. Me aremo juas Herodiasen. Yohanesam atakam Herodes akoroma ajaien. “Wore era taot aotaetmarem, ere Musa Basakamtam Atakam aoomarem.” Emes atakam aesima ajaien. Herodesam, emes apore ere, are owe Yohanes bajipirtaer, ban banam bajikapom, buji tame bomon bajiitaapomam, emes atakam asakamtamen. 5Me Herodes, Yohanes batatii, akot ajien. Me, are owe tanane ombare aememen. Era owe tanane abimak binip ere, “Yohanes, Allah atakam bakoretam ipitkor.” Emes bimak binip atetaramesen.

6Me Herodes ajisamse bare, owe pakambwi aemesen. Me Herodias arerepam era pakambwi jaki owe bipu di andien. Herodes arawa, era di andie akotnak aporen. 7Are era taot ataaji aeetamen. “Pak atakam ajaniman. Dere era pak wora batetam.” Emes atakam aesimen. 8Arsoot arawa, atakam arerep akoromen. Me arerep arawa, arsoot atakam jipu, Herodes aokoromen. “Yohanes Owe Bwi Bakupimtaer Ipit akuus, aone bomon ara asan ombo tetaman.” Emes atakam aesimen. 9Emesare, raja era taot atakam ajanime pak jane ajien. Ararawa, jak pota daytu aemapen. Me, are era ataaji aee pak aporen. Are pakambwi jaki owe aporen. Erarawa are owe era pak era taot batetam atakam asakamtamen. 10Are owe Yohanes kuus buji tame bomon basakamtaer atakam asakamtamen. 11Owerawa, era kuus aone bomon era pakambwi tame atoomjiiesen. Atoomjiies arawa, era taot atetamesen. Era taotam era kuus arsoot aotetamen. 12Me Yohanes ajamkaies owerawa, bino ambartaeresen. Are era bino awuapomesen. Ararawa, Yesus ambaromes, wanam era pak atakam aesimtames.

Yesus, banda pak, oorey owe 5.000 atetame atakam

(Mrk. 6:30-44; Luk. 9:10-17; Yoh. 6:1-4)

13Yesus emes atakam jane ajie, Are era asan beken ajiose. Are ti andaejuue, wanam tame apok asan apa aesose. Owe tananeam emes atakam jane ajies. Are akota poreesosa ajaies. Are tamao Yesus fe asep asarames. 14Emesare, Yesus asokue. Asokuerawa, Are era owe tananenak apore. Are era owe seis akot aoorpore. Wanam, Are era owe damon, damo pota owe ajaoromtaere.

15Emesare, ju atie. Ju atierawa, Yesus bajamkai owe Armat Ipit ambaromes. “Ara asan tame apok asan. Juam emetiar. Ara owe tanane baesos atakam asakamtamey. Are ara samaniin samaniin, banda pak bajitittaan baesostas.” Emes atakam aesimes. 16Yesus arawa, “Era owe baesos bas. Tare banda pak era owe tamba atetamay.” Emes atakam aesime. 17Era owerawa, “Dare ere, ara asan amos jise ban taka kopeam, enamo jamnuk kopeam, atoomarom.” Emes atakam aesimes. 18Armat Ipit arawa, “Emesare era pak dera toomdaetamani.” Emes atakam aesime. 19Armat Ipit arawa, era owe takapin ten bandaepakiapteter atakam asakamtame. Are era amos jise ban takaam, era enamo jamnukam, ataere. Are banamek wonamo oup apemtemeteme. Are terima kasih atakam Allah akorome. Wanam, era amos akookome. Amos akookomerawa, Are era amos abajamkai owe atetame. Me abajamkai owerawa, era amos, era owe tanane asaietames. 20Emesare, era owe takes era amos andes. Are jak andatukuapteteres. Oweam era andaeremtiies amos, ese 12 aoweapomes. 21Era amos andes oorey owe, ere 5.000 apayeen. Are tapes anama jii bajititimar apok.

Yesus bwi ten ajare atakam

(Mrk. 6:45-52; Yoh. 6:15-21)

22Emes aemes arawa, Yesus atakam abajamkai owe, ametesakamtamen. “Tanom poman bonak ajiriteay. Dere asep bajinao.” Emes atakam aesimen. Armat Ipit arawa, era owe tanane tame poreesosa bajie atakam asakamtame. 23Are era owe tanane tame baesos atakam asakamtamerawa, atakam Allah apa bajanim, fami oup atemete. Ere jee asapiepue, Armat Ipit apa aemapen. 24Me abajamkai owe ere, itimbup aemeses. Buiam ti timen awotapeme. Erarawa woam era ti afaumjuume. 25Eamnak arawa, Yesus era owepu ajinaome. Are bwi ten ajare. 26Me abajamkai owe, Armat Ipit bwi ten bajar apores. Ararawa, ombarenak aemeses. “Jake tasir ipit!” Emes atakam aesimes. 27Yesusam atakam era owe ametekorome. “Jak fiaka! Dere Yesus. Ombare bas.” Emes atakam aesime. 28Petrus arawa, “Tuhan! Wora apaye, ere, dere era bwi ten wopu bajar, atakam basakamtaman.” Emes atakam aesime. 29Yesus arawa, “De!” Emes atakam aesimen. Emesare. Petrus era ti aesoondae. Ararawa, Yesuspu bwi ten ajare. 30Me, are bui daytu apore ere, ombare aememe. Are bwi ajurpuuerawa, wanam atakam daytu afaketaere. “Tuhan! Dere bajortaeran!” Emes atakam aesime. 31Yesus arawa, aban ametejiraomdaeme. Are armat ipit ban ajimompe. “Wore eemnak Dera bamesemkorom apok. Wore apa ombareem?” Emes atakam aesime. 32Era ipit amnuk arawa, ti asojuuemis. Ti asojuuemis arawa, bui akarie. 33Era ti bomon aemeses oweam Yesus asitimes. “Atakamnak! Wore Allah Andep.” Emes atakam aesimes.

Yesus, Genesaret tapirmi owe ajaoromtaere atakam

(Mrk. 6:53-56)

34Emesare, are poman apiiresen. Poman apiires arawa, Genesaret tapirmi ajirites. 35Me era asan oorey owe, Yesus amsam. Era oweam, era tapirmi takes damo pota owe bajate, atakam asakamtames. Owerawa. Era damo pota owe takes Yesuspu atoomtines. 36Are era damo pota owe Yesus baju aip ban taka bakurum, atakam Armat Ipit ajanimes. Emesare, era baju aip ban bi akuruma ajaies owe takesam, ajaorema ajaies.

Currently Selected:

MATIUS 14: LAIASC

Highlight

Copy