Matiu 22

Tadulako agama Iahudiꞌ rapándiriꞌ nodo tauna to lohe lao i posusaꞌá

(Luk. 14:15-24)

1Molaluita wopiꞌi Iesu i tadulako agama Iahudiꞌ, Napahaweꞌáheꞌ bahangapa ngkóráꞌ pándiriꞌ {bona raisá apa to ina mewaliꞌ i tauna to tiꞌara mampoinálái kaꞌIana Datu Topehómpóꞌ}. Nauliꞌ, 2“Pueꞌ Ala peisá rapándiriꞌ nodo hadua datu to mobábehi susa petauna i ánáꞌna. 3Datu iti mopárentámoheꞌ huoꞌána lao mokióꞌ tauna bona laoheꞌ i posusaꞌá petauna iti. Agáiáná upu-upuheꞌ to rakióꞌ, tiꞌaraheꞌ mau lao. 4Onoꞌ miꞌi haneꞌi nahuoꞌ wopaheꞌ huoꞌána to ntániꞌna, nahángáꞌáheꞌ, ‘Nipahaweꞌ i tauna to rakióꞌ: gapiꞌ hai ánáꞌ gapiꞌ to maruduꞌ rasambale miꞌi, pandeꞌ leháꞌ miꞌi, upu-upuna timama miꞌi. Laomokeꞌ deꞌe-deꞌe i posusaꞌá petauna!’ 5Agáiáná upu-upu tauna to rakióꞌ tiꞌaraheꞌ mampeuláꞌi pekióꞌ iti. Hadua-hadua lao peheꞌ i bágóꞌraꞌ. Araheꞌ to lao i hinoeraꞌ, araheꞌ woꞌo to lao i pobágóꞌáraꞌ ntániꞌna. 6Araheꞌ woꞌo to mohakaꞌ huoꞌána datu iti, rapapahái hai rapapateheꞌ. 7Kanahádina datu apa to pewaliꞌ, mabukoꞌ ntepuꞌu miꞌi, onoꞌ haneꞌi mohuoꞌmoheꞌ surudadoꞌna lao mopapate topepapate iti hai mohunu wánuáraꞌ.

8Roo onoꞌ, nakióꞌ wopaheꞌ huoꞌána to ntániꞌna, nahángáꞌáheꞌ, ‘Posusa petauna timama miꞌi, agáiáná tauna to kukióꞌheꞌ ininá, tiꞌarapoheꞌ hintotoꞌ mai i posusa deꞌe, láwiꞌ tiꞌaraheꞌ mampeuláꞌi pekióꞌkuꞌ. 9Mewaliꞌ, laomokou i upu-upu porompengaꞌá rárá, hai heáná peá to nipohidupaꞌá, niwáwáháheꞌ mai i posusa petauna deꞌe.’ 10Lao mpuꞌumoheꞌ huoꞌána iti i porompengaꞌá rárá, mokióꞌ upu-upu tauna to rapohidupaꞌá ionoꞌ. Tiꞌara rapopontaniꞌ to maroꞌa bábehiáraꞌ ba to kadake. Kahópóꞌána, handaꞌheꞌ to lao álána bukeꞌ ntepuꞌu támbi petaunaꞌá iti.

11Roo onoꞌ, datu iti lao mampohidupaꞌá torare. Agáiáná naita i oloꞌraꞌ, ara hadua to tiꞌara mopakeꞌ waruꞌ posusa to napatimama miꞌi.#22:11 waruꞌ posusa to napatimama miꞌi: Tauna iti tiꞌara mopakeꞌ waruꞌ to napatimama miꞌi datu, tandaꞌ katiꞌárána mobiláꞌ datu hai ánáꞌna. 12Nauliꞌ datu, ‘Ee! Moapa riꞌi haneꞌi mesuaꞌkoꞌ i támbi posusaꞌá, agáiáná tiꞌarakoꞌ mopakeꞌ waruꞌ posusa?’ Tauna iti maniiꞌ peá. 13Hangko ionoꞌ, datu iti mopárentáheꞌ huoꞌána, nauliꞌ, ‘Nitimpuku bitina hai taena, haneꞌi nitibe i rawa i lalu kakáindiána! Ionoꞌ, ina teriaꞌheꞌ hai mapári rahádi.’ ”

14Napahópóꞌ Iesu ngkóráꞌ pándiriꞌ iti node: “Handaꞌ ntepuꞌu tauna to nakióꞌ Pueꞌ Ala, agáiáná tiꞌaraheꞌ handaꞌ to Napileꞌi mewaliꞌ taunáNa i lalu popárentáNa.”#22:1-14 Tunggáiána Iesu mopahaweꞌ ngkóráꞌ pándiriꞌ iti, bona raisá tadulakoraꞌ toIahudiꞌ apa to ina mewaliꞌ i tauna to tiꞌara mopangákuꞌ kaꞌIana Datu Topehómpóꞌ. I lalu ngkóráꞌ pándiriꞌ iti, Pueꞌ Ala rapándiriꞌ datu, Iesu rapándiriꞌ ánáꞌna datu, nabiꞌ-nabiꞌ tepasuaꞌ Iohane Toperiu rapándiriꞌ huoꞌána datu. ToIahudiꞌ to mosápuáka kaꞌIesuna Datu Topehómpóꞌ to hangko i Pueꞌ Ala rapándiriꞌ torare to rakióꞌ rungu-runguna, upu-upu tauna to mepoinálái i Iesu rapándiriꞌ torare to rakióꞌ i bókóꞌ, hai kamanótó to naweꞌikeꞌ Pueꞌ Ala rapándiriꞌ waruꞌ posusa. Básá Iesaia 61:10.

ToParisi mekuneꞌ i Iesu kana pobaiari ásele

(Mrk. 12:13-17; Luk. 20:20-26)

15Roo onoꞌ, pohuꞌmoheꞌ toParisi {hangko i Támbina Pueꞌ Ala} haneꞌiheꞌ mogómbó bona mampeliꞌheꞌ rárá mopakanawoꞌ Iesu moliu pekuneꞌraꞌ to maꞌángkárá rahániki. 16Onoꞌ miꞌi haneꞌi rapohawaꞌámoheꞌ bahangapa topegururaꞌ hai bahangapa taunána Datu Herode#22:16 taunána Datu Herode: Hira tauna to mopangákuꞌ pemuleꞌána Datu Herode Mahile to makuasaꞌ, hai mampokanaheꞌ woꞌo topopárentá Roma i tampoꞌ Sáráeliꞌ. Peisá woꞌo rauliꞌ toHerode. bona laoheꞌ mekuneꞌ i Iesu kana pobaiari ásele.#22:16 Mosisalaꞌ pekiriraꞌ toParisi hai taunánaheꞌ Herode. ToParisi motibaaꞌheꞌ Paturoꞌna Musa hai tiꞌara mampokana pobaiari ásele i tauna to tiꞌara toIahudiꞌ nodo Datu Mahile i Roma, agáiáná taunánaheꞌ Herode mampokana. Kahaweꞌraꞌ i Iesu, rahángáꞌá, “Guru, kiꞌisá miꞌi kaꞌIona tauna to manótó. MepaturoꞌKoꞌ i katoꞌu-toꞌuána apa peundeꞌána Pueꞌ Ala. Tiꞌara Nupeuláꞌi pampekiriraꞌ ba heáná peá, láwiꞌ tiꞌaraKoꞌ mampopontaniꞌ tauna, 17onoꞌ miꞌi haneꞌi kipembiáꞌ bona Nuhángáꞌáꞌangkaiꞌ noumbá polámbiꞌMu: mouláꞌ áturá ágámántaꞌ, ba hintotoꞌkeꞌ mobaiari ásele i topopárentá toRoma,#22:17 Hangkani i lalu hampare, upu-upu tauna i kadatuá Roma hangaa-ngaa mobaiari ásele i Datu Mahile, agáiáná i Paturoꞌna Musa, toIahudiꞌ ralaraꞌ mengkoruꞌ i tauna to tiꞌara toIahudiꞌ (básá Pohuleki 17:15). ba tiꞌara?”

18Agáiáná naisá miꞌi Iesu tunggáiána laluraꞌ to kadake,#22:18 tunggáiána laluraꞌ to kadake: ToParisi mampoinaoheꞌ mopakanawoꞌ Iesu. Ane Nahániki “Paraluukeꞌ mobaiari ásele i Datu Mahile i Roma,” lempóna, Ia moliungi Paturoꞌna Musa. Ane Nahániki “Tiꞌarakeꞌ peisá,” lempóna, Ia moewaꞌ topopárentá toRoma, hai hangaa-ngaa rahuku mate. onoꞌ miꞌi haneꞌi Nahángáꞌáheꞌ, “Mampe to maroꞌa pekou! Moapa riꞌi haneꞌi nipeliꞌ kamasalaꞌna laluitaNgkuꞌ? 19NiweꞌiAꞌ mai dóiꞌ to biásá nipakeꞌ mobaiari ásele i toRoma.” Mewaliꞌ raweꞌi mpuꞌu miꞌi hampepaꞌ dóiꞌ peráꞌ. 20Mekuneꞌ Iesu, “Lenggeꞌna hai hangaꞌna heáná to ara i dóiꞌ deꞌe?”

21Rahániki, “Lenggeꞌna hai hangaꞌna Datu Mahile i Roma.”

Nauliꞌ Iesu, “Ane noꞌonoꞌi, niweꞌi topopárentá toRoma apa to hintotoꞌ raweꞌi, hai niweꞌi woꞌo Pueꞌ Ala apa to hintotoꞌ raweꞌi.” 22Karahádina pehániꞌna Iesu, tingkáráꞌmoheꞌ hai pohuꞌ pemoheꞌ mopálehi Iesu.

ToSaduki mekuneꞌ i Iesu kana i katueꞌna huleꞌ tomate

(Mrk. 12:18-27; Luk. 20:27-40)

23I alo iti woꞌo, araheꞌ bahangapa toSaduki to haweꞌ i Iesu. ToSaduki iti, iamoheꞌ bahangapa tadulako agama Iahudiꞌ to tiꞌara mampoinálái tauna to mate ina rapatueꞌ huleꞌ.#22:23 ToSaduki tiꞌara mampoinálái tauna ina raꞌaró huleꞌ hangko i kapate, láwiꞌ rauliꞌ tiꞌara teukiꞌ i surana Musa. Básá to teukiꞌ i Kahirámpuá Laluita. 24Kahaweꞌraꞌ toSaduki iti, mampeliꞌheꞌ woꞌo kamanawoꞌána Iesu, rahángáꞌá, “Guru, teukiꞌ i Paturoꞌna Musa node: ane arai tobaleilo to mate, agáiáná tiꞌara ara ánáꞌna, halaluna hangaa-ngaa mampohambokoá bembaꞌna, bona ara pemuleꞌána toámána to mate miꞌi.#22:24 Básá Pohuleki 25:5-6 mokana i ádáraꞌ toIahudiꞌ. Básá woꞌo Pewaliꞌána gáláꞌna ka-38 hai Ruti gáláꞌna ka-3-4. 25Mewaliꞌ, araheꞌ pitu topohalalu, paka tobaleilo. To towutuꞌ mampotoina hadua towawine, agáiáná hangko tiꞌara mani woia ara ánáꞌraꞌ, mate miꞌi towutuꞌ iti. Bembaꞌna napohambokoá ádina. 26Tiꞌara mani woꞌo nampakaꞌ memuleꞌ, mate miꞌi. Noꞌonoꞌ woꞌo to mewaliꞌ i katáluna duuꞌna haweꞌ i kapituna. 27Kahópóꞌána, mate miꞌi woꞌo towawine iti. 28Mewaliꞌ i alo pobutusi, ane toꞌu-toꞌu tueꞌ huleꞌ upu-upu tomate, heáná hangko i oloꞌraꞌ to pitu iti to mewaliꞌ toámána towawine iti, láwiꞌ upu-upuheꞌ mampohambokoá?”#22:28 ToSaduki hai toParisi mosisalaꞌ. Mouláꞌ toSaduki, ane towawine iti raꞌaró hangko i kapate, ina ara pitu toámána, hai iti tiꞌara ina napokana Pueꞌ Ala, mewaliꞌ tauna tiꞌara ina raꞌaró huleꞌ hangko i kapate. Agáiáná mouláꞌ toParisi, ane towawine iti raꞌaró huleꞌ, toámána to rungu-runguna to ina mewaliꞌ toámána i surugáꞌ.

29Nahániki Iesu, “Salaꞌ ntepuꞌu pekirimi, láwiꞌ tiꞌara niꞌisá apa to teukiꞌ i lalu Sura Magasaꞌ, hai tiꞌara woꞌo niꞌisá kuasaꞌna Pueꞌ Ala. 30Láwiꞌ ane rapatueꞌmoheꞌ huleꞌ tauna to mate, katueꞌraꞌ hibali miꞌi hai katueꞌraꞌ malaꞌeka i lalu surugáꞌ, lempóna: tiꞌarapoheꞌ mohamboko. 31Tiꞌara mani paꞌi nibásá i lalu Sura Magasaꞌ laluita to mopakanótó katueꞌraꞌ huleꞌ tomate? Teukiꞌ node: 32‘Kódóꞌ miꞌi Pueꞌ Ala to rapenómbái oaꞌ Burahima, Isakiꞌ, hai Iako.’#22:32 Básá Pesuwuꞌá 3:6,15-16. Mewaliꞌ, hangko i laluitaNa Pueꞌ Ala iti, taisá ntepuꞌu Burahima, Isakiꞌ hai Iako bateꞌna tueꞌ maniheꞌ, láwiꞌ tiꞌara riꞌi tauna to mate to menómbá i Pueꞌ Ala, agáiáná bateꞌna peá tauna to tueꞌ to menómbá i Hia.”#22:32 Básá 1 Korintu 15:12-58; Pilipi 3:20-21; 1 Tesalonika 4:13-18. 33Tauna to handaꞌ mokamaleá ntepuꞌu paturoꞌna Iesu iti.

ToParisi mekuneꞌ i Iesu kana i párentá to hangaa-ngaa rapaioru

(Mrk. 12:28-34; Luk. 10:25-28)

34ToSaduki iti tiꞌara piꞌi rabuku mohániki Iesu, onoꞌ miꞌi haneꞌi toParisi mogómbó wopaheꞌ {mampeliꞌheꞌ oaꞌ rárá bona mopakanawoꞌheꞌ Iesu}. 35Mewaliꞌ hadua hangko i oloꞌraꞌ guru agama mampehukáꞌ mopakanawoꞌ Iesu moliu pekuneꞌna, nauliꞌ, 36“Guru, hangko i upu-upu párentá i lalu Paturoꞌna Musa, párentá apa to hangaa-ngaa tapaioru ntepuꞌu?”#22:36 I lalu Paturoꞌna Musa, ara ini átuna hampuloꞌ hai tálu párentá, hai toIahudiꞌ pakaheꞌ mompombeheheꞌi párentá apa to hangaa-ngaa rapaioru. Mewaliꞌ noumbá peá pehániꞌna Iesu, hangaa-ngaa ara tauna to kóiꞌ inaona i Hia.

37-38Nahániki Iesu, “Párentá to hangaa-ngaa tapaioru ntepuꞌu ia miꞌi:

‘Nipokaꞌahiꞌ Pueꞌ Ala Pueꞌmi,

i sukáꞌna kabulána lalumi,

i sukáꞌna pekirimi

hai i sukáꞌna kapándemi.’#22:37 Básá Pohuleki 6:5.

39Hai párentá to karompákáꞌna to mobunduꞌ ntepuꞌu woꞌo ia miꞌi:

‘Nipokaꞌahiꞌ hángká rángámi nodo pampokaꞌahiꞌmi wátámi haduduámi.’#22:39 Básá Áturá Menómbá 19:18.

40Upu-upu Paturoꞌna Musa hai paturoꞌraꞌ nabiꞌ-nabiꞌ#22:40 Upu-upu Paturoꞌna Musa hai paturoꞌraꞌ nabiꞌ-nabiꞌ: Lempóna, Pototowiá to Sae. mentóáꞌ hangko i párentá to rompákáꞌ deꞌe.”

Iesu mekuneꞌ i toParisi heáná iti Datu Topehómpóꞌ

(Mrk. 12:35-37; Luk. 20:41-44)

41Tangaꞌraꞌ mani toParisi hirámpu ionoꞌ, Iesu mekuneꞌ i hira, Nauliꞌ, 42“Mouláꞌ polámbiꞌmi: heáná iti Datu Topehómpóꞌ to nadándi Pueꞌ Ala hangkoia? Pemuleꞌána heáná?”

Rahániki, “Pemuleꞌána Datu Daudiꞌ.”#22:42 Básá 2 Semueli 7:12-16; Sura Petóiá 89:4-38; 132:11-18; Iesaia 9:6-7; 11:1-11; Ieremia 23:5-6; 33:15-17; Ieheskie 34:23-24; 37:24-28.

43Nauliꞌ Iesu, “Mewaliꞌ, moapa riꞌi haneꞌi nauliꞌ Daudiꞌ, pemuleꞌána ia miꞌi Pueꞌ to napenómbái? Láwiꞌ hangkoia ánti peteteꞌna Inao to Magasaꞌ, Daudiꞌ mampolaluita kana i Datu Topehómpóꞌ node:

44Pueꞌ Ala molaluita i Pueꞌkuꞌ to kupenómbái, Nauliꞌ:

‘MehodamoKoꞌ tándáꞌ i kuánáNgkuꞌ,

duuꞌna Kupopengkoruꞌheꞌ upu-upu ewáliMu i Hio.’ (Sura Petóiá 110:1)

45Mewaliꞌ, ane Datu Daudiꞌ manguliꞌ Datu Topehómpóꞌ Ia miꞌi Pueꞌ to napenómbái, noumbá haneꞌi Ia mewaliꞌ woꞌo pemuleꞌána Daudiꞌ?”#22:45 To natunggái Iesu, Datu Topehómpóꞌ ia miꞌi tauna (pemuleꞌána Daudiꞌ) hai ia miꞌi woꞌo Pueꞌ Ala (Pueꞌna Daudiꞌ). Básá woꞌo Roma 1:3-4. Tiꞌara mesuaꞌ i pekiriraꞌ toIahudiꞌ Datu Topehómpóꞌ ia miꞌi woꞌo Pueꞌ Ala. 46Tiꞌara ara haweꞌ hadua to nabuku mohániki. Mantepuꞌu i alo iti, tiꞌara piꞌi woꞌo ara haweꞌ hadua to pebáiꞌ mampekuneꞌ ba apa-apa i Iesu {bona mampeliꞌ kamanawoꞌNa}.

Currently Selected:

Matiu 22: NTBEP

Highlight

Copy