Matiu 23
23
Iesu mosalaꞌi guru-guru agama toIahudiꞌ hai toParisi
(Mrk. 12:38-40; Luk. 11:37-54; 20:45-47)
1Hangko ionoꞌ, Iesu mohángáꞌáheꞌ topeguruNa hai tauna to handaꞌ, Nauliꞌ, 2“Guru-guru agama hai toParisi, hira miꞌi to ara kuasaꞌraꞌ mopaturoꞌákou Paturoꞌna Musa,#23:2 ara kuasaꞌraꞌ mopaturoꞌákou Paturoꞌna Musa - I lalu básá Iunani: mehoda i pehodaꞌána Musa. 3onoꞌ miꞌi haneꞌi hangaa-ngaa niuláꞌ upu-upuna to rapaturoꞌákou, agáiáná ineeꞌ nipeuláꞌi bábehiáraꞌ, láwiꞌ hira haduduáraꞌ tiꞌaraheꞌ mampeuláꞌi apa to rapaturoꞌákou. 4Hira mampoweꞌi kilinga to matimi i tauna, láwiꞌ ratámbái mani párentá hai ádá agama to matimi,#23:4 Montaniꞌ hangko i kilinga to naweꞌiangkaiꞌ Iesu. Básá Matiu 11:28-30; Suro 15:10; Galatia 5:1. agáiáná hira haduduáraꞌ, mogalo riꞌi hangkau karaweꞌraꞌ tiꞌara rapakeꞌ motulungi tauna.
5Upu-upu to rabábehi, rabábehi i lindoꞌraꞌ tauna bona raita. Rápáꞌna, mouláꞌ ádá ágámántaꞌ, upu-upukeꞌ tobaleilo toIahudiꞌ mopatakaꞌkeꞌ pamboliá i kirentaꞌ hai i tae kabeoꞌtaꞌ. I lalu pamboliá iti, ara sura to rapoukiꞌi bahangapa wátiꞌ hangko i Sura Magasaꞌ.#23:5 pamboliá… rapoukiꞌi bahangapa wátiꞌ hangko i Sura Magasaꞌ: Pamboliá iti rabábehi hangko i koliꞌ, lenggeꞌna nodo taku, hai rabárárángi. Wátiꞌ to biásá teukiꞌ raꞌala hangko i Pesuwuꞌá 13:1-16; Pohuleki 6:4-9; 11:13-21. Agáiáná toParisi iti mopamahile pamboliá iti bona raita peá tauna hai ratóiá nodo tauna to mengkoruꞌ ntepuꞌu i Pueꞌ Ala. Noꞌonoꞌ woꞌo rendá-rendá to rapatakaꞌ i kumbáraꞌ,#23:5 rendá-rendá to rapatakaꞌ i kumbáraꞌ: Tobaleilo toIahudiꞌ mopakeꞌ rendá-rendá i hokina kumbáraꞌ, tandaꞌ pengkoruꞌraꞌ i Pueꞌ Ala. Básá Poimbaꞌ 15:37-41; Pohuleki 22:12. rapakalóe bona rauliꞌ peá tauna ntániꞌna maróhó ntepuꞌu poágámáraꞌ. Mampe to magasaꞌ peheꞌ! 6Góeꞌheꞌ ane rapopehoda i pehodaꞌá to i lindoꞌ i posusaꞌá hai i támbi penómbáꞌá. 7Góeꞌheꞌ ane rabiláꞌ tauna iumbá-umbá peá kahirámpuá, hai ane rakióꞌheꞌ ‘Guru.’#23:7 Guru - básá Iunani: Rabi. Mouláꞌ ádáraꞌ toIahudiꞌ hangkoia, tauna to rakióꞌ “Rabi” bateꞌna rabiláꞌ hai rapengkoruꞌi ntepuꞌu.
8Agáiáná kómu topeguruNgkuꞌ, ineeꞌkou mampoinao rabiláꞌ hai rakióꞌ ‘Guru’, láwiꞌ hadua peá Gurumi. Mewaliꞌ kómu upu-upu, hibali pekou nodo topohalalu. 9Ineeꞌ woꞌo nikióꞌ tauna i duniáꞌ deꞌe ‘Umaꞌ’, tandaꞌ pebiláꞌmi, láwiꞌ Umámi hadua peá, ia miꞌi Pueꞌ Ala to ara i surugáꞌ. 10Hai ineeꞌkou woꞌo mampoinao rakióꞌ ‘tadulako’, láwiꞌ Tadulakomi hadua peá, ia miꞌi Datu Topehómpóꞌ. 11Heáná to mampoinao bona i reá tueꞌna, hangaa-ngaa mengkaiwóiꞌ hai mewaliꞌ nodo topekádipurá. 12Tauna to mampepemahile ina rapaiwóiꞌ, hai tauna to mengkaiwóiꞌ ina napomahile Pueꞌ Ala.
13Hurewuꞌmokou guru-guru agama hai toParisi! Bateꞌna ina molámbiꞌkou rugiꞌ, láwiꞌ mampe to maroꞌa pekou! Kómu, motukokou rárá mesuaꞌ i lalu popárentána Pueꞌ Ala láwiꞌ kómu haduduámi, tiꞌara niundeꞌ mewaliꞌ taunáNa, hai tauna ntániꞌna to moundeꞌ, nikóntóheꞌ.#23:13 Popárentána Pueꞌ Ala rapándiriꞌ nodo kótá to natolelingi bente kótá. Guru-guru agama hai toParisi iamoheꞌ nodo topokámpái babaꞌá bente kótá. Pegili to rapakeꞌ mobungkáhi babaꞌá bente kótá iti ia miꞌi Ngkóráꞌna Pueꞌ Ala, agáiáná paturoꞌraꞌ guru-guru agama iti salaꞌ. Raundeꞌ mani bona tauna mengkoruꞌ i párentá to rabábehi peá haneꞌi mengkoruꞌ i Pueꞌ Ala.
[ 14Hurewuꞌmokou guru-guru agama hai toParisi! Mampe to maroꞌa pekou! Mobagiuꞌkou towawine to bembaꞌ bona nirámpáki támbiraꞌ hai óntóꞌna, haneꞌi mekakaekou nipakarue motámbungi bábehiámi to kadake iti. Ina matimi ntepuꞌu karahukumi!]#23:14 Wátiꞌ iti tiꞌara teukiꞌ i upu-upu surana Lukasi to sae ntepuꞌu, agáiáná teukiꞌ i handaꞌ sura to raukiꞌ huleꞌ i bókóꞌ.
15Hurewuꞌmokou guru-guru agama hai toParisi! Mampe to maroꞌa pekou! Madota ntepuꞌukou mopaturoꞌ tauna ntániꞌna bona mampeuláꞌiheꞌ paturoꞌmi. Nipenoꞌongi miꞌi molumao karaoꞌ mengkalimba i tahiꞌ, bona molámbiꞌ pekou hadua tauna to mewaliꞌ topegurumi. Hai ane ia mesuaꞌ i poágámámi, nipaturoꞌ bona mampeuláꞌi paturoꞌ to salaꞌ, álána hintotoꞌ ntepuꞌu rahuku i naraka láwiꞌ rumihi mani kakadakena bábehiána hangko i kómu.
16Hurewuꞌmokou! Nodokou tobilo to moteteꞌ tauna ntániꞌna! Kómu miꞌi to mewaliꞌ guru agama, agáiáná mopakanawoꞌ pekou tauna moliu paturoꞌmi to tiꞌara toꞌu. Rápáꞌna, mepaturoꞌkou, niuliꞌ: ane tauna modándi mokábelái Támbina Pueꞌ Ala, tiꞌara tetakaꞌ hai dándina iti. Agáiáná ane mokábelái párewá buláwá to i lalu Támbina Pueꞌ Ala, ia tetakaꞌ hai dándina iti. 17Bebe hai bilo ntepuꞌukou! Ba niuliꞌ mahile mani bunduꞌna buláwá haneꞌi Támbina Pueꞌ Ala? Katoꞌuána, Támbina Pueꞌ Ala iti to mopamagasaꞌ párewá buláwá to ara ionoꞌ. 18Mepaturoꞌkou woꞌo, niuliꞌ: ane tauna modándi mokábelái paintuá popenómbá to i lalu Támbina Pueꞌ Ala, tiꞌara tetakaꞌ hai dándina iti. Agáiáná ane mokábelái popenómbá to raintu i wongko paintuá iti, bateꞌna tetakaꞌ hai dándina iti. 19Bilo ntepuꞌukou! Ba niuliꞌ mahile mani bunduꞌna popenómbá haneꞌi paintuá popenómbá? Hangaa-ngaa tiꞌara, láwiꞌ paintuá iti miꞌi to mopamagasaꞌ popenómbá to ara i wongkona. 20Mewaliꞌ heáná to modándi mokábelái paintuá popenómbá, lempóna tepasuaꞌ miꞌi woꞌo popenómbá to raintu i wongkona. 21Hai heáná to modándi mokábelái Támbina Pueꞌ Ala, lempóna ia modándi miꞌi woꞌo i lalu hangaꞌna Pueꞌ Ala to toroꞌ ionoꞌ. 22Hai heáná to modándi mokábelái surugáꞌ, lempóna ia mokábelái pehodaꞌá kadatuána Pueꞌ Ala. Hai melumbuꞌ hangko i onoꞌ, Pueꞌ Ala mosabiki dándina.
23Hurewuꞌmokou guru-guru agama hai toParisi! Mampe to maroꞌa pekou! Madota ntepuꞌukou mampeuláꞌi párentá to manangkoꞌ. Mogalo riꞌi tudaꞌ-tudaꞌ to kókóiꞌ to nodo háre, siderei hai rampaꞌ-rampaꞌ ntániꞌna to ara i hinoemi, nipopenómbá hanggáláꞌ hampuloꞌ i Pueꞌ Ala mouláꞌ Paturoꞌna Musa.#23:23 Básá Áturá Menómbá 27:30-33; Pohuleki 14:22-23. Agáiáná párentá to matimi tiꞌara nipeuláꞌi. Rápáꞌna, hangaa-ngaa hintotoꞌ pobutusimi i tauna ntániꞌna, hangaa-ngaa mampokaꞌahiꞌkou hángká rángámi, hai mobukekikou dándimi.#23:23 Básá Sura Paturoꞌ 21:3; Mika 6:8. Katoꞌuána, párentá to matimi iti to hangaa-ngaa nipeuláꞌi ntepuꞌu, hai ineeꞌ woꞌo nikábáhá pampeuláꞌimi párentá to manangkoꞌ. 24Agáiáná tiꞌara iti to nibábehi. Madotakou mowehángi daliꞌ hangko i uwai to niꞌinu, láwiꞌ rapáliá. Agáiáná untá to rapáliá woꞌo,#23:24 daliꞌ hai untá: Daliꞌ ia miꞌi to kókóiꞌ ntepuꞌu to rapáliá toIahudiꞌ. (Básá Áturá Menómbá 11:20-23,41.) Untá binataꞌ to mahile ntepuꞌu to rapáliá woꞌo. (Básá Áturá Menómbá 11:4.) Párentá to manangkoꞌ, rápáꞌna: hangaa-ngaa membahoꞌheꞌ hangko tiꞌara maniheꞌ mandeꞌ, hai tiꞌaraheꞌ peisá molumao karaoꞌ ane alo penómbáꞌá. Agáiáná párentá to matimi nodo hangaa-ngaa mampokaꞌahiꞌkeꞌ hángká rángántaꞌ, tiꞌara rapailalu. nipahiameꞌ. Daliꞌ iti nodo párentá to manangkoꞌ peá, hai madotakou mampeuláꞌi párentá iti, agáiáná párentá to matimi to hangaa-ngaa nipeuláꞌi ntepuꞌu, tiꞌara nipailalu. Kómu mewaliꞌkou tadulako agama, agáiáná bilokou.
25Hurewuꞌmokou guru-guru agama hai toParisi! Mampe to maroꞌa pekou! Kómu nodokou tauna to mobahoꞌi painuá hai taboꞌ i rawana peá, mole lalumi bukeꞌ to kadake hai mampokaelu pekou oaꞌ párewána tauna ntániꞌna! 26Kómu toParisi, tobilo mpuꞌukou! Nodo laluna mangku hangaa-ngaa rabahoꞌi, noꞌonoꞌ woꞌo lalumi hangaa-ngaa rapamagasaꞌ bona bábehiámi hintotoꞌ hai peundeꞌána Pueꞌ Ala.#23:26 Básá woꞌo Matiu 15:11,17-20.
27Hurewuꞌmokou guru-guru agama hai toParisi! Mampe to maroꞌa pekou! Nodokou popatawuá to rawone to bulá.#23:27 Popatawuá to hungkuꞌ i Ierusale biásá rawone to bulá hambulá hangko tiꞌara mani Posusa Paska, bona tauna to lao i Ierusale ina moisá kaꞌárána to ratawu. Ane tauna mokada popatawuá, ia rarekeꞌ kedái pitu alona kamaruena (básá Poimbaꞌ 19:16), hai tiꞌara peisá mouláꞌ posusa iti. Rawana mababe raita, agáiáná laluna moꞌóntóꞌ buꞌu tomate hai handaꞌ pákáꞌna to mopakedái. 28Noꞌonoꞌ woꞌo kómu. Raita maroꞌa bábehiámi, agáiáná lalumi tiꞌara noꞌonoꞌ. Topodongkoꞌkou hai kadake bábehiámi.
29Hurewuꞌmokou guru-guru agama hai toParisi! Mampe to maroꞌa pekou! Nikádipurá oaꞌ popatawuáraꞌ nabiꞌ-nabiꞌ hai tauna to manótó to tueꞌ hangkoia. 30Mampepemahilekou, láwiꞌ niuliꞌ, ‘Ane rápáꞌna aramongkaiꞌ hingkakani hai toiorungkiꞌ hangkoia, ketiꞌaraꞌangkaiꞌ mampeuláꞌi bábehiáraꞌ mopapate nabiꞌ-nabiꞌ.’ 31Mewaliꞌ mouláꞌ laluitami iti, nipangákuꞌ mpuꞌu miꞌi kakómuna pemuleꞌáraꞌ to mopapate nabiꞌ-nabiꞌ, 32hai ina nipaliliu bábehiáraꞌ toiorumi iti!#23:32 Naisá miꞌi Iesu kaꞌina rapapateNa tadulakoraꞌ toIahudiꞌ.
33Pemuleꞌána mpuꞌukou to kadake! Humemi mobisa nodo lelótó láwiꞌ pakakou mopakanawoꞌ tauna moliu polaluitami. Ba nipekiri ina tekábáhákou hangko i karahukumi i lalu naraka? 34-35Toiorumi hangkoia mopapateheꞌ handaꞌ tauna to manótó bábehiáraꞌ, mantepuꞌu hangko i kamopapateraꞌ Abeli, haweꞌ-haweꞌ i kamopapateraꞌ nabiꞌ Sakaria ánáꞌna Berekia.#23:34-35 kamopapateraꞌ Abeli hai Sakaria: Abeli tauna to rungu-runguna rapapate i Pototowiá to Sae (básá Pewaliꞌána 4:8) hai hadua tauna to rahangaꞌ Sakaria, to kaupuána rapapate i Pototowiá to Sae (básá 2 Tuntukáná Datu 24:20-22). Ia rawatui haweꞌ mate i tangabaa Támbina Pueꞌ Ala, i hiliꞌna támbi to magasaꞌ iti hai paintuá popenómbá. Onoꞌ miꞌi haneꞌi ina Kuhuoꞌheꞌ nabiꞌ-nabiꞌ, tauna to moisá ntepuꞌu ngkóráꞌna Pueꞌ, hai guru-guru agama, bona maiheꞌ i kómu to tueꞌ deꞌe-deꞌe mopaturoꞌákou laluitaNgkuꞌ {bona menosoꞌkou hangko i bábehiámi to kadake}. Agáiáná araheꞌ to ina nipapate, araheꞌ to ina nipakuꞌ i kau mombehape, araheꞌ to ina nipapahái i lalu támbi penómbáꞌámi, hai araheꞌ woꞌo to ina nidápáꞌ haweꞌ i wánuá ntániꞌna. Kahópóꞌána, kómu to tueꞌ deꞌe-deꞌe ina rahukukou ánti upu-upu dósáraꞌ toiorumi hangkoia láwiꞌ mopapateheꞌ tauna to manótó i peitána Pueꞌ Ala, {láwiꞌ kómu woꞌo kadake hibali hai hira}. 36Toꞌu ntepuꞌu to Kuꞌuliꞌ, hai Kuhángáꞌáꞌákou: kómu to tueꞌ deꞌe-deꞌe bateꞌmi ina rahuku ánti bábehiámi hai ánti bábehiáraꞌ toiorumi to kadake.”
Masusa laluna Iesu láwiꞌ tiꞌara ratarima toIerusale
(Luk. 13:34-35)
37“Óó toIerusale, toIerusale! Kómu miꞌi to mopapate nabiꞌ-nabiꞌ, hai mowatuikou huoꞌána Pueꞌ Ala to haweꞌ i kómu. Handaꞌ kánina Kupoinao mokámpáikou nodo manuꞌ moꞌóbóki ánáꞌna, agáiáná tiꞌaraꞌAꞌ nitarima. 38Nipehádingi! Támbi penómbáꞌámi deꞌe ina napálehi Pueꞌ Ala.#23:38 ina napálehi Pueꞌ Ala: To natunggái Iesu ia miꞌi: 1) Pueꞌ Ala tiꞌara piꞌi ina mohintuwuꞌ hai toSáráeliꞌ nodo to mewaliꞌ miꞌi hangkoia (básá Ieheskie 11:23), 2) i kapohuꞌna Iesu hangko i Támbina Pueꞌ Ala (básá Matiu 24:1), ba 3) i tempóna Ierusale hai Támbina Pueꞌ Ala ragero pare 70M. 39Bona niꞌisá: tiꞌaraPoꞌ ina niꞌita duuꞌna haweꞌ tempóna ina niuliꞌ, ‘Pueꞌ Ala mowátiꞌ tauna to haweꞌ, to mewaliꞌ huoꞌáNa!’ ”#23:39 Básá Sura Petóiá 118:26. Mouláꞌ handaꞌ tauna to mapánde ntepuꞌu motasere Ngkóráꞌna Pueꞌ, i kahaweꞌna huleꞌ Iesu karongkánina, upu-upu tauna ina mopangákuꞌ kaꞌIesuna Datu Topehómpóꞌ, tepasuaꞌ tauna to tiꞌaraheꞌ menosoꞌ hangko i dósáraꞌ. Básá Pilipi 2:10-11.
Currently Selected:
Matiu 23: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
