Matiu 24

Kahópóꞌána duniáꞌ (24:1–25:46)

Kaꞌina magerona Támbina Pueꞌ Ala

(Mrk. 13:1-2; Luk. 21:5-6)

1Roo molaluita, Iesu mopálehi Támbina Pueꞌ Ala. TopeguruNa mohungkukiheꞌ bona motudeꞌá kamababena hai kamaróhóna támbi iti.#24:1 Támbina Pueꞌ Ala rabábehi hangko i watu to mahile ntepuꞌu. Ara watu to haweꞌ 45,500 kiló kamatimina. 2Nahángáꞌáheꞌ Iesu, “Niꞌita miꞌi upu-upuna iti? Bona niꞌisá: ina haweꞌ tempóna, tiꞌara haweꞌ hambuaꞌ watu to ina mentárá i katoroꞌána, bateꞌna ina ragero upu-upu.”#24:2 Rekeꞌ-rekeꞌna iba puloꞌna parena hangko ionoꞌ, kótá Ierusale hai Támbina Pueꞌ Ala ragero toRoma. Iti mewaliꞌ tandaꞌna binataꞌ tiꞌara piꞌi paraluu rasambale rapopenómbá i Pueꞌ Ala láwiꞌ Iesu miꞌi to mewaliꞌ popenómbá to kahópóꞌána. Básá Iberani 9:13-14.

Kapári to hangaa-ngaa mewaliꞌ hangko tiꞌara mani haweꞌ alo pobutusi

(Mrk. 13:3-13; Luk. 21:7-19)

3Roo onoꞌ, Iesu hai topeguruNa pohuꞌheꞌ lao i buluꞌ Saitu.#24:3 buluꞌ Saitu: Buluꞌ iti rapotudaꞌi kau saitu hai mombehambali hai Ierusale, tándáꞌ i mata alo lokeꞌ Kidero. Tangaꞌna Iesu mehoda haduduáNa, laomoheꞌ topeguruNa mekuneꞌ i Hia, “Guru, impirá Támbina Pueꞌ Ala ina ragero nodo to Nuꞌuliꞌ ininá?” Hai mekuneꞌ wopaheꞌ, rauliꞌ, “Apa tandaꞌna kaꞌina haweꞌMu hai kahópóꞌána duniáꞌ?”

4Nahániki Iesu, “Maingáꞌ-ingáꞌkou, bona tiꞌarakou rapakanawoꞌ, 5láwiꞌ handaꞌ tauna ina haweꞌ hai ina manguliꞌ kahirana Datu Topehómpóꞌ, álána handaꞌ tauna ina rapakanawoꞌ. 6Ina nihádi topombeala, hai ina nihádi woꞌo bámbári iumbá-umbá peá ara to mombeala, agáiáná ineeꞌkou malááꞌ. Upu-upu iti bateꞌna ina mewaliꞌ {láwiꞌ napakanótó miꞌi Pueꞌ Ala}. Agáiáná upu-upuna iti tiꞌara mopakanótó kahópóꞌána miꞌi duniáꞌ. 7Tampoꞌ ina mombeala hai tampoꞌ ntániꞌna, kadatuá ina moewaꞌ kadatuá, hai iumbá-umbá peá ina ara rimi hai linu. 8Upu-upuna iti hangko pantepuꞌuána, agáiáná kapári iti ina tetámbái mani karumihina nodo kapári to nahádi towawine to tangaꞌna humádi.

9I tempó iti, ánti peuláꞌmi i Kódóꞌ, tauna i humalele duniáꞌ ina mokáhihiꞌkou. Ina rahuhuꞌkou i topopárentá bona rapopeahiahiꞌkou hai rapapatekou. 10Handaꞌ tauna ina mosápuáka peuláꞌraꞌ i Kódóꞌ. Ara to ina mohuhuꞌ halalu hampepepoináláiraꞌ i ewáliraꞌ, hai handaꞌ tauna to ina mombekáhihiꞌ. 11Ina haweꞌheꞌ woꞌo handaꞌ nabiꞌ to ina mopakanawoꞌ handaꞌ tauna. 12I tempó iti, ina tetámbái kakadakeraꞌ tauna, duuꞌna tiꞌara piꞌi ara kamaꞌahiꞌraꞌ i hángká rángáraꞌ. 13Agáiáná tauna to mepoinálái oaꞌ i Kódóꞌ haweꞌ i kahópóꞌána, ina molámbiꞌheꞌ katueꞌ to maroꞌa to tiꞌara mokahópóꞌá. 14Ane bámbári kana i popárentána Pueꞌ Ala rabámbári miꞌi i humalele duniáꞌ, hai upu-upu tauna mehádi miꞌi, hangko haweꞌ riꞌi kahópóꞌána duniáꞌ.”

Kapári to rumihi to ina mewaliꞌ

(Mrk. 13:14-23; Luk. 21:20-24)

15Iesu mopaliliu wopiꞌi laluitaNa, Nauliꞌ, “Hangkoia, nabiꞌ Danieli mampolaluita kaꞌina haweꞌna ‘To Kadake to Megero’ to mopakedái Támbina Pueꞌ Ala.#24:15 ‘To Kadake to Megero’ to mopakedái Támbina Pueꞌ Ala: Básá to teukiꞌ i Kahirámpuá Laluita. Heáná to mobásá laluita deꞌe, hangaa-ngaa napekiri maroꞌa apa lempóna! Ane niꞌita to natunggái Danieli iti meángkáꞌ i Támbina Pueꞌ Ala, 16rángina miꞌi tauna to toroꞌ i tampoꞌ Iudá#24:16 tauna to toroꞌ i tampoꞌ Iudá: Pare 70M, surudadoꞌ toRoma motolelingi Ierusale ina mampombealaꞌá. Handaꞌ toSarani to mambuhinao laluitana Iesu iti, haneꞌiheꞌ mengkalimba i uwai Iarade melangka lao i kótá Pela i poropensi Dekapoli. mengkatueꞌheꞌ melangka lao i buluꞌ. 17Tauna to tangaꞌraꞌ mehoda mengkakaroo i atuꞌ to hirante, ineeꞌmoheꞌ lebaꞌ mesuaꞌ i lalu támbiraꞌ moala apa-apa, láwiꞌ tiꞌara piꞌi ina ara tempó! 18Tauna to tangaꞌraꞌ i hinoe, ineeꞌmoheꞌ lebaꞌ mesuleꞌ lao i wánuá moala kumbáraꞌ. Hangaa-ngaa liliumoheꞌ melangka! 19Ina masusa ntepuꞌu rahádi towawine to morodua hai to mopahuhu ánáꞌna. 20Mekakaekou i Pueꞌ Ala bona alo pelangkaꞌámi iti ineeꞌ mewaliꞌ i tempó udá#24:20 tempó udá: I tampoꞌ Iudá, tempó lengiꞌ tempó udá. ba i alo penómbáꞌá.#24:20 alo penómbáꞌá: Ane alo penómbáꞌá, toIahudiꞌ tiꞌara peisá molumao melábi hangko i hakiló kakaraoꞌna. 21I tempó iti, ina haweꞌ kapári to rumihi ntepuꞌu to tiꞌara mani hangkani mewaliꞌ mantepuꞌu hangko i pewaliꞌána duniáꞌ duuꞌna haweꞌ deꞌe-deꞌe, hai tiꞌara woꞌo ara to ina mewaliꞌ noꞌonoꞌ i alo to ina haweꞌ.#24:21 Básá woꞌo Danieli 12:1. 22Agáiáná tempó kapári iti ina napahawiáꞌ Pueꞌ Ala, láwiꞌ ane tiꞌara Napahawiáꞌ, tiꞌara ara haweꞌ hadua to ina rapelae. Agáiáná ánti kamaꞌahiꞌNa i tauna to Napileꞌi, onoꞌ miꞌi haneꞌi ina Napahawiáꞌ tempó kapári iti.#24:22 Básá woꞌo 2 Peturuꞌ gáláꞌna ka-3.

23I tempó iti, ane ara to mohángáꞌáꞌákou, ‘Peita, demiꞌe Datu Topehómpóꞌ!’ ba ‘Domi maiꞌo!’ ineeꞌheꞌ nipoinálái, 24láwiꞌ ina haweꞌ handaꞌ tauna to mepakanawoꞌ to manguliꞌ kahirana miꞌi Datu Topehómpóꞌ, ba to manguliꞌ kahirana miꞌi nabiꞌ. Ina mobábehiheꞌ tandaꞌ kuasaꞌ hai tandaꞌ to metingkáráki, bona mopakanawoꞌheꞌ handaꞌ tauna. Mogalo riꞌi tauna to napileꞌi Pueꞌ Ala, ina rapehukáꞌ rapakanawoꞌ. 25Upu-upuna iti Kuhángáꞌámokou ami bona ane mewaliꞌi, tiꞌarakou ina rapakanawoꞌ.

26Mewaliꞌ, ane ara to mohángáꞌákou, ‘Datu Topehómpóꞌ ara i pádá loriꞌ,’#24:26 Ara pehárungáraꞌ toIahudiꞌ, Datu Topehómpóꞌ ina haweꞌ hangko i pádá loriꞌ nodo Musa hangkoia tempóna mesuleꞌ lao i tampoꞌ Másiriꞌ bona mokábáháheꞌ toIberani hangko i karapohawiꞌáraꞌ. ineeꞌkou lao! Ane rauliꞌ, ‘Datu Topehómpóꞌ ara i lalu támbi, mentabuni i lintuꞌ,’ ineeꞌ nipoinálái! 27Láwiꞌ ane haweꞌ huleꞌ Ánáꞌ Mánusiá, ina tongawaꞌ ntepuꞌu kahaweꞌNa. Ina raita i humalele duniáꞌ, nodo pewangkaꞌ kiláꞌ to mesupaꞌ i pembetoá alo hai mewangkaꞌ haweꞌ-haweꞌ i katámpuána alo. 28Pándiriꞌ, ane moitakou handaꞌ tádáhi kóngká hirámpu, niꞌisá kaꞌárána to mate ionoꞌ. Noꞌonoꞌ woꞌo, ina tongawaꞌ ntepuꞌu kahaweꞌna huleꞌ Ánáꞌ Mánusiá mai i duniáꞌ.”

Kaꞌina haweꞌNa huleꞌ Iesu

(Mrk. 13:24-32; Luk. 21:25-33)

29“Ane liu miꞌi tempó kapári iti,

‘alo ina mambáliꞌ mewaliꞌ makáindi,

wulá tiꞌara piꞌi ina mewangkaꞌ,

betue ina manawoꞌ hangko i langiꞌ,

hai Pueꞌ Ala ina mampopoenggo upu-upu to ara i langiꞌ.’#24:29 Básá Iesaia 24:21-23; Ieheskie 32:7-8; Ioeli 2:10,31; 3:15-16; Amosi 8:9. (Iesaia 13:10; 34:4)

30I tempó iti, ina mesupaꞌ tandaꞌ i langiꞌ to molempónga kahaweꞌna miꞌi Ánáꞌ Mánusiá, hai upu-upu tauna i duniáꞌ ina teriaꞌ, láwiꞌ ina moitaheꞌ Ánáꞌ Mánusiá i wongko gawu mendáulu mai hangko i langiꞌ. Ina tongawaꞌ ntepuꞌu kuasaꞌNa hai peawaꞌna tueꞌNa. 31Tamburuꞌ to maoniꞌ ntepuꞌu pokániꞌna ina ratawueꞌ rapasimbuku, hai Ánáꞌ Mánusiá ina mohuoꞌ malaꞌekaNa lao morámpu tauna to Napileꞌi hangko i humalele duniáꞌ, mantepuꞌu hangko i pembetoá alo duuꞌna haweꞌ i katámpuána alo.”

Kahaweꞌna huleꞌ Ánáꞌ Mánusiá rapándiriꞌ nodo kau ara

32Roo onoꞌ, Iesu molaluita i topeguruNa, Nauliꞌ, “Nipailalu apa to ina Kupaturoꞌákou moliu pándiriꞌ hangko i kau ara. Ane niꞌita dáꞌána motumbeꞌ hai mantepuꞌu motaweꞌ, niꞌisá miꞌi kaꞌina haweꞌna tempó alo. 33Noꞌonoꞌ woꞌo, ane niꞌita pewaliꞌna upu-upu to Kupahaweꞌákou ininá, niꞌisá katiꞌárána piꞌi marue ina haweꞌ miꞌi kahópóꞌána duniáꞌ.#24:33 ina haweꞌ miꞌi kahópóꞌána duniáꞌ - I lalu básá Iunani: hungkuꞌ miꞌi i babaꞌá. 34Toꞌu ntepuꞌu to Kuhángáꞌákou: upu-upu to Kuꞌuliꞌ ininá bateꞌna ina mewaliꞌ hangko tiꞌara mani mate upu-upu tauna to tueꞌ tempó deꞌe.#24:34 hangko tiꞌara mani mate upu-upu tauna to tueꞌ tempó deꞌe - Peisá woꞌo ralempónga: hangko tiꞌara mani hópóꞌ tempó deꞌe. Lempóna: hangko tiꞌara mani haweꞌ kahópóꞌána duniáꞌ. 35Langiꞌ hai duniáꞌ ina magero, agáiáná laluitaNgkuꞌ bateꞌna ina ara oaꞌ haweꞌ i rue-ruena.”#24:35 To natunggái Iesu, laluitaNa hibali hai laluitana Pueꞌ Ala. Básá Sura Petóiá 119:89; Iesaia 40:8.

Hangaa-ngaa timamakeꞌ oaꞌ kaꞌina haweꞌna huleꞌ Iesu

(Luk. 17:26-30,34-36)

36“Agáiáná alo hai jaa pewaliꞌna upu-upuna iti,#24:36 alo hai jaa pewaliꞌna upu-upuna iti: I lalu Pototowiá to Sae, molempónga alo pobutusi (básá Iesaia 2:11; Amosi 5:18; Mika 5:10-13), hai i alo iti Pueꞌ Ala ina mobutusi kárá-káráraꞌ tauna (básá 1 Tesalonika 5:1-2). bateꞌna peá UmáNgkuꞌ to moisá. Tiꞌara ara haweꞌ hadua tauna to moisá. Mogalo malaꞌeka to i surugáꞌ, tiꞌara woꞌo raisá. Hai ÁnáꞌNa Pueꞌ Ala, tiꞌara woꞌo Naisá. 37Apa to mewaliꞌ hangkoia i tempóna nabiꞌ Noho tueꞌ mani, ina mewaliꞌ woꞌo i alo kahaweꞌána huleꞌ Ánáꞌ Mánusiá. 38I tempóna nabiꞌ Noho hangko tiꞌara mani duniáꞌ nalábóꞌ uwai, tauna mampomaleꞌaheꞌ, tiꞌara raisá apa to ina merampe. Mandeꞌ hai mainuheꞌ oaꞌ, mosambokoheꞌ hai mosusaheꞌ. Noꞌonoꞌ katueꞌraꞌ duuꞌna haweꞌ tempóna nabiꞌ Noho mesuaꞌ i lalu duanga to mahile.#24:38 Básá Pewaliꞌána 6:9–7:24. 39Nalábóꞌmoheꞌ uwai hangko raisá riꞌi apa to mewaliꞌ. Noꞌonoꞌ woꞌo kamampomaleꞌaraꞌ tauna i tempóna Ánáꞌ Mánusiá ina haweꞌ huleꞌ i duniáꞌ. 40Rápáꞌna, rodua tauna ina mobágóꞌ i hinoe: hadua ina raꞌala hai to haduána rapálehi. 41Noꞌonoꞌ woꞌo rodua towawine to tangaꞌraꞌ mombau: hadua ina raꞌala hai to haduána rapálehi. 42Onoꞌ miꞌi haneꞌi Kuꞌuliꞌ: hangaa-ngaa nipatimama lalumi, láwiꞌ tiꞌara niꞌisá impirá Pueꞌ ina haweꞌ!

43Hangaa-ngaa nipailalu ngkóráꞌ pándiriꞌ deꞌe: Ane kenaisái ami pueꞌ támbi impirá kaꞌina haweꞌna topanako, bateꞌna maingáꞌ-ingáꞌ, tiꞌara ina napatodáhi mesuaꞌ i lalu támbina. 44Noꞌonoꞌ woꞌo kómu: hangaa-ngaa timamakou oaꞌ, láwiꞌ kaꞌina haweꞌna huleꞌ Ánáꞌ Mánusiá, tiꞌara niꞌisá impirá tempóna.”

Ngkóráꞌ pándiriꞌ kana hadua hawiꞌ to mampopolumao oaꞌ bágóꞌna

(Luk. 12:41-48)

45“Nipailalu ngkóráꞌ pándiriꞌ deꞌe: Ara hadua hawiꞌ to manótó laluna hai peisá napoinálái pueꞌna. Ia naꞌángkáꞌ pueꞌna bona motadulakoi hawiꞌ ntániꞌna hai mokádipurá pandeꞌraꞌ alo-alona. 46Morasiꞌ ntepuꞌu hawiꞌ iti ane i pesuleꞌna pueꞌna, ia nalámbiꞌ pueꞌna tangaꞌna mampopolumao bágóꞌna. 47Hai Kuhángáꞌáꞌákou: hawiꞌ iti bateꞌna ina naꞌángkáꞌ pueꞌna mewaliꞌ to mokádipurá upu-upu párewána.

48Agáiáná noumbá ane tiꞌara maroꞌa pambiárána hawiꞌ iti? Ina nauliꞌ i laluna, ‘Pueꞌkuꞌ tiꞌara ina poloꞌ mesuleꞌ!’ Mewaliꞌ ia tiꞌara piꞌi ina mampopolumao bágóꞌna. 49Ina natepuꞌu mopapaháiheꞌ hangka hawiꞌna, haneꞌi mandeꞌ hai mainu peheꞌ oaꞌ hingkakani hai tauna to malangu. 50Agáiáná hangkaꞌ-hangkaꞌ perái ina haweꞌ pueꞌna i tempó to tiꞌara nasangka-sangka. 51Hawiꞌ iti ina napapahái pueꞌna hai ratibe i katoroꞌá tauna to mampe to maroꞌa. Ionoꞌ, tauna to rahuku ina teriaꞌ hai mapári ntepuꞌu rahádi.”

Currently Selected:

Matiu 24: NTBEP

Highlight

Copy