Matiu 25

Ngkóráꞌ pándiriꞌ kana i hampuloꞌ ánáꞌntawine

1Iesu mopaliliu laluitaNa, Nauliꞌ, “Ane haweꞌ huleꞌ Ánáꞌ Mánusiá i kadatuáNa, pewaliꞌna nodo ngkóráꞌ pándiriꞌ deꞌe: hampuloꞌ ánáꞌntawine lao mampegiá modupaꞌ tobaleilo to ratauna. Hadua-haduaheꞌ moánti palitaraꞌ. 2Limaheꞌ to tiꞌara timama, hai limaheꞌ woꞌo to timama. 3Ánáꞌntawine to lima to tiꞌara timama iti, moántiheꞌ palitaraꞌ, agáiáná tiꞌara melábi minaraꞌ,#25:3 mina: Tempó onoꞌ, tauna mopakeꞌ lana hangko i wuaꞌ saitu i palitaraꞌ. 4hai ánáꞌntawine to lima to timama, moántiheꞌ palitaraꞌ hai moántiheꞌ woꞌo mina to ina rapopotámbái minana palitaraꞌ. 5Tobaleilo to ina ratauna iti, marue ntepuꞌu hangko haweꞌ riꞌi, álána maleluemoheꞌ ánáꞌntawine iti, hai kahópóꞌána letaꞌmoheꞌ upu-upu.

6Tangaꞌ káindi, hangkaꞌ-hangkaꞌ perái ara tauna to mekióꞌ, ‘Tobaleilo to ratauna haweꞌ miꞌi! Maimokou, nidupaꞌ miꞌi.’ 7Kapearóraꞌ ánáꞌntawine to hampuloꞌ iti, hadua-haduaheꞌ mopatimama palitaraꞌ. 8Ánáꞌntawine to tiꞌaraheꞌ timama iti membiáꞌheꞌ mina i rángáraꞌ to timama, rauliꞌ, ‘Donggo, niweꞌi wongkaiꞌkaa minami hantóiꞌ, ina mate miꞌi palitangkiꞌ.’

9Agáiáná rahánikiheꞌ ánáꞌntawine to timama iti, rauliꞌ, ‘Tiꞌara paꞌi gáná kipakeꞌ ane kigáláꞌá wopakou. Rángina miꞌi laokou mehóló i topobaluꞌ-baluꞌ mina.’ 10Pohuꞌ mpuꞌumoheꞌ ánáꞌntawine to tiꞌara timama iti lao mohóló mina. Tangaꞌraꞌ mehóló, haweꞌ miꞌi tobaleilo to ratauna. Ánáꞌntawine to lima to timama iti, liliuheꞌ lao i támbi posusaꞌá hingkakani hai tobaleilo to ratauna, hai mesuaꞌheꞌ hingkakani hai upu-upu torare. Upu onoꞌ, babaꞌ ratuko miꞌi.

11Tiꞌara marue hangko ionoꞌ, haweꞌmoheꞌ ánáꞌntawine to tiꞌara timama. Mekióꞌheꞌ hangko i rawa, rauliꞌ, ‘Tuá! Nubungkáhiá wongkaiꞌkaa babaꞌ!’

12Agáiáná mehániꞌ tobaleilo to ratauna, nauliꞌ, ‘Tiꞌarakou kuisá.’ ”#25:1-12 I lalu ngkóráꞌ pándiriꞌ deꞌe, tobaleilo to ratauna mopándiriꞌ Pueꞌ Iesu to ina mai moala tauna to mepoinálái, haneꞌiheꞌ Naꞌánti lao i surugáꞌ bona toroꞌheꞌ hingkakani. Tobaleilo to ratauna tiꞌara hawiáꞌ haweꞌ, lempóna: ina marue mani Iesu hangko mesuleꞌ. Alo kahaweꞌána tobaleilo to ratauna mopándiriꞌ Alo Pobutusi.

13Napahópóꞌ Iesu ngkóráꞌ pándiriꞌ iti, Nauliꞌ, “Mewaliꞌ hangaa-ngaa timamakou oaꞌ, láwiꞌ tiꞌara niꞌisá impirá kaꞌina haweꞌáNgkuꞌ.”

Ngkóráꞌ pándiriꞌ kana i tálu hawiꞌ

(Luk. 19:12-27)

14Iesu mopahaweꞌ wopiꞌi hampákáꞌ ngkóráꞌ pándiriꞌ, Nauliꞌ, “Ane haweꞌ huleꞌ Ánáꞌ Mánusiá i kadatuáNa, pewaliꞌna nodo ngkóráꞌ pándiriꞌ deꞌe: Hadua tuꞌáná moliwo ina pohuꞌ lao i kótá to karaoꞌ. Hangko tiꞌara mani pohuꞌ, ia mokióꞌheꞌ hawiꞌna hai naweꞌiheꞌ dóiꞌ rapopobunduꞌ bona ara ánáꞌna. 15Hadua-hadua naweꞌiheꞌ mouláꞌ pebukuáraꞌ. Hadua naweꞌi lima sábuna dóiꞌ buláwá,#25:15 lima sábuna dóiꞌ buláwá - I lalu básá Iunani: lima talenta. Imbaꞌna hambuaꞌ talenta hibali hai sarona hadua tauna ane mobágóꞌ hampuloꞌ hai lima parena lábi. hadua rosábu, hai hadua woꞌo hasábu. Roo onoꞌ, pohuꞌ miꞌi. 16Hawiꞌ to naweꞌi lima sábuna dóiꞌ buláwá iti, liliu napopobunduꞌ mampeliꞌ ánáꞌna, mewaliꞌ nalámbiꞌ mpuꞌu miꞌi ánáꞌna lima woꞌo sábuna. 17Noꞌonoꞌ woꞌo hawiꞌ to raweꞌi rosábu dóiꞌ buláwá molámbiꞌ woꞌo ánáꞌna rosábu. 18Agáiáná hawiꞌ to raweꞌi peá hasábu lao riꞌi mokae tampoꞌ napowuniꞌi dóiꞌ to naweꞌi pueꞌna iti.

19Marue hangko ionoꞌ, mesuleꞌ miꞌi pueꞌraꞌ hai mokióꞌheꞌ hawiꞌna. I kahaweꞌraꞌ hawiꞌna, napekuneꞌ miꞌi noumbá karapopobunduꞌna dóiꞌna. 20Hawiꞌ to naweꞌi lima sábuna dóiꞌ buláwá moánti i pueꞌna hampuloꞌ sábuna, nauliꞌ, ‘Tuá, to nuweꞌiaꞌ hangkoia lima sábuna, hai deꞌe miꞌi woꞌo ánáꞌna, lima sábuna.’

21Nauliꞌ pueꞌna, ‘Maroꞌa ntepuꞌu kanupopolumaona bágóꞌ to kuweꞌikoꞌ. Mewaliꞌ ánti katetidaꞌmu i bágóꞌ to manangkoꞌ, kupoináláiákoꞌ bágóꞌ to matimi. Maimokoꞌ hingkakani hai kódóꞌ i lalu kagóeꞌ-góeꞌ.’

22Hawiꞌ to raweꞌi rosábu dóiꞌ buláwá haweꞌ woꞌo, nauliꞌ, ‘Tuá, to nuweꞌiaꞌ hangkoia rosábu, hai deꞌe miꞌi woꞌo ánáꞌna, rosábu.’

23Nauliꞌ pueꞌna iti, ‘Maroꞌa ntepuꞌu kanupopolumaona bágóꞌ to kuweꞌikoꞌ. Mewaliꞌ, ánti katetidaꞌmu i bágóꞌ to manangkoꞌ, kupoináláiákoꞌ bágóꞌ to matimi. Maimokoꞌ hingkakani hai kódóꞌ i lalu kagóeꞌ-góeꞌ.’

24Roo onoꞌ, haweꞌ miꞌi woꞌo hawiꞌ to raweꞌi hasábu, nauliꞌ, ‘Tuá, kuisá io hadua tauna to masodokoꞌ. Nuisá peá motarima hangko i apa to tiꞌara nupowonggoꞌ. Nuhuoꞌangkaiꞌ mehuꞌá hai mantudaꞌ, bona i hio aha wuaꞌna! 25Malááꞌaꞌ i hio tuá, onoꞌ miꞌi haneꞌi laoaꞌ mowuni dóiꞌmu i lalu tampoꞌ. Mewaliꞌ, deꞌe miꞌi dóiꞌmu. Kupopesuleꞌ peá huleꞌ.’

26Nauliꞌ pueꞌna iti, ‘Kadake ntepuꞌukoꞌ hai lohekoꞌ woꞌo mobágóꞌ! Nuisá kódóꞌ deꞌe tauna to mampoweꞌiaꞌ topobágóꞌkuꞌ bágóꞌ to matimi. Kuhuoꞌheꞌ mehuꞌá hai mantudaꞌ, bona i kódóꞌ aha wuaꞌna! 27Mewaliꞌ, moapa riꞌi haneꞌi tiꞌara nupeweꞌi dóiꞌ iti i tauna ntániꞌna, bona ia to mampopobunduꞌ dóiꞌkuꞌ? Ane kenoꞌonoꞌ to nubábehi, i pesuleꞌkuꞌ ketiꞌara hasábu peá to kutarima, kehangaa-ngaa hante ánáꞌna woꞌo!’

28Nauliꞌ wopiꞌi pueꞌna iti i hawiꞌna to haduána, ‘Nuala dóiꞌ to ara i hia, nuweꞌi i hawiꞌkuꞌ to molámbiꞌ miꞌi hampuloꞌ sábuna dóiꞌ buláwá, 29láwiꞌ tauna to peisá rapoinálái hai apa to raweꞌi, ina raweꞌi wopiꞌi bona tetámbái. Agáiáná tauna to tiꞌara peisá rapoinálái, kehapiꞌ hantóiꞌ peá to ara i hia, bateꞌna ina raꞌala huleꞌ. 30Hai hawiꞌkuꞌ to tiꞌara mobunduꞌ, nitibe karaoꞌ i lalu kakáindiána. Ionoꞌ tauna to rahuku ina teriaꞌ hai mapári ntepuꞌu rahádi.’ ”

I alo pobutusi, Ánáꞌ Mánusiá ina mogááꞌ tauna mewaliꞌ rontobu

31Iesu mopaliliu laluitaNa i topeguruNaheꞌ, Nauliꞌ, “Ane haweꞌ huleꞌ Ánáꞌ Mánusiá, ina meawaꞌ tueꞌNa hai maróhó ntepuꞌu kuasaꞌNa. Ia ina raporángá upu-upu malaꞌeka, hai Ia ina mehoda i pehodaꞌá kadatuáNa to meawaꞌ.#25:31 Básá Danieli 7:13-14. 32Upu-upu tauna i duniáꞌ ina hirámpu i lindoꞌNa hai ina Nagááꞌheꞌ mewaliꞌ rontobu, nodo topoewu mopataniꞌ dimbá hai bekeꞌ. 33Tauna to mampeuláꞌi peundeꞌána Pueꞌ Ala ina Napahantobuheꞌ tándáꞌ i kuánáNa, hai tauna to tiꞌara mampeuláꞌi peundeꞌána Pueꞌ Ala ina Napahantobuheꞌ tándáꞌ i kabeoꞌNa.

34Hai Datu iti ina mohángáꞌáheꞌ to tándáꞌ i kuánáNa, ‘Maimokou to nawátiꞌ UmáNgkuꞌ! Mesuaꞌmokou i lalu popárentáNgkuꞌ to Kupatimamaꞌámokou ami#25:34 to Kupatimamaꞌámokou ami: Básá Roma 8:17; Kolose 3:24; Iakobu 2:5; 1 Peturuꞌ 1:4. hangko i karapopewaliꞌna duniáꞌ, 35láwiꞌ i tempóNgkuꞌ marimi, nipaꞌandeꞌAꞌ. MangkadoꞌuAꞌ, nipopainuAꞌ. TempóNgkuꞌ mewaliꞌ torare, nitarimaꞌAꞌ. 36Tiꞌara ara waruꞌKuꞌ, nipoweꞌiAꞌ waruꞌ. I tempóna tiꞌara Kulalu, nipákupuiAꞌ. TangaꞌKuꞌ ratarungku, niweoꞌAꞌ.’

37Ina mehániꞌheꞌ tauna to manótó i peitána Pueꞌ Ala to meángkáꞌ tándáꞌ i kuánána Datu iti, rauliꞌ, ‘Pueꞌ, impiráKoꞌ kiꞌita marimi hai kipaꞌandeꞌKoꞌ, ba mangkadoꞌuKoꞌ hai kipopainuKoꞌ? 38ImpiráKoꞌ haweꞌ, hai kipotorareKoꞌ? ImpiráKoꞌ kiꞌita tiꞌara ara waruꞌMu, hai kipoweꞌiKoꞌ waruꞌ? 39Impirá tiꞌara Nulalu hai kipákupuiKoꞌ, ba i lalu tarungku, hai kiweoꞌKoꞌ?’

40Hai ina nahánikiheꞌ Datu, ‘Bona niꞌisá: apa to nibábehi i tempómi motulungi tauna ntániꞌna, kehapiꞌ hadua peá to meahiahiꞌ tueꞌna, lempóna, iti miꞌi to nibábehi i Kódóꞌ.’

41Roo onoꞌ, ina Nahángáꞌáheꞌ to meángkáꞌ tándáꞌ i kabeoꞌNa, ‘Pohuꞌmokou hangko i lindoꞌKuꞌ, kómu to hárárá i UmáNgkuꞌ! Mesuaꞌmokou i lalu api to roreꞌ oaꞌ, to rapatimamaꞌá miꞌi ami Datu Tokadake hai upu-upu malaꞌekana, 42láwiꞌ i tempóNgkuꞌ marimi, tiꞌaraꞌAꞌ nipaꞌandeꞌ. MangkadoꞌuAꞌ, tiꞌaraꞌAꞌ nipopainu. 43HaweꞌAꞌ, tiꞌaraꞌAꞌ nipotorare. Tiꞌara ara waruꞌKuꞌ, tiꞌaraꞌAꞌ nipoweꞌi pewaruꞌ. Tiꞌara Kulalu, tiꞌaraꞌAꞌ nipákupui. TangaꞌKuꞌ ratarungku, tiꞌaraꞌAꞌ niweoꞌ.’

44Ina rahániki woꞌo, ‘Pueꞌ, impiráKoꞌ kiꞌita marimi ba mangkadoꞌu ba nodo tohaweꞌ, ba tiꞌaraKoꞌ mewaruꞌ, ba tiꞌara Nulalu, ba ratarungkuKoꞌ, hai tiꞌaraKoꞌ kitulungi?’

45Hai ina nahánikiheꞌ Datu, ‘Bona niꞌisá: ánti katiꞌárámi motulungi tauna to meahiahiꞌ tueꞌraꞌ, lempóna, Kódóꞌ miꞌi to tiꞌara nitulungi.’ ”

46Napahópóꞌ Iesu laluitaNa, Nauliꞌ, “Upu-upu tauna to kadake iti ina ratibeheꞌ i lalu naraka hai ina rahukuheꞌ duuꞌna i rue-ruena, agáiáná tauna to manótó i peitána Pueꞌ Ala ina molámbiꞌheꞌ katueꞌ to maroꞌa to tiꞌara mokahópóꞌá.”

Currently Selected:

Matiu 25: NTBEP

Highlight

Copy