Matiu 27

Iesu rabutusi hangaa-ngaa rahuku mate

1Kahalona mepulo-pulo,#27:1 Mouláꞌ áturáraꞌ toIahudiꞌ, ane káindi mani, tiꞌaraheꞌ peisá mobutusi bona tauna rahuku mate. upu-upu kapalaꞌ tadulako menómbá hai totosaeraꞌ toIahudiꞌ to ntániꞌna mobutusi Iesu hangaa-ngaa rahuku mate. 2Hangko ionoꞌ, Ia ratimpuku wopiꞌi haneꞌi raꞌánti lao i lindoꞌna Mágáuꞌ Pilatu {láwiꞌ topopárentá Roma peá to peisá mohuku mate tauna}.#27:2 topopárentá Roma peá to peisá mohuku mate tauna: Básá Iohane 18:31. Mewaliꞌ tadulakoraꞌ toIahudiꞌ hangaa-ngaa mampeliꞌheꞌ álásá to ina ratarima topopárentá Roma.

Iudasiꞌ nahohoꞌ inaona mampobaluꞌ Iesu

3I kanaisána peá Iudasiꞌ to mohuhuꞌ miꞌi Iesu i ewáliNa, kana pobutusiraꞌ tadulako-tadulako menómbá hai totosaeraꞌ toIahudiꞌ to ntániꞌna Iesu hangaa-ngaa rahuku mate, nahohoꞌ miꞌi inaona. Onoꞌ haneꞌi lao miꞌi i kapalaꞌ-kapalaꞌ tadulako menómbá hai totosaeraꞌ toIahudiꞌ, ina mampopesuleꞌáheꞌ dóiꞌ peráꞌ to tálu puloꞌna pepaꞌna. 4Nauliꞌ, “Madósámoꞌ! Mampobaluꞌaꞌ tauna to tiꞌara masalaꞌ, álána rabutusi hangaa-ngaa rahuku mate!”#27:4 Ane tauna motarima dóiꞌ bona tauna ntániꞌna ina mate, tauna iti ina hárárá i Pueꞌ Ala. Básá Pohuleki 27:25.

Rahániki, “Apa ripaꞌi haneꞌi kiꞌisá riꞌi kaiꞌ? Iti bábehiámu haduduámu!” 5Hangko ionoꞌ, natelánga Iudasiꞌ dóiꞌ iti i lalu Támbina Pueꞌ Ala,#27:5 Bábehiána Iudasiꞌ iti mobukeki apa to teukiꞌ i Sakaria 11:13. haneꞌi lao menoꞌo mengkalintóe. 6Dóiꞌ iti rarámpu kapalaꞌ-kapalaꞌ tadulako menómbá, haneꞌi rauliꞌ, “Dóiꞌ deꞌe poposuláꞌ waheꞌ. Mouláꞌ áturá ágámántaꞌ, dóiꞌ deꞌe tiꞌara peisá rapakeꞌ i Támbina Pueꞌ Ala.” 7Himpudumoheꞌ bona dóiꞌ iti rapopehóló tampoꞌ to rauliꞌ Tampoꞌ Topoteru Kori, bona tampoꞌ iti rapakeꞌ rapopatawui tauna to tiꞌara toIahudiꞌ. 8Onoꞌ miꞌi haneꞌi tampoꞌ iti rahangaꞌ Tampoꞌ Waheꞌ duuꞌna deꞌe-deꞌe.

9Bábehiáraꞌ kapalaꞌ-kapalaꞌ tadulako menómbá iti mobukeki apa to natunggái nabiꞌ Ieremia#27:9-10 Matiu mopakeꞌ hangaꞌna nabiꞌ Ieremia láwiꞌ ntóáꞌna tunggáiána mokana i tampoꞌ, hai iti to tepakanótó miꞌi i surana Ieremia. (Básá Ieremia 32:6-9.) Ieremia woꞌo mosulewátái poukiꞌraꞌ upu-upu nabiꞌ, tepasuaꞌ Sakaria. hangkoia, to manguliꞌ node:

“Tálu puloꞌna pepaꞌna dóiꞌ peráꞌ ina raꞌala

láwiꞌ iti miꞌi hólóna hadua tauna

to rapakanótó toSáráeliꞌ,

10hai ina rapopehóló tampoꞌna topoteru kori.

Iti ina mewaliꞌ mouláꞌ hawaꞌna Pueꞌ Ala i kódóꞌ.” (Sakaria 11:12-13)

Iesu i lindoꞌna Pilatu

(Mrk. 15:1-15; Luk. 23:1-5,13-25; Ioh. 18:33–19:16)

11I karabutusina miꞌi Iesu hangaa-ngaa mate, Ia raꞌánti miꞌi i lindoꞌna Mágáuꞌ Pilatu bona peisá rahuku mate. Mekuneꞌ miꞌi Pilatu i Hia, nauliꞌ, “Ba Io mpuꞌui daturaꞌ toIahudiꞌ?”#27:11 ToIahudiꞌ mosalaꞌi Iesu, rauliꞌ Ia Daturaꞌ toIahudiꞌ bona Pilatu mampekiri Iesu moewaꞌ topopárentá toRoma.

Nahániki Iesu, “Io haduduámu to manguliꞌ noꞌonoꞌ.”

12Agáiáná upu-upu to rasalaꞌiá kapalaꞌ-kapalaꞌ tadulako menómbá hai totosaeraꞌ toIahudiꞌ, tiꞌara nahániki Iesu. 13Onoꞌ miꞌi haneꞌi mekuneꞌ wopiꞌi Pilatu i Hia, nauliꞌ, “Tiꞌara paꞌi Nuhádi upu-upu to rasalaꞌiáKoꞌ? {Moapa riꞌi haneꞌi tiꞌaraKoꞌ mampetawaꞌi wátáMu?}” 14Agáiáná Iesu maniiꞌ-niiꞌ peá, onoꞌ miꞌi haneꞌi wuli ntepuꞌu Pilatu iti.#27:14 Hangko tiꞌara mani Pilatu mopahaweꞌ pobutusina, napehuoꞌá bona Iesu raꞌánti i lindoꞌna Datu Herode Antipa. Básá Lukasi 23:6-12.

Rabutusi bona Iesu rahuku mate hai Baraba rakábáhá

15Pare-parena i Alo Mahile Posusa Paska, biásána Mágáuꞌ mokábáhá hadua tauna to ratarungku, mouláꞌ popakanótóraꞌ tauna to handaꞌ. 16I pare iti, ara hadua to ratarungku to raisá ntepuꞌu tauna to handaꞌ. Hangaꞌna Iesu Baraba.#27:16 Baraba - Lempóna: “ánáꞌna umána”. 17Mewaliꞌ, i tempóna Pilatu mehoda ina mobutusi kárá-kárána Iesu, handaꞌ tauna to hirámpu miꞌi ionoꞌ. Nakuneꞌheꞌ Pilatu, nauliꞌ, “Heáná to niundeꞌ kukábáháꞌákou pare deꞌe? Iesu Baraba, ba Iesu to rauliꞌ Datu Topehómpóꞌ?” 18Pilatu manguliꞌ noꞌonoꞌ láwiꞌ naisá tadulakoraꞌ toIahudiꞌ mohuhuꞌ Iesu i hia ánti kamahiniꞌraꞌ peá {láwiꞌ handaꞌ ntepuꞌu tauna to meuláꞌ i Hia}.

19I tempóna Pilatu mehoda ina mobutusi kárá-kárána Iesu, haweꞌ miꞌi hadua huoꞌá hangko i toinána Pilatu moánti tewái, nauliꞌ, “Ara tewái hangko i toinámu, nauliꞌ node: Masusa lalungkuꞌ láwiꞌ iakáindi mampaturuáꞌaꞌ to meriringkuꞌi mokana i tauna to nuhoda-hoda. Mewaliꞌ, ineeꞌ nuhuku tauna iti to tiꞌara ara salaꞌNa!”

20Agáiáná kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna mopakaꞌamuꞌ laluraꞌ tauna to handaꞌ, rahángáꞌáꞌáheꞌ, “Hangaa-ngaa nipembiáꞌ i Mágáuꞌ Pilatu bona Baraba to nakábáhá, hai Iesu to nahuku mate!”

21Mekuneꞌ wopiꞌi Mágáuꞌ Pilatu i tauna to handaꞌ, nauliꞌ, “Hangko i oloꞌraꞌ tauna to rodua deꞌe, heáná mpuꞌu to niundeꞌ kukábáháꞌákou?”

Rahániki peá, “Baraba!”

22Napekuneꞌ wopiꞌi Pilatu, “Ane noꞌonoꞌi, kupanoumbá miꞌi Iesu to rauliꞌ Datu Topehómpóꞌ?”

Rahániki, “Pakuꞌmode!”

23Napekuneꞌ wopiꞌi Pilatu, “Salaꞌ apa riꞌi to Nabábehi?”

Agáiáná monganga-nganga peheꞌ oaꞌ rapasimbuku, rauliꞌ, “Pakuꞌmode! Pakuꞌmode!”

24Kahópóꞌána naisá Pilatu tiꞌara piꞌi ara bunduꞌna polaluitana, ngkáliꞌna mantámbái riꞌi pohewo-heworaꞌ, onoꞌ haneꞌi moala miꞌi uwai hai mobahoꞌi taena i lindoꞌraꞌ tauna to handaꞌ, haneꞌi nauliꞌ, “Membahoꞌaꞌ bona niꞌisá tiꞌara kupesuaꞌi kanipapatena tauna deꞌe to tiꞌara ara salaꞌNa! Kómu rái to molámbiꞌ háwángina.”

25Mehániꞌ tauna to handaꞌ, rauliꞌ, “Tiꞌaranto moapa. Kaiꞌnto to ina mampohurunga kamateNa iti, haweꞌ-haweꞌ i pemuleꞌángkiꞌ.”

26Hangko ionoꞌ, Mágáuꞌ Pilatu mokábáháꞌámoheꞌ Baraba, hai mohuhuꞌ Iesu i surudadoꞌna haneꞌiheꞌ nahángáꞌá bona Iesu rahepe sieruꞌ hai gulaꞌ,#27:26 Gulaꞌ iti rabábehi hangko i koliꞌ binataꞌ to rapopatakaꞌi besiꞌ ba buꞌu i wuntuna. Tauna peisá mate ane rahepe láwiꞌ kewaheꞌ ntepuꞌu. Básá woꞌo Iesaia 52:14. hangko rapakuꞌ i kau mombehape.

Surudadoꞌ mopakóiꞌ Iesu

(Mrk. 15:16-20; Ioh. 19:2-3)

27Karoona Iesu rahepe, surudadoꞌnaheꞌ Mágáuꞌ Pilatu moánti Iesu lao i katoroꞌáraꞌ i lalu támbina Mágáuꞌ,#27:27 Handaꞌheꞌ surudadoꞌ toRoma to mobágóꞌ i Ierusale toroꞌ i támbina Mágáuꞌ Pilatu. Támbina iti peisá woꞌo rauliꞌ “Praetorium”. Babilaꞌ Praetorium iti ara i Bente Antonia, i wongko tándáꞌ i mata alo Támbina Pueꞌ Ala. hai mokióꞌheꞌ handaꞌ rángáraꞌ lao motolelingi. 28Ralosu miꞌi kumbána Iesu haneꞌi rapakeꞌá kumbá to malei makámumu. 29Mobábehiheꞌ hambuaꞌ tatali nodo tatali datu, agáiáná hangko i kau dui to mowáláá, haneꞌi ratataliꞌiá. Raweꞌi woꞌo hambuaꞌ laiꞌ rapopatibaaꞌá tae kuánáNa nodo to natibaaꞌ datu, haneꞌi molingkuduheꞌ i lindoꞌNa. Mopakóiꞌheꞌ Iesu, rauliꞌ, “KibiláꞌKoꞌ, daturaꞌ toIahudiꞌ!” 30Ratitinuduhi iti Iesu, haneꞌi raꞌala laiꞌ to i taeNa rabóbáꞌá wuáꞌNa.#27:30 Básá Iesaia 50:5-6; 53:3,5,7-8; hai Matiu 20:18-19. 31Karoona rapakóiꞌ, ralosu miꞌi kumbá to rapakeꞌá ininá, hai rapakeꞌá huleꞌ kumbáNa haduduáNa. Roo onoꞌ, Iesu raꞌánti miꞌi lao i rawa kótá bona rapakuꞌ i kau mombehape.

Iesu rapakuꞌ i kau mombehape

(Mrk. 15:21-32; Luk. 23:26,33-43; Ioh. 19:17-24)

32Tempóraꞌ Iesu hai surudadoꞌ molumao lao i rawa kótá Ierusale, hidupaꞌheꞌ hai hadua tauna to rahangaꞌ Simoꞌ. Simoꞌ iti hangko i kótá Kirene.#27:32 Kirene ia miꞌi kótá to mahile i poropensi Kirenaika, i Afrika tándáꞌ i wongko. Handaꞌ toIahudiꞌ to toroꞌ ionoꞌ. Babilaꞌ Simoꞌ lao i kótá Ierusale ina mouláꞌ Posusa Paska. Surudadoꞌ toRoma mopasaꞌheꞌ Simoꞌ mopáháꞌá kau popakuꞌána Iesu {láwiꞌ tiꞌara piꞌi nabuku Iesu}. 33Tiꞌara marue, haweꞌmoheꞌ i katoroꞌá to rahangaꞌ Gologota,#27:33 Gologota - hangko i básá Árá. I lalu básá Latin: Kalvari. lempóna buluꞌ Bangaꞌwuáꞌ. 34Ionoꞌ, Iesu rapopainu anggoroꞌ to ragalo hai pákupu to mapaiꞌ {bona tiꞌara gaga mahái Nahádi}, agáiáná Napemina hantódiꞌ peá, haneꞌi lohe mainu.#27:34 Iti mobukeki apa to teukiꞌ i Sura Petóiá 69:22. Iesu tiꞌara moundeꞌ mainu láwiꞌ Naundeꞌ mani mohádiá upu-upu to hangaa-ngaa mewaliꞌ bona Ia peisá mohómpóki tauna hangko i huku dósá.

35Roo onoꞌ, Iesu {ralosui haneꞌi} rapakuꞌ i kau mombehape, hai waruꞌNa raꞌala ragáláꞌ-gáláꞌheꞌ surudadoꞌ. Agáiáná hangko tiꞌara maniheꞌ mogáláꞌ-gáláꞌ waruꞌna Iesu, ioruheꞌ hampaiꞌ mobolobiaꞌ bona raisá heáná to molámbiꞌ waruꞌna Iesu.#27:35 Iti mobukeki apa to teukiꞌ i Sura Petóiá 22:19. Waruꞌna Iesu: kumbá, badu, báná pekakae, pampou hai sandale. Taisá ibaheꞌ surudadoꞌ (básá Iohane 19:23). 36Hangko ionoꞌ, mehodaheꞌ mokámpái Iesu. 37I kau popakuꞌáNa iti, i wongko wuáꞌNa, rapatakaꞌ hambóhóꞌ pata to rapoukiꞌi apa to rasalaꞌiá Iesu. Node ukiꞌna:

Deꞌe Miꞌi Iesu Daturaꞌ ToIahudiꞌ.

38Tempó onoꞌ, ara woꞌo rodua toperampaꞌ to rapakuꞌ i kau mombehape, hadua tándáꞌ i kuánána Iesu, hadua tándáꞌ i kabeoꞌNa.

39Tauna to melempó ionoꞌ, mobibiliheꞌ mopakóiꞌ Iesu,#27:39 Iti mobukeki apa to teukiꞌ i Sura Petóiá 22:8. Teukiꞌ miꞌi ami hasábu parena hangko tiꞌara mani mewaliꞌ. 40rauliꞌ, “Ee! Nuꞌuliꞌ ina mogeroKoꞌ Támbina Pueꞌ Ala, hai ina Nuaró huleꞌ i lalu tálu peá alona! Ane toꞌu-toꞌu mpuꞌuKoꞌ Ánáꞌna Pueꞌ Ala,#27:40 Ane toꞌu-toꞌu mpuꞌuKoꞌ Ánáꞌna Pueꞌ Ala: Molaluitaheꞌ noꞌonoꞌ láwiꞌ mopakóiꞌheꞌ Iesu. Nupelae wátáMu haduduáMu! MendáulumoKoꞌ hangko i kau mombehape iti!” 41Noꞌonoꞌ woꞌo kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna mopakóiꞌheꞌ woꞌo Iesu, rauliꞌ, 42“Tauna ntániꞌna Natulungiheꞌ, agáiáná wátáNa haduduáNa tiꞌara Nabuku Natulungi! Ane toꞌu-toꞌu mpuꞌu kaꞌIana Daturaꞌ toSáráeliꞌ, ina tapoinálái ane Ia mendáulu mpuꞌu hangko i kau mombehape! 43Ia mehárungá i Pueꞌ Ala, hai Nauliꞌ kaꞌIana Ánáꞌna Pueꞌ Ala. Tapegiá, ba ina haweꞌ mpuꞌui Pueꞌ Ala mai mokábáhá!” 44Mogalo toperampaꞌ to rapakuꞌ woꞌo i kau mombehape, mohuwáráheꞌ laluita to mopakóiꞌ Iesu.#27:44 Tebukeki miꞌi apa to teukiꞌ i Iesaia 53:12. Taisá hadua hangko i toperampaꞌ iti menosoꞌ deiná. Básá Lukasi 23:39-43.

Iesu mate

(Mrk. 15:33-41; Luk. 23:44-49; Ioh. 19:28-30)

45Mantepuꞌu tintiꞌ hampuloꞌ hai duá kalialo, hangkaꞌ-hangkaꞌ perái makáindi i humalele tampoꞌ iti#27:45 Kamakáindi mewaliꞌ láwiꞌ Pueꞌ Ala tangaꞌna mohuku Pueꞌ Iesu ánti dósáraꞌ upu-upu tauna i duniáꞌ. Pehuku iti melumbuꞌ mani kamapárina hangko i kamaháina karapakuꞌNa i kau mombehape. tálu jaa kamaruena. 46Tintiꞌ tálu kalumbaꞌ, meraruaꞌ miꞌi Iesu Napasimbuku, Nauliꞌ, “Eli, Eli, lama sabakhtani?” Lempóna: “Pueꞌ AlaNgkuꞌ, Pueꞌ AlaNgkuꞌ, moapa riꞌi haneꞌiAꞌ Nupálehi?”#27:46 Rekeꞌ-rekeꞌna hasábu parena hangko tiꞌara mani mewaliꞌ, handaꞌ to naukiꞌ miꞌi Datu Daudiꞌ mokana i kapári to ina nalámbiꞌ Iesu. (Básá Sura Petóiá gáláꞌna ka-22.) Ánti dósántaꞌ, Pueꞌ Ala mopálehi Iesu. (Básá Iesaia 59:2.)

47Araheꞌ bahangapa tauna to meángkáꞌ hungkuꞌ i popakuꞌáNa. Mohádiheꞌ peraruaꞌNa, rauliꞌ, “Nipehádingi! Ia mokióꞌ nabiꞌ Eliá!” 48Hadua hangko i oloꞌraꞌ melangka lao moala hangkumuꞌ lómóꞌ, naeme i lalu anggoroꞌ to maisu, nahipika i wuntu dáꞌángkau to kókóiꞌ haneꞌi napopadumeá humena Iesu bona Nainu.#27:48 Iti mobukeki miꞌi apa to teukiꞌ i Sura Petóiá 69:22. 49Agáiáná tauna to ntániꞌna manguliꞌ, “Pegiá sieruꞌ, tapeita ba ina haweꞌ mpuꞌui Eliá#27:49 I lalu básá Iberani, laluita “Eli” ba “Eloi” (lempóna: PueꞌKuꞌ) hungkuꞌ hibali hai “Eli” (Eliá). Nabiꞌ Eliá raꞌángkáꞌ miꞌi lao i surugáꞌ rekeꞌ-rekeꞌna pare 850sM. Básá 2 Datu-datu 2:11. mai motulungi.”

50Roo onoꞌ, monganga wopiꞌi Iesu Napasimbuku, haneꞌi upu miꞌi inaoNa. 51I tempó iti woꞌo, rindi báná to tetóe i lalu Támbina Pueꞌ Ala hangkaꞌ-hangkaꞌ mahepaꞌ ntangaꞌ hangko i wongko haweꞌ i wóiꞌ.#27:51 Rindi báná to i lindoꞌna Lintuꞌ to Melumbuꞌ Kamagasaꞌna mahepaꞌ ntangaꞌ, tandaꞌ tiꞌara piꞌi ara to moparailiki Pueꞌ Ala hai tauna, hai tiꞌara piꞌi paraluu ara binataꞌ to rasambale mewaliꞌ popenómbá, láwiꞌ Iesu miꞌi to mewaliꞌ popenómbá to kahópóꞌána. Tempó onoꞌ woꞌo melinu to rumihi,#27:51 linu to rumihi: Linu hangkani-hangkani mewaliꞌ tandaꞌ kaꞌárána Pueꞌ Ala. Básá Pesuwuꞌá 19:18; Suro 4:31; 16:26. hai buluꞌ watu mabikáꞌ. 52-53Tempó iti woꞌo, handaꞌ popatawuá tebungkáhi, hai handaꞌ tauna to mengkoruꞌ i Pueꞌ Ala to mate hangkoia rapatueꞌ huleꞌ. Karoona Iesu rapatueꞌ, hira iti mesuaꞌheꞌ i kótá Ierusale to rauliꞌ kótá to magasaꞌ, hai raitaheꞌ handaꞌ tauna.

54Tadulako surudadoꞌ hai upu-upu surudadoꞌ to mokámpái Iesu, malááꞌ ntepuꞌuheꞌ mohádi linu hai moita upu-upu to pewaliꞌ iti. Rauliꞌ, “Toꞌu-toꞌu mpuꞌu kaꞌIana deꞌe Ánáꞌna Pueꞌ Ala!”#27:54 Hangkani mani tauna to tiꞌaraheꞌ toIahudiꞌ moisá apa to toꞌu mokana i Iesu, agáiáná toIahudiꞌ tiꞌara mani, mole toIahudiꞌmoheꞌ to ioru napaturoꞌ Iesu. Básá mokana i Tomata Alo (Matiu 2:2,11), tadulako surudadoꞌ to Roma (Matiu 8:10-13), hai towawine toKánáꞌá (Matiu 15:28).

55Ionoꞌ, handaꞌ woꞌo towawine to mampeita Iesu hangko karaoꞌ. Hira iti to meuláꞌ i Iesu hai mokádipurá, mantepuꞌu hangko i pobágóꞌNa i tampoꞌ Galilea. 56Hangaꞌna to hadua Maria toMadalena.#27:56 Maria toMadalena: Rauliꞌ noꞌonoꞌ láwiꞌ ia hangko i wánuá Madala. Ara woꞌo Maria ináraꞌ Iakobu hai Iusupu.#27:56 Maria inána Iakobu hai Iusupu: Ia miꞌi inána Iesu. (Básá Matiu 13:55; Iohane 19:25.) Babilaꞌ Matiu moukiꞌ noꞌonoꞌ bona tongawaꞌ mani Iesu ia miꞌi Ánáꞌna Pueꞌ Ala. (Básá wátiꞌna ka-54.) Hai hadua woꞌo toinána Sebedeu, {ináraꞌ Iakobu hai Iohane}.#27:56 Iakobu hai Iohane: Roduaheꞌ topeguruna Iesu. Babilaꞌ Salome ináraꞌ. (Básá Marakusi 15:40.) Babilaꞌ ia woꞌo pinoinána Iesu ane ia woꞌo halaluna Maria. (Básá Iohane 19:25.)

Iesu ratawu

(Mrk. 15:42-47; Luk. 23:50-56; Ioh. 19:38-42)

57Ina támpu miꞌi alo, haweꞌ miꞌi hadua topebuku to hangko i wánuá Arimatea, hangaꞌna Iusupu. Iusupu iti mepoinálái i Iesu.#27:57 Iusupu iti hadua tauna to rabiláꞌ hangko i Topepáresáꞌ Mahile (básá Marakusi 15:43; Lukasi 23:50-51). Ia mepoinálái i Iesu, agáiáná i laluna peá (básá Iohane 19:38). 58Ia lao i Pilatu membiáꞌ wátámandoꞌna Iesu bona natawu, hai Pilatu mohuoꞌ miꞌi surudadoꞌna mampeweꞌi wátámandoꞌna Iesu iti i hia.#27:58 Biásá toRoma mopatodáhi wátámandoꞌna tomate i kau mombehape duuꞌna maruꞌ. Mouláꞌ áturáraꞌ toIahudiꞌ, wátámandoꞌ tiꞌara peisá rapatodáhi i kau ane káindi miꞌi (básá Pohuleki 21:22-23), apa mani i alo penómbáꞌá (básá Iohane 19:31). 59Mewaliꞌ, naꞌala mpuꞌu miꞌi Iusupu wátámandoꞌna Iesu,#27:59 Nikodemu modurei Iusupu. Básá Iohane 19:39-42. haneꞌi nabungkuhi báná to meálu hai bulá ntepuꞌu. 60Napopaturu i lalu balamba popatawuána haduduána to rapatimama miꞌi.#27:60 Kamatena Iesu hingkakani hai toperampaꞌ, hai karatawuNa i popatawuá tauna to pebuku mobukeki apa to naukiꞌ Iesaia hangkoia. Básá Iesaia 53:9,12. Popatawuá iti woꞌu mani, to rabábehi i pingkena buluꞌ watu. Roo onoꞌ, monduli miꞌi hambuaꞌ watu to mahile napopotuko babaꞌ popatawuá iti, haneꞌi pohuꞌ miꞌi lao i támbina. 61Agáiáná Maria toMadalena hai Maria to ntániꞌna#27:61 Maria to ntániꞌna: Babilaꞌ Maria iti inána Iesu. Básá wátiꞌna ka-56 hai to teukiꞌ i wóiꞌna. mehodaheꞌ i rawa popatawuá iti.

Popatawuána Iesu rakámpái surudadoꞌ

62Kahalona mepulo i alo penómbáꞌá, upuheꞌ mopatimama ina mosusa pandeꞌ Paska, kapalaꞌ-kapalaꞌ tadulako menómbá hai toParisi laoheꞌ i Mágáuꞌ Pilatu, 63rauliꞌ, “Tuá, kibuhinao laluitana topodongkoꞌ iti, láwiꞌ i tempóNa mani tueꞌ, Nauliꞌ, ‘I katáluna alona, ina tueꞌAꞌ huleꞌ.’#27:63 Básá Matiu 12:40; 16:21; 17:23; 20:19. 64Onoꞌ miꞌi haneꞌi kipembiáꞌ i tuá bona nuhuoꞌheꞌ surudadoꞌmu lao mokámpái maroꞌa popatawuáNa duuꞌna haweꞌ i katáluna alona, bona tiꞌaraheꞌ lao topeguruNa hai mopanako wátámandoꞌNa. Ane wátámandoꞌNa raꞌala, ina rauliꞌ i tauna to handaꞌ, Iesu tueꞌ huleꞌ, álána handaꞌ tauna to ina rapakanawoꞌ, hai ina melumbuꞌ ntepuꞌu pepakanawoꞌ to kahópóꞌána deꞌe haneꞌi to ioru.”#27:64 ina melumbuꞌ ntepuꞌu pepakanawoꞌ to kahópóꞌána deꞌe haneꞌi to ioru: To rapokalááꞌ tadulakoraꞌ toIahudiꞌ, tauna ina maꞌala mepoinálái 1) Iesu Ia miꞌi Datu Topehómpóꞌ, hai 2) Ia mearó hangko i kapate.

65Nahániki Pilatu, “Deꞌemoheꞌ surudadoꞌ. Nuántimoheꞌ lao mokámpái pakaroꞌa popatawuáNa.” 66Lao mpuꞌumoheꞌ i popatawuána Iesu. Watu petukona rapetándái bona ineeꞌ paꞌi ara tauna to lao mobungkáhi, hai surudadoꞌ iti rahuoꞌheꞌ mokámpái popatawuá iti, bona tiꞌara ara to mokakaleá.

Currently Selected:

Matiu 27: NTBEP

Highlight

Copy