Matiu 28

Iesu tueꞌ huleꞌ

(Mrk. 16:1-8; Luk. 24:1-12; Ioh. 20:1-10)

1Liu miꞌi alo penómbáꞌá toIahudiꞌ, mepulo-pulo alo Minggu, Maria toMadalena hai Maria to ntániꞌna laoheꞌ mampeita popatawuána Iesu. 2Hangkaꞌ-hangkaꞌ perái mewaliꞌ linu to rumihi, láwiꞌ hadua malaꞌekana Pueꞌ mendáulu mai hangko i surugáꞌ mogesuꞌ watu popetuko popatawuá, hai mehoda i wongkona. 3Lenggeꞌna mewangkaꞌ nodo kiláꞌ, hai waruꞌna bulá ntepuꞌu. 4Surudadoꞌ to mekámpái ionoꞌ, malááꞌ ntepuꞌumoheꞌ, moridiꞌheꞌ, hai madungkáheꞌ, nodo peramoheꞌ tauna to mate.

5Agáiáná nauliꞌ malaꞌeka i towawineheꞌ iti, “Ineeꞌkou malááꞌ. Kuisá to nipeliꞌ Ia miꞌi Iesu to rapakuꞌ i kau mombehape. 6Ia tiꞌara piꞌi ara ieneꞌ. Ia tueꞌ miꞌi huleꞌ nodo to Nahángáꞌáꞌámokou.#28:6 Handaꞌ miꞌi kánina Iesu mopahaweꞌáheꞌ kaꞌina mateNa, hai kaꞌina tueꞌNa huleꞌ. Básá Matiu 12:40; 16:21; 17:23; 20:19; 26:61. Mai nipeita karawoliáNa. 7Upu onoꞌ, hawiáꞌkou lao nipahaweꞌ i topeguruNaheꞌ: ‘Iesu tueꞌ miꞌi huleꞌ. Ia ina moioru lao i tampoꞌ Galilea, hai ina nipohidupaꞌá ionoꞌ.’#28:7 Básá Matiu 26:32. Hangaa-ngaa nibuhinao apa to kuhángáꞌáꞌákou deꞌe!”

8Hawiáꞌ mpuꞌumoheꞌ towawine iti pohuꞌ hangko i popatawuá. Malááꞌ ntepuꞌuheꞌ, agáiáná góeꞌheꞌ woꞌo. I tempóraꞌ manggagu melangka ina lao mopahaweꞌ apa to pewaliꞌ i topeguruna Iesu, 9iaperái Iesu mampohidupaꞌheꞌ hai Natabeheꞌ. Lao miꞌi rahungkuki hai rakápui bitiNa, tandaꞌ penómbáraꞌ i Hia. 10Nahángáꞌáheꞌ Iesu, “Ineeꞌkou malááꞌ! Laomokou hai nihángáꞌáꞌáheꞌ halaluNgkuꞌ bona laoheꞌ i Galilea, ina mohidupaꞌangkaiꞌ ionoꞌ.”

Popahaweꞌraꞌ surudadoꞌ to mokámpái popatawuána Iesu

11I tempóraꞌ towawine iti mesuleꞌ, bahangapa surudadoꞌ to mokámpái popatawuá laoheꞌ i lalu kótá mopahaweꞌ i kapalaꞌ-kapalaꞌ tadulako menómbá upu-upu to mewaliꞌ i popatawuá. 12Onoꞌ miꞌi haneꞌi mogómbóheꞌ kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna. I pogómbóáraꞌ iti, himpuduheꞌ, mampoweꞌi dóiꞌ to handaꞌ i surudadoꞌ to mokámpái popatawuá rapopotuko humeraꞌ bona ineeꞌ rauliꞌ-uliꞌ. 13Hai rahángáꞌáheꞌ surudadoꞌ iti, “Nipolaluita i tauna node: ‘I tangaꞌ káindi tangaꞌkiꞌ letaꞌ, wátámandoꞌna Iesu rapanako topeguruNa.’ 14Ane laluitami iti nahádi Mágáuꞌ Pilatu, kaiꞌ rái to molaluita i hia bona ineeꞌkou rahuku.”#28:14 Ane surudadoꞌ toRoma letaꞌ tangaꞌna mekámpái, hangaa-ngaa rahuku mate. 15Surudadoꞌ iti motarimaheꞌ dóiꞌ to raweꞌiheꞌ, hai mopahaweꞌheꞌ apa to roomoheꞌ rapaturoꞌá. Duuꞌna haweꞌ deꞌe-deꞌe, tebámbári oaꞌ laluita iti i toIahudiꞌ.

Iesu mohuoꞌheꞌ topeguruNa moánti Ngkóráꞌ Marasa

16Topeguruna Iesu to hampuloꞌ hai hadua, laoheꞌ i tampoꞌ Galilea, i buluꞌ to napakanótóámoheꞌ ami Iesu. 17Ionoꞌ, mohidupaꞌ mpuꞌumoheꞌ hai Iesu, haneꞌi menómbáheꞌ i Hia. Agáiáná ara woꞌo to bata-bata mani laluraꞌ. 18Nahungkukiheꞌ Iesu, haneꞌi Nahángáꞌáheꞌ, “Upu-upu kuasaꞌ i surugáꞌ hai i duniáꞌ naweꞌiMoꞌ Pueꞌ Ala. 19Mewaliꞌ, iumbá peá kalaoámi i humalele duniáꞌ, nipaturoꞌheꞌ upu-upu tauna bona mepoináláiheꞌ i Kódóꞌ. Niriuheꞌ i lalu hangaꞌna Umaꞌ, Ánáꞌ hai Inao to Magasaꞌ. 20Nipaturoꞌmoheꞌ bona mampeuláꞌiheꞌ upu-upu to Kuhawaꞌámokou. Hai hangaa-ngaa nibuhinao: ina Kuporángákou oaꞌ duuꞌna haweꞌ i kahópóꞌána duniáꞌ.”#28:20 ina Kuporángákou oaꞌ…: Iti miꞌi lempóna hangaꞌna Iesu to ntániꞌna, “Imanueꞌ”, Pueꞌ Ala mamporángákou. Básá Matiu 1:23.

Currently Selected:

Matiu 28: NTBEP

Highlight

Copy