TEALIAN 24
24
Meeng komian tuuk Ishak naboloki
1Abraham motuamo tuuno, tukon ko Temeneno balakaatiyo yana doi sasaibino kolangge. 2Daano kooloyo meeng Abraham bantile doi naata momotuamo tuuno, mouluse sasaibino konabuat, “Binggakene kolimamu doi kumaa. 3Batotopimo doi Temeneno, Mian Bisa mokuasaiyo kotimbu tukon buta, baikon ikoo aki naikon mumounggoliikene boloki Ishak kupaudoo luwedoi antara mian badaang nai tano Kanaan nia. 4Ikoo sio muabali doi kulipu sinuungan sulano mumounggoliikene Ishak boloki doi antara kumontolutusan.”
5Maka doatadoo mansadai doi yana, “Bulaando kalu boinedoo aki naiyase otinggale kona bonua tukon aki naiyase laingaku doi lipu nia? Kai sio kubabayo Tuan napaudoo doi Tuan natano dungolan?”
6Bai Abraham timbiliyo, “Awas! Inaikai mobabayo daku paudoo dombalaa! 7Ko Temeneno, Mian Bisa mokuasaiyo kotimbu, lapamo babayo yaku luwedoi tamanggu nabonua tukon luwedoi kumontolutusan natano, tukon yana lapamo batotopi doi yaku baikon yana naikon mobeekene natano nia doi kukatulunan. Yana koidan naikon bintekene konamalaekat tuuk motulungiyo ikoo, sulano mumoola pososuunggene komeeng koboloki luwe indaa tuuk kupau. 8Bai kalu boinedoo aki naiyase malaing tukon ikoo, maka ikoo tongosobii luwe nai totopi nia. Maukai nabulaandomo koidan, inai mobabayo daku paudoo dombalaa.” 9Doibundu doatadoo binggakene kolimano doi natuan Abraham namaa, tukon batotopi naikon mokubaiyo oila Abraham nakinabidoo.
10Doatadoo mangala songulo kounta tukon moisalomo kolangge kali-kaliangano modaano koanggano natuan koona tukon tauso doi kota Nahor nalipu dungolan moanoon motubo kona tangabosan doi Mesopotamia taambikon doi lembet. 11Salataa yana polong idoo, yana atadeyo kona unta-untadoo sulano nabalasanaang loolani komeeng kobubung doi kota tonggulungo. Oloyo kinobiano, tukon doiyamo kotempono koboiboine nalubatan doi bubung tuuk momatambuk paisu. 12Maka doatadoo sambeang, “Temeneno, kutuan Abraham na Mian Bisa, tulungiyo, sulano daku limang nadaano kohasilo doi oloyo nia; tapaatiyomo komu dandi doi kutuan Abraham. 13Kitayo, yaku kokondong loolani nabubungia. Naapakai koboiboine moluwedoi kota naikon lubat momatambuk paisu. 14Yaku naikon bantile doi meeng komian doi yanila, ‘Tulung obulusene komu tombuan tukon beenggu monginum.’ Kalu yana timbiliyo, ‘Monginum, tukon koidan Tama naunta-unta naikon yaku beena monginum!’ Yanamo ko Temeneno nalinilik tuuk muata Ishak. Kalu dolanggedoo teali, yaku naikon toiyo baikon ko Temeneno lapamo tapaatiyo konadandi doi kutuan Abraham.”
15-16Doi tempo nadaanoan mosambeang, Ribka, meeng koboine motambongan tuuno tukon daano mopauboinekon, polong doi bubungoo makanggi tombuan doi bengeno. Yana Betuel napau, tukon Betuel tamano tinano doiyamo Nahor tukon Milka; Nahor doo Abraham utuso langgongo. Ribka ampakon doi bubungoo tukon tambukiyo kona tombuan, maka ampakon abali. 17Abraham naata obulen koolaniyo tukon bantile, “Tulung, Pau, beena yaku monginum paisu doi mutombuanoo.”
18Boinedoo timbiliyo, “Monginum Tuan,” maka tukon mosobit yana obulusene kona tombuan doi bengeno, tukon polaing taaniyo dotombuanoo beenamo doatadoo momonginum. 19Salataa lapa doatadoo monginum; boinedoo bantile, “Yaku naikon matambuk paisu tuuk koidan Tama naunta-unta, sulano sasaibino doiyayonoo moola monginum nabiyai.” 20Doibundu tukon mosobit kopaisu doi tombuanoo lalomo yana kundongiikene doi untadoo natampat monginuman lalomo, maka yana obulen abali doi bubung sulano namangauk paisu koidan mobadaang tuuno polong sasaibino doiyayonoo biyai momonginum. 21Daanoon Abraham naata banggadudul mokiteese aki namabantil mau meeng kobantilan. Yana yase toiyo oilakai ko Temeneno kubaiyo yana daano kohasilo doi yana nalaksanakangganano kona limang kai aki.
22Salataa lapa sasaibino kona unta biyai momonginum, Abraham naata mangala perhiasan mosoni moano kooli, maka konoikene doi boinedoo soongano. Doi botokono inusokon komeeng kopaal kokulaluk mosoni. 23Maka doatadoo bantile, “Soba bantile indee kotamamu. Kai daano kotampat moolowan doi nabonua tuuk yaku tukon daku mian-mian?”
24“Kotamanggu Betuel, Nahor napau tukon Milka,” boinedoo timbiliyo. 25“Doi mai bonua daano kotampat moolowan tuuk Tama tukon koidan badaang kolaing tukon iyayon nakinaan.”
26Maka atadoo tootuku mososubaiyo ko Temeneno. 27Yana bantile, “Nggaale ko Temeneno, Abraham kutuan na Mian Bisa. Temeneno tokita tapaatiyo konadandi doi kutuan Abraham. Yana andane yaku banggadudul doi namotolutusan.”
28Doibundu boinedoo obulen doi tinano nabonua tukon salitayo sasaibino komo tealidoo. 29-30Ribka daano komeeng komian koutuso langgongo kosambuno Laban. Yana lengele koutuso piyoto nasalita oila kokaliangano doatadoo nabinantil. Yana kitayo koidan kopalahiasan doi soongano tukon kulaluk doi utuso piyoto botokono. Maka Laban obulen tobuat doi bonua tuuk pososuung Abraham naatadoo modaano mokokondong tukon naunta-unta doi napololanikonan kobubung. 31Maka Laban bantile, “Tama mian Temeneno mobalakaatiyo! Inai modungol dimbaa tonggulungia. Mai doimai bonua. Kami lapamo sadiayo kokombiang tuuk i Tama tukon koidan tampat Tama naunta-unta.”
32Maka doatadoo malaingo tukon usok doi bonuadoo lalomo. Laban obulusene dountadoo nabinaba, tukon beena laing tukon kinaan doi iyayon-iyayonoo. Lapa doiya yana mababamo paisu tuuk pokumesi Abraham naata aino tukon namian-mian. 33Salataa sinidokiikon kokinaan, doatadoo bantile, “Yaku akiyon naikon kukaan kalu akiyon kupelenggene koteteba yaku mokanggiyo.”
Laban bantile, “Basilingano.”
34Maka Abraham naata tambuuno mobasilingan, konabantilano, “Yaku nia Abraham naata. 35Ko Temeneno balakaatiyo tuuno daku tuanoo tukon tealikene yana kaasa tuuno. Temeneno lapamo beena doi yana badaang kodomba, mbembe, saapi, unta, keledai tukon koidan perak, mosoni, maka ata mala-malane tukon moluko. 36Doi naumur motuamo, Sara, daku tuan naboloki lapamo mosuung pau malaneno, tukon daku tuan lapamo pusakaikene sasaibino kona buat doi napaudoo. 37Yana sumboliyaku berjanji tukon totopi sulano taatiyo kona parenta. Kona bantilano, ‘Inai molilikene daku pau boloki luwedoi antara boi-boine doi tano Kanaania, 38bai luwedoi antara tamanggu namotolutusan. Jadi tauso dombalaa tukon mosobit.’ 39Maka yaku masadai doi yana, ‘Bulaando kalu boinedoo aki naiyase lainge yaku?’ 40Maka yana timbiliyo, ‘Temeneno mosidutu kutaatio, naikon mobinitokon Namalaekat tuuk natomboniiyo sulano komu limang daano kohasilo. Ikoo naikon pososuunggene koboloki tuuk kupau luwedoi antara pulinggu susuunggu, doiyamo luwe tamanggu namotolutusan. 41Tolongo kalu yanila tolakemo ikoo, maka nasodo ikoo tongosobii doi mutotopi.’
42Tukon salataa yaku polong budoo doi bubung, yaku sambeang doi noanggu lalomo, ‘Temeneno, Abraham kutuan na Mian Bisa, sio kai Temeneno nakubaiyo daku limang nabalahasil. 43Yaku tataap kokondong lolani nai bubungia. Banggokai meeng koboine lubat matambuk paisu, yaku naikon kabiyo doi yana sulano nabinee monginum. 44Kalu yana yase kubaiyo, tukon baasiyo koidan sulano nabeena monginum daku unta-unta, maka yanamo kai ko Temeneno naililik moteali kutuan napau nabolokidoo.’ 45Akiyoon koidan kulapa mosambeang doi noanggu lalomo, lubato Ribka mababa tombuan doi bengeno bunggono maka mangala paisu doi bubung. Doibundu yaku bantile doi yana, ‘Tulunge yaku beena monginum.’ 46Tukon mosobit yana obulusene kona tombuanoo doi bengeno tukon bantile, ‘Monginumo, tukon Tama naunta-untadoo naikon yaku beena monginum.’ Maka yaku monginum tukon lapa doiya daku unta-untadoo koidan beena monginum. 47Lapa doiya yaku masadai, ‘Indee kotamamu?’ Tukon yana timbiliyo, ‘Kotamanggu Betuel, Nahor tukon Milka napau.’ Maka yaku konoikene kopolohiasan mosoni doi songano tukon kulaluk meeng kopaal doi botokono. 48Yaku tootuku tukon sosuba nggaale ko Temeneno, kutuan Abraham na Mian Bisa. Yana lapamo lolainge yaku polong dimbaa; doi kutuan namotolutusan, tobikon yaku moola pososuung naboinenia tuuk doi napau. 49Dia budodoo, kalu komuyu balasadia talimayo daku tuan tukon monondok tukon daano komuyu balatanggung jawab doi yana buno utus, namoola nyatakanggene doi yaku, bai kalu aki, bantilemo kai koidan, sulano kutoiyo sio oila daku kinabai.”
50Laban tukon Betuel timbiliyo, “Sabab oila komo teali nia luwedoi Temeneno, kami aki namoola mebee kaputusan. 51Naiya Ribka; sodiyomo yana lainge doi Tama tukon teali mu Tuan napau naboloki, bunomo Temeneno susungo nabinantil.” 52Salataa Abraham naatadoo lengele yanila nabantilan, yana tootuku sosuba doi Temeneno. 53Maka yana idute kona pakeyan, perhiasan perak tukon mosoni, tukon beekene sasaibinodoo doi Ribka. Koidan utuso langgongo tukon tinano binee palaseng momamaaling.
54Lapa doiya Abraham naata tukon napolalaing kaan tukon inum, maka moolomo idoo. Salataa yanila bangun modoakon kooloyo, atadoo bantile, “Pataikenemo yaku kumule doi kutuan.”
55Bai utuso langgongo tukon Ribka tinano bantile, “Sodiyomo Ribka nadungol doi kami uga-ugaate meeng kominggu kai songulo kooloyo koidan, tukon lapa doiya moolamo yana taus.”
56Bai atadoo bantile, “Inai motaane yaku.Temeneno kubaiyo daku ampakonan daano kohasilo; pataikenemo kumule doi kutuanoo.”
57Yanila timbiliyo, “Mai nda uange Ribka tukon masadaikene kona pandapat.” 58Maka yanila uange Ribka tukon masadai, “Ikoo yase lainge namiania?”
Boinedoo timbiliyo, “Oode, yaku yase.”
59-60Maka yanila pataikene Ribka tukon moteenake taus tukon Abraham naata tukon namian badaang. Maka yanila balakaatiyo Ribka tukon bantilan-bantilan nia,
“Boliisi ikoo Ribka, muteali tinano doi libuso komian!
Boliisi komu katulunan nalungguiyo komusuh nakota-kota!”
61Doibundu Ribka batotobomo tukon boi-boine mongula moteali naata, maka lakit doi unta tukon taus lainge Abraham naatadoo.
62Daanoon buno doiya Ishak lubato luwedoi padang lalomo, loloiyo kobubung mosinombuikon “Yana Mo Palahatikanggene Yaku” tukon dungol taambikon lalom ko Kanaan. 63Doi meeng kokinobian yana tobuat doi nasandung mopapakon doi naasi, maka nakitayo kounta-unta molubat. 64Salataa Ribka kitayo Ishak, yana obulus doi naunta, 65tukon masadai doi Abraham naatadoo, “Indee komiano mala-malane doi asidoo molubat doi salaanggita?”
“Yana kutuan,” atadoo timbiliyo. Maka Ribka alayo kona kokudung tukon tutupikene koduduso.
66Doibundu atadoo salitaikene doi Ishak sasaibino komo lapamo yana lakukanggene. 67Lapa doiya Ishak babayo Ribka usok doi tinano Sara nasandung lalomo, tukon yana babolokikene Ribka. Ishak seange Ribka; maka sanaango Ishak noano mosusa sabab kotinano momatemo.
Currently Selected:
TEALIAN 24: LAIBGZ
Highlight
Share
Copy
Want to have your highlights saved across all your devices? Sign up or sign in
