TEALIAN 25
25
Abraham nakatulunan doi naboloki bailon
(1Tund. 1:32-33)
1Abraham kilayo koidan ko meeng koboine kosambuno Ketura. 2Nabolokidoo mosuung pau-pau kosambuno: Zimran, Yoksan, Medan, Midian Isybak, tukon Suah. 3Yoksan Syeba tukon Dedan tamano, tukon Dedan nakatulunan doiyamo Asyur miano, Letus miano tukon Leum miano. 4Midian napau-pau doiyamo: Efa, Efer, Henokh, Abida, tukon Eldaa. Yanila sasaibino Ketura nakatulunan.
5Mau kai Abraham nasalakanggene sasaibino kona buat doi Ishak, 6modaano motubo yana beena badaang kona palaseeng doi napau-pau nailaat luwedoi nabolo-boloki bailon. Doibundu yana sumboliiyo pau-paudoo biyol doi lipu taambikon tolopot doi Kanaan, sulano napokododoonggon kona pau Ishak.
Abraham mate tukon kinibul
7-8Abraham mate kona umur motuamo, doiyamo 175 kotaun. 9Yana napau-pau komo kibule, doiyamo Ishak tukon Ismael, doi Leeng Makhpela motangabos doi asi taambikon tolopot doi Mamre. Looluk doasidoo Efron kotumbuno Zohar napau, Het miano, 10#Tea. 23:3-16 bai lapamo Abraham oliyo luwedoi Het mianodoo. Sara, Abraham naboloki, koidan kinibul imbali. 11Lapa Abraham mate, ko Mian Bisa balakaatiyo Ishak, Abraham napau. Doiya kosinggato Ishak dungol loolani kobubung mosinombuikon “Yana Mo Palahatikanggene Yaku.”
Ismael nakatulunan
(1Tund. 1:28-31)
12Ismael doiyamo Abraham napau tukon Hagar, boine Mesir, doiya Sara naata. 13-16Ismael daano songulo lua kona pau mobinantil naimbaa menurut napotuunduan kona sinuungan: Nebayot, Kedar, Adbeel, Mibsam, Misyma, Duma, Masa, Hadad, Tema, Yetul, Nafis tukon Kedma. Pau-paudoo teali tama bambumbuan songulo lua kobangsa benseno, tukon kampung maka napai basandungan sinombuikon pololoi yanila sambu-sambuno. 17Ismael kona umur 137 kotaun maka yana mate. 18Kona katulunan dungol doi napokalalatanan kolipu Hawila tukon Syur doi Mesir sembeleng tambikon tolopot sasalaane ko Asyur. Yanila tubo poalaas luwedoi Abraham nakatulunan bailon.
Esau tukon Yakub nasinungan
19Naiyamo kotunduno Ishak, Abraham napau. 20Ishak kona umur sangkapolono kotaun maka yana pokila tukon Ribka, Laban utuso pioto, Betuel napau, meeng ko Aram miano luwedoi Mesopotamia. 21Sabab Ribka aki namalaat pau, Ishak sambeang doi Temeneno tuuk naboloki. Tukon Temeneno talimayo Ishak nasambeang, tobikon Ribka tianan. 22Yana tiananggene kopau pinga, tukon akiyon dopaudoo nasinuung, yanila poduwo-duwokon doi nabakodutanan. Ribka bantile, “Bulaando nalangge nia mosio nateali doi butonggu?” Maka yana kabiyo kootunggul doi Temeneno.
23 #
Rm. 9:12
Temeneno bantile doi yana,
“Lua kobangsa daano doi mukodutan lalomo;
ikoo naikon suunge lua kobangsa mopomusu;
utuso pioto lobian kona bukuanan doi utuso langgongo
kolanggongo leleaniyo kopioto.”
24Laatemo kotempono Ribka namosuungan, tukon yana suunge lua kopau malaneno pinga. 25Kolanggongo same-samelaon kondondoongo, tukon kokulito mopasibuluon. Tobikon doiya yana sinombuikon Esau. 26Tempo pau koluano sinuung, kolimano taaniyo Esau totunano. Tobikon doiya sinombuikon Yakub. Ishak kona umur nomkolono kotaun doi tempo yanila nasinuungan.
Esau balukene kona obos salaku pau langgong
27Paudoo luaila tosuungimo kona kabasal. Esau tealimo toloasu mopandoi tukon yase dungol doi padang, bai Yakub kona ndondoong tanaang tukon yase dungol doi bonua. 28Ishak seange tuuno Esau, sabab Ishak yase makaan sail moinasu. Bai Ribka seange tuuno Yakub.
29Daano kooloyo meeng salataa Yakub daano momasaang nosuwon kacang memela, Esau lubat doi namangasuan. Yana malaal. 30Yana bantile doi Yakub, “Yaku malaal tuuno. Mangkabi soisik kacang memeladoo.” (Doiyamo kosababpo yana sinombuikon Edom.)
31Yakub timbiliyo, “Monondok, sio mubeekanaku lolukon komu obos salaku pau langgong.”
32Esau bantile, “Paduli oila dohakoo doi yaku. Yaku malaalo tuuno!”
33 #
Ibr. 12:16
Yakub bantile koidan, “Batotopimo looluk baikon ikoo mobeekene domu hak doi yaku.”
Esau batotopi tukon beekene kona hak doi Yakub. 34Lapa doiya Yakub beene roti tukon soobos kokacang memela mosinaang. Esau kaane tukon inume maka taus. Bunomo doiya Esau dadaate kona hak salaku pau langgong.
Currently Selected:
TEALIAN 25: LAIBGZ
Highlight
Share
Copy
Want to have your highlights saved across all your devices? Sign up or sign in
