LUKAS 13
13
Mkombror ḇaido nari mkoroë
13:1-5
1Rofyor snonkaku ono sfar faro Yesus ro snon Galilea, Pilatus myunsya rik sena fyawawas na kuker rik farsarser ssḇuki fyarser na. 2Yesus kyarem farosi: “Inja mkoḇo snon Galilea ḇemar sine sasar sena naba syadi snonkaku Galilea ḇesesya kamke, snar sisma roi ḇeradine na? 3Roḇa! yakofen faro mko. Ḇape rofyor mkombrorḇa, nari mkokam mkoro kuker nyan ḇerarirya. 4Roḇaido mkoḇo snonkaku samfur seser riwar kaderen syosya imbriwer fa myunbos ro Siloam ansi, sasar sena naba syadi ro sasar snonkaku ḇena mnu ro Yerusalem? 5Yakofen faro mko. Roḇa! Ḇape rofyor mkombrorḇa, mkokam nari mkoro kuker nyan berarirya.”
Sarḇer ḇekur ara knam ḇeḇe bon ḇa
13:6-9
6Raimnai Yesus ikofen sarḇer ine: “Snonkaku oso nya ara knam oser ro yaf anggur ḇyedi, ma rya syewar bon ro ara knam ani, ḇape isma bono ḇaḇeri. 7Inja ikofen faro ḇefararur ro yaf anggur ani: Wampasi wambarek rikior kwar yarama yasewar bon ro ara knam ine ḇape yasma bonoḇa. Iḇye rwoḇen ara knam ani! Isur farfyos monda sapropya! 8Snon ani kyarem: Tuan, yor fa kyain ro wampasi wambarek ine wer ari, nari yasofer saprop ro fuarya ma yarir fafen roi, 9imbude wampasi wambarek iyama imaremri; mboi roḇaido, insape ḇyeḇeroḇen!”
Yesus ḇyuk pararei faro bin oso ro ras Mananai Yahudi
13:10-17
10Rofyor Yesus ḇyuk farkarkor ro rum ari oso ro ras Mananai Yahudi. 11Rodia bin oso isya rur ḇemaḇakya iswoḇeri ḇewampasi wambarek samfur seser riwar kwar isof iduf rao dokor ḇyedi iyar ḇo dores aḇyoḇer werḇa. 12Fafisu Yesus myam bin ani, dori ma ikofen: “Ne awine waprei ro dafduf ḇedi.” 13Raimnai pyan ro bin ani ḇukor ḇyedi ma fafisu ani beri bin ani dores aḇyobber, ma isandik Allah. 14#Kel. 20:9-10; Ul. 5:13-14 Ḇape mananir rum ari imsor snar Yesus ḇyuk pararei faro snonkaku ḇeduf ro ras Mananai Yahudi, ma ikofen faro snonkaku ḇeḇor ansi ḇo doḇo: “Ras riwonem naisya faro kofararur. Inja mkorama mkosewar pararei ro ras anna oso, mboi ro ras arina awer.” 15Ḇape Yesus kyarem faroi ma ikofen: “Ne, snonkaku ḇeḇarḇor mkofawiḇake rofandu mko ono sisasyar sapi ma keledai sesi ro padwar sena ro ras Mananai Yahudi ma sunsi ḇemoḇ saninem war roya? 16Mboi bin ine ibirisya pyarari ḇewampasi wambarek samfur seser riwar kwar ine, Abraham kpu ḇyedirya inja koperi ro ras Mananai Yahudi ḇake?” 17Ma fyor ikofen rarirya, mbroḇ ḇyesikam simai ma kawasa ḇeḇor ansi simarisen snar smam roi ḇeba ifrur nane.
Sarḇer ḇekur sesawi mor ma mur
13:18-21
(Mat. 13:31-33; Mrk. 4:30-32)
18Raimnai Yesus ikofen: “Rosai yaḇuki syarḇer Allah Ḇaḇesasoser ḇyedi ma kuker rosai nari yaḇuki imnisya? 19Imnis sesawi mor snon oso dun ma ḇyuḇer ro yaf ḇyedi; mor ani isur ma ḇyebaken ma man ro farsyos sifrur narem ro snaw ḇyena.”
20Ma ikofen wer: “Kuker rosai yaḇuki syarḇer Allah Ḇaḇesasoser ḇyedi? 21Imnis mur bin oso dun fa ḇyuki irḇaren kuker terigu amek rikior isof namnir kam.”
Mansei nari ḇesma koreri
13:22-30
22Rofyor oso Yesus imbran ḇe Yerusalem, dunuk ro mnu ḇe mnu ḇo ḇyuk farkarkor. 23Ma snonkaku oso ikofen faroi: “Manseren, snonkaku ḇesma korerisya sibor ḇake?”
24 #
Mat. 7:13-14
Yesus kyarem faro kawasa ansi: “Mkobesewar fa mkosun ro kedwai ḇefyosya! Snar yakofen faro mko: Snonkaku sibor sesewar fa siḇe ssun fama sismaḇa. 25Rofyor tuan ḇena rumya ikḇok ma kyen kedwaiya nari mkores ro ḇondi ma mkonuk kedwaiya ḇo mko kofen: Tuan, sweḇen kedwaiya maḇe inko! Ma nari kyarem ma ikofen faro mko: Yafawi moḇ mkoramuma royaḇa. 26#Mat. 7:22-23 Ma nari mko kofen: Nkoiso ḇeyan ma ḇeyinem kwar ro ḇarpon ḇedi ma aw ḇeḇuk farkarkor kwar ro nyan-nyan ro mnu nkoḇedi. 27#Mzm. 6:9 Ḇape nari ikofen faro mko: Yafawi moḇ rosai mkoramuma royaḇa, mkobur ḇarpon ayedi mko snonkaku ḇeḇarḇor! 28#Mat. 22:13, 25:30 #Mat. 8:11-12 Rodiwa nari mkosma kankanes ma arkfafais nakor, rofyor nari mkomam Abraham ma Isak ma Yakub ma nabisyakam ro Allah Ḇaḇesasoser ḇyedi, ḇape mko ḇardi sisawen mko bebandi. 29Ma nari snonkaku srama ker Wamurem, Wambarek, Wambrur ma Wambraw ma nari skain sanan ro Allah Ḇaḇesasoser ḇyedi. 30#Mat. 19:30, 20:16; Mrk. 10:31 Ma kaku ḇeri snonkaku ḇepursya nari spon, ma snonkaku ḇeponsya nari spur.”
Yesus nari imar ro Yerusalem – Fafafko faro Yerusalem
13:31-35
(Mat. 23:37-39)
31Rofyor ani snon farisi ono sramura faro Yesus ma sikofen ḇo soḇo: “Snar Herodes iḇe myun aw inja rwa wabur moḇ ine.”
32Yesus kyarem: “Mkora mko kofen faro makei sup ani: Yayaw setan, ma yaḇuk pararei faro snonkaku ro ras ine ma meser, ma ro ras ḇeḇekior nari yamnai ro fararur ayena. 33Ḇape ras ine ma meser yawer yambran pdef mararan ayedi, snar nabi oso nari ḇyeḇemun ro Yerusalem ḇandiriḇa.
34Yerusalem, Yerusalem aw ḇemun nabi-nabisya ma manwawan Allah iwansya swosi kuker karui! Rarwan ono yaswarkuf fa yaryur romawa mkoḇesi, imnis mankoko sinan ḇeryur mkun ḇyesi ro prer ḇyedi baḇsi, ḇape mkomewer. 35#Mzm. 118:26 Kaku ḇeri rum bedi nari ḇyeḇebur ma ḇyeursḇa. Ḇape yakofen faro mko: Nari mkomam aya werḇa isof rofafisu mkokofen: Bok faroi ḇerama kuker snonsnon Manseren!”
Currently Selected:
LUKAS 13: LAIBHW
Highlight
Share
Copy
Want to have your highlights saved across all your devices? Sign up or sign in
