LUKAS 4
4
Fafrowes ro sup ḇeursḇa
4:1-13
(Mat. 4:1-11; Mrk. 1:12-13)
1Yesus, ḇefo kuker Rur Ḇesren, kyaḇer ro war Yordan, raimnai Rur Ḇesrenya duniḇe sup ḇeḇeursḇa. 2Kyain ro dia ras samfur rifiak ma Ibirisya ifrowes i. Fyor kyain ro dia dan royoḇa ma posa ro ras samfur rifiak ibiser.
3Inja Ibiris ikofen faroi: “Kaku au Rumkun Allah, ido wawan fa karui nane nemamami.”
4 #
Ul. 8:3
Yesus kyarem faroi: “Fas-fas isya: Snonkaku sikenem kuker mamamiya dererḇa.”
5Ḇarpurya Ibiris dun Yesus ḇemoḇ ḇekaki oso ma kniko monda fyasnai faro i ḇaḇesasoser-ḇaḇesasoser kam ro supswan ine. 6Ibiris ikofen faro i: “Papoik ḇeḇor nakam kuker payamyum ḇyena nari yaḇuk na faro Au, snar nakam neḇeḇuk kwar maro aya ma yakḇuk na faro manseirya wer yamarisen sya. 7Inja rofyor bansuba ḇeaya, nakam nari nwana.”
8 #
Ul. 6:13
Ḇape Yesus ikofen faroi: “Fas-fas isya ryok: Aukada bansuba faro Manseren, Allah bedi, ma Demir monda iso wanadi faroi!”
9Ḇarpurya wer dun Yesusbe Yerusalem ma ryir i ro Allah Rum ḇyedi bunemya, ma ikofen faro i: “Kaku au Rumkun Allah ido, wasawen mankundaw, 10#Mzm. 91:11-12 snar fas-fas isya: Ḇekur au, ikada nari ḇyuk sasoser faro malaikat-malaikat ḇyesi fa skansin 11ma siser Au insa wemsi kyarkar awer ro karui.”
12 #
Ul. 6:16
Yesus kyarem ma ikofen: “Wos isya: Wafrowes Manseren, Allah bedi awer!”
13Ibiris fafrowes ḇyena posa kwar isusu bur i ma iwaf fafisu ḇepyum faroi.
Yesus kyaḇer ḇe Galilea
4:14-15
(Mat. 4:12-17; Mrk. 1:14-15)
14Kuker papoik Rurya Yesus kyaḇerḇe Galilea. Ma ḇyesno ro sup ani ḇesiper. 15Ro fafisu ani ḇyuk farkarkor ro rum nadi ro dia ma snonkakusya kam sisandik i.
Nazaretsya siyaw Yesus
4:16-30
(Mat. 13:53-58; Mrk. 6:1-6)
16Ryama ro Nazaret moḇ sfaduru ma ibaroya, ma imnis rari ḇyedi ro ras Mananai Yahudi syun ḇerum nadi, raimnai iyori fa ḇyewasya Refo. 17Ssḇuk faroi syap nabi Yesaya ma rofyor ḇyasi kwar, isma mnuk, ro moḇ sfas ḇo soḇo:
18 #
Yes. 61:1-2
“Rur Manseren isya ryows aya,
snar ikada ryem aya kwar,
insa yaḇaryas Ankankinem Ḇeḇye faro snonkaku ḇesaḇarar;
ma iwan aya kwar
19fa yaḇaryas ḇaḇemkei faro snonkaku ḇeḇemanfyansya,
ma mamam faro ḇeprafsya,
ma ḇaḇemkei faro snonkaku sewayamsya
insa yaḇaryas wampasi wambarek Manseren
ḇaḇenaḇye ḇyena ḇerama kwar.”
20Raimnai isisen syap ani, ḇyuk kaḇeri faro ḇefararur, raimnai kyain; ma snonkaku sya kam ro rum nadi ani smamjoḇ i. 21Raimnai irandak ḇyuk farkarkor faro si, ḇo ikofen: “Ro ras ine mnuk mkomnaf ine imnis.”
22Ma snonkaku ansi kam ssḇuk kaku roi ma sikandor snar wos ḇepyum dawosna, inja sikofen: “Inenido Yusuf romawa ḇyaniryake?”
23Inja ikofen faro si: “Mboi nari mkokofen wos sarḇer ine maro aya: Ne, snon ḇena mon, buk pararei faro mankundaw. Wafrur kako ro dine, ro mankundaw mnu bedi, roi ḇeḇor nkomnaf wafrur kwar ro Kapernaum!” 24#Yoh. 4:44 Ma ikofen wer: “Yakofen faro mko, kaku ḇeri nabi oso sesyowi i ro mnu ḇyedi ḇa. 25#1Raj. 17:1, 8-16 Ma yakofen faro mko, ma wos Ayenane nkaku: Ro fafisu Elia kosmai bin kabom sibor ro Israel rofyor nanki isisen ḇewampasi wambarek rikior ma paik ri wonem ma rofyor andoḇa ḇeba myun sup ani ḇesiper. 26Ḇape Elia ḇyeḇewan faro oso ro siḇa, mboi faro kabom oso ro Sarfat, ro sup Sidon. 27#2Raj. 5:1-14 Ma ro awar Nabi Elisa ḇeduf pado sibor ro Israel ma oso ro si isma fasasren ḇaḇeri, mboi Naaman derer ro sup Siria.”
28Simnaf kam rarirya kawasa kam ḇero rum nadi ani simsorbos kaku. 29Siyorsi, raimnai sfori ḇo suni ḇemnuya ḇondiri ḇebon moḇ mnuya kyain roya, insa sisawen i ro fofen ani. 30Ḇape Yesus imbran uk ro fadu sedi ma ibur si.
Yesus syun ro rum nadi ro Kapernaum
4:31-37
(Mrk. 1:21-28)
31Posa kwar Yesus ryaḇe Kapernaum, mnu oso ro Galilea, fa ḇyuk farkarkor ro dia ro ras-ras Mananai Yahudi. 32#Mat. 7:28-29 Simnaf farkarkor ḇyena sikandor kaku, snar wos ḇyena nafo kuker papoik. 33Ro rum nadi ani snon rur ḇemaḇaksyower oso ma snon ani dar naba: 34“Ne, au Yesus snon Nazaret, rosai wafrur kuker inko? Rwama insa mun inko? Yafawi manseiso aw: au Saranden ro Allah.”
35Ḇape Yesus ḇyewefi, ḇo ikofen: “Befasis, wasasyarburi!” Ma rur ḇemaḇak ani ipyasbos snon ani ro fandu kawasa ḇeḇor ansi, raimnai isasyarbur snon ani ma ifrur dafdufi ḇaḇeri.
36Ma snonkakusya kam sikandor, ma sikofen yae faro si, ḇo soḇo: “Rosaisoine? Snar ifo kuker baba ma papoikya ma ḇyuk sasoser faro rur-rur ḇemaḇaksya fa sisasyar.” 37Ma snonsnon ḇyedi ḇyesno ḇemoḇ nakam ro supya fyor ani.
Yesus ḇyuk pararei faro Simon Petrus imbanyori ma snonkaku ḇesesya
4:38-41
(Mat. 8:14-17; Mrk. 1:29-34)
38Posa isasyarbur rum nadi ani ma ryaḇe Simon rum ḇyedi. Ro fafisu ani Simon imbanyori isam fafayaḇa ma sor faro Yesus insa ifnoḇek i. 39Rarirya dores fanam bin ani, raimnai iyaw sam-sam ani, ma dafduf ani iburi. Bin ani ikḇok ḇeri ma duffarmyan si.
40Ro fafisu ori isyun, kawasa ansi sun ḇeduf sesi faro Yesus, ḇeduf dafduf ḇeḇor kam. Ma isawardofen si ma ḇyuk pararei faro si. 41Ro snonkaku sibor kako rur ḇemaḇaksya sisasyarbur si ma sfararar, ḇo soḇo: “Rumkun Allah risaw.”
Raimnai idwarek pakrek si ma imewerbos kaku sawawosri, snar sifawi ikada Wairek dirya.
Yesus ḇyuk farkarkor ro mnu-mnu ḇesena
4:42-44
(Mrk. 1:35-39)
42Fafisu isnai kwar, Yesus imbran fa ryaḇe moḇ ḇeḇeusḇa oso. Ḇape kawasa ḇeḇor ansi ssewar I, ma sisrow I ma soḇo skarwarek i insa ibur awer si. 43Ḇape ikofen faro si: “Ro mnu-mnu ḇese kako yamarisen yaḇaryas Ankankinem Ḇeḇye ro Ḇaḇesasoser Allah snar i ḇeḇedari yaḇeḇewan muma.”
44Ma ḇyaryas Ankankinem Ḇeḇyeya ro rum nadina ro sup Yudea.
Currently Selected:
LUKAS 4: LAIBHW
Highlight
Share
Copy
Want to have your highlights saved across all your devices? Sign up or sign in
