LUKAS 3

Yohanes Ḇeḇemasasi Sren

3:1-20

(Mat. 3:1-12; Mrk. 1:1-8; Yoh. 1:19-28)

1Ro wampasi wambarek samfur seser ri rim ro Kaisar Tiberius ḇaḇesasoser ḇyedi, fafisu Pontius Pilatus ḇye gubernur ro sup Yudea, ma Herodes ḇyekoranu fiak ro sup Galilea, ma naek ḇyedi Filipus, ḇyekoranu fiak ro sup Iturea ma Trakhonitis, ma Lisanias ḇyekoranu fiak ro sup Abilene, 2ro fafisu Hanas ma Kayafas suḇe Imam Ḇeba, Allah ikofen faro Yohanes, Zakharia mandaḇendi ro sup ḇeursba. 3Inja Yohanes ryama ro supya mnuk Yordan ḇesiper ma ḇyaryas, ḇo doḇo: “Mkombror ma mkor masi sren ma nari Allah ipyos nyaki sasar mkoḇena kam, 4#Yes. 40:3-5 Imnis fas-fas ro syap nabi Yesaya ḇardi ḇyena:

Mkaren snonkaku oso isya ḇekaru ro sup ḇeḇeursḇa:

Mkofasos nyan faro Manseren,

mkofrur nyan ḇeaḇyoḇer faro i.

5Dwas nakam nari neḇekupoi

rarirya bon ma urkna nari neḇekar pyom,

ḇekaparawer na neḇesye aḇyoḇer,

ḇeḇe row-row na neḇekar pyom,

6ma kawasa kam nari smam koreri ḇeramuma ro Manseren.”

7 # Mat. 12:34, 23:33 Raimnai ikofen faro kawasa ḇeḇor ḇerama faroi fa ḇesma masi sren, ḇo doḇo: “Ne, ikak beknampu kpu ḇyena mko! Mansei ḇekofen faro mko fa mko frarbur masasor nari ḇeramuma ya? 8#Yoh. 8:33 Inja mko ḇuk bon-bon ḇemnis kuker marandor. Ma mkopok mkokara ḇaḇeri ro mkosnemna: Abraham kma nkoḇe dirya! Snar yakofen faro mko: Allah ipok kaku fa ifrur karui nane fa neromawa faro Abraham! 9#Mat. 7:19 Mkanya fyasos kwar ro aya fuarya ma ai knam ḇemarem bon ḇepyun ba, nari ḇyeḇeroḇen ma ḇyeḇekun ro for.”

10Snonkaku ḇeḇor ansi sifuken faroi: “Rofyor rariryanido, rosaiso nari nkofrurya?”

11Kyarem farosi: “Mansei ḇena sansun risuru, irwas faro ḇeyaknaḇaya, ma mansei ḇena roḇean, dakfur rarirya kako.”

12 # Luk. 7:29 Ḇeyor som ono kako, srama sorfa saksma masi sren ma sifuken faroi: “Guruyo, rosai nari nkofrurya?” 13Yohanes kyarem: “Mkor syadi awer ro rosai sḇe asaskwar faro mko.” 14Ma sordade-sordadesya sifuken kako faroi: “Ma nkonido rosai nari nkakfrurya?”

Yohanes kyarem farosi: “Mkofasyar ma mkoḇewayam awer snonkaku, mboi mkokenem mnis monda kuker ḇaḇyak mkoḇena.”

15Ḇape snar kawasa ḇeḇor ansi sifawi kuker kakyar, ma skara ḇo soḇo imbude Yohanes irya Wairek siwaf anike, 16ḇape Yohanes kyarem faro kawasa ḇeḇor ansi kam: “Ayakada yaḇuk masasisren faro mko kuker war monda, ḇape ḇepoik syadiro aya, nari ryama, ma yasyusḇafa yaper kaḇrai ḇefes roi ḇesowerḇyesi. Ikada nari ḇyuk masi sren faro mko, kuker Rur Ḇesren ma for. 17Badeiḇerasya isyakwar ro ḇramin ḇyesuyafa ḇyuk ifrur sren sayar aḇrui ḇyesi ma iryur aḇrui ḇyesiro kron ḇyedi, ma pissya kada seḇekunro for ḇembrerḇa.”

18Kuker wos anun ḇese, Yohanes ḇyaryas Ankankinem Ḇeḇyeya faro kawasa ḇeḇor ansi. 19#Mat. 14:3-4; Mrk. 6:17-18 Ḇape snar isonek Herodes ḇeḇe koranu fiak ro sup Galilea, snar fyakawin kuker Naek ḇyedi Herodias, ma snar ḇarḇor ḇese ifrur kakona, 20koranu fiak ani ifrur syadi wer ro ḇarḇor ḇyena, kuker nyan ḇyuk samamyai faro Yohanes ro bui.

Yesus isma masi sren

3:21-22

(Mat. 3:13-17; Mrk. 1:9-11; Yoh. 1:32-34)

21Ro fafisu kawasa ḇeḇor ansi sisma masi sren kwar ma ro fafisu Yesus kako isma masi sren ma Ḇyenadi, rofyor ani nanki ḇyas 22#Kej. 22:2; Mzm. 2:7; Yes. 42:1; Mat. 3:17; Mrk. 1:11; Luk. 9:35ma Rur Ḇesrenya dado imnis manjawa faro i. Ma mkaren oso ryok ro nanki: “Aukada Romawa Yaswar kaku, Yaḇeḇare faro Au.”

Syapḇaḇeknam ro Yesus

3:23-38

(Mat. 1:1-17)

23Fafisu Yesus irandak ifararurya indokada ḇyewampasi wambarek samfur rikior ma kawasa skarai ikada romawa ro Yusuf, ma kpuḇyesi siso sine: Eli, 24Matat, Lewi, Malkhi, Yanai, Yusuf, 25Matitya, Amos, Nahum, Hesli, Nagai, 26Maat, Matitya, Simei, Yosekh, Yoda, 27Yohanan, Resa, Zerubabel, Sealtiel, Neri, 28Malkhi, Adi, Kosam, Elmadam, Er, 29Yesua, Eliezer, Yorim, Matat, Lewi, 30Simeon, Yehuda, Yusuf, Yonam, Elyakim, 31Melea, Mina, Matata, Natan, Daud, 32Isai, Obed, Boas, Salmon, Nahason, 33Aminadap, Admin, Arni, Hesron, Peres, Yahuda, 34Yakub, Isak, Abraham, Terah, Nahor, 35Serug, Rehu, Peleg, Eber, Salmon, 36Kenan, Arpaksad, Sem, Nuh, Lamekh, 37Metusalah, Henokh, Yeret, Mahalaleel, Kenan, 38Enos, Zet, Adam, Allah.

Currently Selected:

LUKAS 3: LAIBHW

Highlight

Copy