MARKUS 1

Yohanes Ḇemasi

1:1-8

(Mat. 3:1-6, 11-12; Luk. 3:3-6, 15-17; Yoh. 1:19-28)

1Ine kada Ankankinem Ḇeḇye randak kaku ḇekur Yesus Kristus Rumkun Allah. 2#Mal. 3:1 Imnis fas-fas ḇero surat Nabi Yesaya, Manseren ikofen ḇo doḇe:

“Mame, nari Yawan manfamyan Ayedi 'fa pyon Au, iso nari ḇefasos nyan ḇe Au;

3 # Yes. 40:3 mkarem snonkaku oso isya ḇye ruran ro sup ḇeursḇa: Fasos nyan ḇemkei ma ḇeaḇyoḇer faro Manseren.”

4Rarirya Yohanes Ḇemasi rya ḇe sup ḇeursḇa fa ḇyaryas: “Mkombror ḇo mkosma masi sren insama Allah ipyos sasar mkoḇena.” 5Inja kawasa ḇero sup Yudea ḇesiper ma ḇero Yerusalemsya kam srama ro i, ma skaram sasar sena ma sisma masasisren ro war Yordan.

6 # 2Raj. 1:8 Yohanes syatu ḇyena ro onta bur, ḇeḇoḇek ḇyedi ro aiwan kif ma anan ḇyena kampam ma umber sup. 7Wos ikofen na ndok ra dine: “Ro ḇarpur ayedi ḇepok syadi aya nari isyama, yakunem fa yaper kaḇrai roḇesower-wesisya monda, yasyus ḇa. 8Aya ma yamasi mko kuker war monda ḇape i, nari imasi mko kuker RurḆesren.”

Yesus Isma masasisren ro Yohanes

1:9-11

(Mat. 3:13-17; Luk. 3:21-22; Yoh. 1:32-34)

9Ro fafisu ya Yesus ryaker Nazaret ro sup Galilea, ma Yohanes ḇyuk masasisren faro I ro war Yordan. 10Rofyor isasyar bur war ya, Myam nanki ḇyas, ma Rurḇesren ya isaḇu ro i imnis manjawa. 11#Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22 Ma mkarem oso ryok ro nanki mumfes, ḇo doḇe: “Au kada Rumkun saswar ayedi, faro Au yamarisen.”

Farawrowes ḇero sup ḇeursḇa

1:12-13

(Mat. 4:1-11; Luk. 4:1-13)

12Fyor o ḇa Rur ya fyarkin Yesus ḇe sup ḇeursḇa. 13Ḇyarek ras samfur rifiak ro sup ḇeursḇa anya, ma biris ifrowes i. Ikenem ro fandu aiwan ḇeḇarḇor sya ma malaikatsya suf farmyan i.

Yesus rya ro sup Galilea

1:14-15

(Mat. 4:12-17; Luk. 4:14-15)

14Sfor Yohanes raimnai Yesus rya ḇe Galilea ma Ḇyaryas Ankankinem Ḇeḇye ro Allah, 15#Mat. 3:2 Doḇe: “Fafisu ya imnis kwar; Ḇaḇesasoser Allah fyanam kwar. Mkombror ma mkokyar faro Ankankinem Ḇeḇye ya.”

Yesus dor manfamyan ḇepon ḇyesi

1:16-20

(Mat. 4:18-22; Luk. 5:1-11)

16Rofyor Yesus imbran ro yendisare ḇero danosen Galilea, myam Simon ma naekri Andreas. Suisya ssunap pam ro danosen ani snar mandaswan suirya. 17Yesus ikofen faro su ḇo doḇe: “Ne, murama muso aya, ma nari Yana mu ḇe mandaswan snonkaku.” 18Inja fyor ya beri subur pam suḇedi ma suso i.

19Ma ro marandan ḇyani fyoro ḇa wer Yesus myam Yakobus, Sebedeus mandaḇendi, ma naekri Yohanes, suyanem pam ya ro wai ya dori. 20Yesus dor su beri ḇo subur sinan kma suḇe Sebedeus kuker snon ḇeyan ḇaḇyak ḇyesi, ma suso i.

Yesus ryo rum Ari ḇero Kapernaum

1:21-28

(Luk. 4:31-37)

21Skosun ro Kapernaum; ras Mananai Yahudi ya syeḇen mura, Yesus Syun beri ro rum Ari ya dori ma Ḇyuk farkarkor faro kawasa sya. 22#Mat. 7:28-29 Kawasa sikandor rofyor simnaf farkarkor Ḇyena snar fyarkor si imnis snonkaku ḇena papoik; ḇo imnis kuker snon ḇefawi nananem Refo Yahudisya ḇa.

23Ro fafisu ani snon rur-ḇemaḇak sisawoḇer oso isya ro rum Ari ya dori. Snon ani dar naba ḇo doḇe: 24“Rosai waḇe wafrur kuker inko, Yesus snon Nazaret? Waḇe rwama fa mun inko kwar ya isoine ke? Yafawi au kwar: Ḇesaranden ḇeramuma ker Allah.”

25Ḇape Yesus Ḇye wef i ḇo doḇe: “Be fasis, wasasyar buri!”

26Rur-ḇemaḇak anya kyiker farma snon ani, posa dar naba ḇo isasyar buri. 27Kawasa ansya kame sikandor kaku, isof sifuken yae ro mankun si ḇo soḇe: “Rosaisoine? Farkarkor ḇebabo ke? Dawawos kuker papoik, ma rur-ḇemaḇak syano dawos epen si, ma siso user wos Ḇyena.”

28Fyorya abar ḇyedi ifrar yar sup Galilea ḇesiper.

Yesus ḇyuk pararei faro Petrus imbanyori ma ḇeduf ḇesesya

1:29-34

(Mat. 8:14-17; Luk. 4:38-41)

29Sisasyar ro rum Ari anya, Yesus kuker Yakobus ma Yohanes skora ḇe Simon ma Andreas rum suḇedi. 30Simon imbanyori ḇyis ḇo ḇyarek. Skokofen ḇadir beri dafduf ani faro Yesus. 31Inja Yesus rya myam bin ani, i kin ḇrasi ma Ḇyausi. fyor ya beri ḇasḇis anya ibur i. Ma posa bin anine duf farmyan sko.

32Ro mandira ya, rofyor ori syun kwar, sun snonkaku ḇeduf ma snonkaku rur-ḇemaḇak sisawoḇer sya kam faro Yesus. 33Inja kawasa ḇero mnuḇeba anya sya kame, siryur ro rum ya rawendi. 34Yesus ḇyuk pararei faro snonkaku ḇesma dafduf ḇeḇor ansi, ma rur-ḇemaḇak sya iyaw sibor kaku; imewer ḇyuk fa rur-ḇemaḇak ansya sawosri, snar sifawi I kwar.

Yesus ḇyuk farkarkor ro mnu-mnu ḇeba ḇesena

1:35-39

(Luk. 4:42-44)

35Ḇyarḇir meser ro arwo prim ya, Yesus ikḇok ma isasyar ḇe moḇ ḇeḇeursḇa oso ma ḇye nadi ro diwa. 36Ḇape Simon kuker min ḇyesi siyaw user I. 37Rofyor sisrowi , sikofen ḇei ḇo soḇe: “Kawasa sya kame, ssewar au!”

38Inja Kyarem faro si ḇo doḇe: “Mkorama, kora ḇe moḇ ḇese, ḇe mnu-mnu ḇeba ḇefanam nane, insa Yakḇaryas Ankankinem Ḇeḇye ine kako ro diwa, snar si ḇeḇewar Yarama ya!”

39 # Mat. 4:23, 9:35 Ma Yesus rya ḇe sup Galilea ḇesiper, ma ḇyaryas Ankankinem Ḇeḇye anya ro rum Ari sena, ma iyaw rur-ḇemaḇak sya.

Yesus ḇyuk pararei faro snon ḇeduf pado oso

1:40-45

(Mat. 8:1-4; Luk. 5:12-16)

40Snon ḇeduf pado oso ryama faro Yesus i, ḇyan suba ro ḇarpon Ḇyedi ma dor fafnoḇek ro I ḇo doḇe: “Sye, Wamarisen ido Buk pararei ḇe aya!” 41Yesus sneri iswar kufi, inja isawar ra pyan ro snon anya ma ikofen faro i ḇo doḇe: “Yamarisen. Waprei ro dafduf bedi!” 42Rofyor ya beri dafduf pado anya isyof buri, ma iprei. 43Yesus iwan ifa ibur, ḇo danun pakrek faroi ḇo doḇe: 44#Im. 14:1-32 “Waswarepen, wapok fa baḇdas awer parare bedine faro manseirya kaker, imboi rwa fasna mankundau faro imamsya, ma buk farsarser ḇekar parare ḇedi, imnis sasoser Musa ḇyani insa ḇye fasasnai-kaku faro si.”

45Ḇape snon anya ibur ma ḇyaḇdas parare ḇyanya ḇe moḇ-moḇ na kam, isof Yesus ipok fa syun fababa wer ro mnu ḇeba ani ḇa. Ḇyarek ro moḇ ḇeḇeursḇa na, ḇape kawasa siswek i ḇesya kwar beraker moḇ nakam.

Currently Selected:

MARKUS 1: LAIBHW

Highlight

Copy