MARKUS 2
2
Snon ḇeapaper oso isma pararei
2:1-12
(Mat. 9:1-8; Luk. 5:17-26)
1Ras ri ḇeso nawase, Yesus Kyaḇer wer ḇe Kapernaum, ma abar nakofen ḇadir isya ro rum. 2Mura kawasa sya srama spanjuḇer rao moḇ anna nafyos, ma kedwaya ḇarpondi kako. Rofyor ḇyaryas wos ya faro kawasa ansi, 3snonkaku ono sisya sun snon ḇeapaper oso faro i; ma snon rifiak skoḇar i kuker waryar oso. 4Ḇape sisma nya no ḇa fa suni faro Yesus, snar donek ya iba, mura skek kukeri ma skoḇas rum ya bori imnis kaku murḇaḇ ro moḇ Yesus Kyon ro ya, posa skokyui ro ḇarpon Ḇyedi. 5Rofyor myam kakyar skoḇena, ikofen faro snon ḇeapaper anya ḇo Doḇe: “Ne rumkun Yedi, wasma payasyos ro sasar ḇena kwar!”
6Ḇape ro moḇ anya snon ḇefawi nananem Refo Yahudisya ono sisya kako, inja skara fasis ro sisnes na ḇo soḇe: 7“Rosai ḇefnai fa snonkaku ine dawos rarirya? Donef Allah. Mansei nari ḇepok fa ḇeḇuk ampun ro sasar, nkofawi monda Allah mankundi?”
8Ḇape Yesus myamkir swaruser ma karkara sena, inja ikofen faro si ḇo doḇe: “Mkokara ro mkosnemna rarirya, snaro? 9Rosai ḇepyan syadi ya, Yakofen ḇe snon ḇeapaper ine ḇo yoḇe: Wasma payasyos ro sasar ḇena kwar roḇa i do: wakḇoke, wakanow yar ḇena ma wambran. 10Ḇape insama mkofawi ro supswan ine Rumkun Snonkakuya ipok ipyos sasarna.” Ma ikofen kaku faro snon ḇeapaper anya ḇo doḇe: 11“Yakofen kaku faro au, wakḇoke, wakanow yar ḇena ḇo wabur ḇe rum bedi!”
12Ma snon ḇeapaper anya ikḇoke, ikanow yar ḇyena ma isasyar ro fandu kawasa ansya, isof sikandor kam ma sisandik Allah ḇo soḇe: “Roi ḇera dine, nkomam ono ḇaim!”
Lewi ḇeyor som iso Yesus
2:13-17
(Mat. 9:9-13; Luk. 5:27-32)
13Raimnai Yesus rya wer ḇe danosen andir ya, ma kawasa sya kam sra yoḇ i inja fyarkor si. 14Posa, rofyor imbran uk ro moḇ anya, myam Lewi Alfius mandaḇendi kyain ro rum ḇeyor som ya, inja ikofen ḇe i ḇo doḇe: “Waso Aya!” Mura Lewi dores ma isoi.
15Raimnai rofyor Yesus inanus Lewi rorum ḇyedi, snon ḇeyor som ma snonkaku ḇesasar sibor saknan warpu i kuker manfamyan ḇyesi, snar kawasa ḇeso i sya sibor kaku. 16Rofyor snon ḇefawi nananem Refo Yahudi ro ḇar Farisi sya smam Yesus inan fnoḇek snon ḇeyor som ma snonkaku ḇesasarsya inja sifuken faro manfamyan ḇyesi ḇo soḇo: “Snaro Yesus danan us ḇeyor som ma kawasa ḇesasarsya?”
17Yesus imnaf wos anya ma ikofen yoḇ si ḇo doḇe: “Snonkaku ḇepre syama sefandun dokter ḇa, imboi ḇeduf sya kada. Yarama ine, yaḇe yor snonkaku ḇenapes ḇa, imboi kawasa ḇesasar!”
Ro yar ḇaḇefarfor
2:18-22
(Mat. 9:14-17; Luk. 5:33-39)
18Ro fafisu oso, rofyor Yohanes manfamyan ḇyesi ma kawasa Farisi sfarfor, snonkaku ono srama ro Yesus ma sifuken ḇo soḇe: “Snaro Yohanes manfamyan ḇyesya ma snon Farisi manfamyan sesya sfarfor ḇoi, manfamyan ḇesya sakfarfor ḇa?”
19Yesus Kyarem ḇe si ḇo doḇe: “Jadi fa manfakawin ya bati ḇyesya sfarfor rofyor isya kuker si? Rofyor manfakawin anya isya kaker ro fandu si, nari sipok fa sfarfor ḇa. 20Ḇape nari fafisu ya isyama manfakawin anya ssun i bur si, ma rofyor anya insape sakfarfor.
21Snonkakuyo ḇyuk kruḇen ker ḇebabo yo syokop marwai yo ḇaim, snar rarirya ido nari kruḇen ker ḇebabo ya syawek fanuk marwai ani, imuk naba syadi wer. 22Rarirya kako, snonkaku yo nari isar swan ḇebabo yo ro kibon ḇeḇerereyo ḇa, snar rarirya ido, swan ansya nari sisai pef kibon ḇeḇerere ani, ma swan kuker kibon sudawer kame. Inja swan ḇeḇabo ya, ipyum syadi ḇyeḇeser ro kibon ḇebabo kako!”
Manfamyan Yesus ḇyesya spanuk gandum ro ras Mananai Yahudi
2:23-28
(Mat. 12:1-8; Luk. 8:1-5)
23 #
Ul. 23:25
Ro ras Mananai Yahudi oso Yesus ma manfamyan Ḇyesya simbran uk ro yaf gandum oso, ma ro fyor simbran anya manfamyan ansya spanuk gandum yorem ono. 24Inja snon Farisi sya sikofen faro i ḇo soḇe: “Mam kada! Snaro manfamyan ḇesya sifrur roi kopok fa kofrur ḇaḇeri ro ras Mananai Yahudi?”
25 #
1Sam. 21:1-6
Yesus Kyarem faro si ḇo doḇe: “Mkowasya roi Daud ifrurna ḇaim ke? Rofyor i ma ḇeso i sya sananjar ma sibiser, 26#Im. 24:5-9 rariya syun ro rum Allah, rofyor Abyatar ḇye imam ḇeba ya, dan mamami farsarser-snonkaku ḇese sakan ḇa derer imainsya kada ma ḇyuk kako faro ḇeso isya.”
27Ma Yesus ikofen ḇe si ḇo doḇe: “Ras Mananai Yahudi ḇyeḇefrur faro snonkaku sya, ḇoi snonkaku sya seḇefrur faro ras Mananai Yahudi yaba, 28inja Rumkun Snonkaku Ya kako Ḇye Manseren faro ras Mananai Yahudi ya.”
Currently Selected:
MARKUS 2: LAIBHW
Highlight
Share
Copy
Want to have your highlights saved across all your devices? Sign up or sign in
