MARKUS 11
11
Kawasa sibor siyaker Yesus ro Yerusalem
11:1-11
(Mat. 21:1-9; Luk. 19:28-38; Yoh. 12:12-15)
1Rofyor Yesus kuker manfamyan Ḇyesya skofanam kwar ḇe mnu ḇeba Yerusalem, fanam mnu Betfage ma Betania ḇekain ro Urek Zaitun, Yesus Iwan manfamyan risuru rosi. 2Kuker ananun ḇo doḇe: “Mura ḇe mnu ḇero ḇarpon muḇedi. Rofyor musun ro dia, nari musrow keledai babo oso isya sfesepen i, snonkaku sek i ro ras o ḇaim. Muperi ḇo muyuni muma. 3Ma rofyor ono sifuken faro mu ḇo soḇe: snaro mufrur rarirya, mukofen faro si ḇo muyoḇe: Manseren ḇye fanduni. Nari Kyaḇer fasaui muma wer.”
4Inja sura mura beri, ma susrow keledai babo oso sfesepen i ro kedwai ḇero barpon ya ḇandi ro nyan andirya inja superi beri. 5Ma snonkaku ono sifuken su ḇo soḇe: “Ne, muper keledai ya faro?”
6Inja sukarem raris moḇ Yesus ikofen faro su rai. Inja snonkaku ansya smam monda su. 7Ma suyun keledai anya faro Yesus ma sḇor dokor ya kuker sansun sena, raimnai Yesus dek roi. 8Kawasa ḇeḇor ansya sḇor sansun sena ro nyanya, ma ono wer skek ai ram ssun ro yaf na. 9#Mzm. 118:26 Snonkaku ḇembran ro ḇarpon ma ḇeyuser ro ḇarpursya ssibras ḇo soḇe:
“Hosana!
Yesus ḇerama ro snonsnon Manseren, isma barakas,
10Ḇaḇesasoser beramayan isma barakas, Ḇaḇesasoser kma koḇedi Daud,
Hosana ro moḇ ḇekaki syadi!”
11Sra kwar ro mnu ḇeba Yerusalem Yesus syun ro Rum Allah. Ro dia myam user na kam, ḇape snar fanam roḇ kwar Yesus kuker manfamyan samfur seser risuru Ḇyesya sisayar ḇe Betania.
Yesus ifras ara knam oso
11:12-14
(Mat. 21:18-19)
12Meserdi Yesus ma manfamyan samfur seser risuru ḇyansya sskobur mnu Betania kwar, Yesus ibiser. 13Skobinkwan kaker ḇo myam ara knam oso ḇye ram kwar. Inja imbran yoḇ i fa Myam pan ḇye bon ri. Ḇape rofyor isya ro fuar ya kwar myam fama ḇye bon ḇa ḇoi ḇye ram monda, snar mamarem ḇyedi sya ḇa. 14Inja ifras ara knam anya ḇo doḇe: “Na isof fyoro-fyoro snonkaku oso dan bon ḇena wer ḇa!” Ma manfamyan Ḇyesya sakmnaf fras ani.
Yesus fyasren Rum Allah
11:15-19
(Mat. 21:12-13; Luk. 19:45-48; Yoh. 2:13-16)
15Raimnai Yesus ma manfamyan Ḇyesya skorama ro mnu ḇeba Yerusalem. Rofyor Yesus syun kwar ro Rum Allah, iḇyaḇer snonkaku ḇefarḇaḇyan sya bur buḇes Rum Allah. Meja ssḇuk sadadwer pipi ma banku ḇeḇaḇoḇ manjawa sya sena pyambar na, 16ma ḇyuk ḇa beri fa snonkaku ḇeyun papus simbranuk ro buḇes Rum Allah. 17#Yes. 56:7; Yer. 7:11 Raimnai fyarkor si ḇo doḇe: “Mkofawi fas-fas ḇerok ḇo ḇeyoḇe: Rum ayedi na snir i ḇe rum Ari faro ersya kam? Ḇape mkoine mkofruri ḇe nas faro kawasa ḇeḇarḇor!”
18Mananir imam-imamsya ma ḇefawi nananem Refo Yahudisya simnaf roi ḇeḇe jadi ani, mura ssewar nyan fa siḇe smun i, snar smam kawasa ḇeḇor ansya sikandor farkarkor Ḇyena.
19Fanam roḇ mura Yesus ma manfamyan Ḇyesya skosasyar bur mnu beba ani.
Ara knam ḇemar kwar Yesus farkarkor ḇyena ro mnuk nadi
11:20-26
(Mat. 21:20-22)
20Ro arwo babo ya rofyor Yesus ma manfamyan Ḇyesya skombranuk wer ro moḇ ara knam ani, ssmam ara knam anya myas ro ḇidwom isof ro rares ḇyena. 21Ro diya Petrus iswar epen roi ḇeḇe jadi kwar anya, inja ikofen faro Yesus ḇo doḇe: “Rabi ye, wakmam kada, ara knam wafras anya myas kwar.”
22Yesus kyarem faro si ḇo doḇe: “Mkokyar faro Allah! 23#Mat. 17:20; 1 Kor. 13:2 Yakofen faro mko: Oso ḇye kaku fa ikofen faro bon ine: Wakḇaken ma rwop randa wamsawer ro soren! Oso ḇe ḇirḇar ḇa ḇoi wakyar nako ido nari roi wakofen na nejadi rarirya. 24Inja Yakofen ḇe mko: Rosairya wer mkor ma mkonadi wark na, mkokyar imnis raris mkosma na kwar, ma nari Allah Ḇyuk na faro mko. 25#Mat. 6:14 Ma rofyor mkofasos fa mkoḇe nadi mkoswarepen insa mkoḇuk ampon faro snonkaku mkomsor sya ro mkosnemna resari, insa Kma mkoḇedi ro boiyaswa dakḇuk ampon faro mko ro sasar mkoḇena. [26Mboi mkoḇuk ampon ḇa ido, Kma mkoḇedi ro boiyaswa dakḇuk ampon ḇa kako ro sasar mkoḇena.]”
Fakfuken ḇefasnai snopor Yesus
11:27-33
(Mat. 21:23-27; Luk. 20:1-8)
27Raimnai Yesus kuker manfamyan ḇyesya sra wer ma ro mnu ḇeba Yerusalem. Rofyor Yesus imbran ro Rum Allah ya buḇes ya, mananir imam-imamsya ma ḇefawi nananem Refo Yahudi ma snon ḇebarara sya, srama sifuken Yesus ḇo soḇe: 28“Kuker snopor rosai bukfrur roi ḇeḇor nane? Ma mansei ḇeḇuk snopor anya faro au, isof wafrur roi ḇeḇor nane?”
29Yesus kyarem faro si ḇo doḇe: “Na Yaḇuk fakfuken oser faro mko. Mkokarem ḇeponi ḇe aya insape na Yakofen ḇadir snopor saiso yakfrur roi nane kam ya faro mko. 30Masisren Yohanes ryamuma ro boiyaswa ke snonkaku? Indo mkokarem ḇe aya pan!”
31Sawos yae ro mankun si ḇo soḇe: “Na kokofen ḇo koḇe masi sren Yohanes ryama ker boiyaswa, na ikofen ḇo doḇe: rarirya ido snaro mkokyari ḇa? 32Ḇape rariso na kokofen ḇo koḇe: Ryama ro snonkaku!” Snar simkak kawasa ḇeḇor ansi, snar snonkaku sya kam siwasen ḇo soḇe Yohanes nabi rirya kaku inja simkaki. 33Mura skarem faro Yesus ḇo soḇe: “Nkofawi ḇa.” Inja Yesus ikofen faro si ḇo doḇe: “Rarirya ido aya kako nari Yakkofen ḇair snopor saiso Yakfrur roi ḇeḇor nane faro mko ḇa.”
Currently Selected:
MARKUS 11: LAIBHW
Highlight
Share
Copy
Want to have your highlights saved across all your devices? Sign up or sign in
