MARKUS 10
10
Faspar
10:1-12
(Mat. 19:1-9)
1Ro dia Yesus skora ḇe sup Yudea ma war Yordan ḇar iwara ma ro dia kako kawasa sibor srama spanjuḇer I, ma raris fararur Ḇyedi Yesus fyarkor si wer.
2Snon Farisi ono sra faro Yesus fa sifrowes bir i ḇo soḇe: “Jadi fa snon oso fyaspar bur swari ke?”
3Inja Yesus kyarem faro si ḇo doḇe: “Rariso kuker Moses sasoser ḇyena faro mko?”
4 #
Ul. 24:1-4; Mat. 5:31 Skarem ḇo soḇe: “Moses ḇyuk kwar fa ḇyeḇefaspar kuker syap ḇepampum.”
5Inja Yesus ikofen faro si ḇo doḇe: “Imboi snar sne ḇepakrek mkoḇena ḇeḇewar Moses fyas sasoser ḇera dine. 6#Kej. 1:27, 5:2 Snar ro awar supswan Allah ifrur snonkaku snon ma bin, 7#Kej. 2:24 inja snon oso nari ibur kmari ma snari su ma ḇye oser kuker swari, 8isof suḇe kraf oser. Rarirya suḇe baken risuru wer ḇa ḇoi suḇe oser. 9Inja rosai Allah fyesepen kwar, snonkaku sya sipok sfaspar awer.”
10Ro fafisu skorandum ro rum oso manfamyan ḇyensya sifuken Yesus ro yar ine. 11#Mat. 5:32; Luk. 16:18; 1 Kor. 7:10-11 Ma Yesus ikofen ḇe si ḇo doḇe: “Mansei ḇefaspar swar i, raimnai dun bin ḇese, irya ifrur far-ḇaḇuk faro swa ḇepon byedi. 12Rarirya kako bin oso fyaspar swari ma fyakawin snon ḇese, i kako ifrur farḇuk.”
Yesus ḇyebarakas kapiraresya
10:13-16
(Mat. 19:13-15; Luk. 18:15-17)
13Ma kawasa sya ssun romawa kapira ono faro Yesus insa ḇye barakas si, ḇape manfamyan ḇyesya sisonek kawasa ansi. 14Rofyor Yesus myam rarirya, imsor ma ikofen faro si ḇo doḇe: “Mkorir romawa ansya fa sra yoḇ aya, imboi mkomunwarek awer si, snar snonkaku ḇera dine sya siso ḇenai Ḇaḇesasoser Allah. 15#Mat. 18:3 Yakofen kaku ḇe mko: Mansei ro mko imarisen daknai Ḇaḇesasoser Allah ḇape dakmnis romawa kapira ḇa na daksun ro i ḇa.” 16Raimnai fyoraḇen romawa kasun ansya ma pyan rosi ḇo ḇye barakas si.
Syamswen kaku fa snon ḇenanasya saksun ro Ḇaḇesasoser Allah
10:17-27
(Mat. 19:16-26; Luk. 18:18-27)
17Rofyor Yesus imbran pdef ro marandan ḇyedi, snon oso ifrar yoḇi ma ḇyan suba ro ḇarpon ḇyedi ma ifukeni ḇo doḇe: “Mankorari ḇeḇye, na rosai yafrur fa yaksma kankenem ḇemnai ḇa ya?”
18Yesus kyarem faroi ḇo doḇe: “Snaro wor ayaḇe ḇeḇye? Oso ro fandu snonkaku iḇye syadi Allah ḇa, Allah demir. 19#Kel. 20:12-16; Ul. 5:16-20 Wafawi Allah sasoser ḇeḇor ḇyena kwar: Nari mamun awer, nari wafrur farḇakḇuk awer, nari kwarau awer, nari be saksi ankarkar awer, nari wayaḇyoḇer snonkaku nana sena awer, ma ḇe maf kmami ma snami su!”
20Ma snon anya ikofen faro Yesus ḇo doḇe: “Mankorari yo, roi wakofen nane kam yaḇe user na rofyor yaba ḇa ya.”
21Ḇape Yesus myam yoḇi ma sneri iswari mura ikofen faroi ḇo doḇe: “Imboi roi oser wer iso ḇemnis ḇaim ro au; wabur mura, boḇ kayan ḇena, bukna faro kawasa ḇesaḇarar sya, snar nari wasma kayan ro nanki, raimnai rwama waso aya.” 22Imnaf wos anna fyafayaf ḇo ibur kuker sne ḇefafardun snar kayan ḇyena nabor kaku.
23Raimnai Yesus myam manfamyan ḇye ḇeyores yar i ma ikofen faro si ḇo doḇe: “Syamswen kaku faro snon ḇenana sya saksun ro Ḇaḇesasoser Allah.”
24Manfamyan ḇyesya sikmom rofyor simnaf wos ḇyena. Ma Yesus Ikofen wer ḇo doḇe: “Romawa yena mko, kosun ro Ḇaḇesasoser Allah ya syamswen fafaya ḇa. 25Onta oso syun ro wairus mkir ya ipyan ro snon benana oso daksun ro Ḇaḇesasoser Allah.”
26Sikmom syadadi wer ma sawos yae ro mankun si ḇo soḇe: “Rarirya ido nari mansei ḇesma koreri ya?”
27Yesus myam yoḇ si ḇo doḇe: “Faro snonkaku roi ḇera dine ndarirya ḇa, ḇape rarirya ḇa faro Allah. Snar roi nane ndarirya faro Allah.”
Ḇaḇyak faro ḇeso Yesus
10:28-31
(Mat. 19:27-30; Luk. 18:28-30)
28Ḇarpur wer Petrus ikofen faro Yesus i ḇo doḇe: “Nkoine nkobur pres nana nkoḇena snar nkoso Au!”
29Yesus kyarem ḇo doḇe: “Yakofen kaku faro au, snonkaku oser-oser ḇebur rum ḇyedi, naek srar, sna roḇa ido kma, kina ḇyena roḇa ido yaf ḇyena snar aya ma Ankankinem Ḇeḇye ya, 30snonkaku anya ro fafisu ine kako nari isma sadwer syadi ḇe utin, rum, naek srar, sna, kina ma yaf marindi ḇemun fnoḇek na, ma ro ras ḇarpur iyama isma kenem ḇemnai ḇa ya. 31#Mat. 20:16; Luk. 13:30 Imboi kawasa ḇeḇor ḇepon ansya nari spur ḇoi ḇepur ansya nari sakpon wer.”
Ḇaryas ḇeḇekior ro marindi ḇekur Yesus
10:32-34
(Mat. 20:17-19; Luk. 18:31-34)
32Yesus kuker manfamyan Ḇyesya sisya ro marandan ḇera ḇe Yerusalem ma Yesus pyon si. Manfamyan ansya se fesfyas ma kawasa ḇeso skonsya simkak. Yesus dor manfamyan samfur seser risuru Ḇyansya ma Ikofen fababa rosai nari ḇekur i ḇo doḇe: 33“Insape kora ḇe Yerusalem ma Rumkun Snonkaku nari ssḇuki faro mananir imam-imam ma snon ḇefawi nananem Refo Yahudi ma nari se ukum i fa imar. Ma nari ssḇuki faro er-er ḇeyakfawi Allah ḇa sya, 34ma nari iser anonef, aninef, ayos ma smun, ḇape ro ras ḇeḇekior ya nari diḇri ro kubir.”
Yakobus ma Yohanes fararyor suḇedi – Ḇeḇesasoser ḇa ḇoi uffarmyan
10:35-45
(Mat. 20:20-28)
35Sebedeus mandaḇen ḇyesu Yakobus ma Yohanes susnefer Yesus ma sukofen faro i ḇo suyoḇe: “Mankorari yo, nukyar insama Kwarem fararyor nuḇedine!”
36Yesus ifuken ḇo doḇe: “Rosaiso muyoḇe Yafrur faro mu?”
37Inja sukofen ḇo suyoḇe: “Wamarisen kada nari ras kokain ro payamyum Bedi numindi nyaro ḇar raku Bedi ma numindi wer nyaro ḇar rasar Bedi.”
38 #
Luk. 12:50
Ḇape Yesus ikofen faro su ḇo doḇe: “Mufawi ro muyor ya ḇa. Jadi fa muyakinem ro sek aninem Yaḇe Yinem ma muyakmasi masasi Yaḇe Yamasi ya ke?”
39Sukarem ḇo suyoḇe: “Numarisen.” Yesus ikofen faro su ḇo doḇe: “Imboi na muyakinem ro sek aninem Yaḇe Yinem ya ma nari muyakmasi masasi Yaḇe Yamasi ya. 40Ḇoi mnuk kankain ro ḇar raku ma ḇar rasar yeja, mankun daya Yapok fa Yaḇuk i ḇa. Mnuk anya nari ḇyeḇe ḇuk faro snonkaku mansei Allah fyasos kwar sya.”
41Manfamyan samfur ḇese ansya simnaf rarirya simsor Yakobus ma Yohanes su. 42#Luk. 22:25 Ḇape Yesus dor si ma ikofen ḇo doḇe: “Mkofawi, mansei sap ḇe ḇeḇe prenta er-er ḇeḇor sya, siso ḇeḇe prenta kawasa sesya kuker ḇramin mankarmomen, ma ḇebarara sesya prenta sena nambran kuker pakakrek faro kawasa sesi. 43#Mat. 23:11; Mrk. 9:35; Luk. 22:26 Mkoma rarirya ḇa. Mansei ḇemarisen ḇeba ro fandu mko ido i kada nari ḇye manfyan ḇe mko, 44mansei ḇemarisen ḇeba syadi kaku ro fandu mko ido i kada ḇye manfyan ḇe mko kam. 45Snar Rumkun Snonkaku kako ryama insa suf farmyan i ḇa, ḇoi insa duf farmyan ma ḇyuk nyawa ḇyedi fa ḇyak namuk snonkaku ḇeḇor sya kam.”
Yesus ḇyuk pararei faro Bartimeus
10:46-52
(Mat. 20:29-34; Luk. 18:35-43)
46Yesus kuker manfamyan ḇyesya srama ro Yeriko. Ma ro fafisu Yesus isasyar kuker manfamyan ḇyesya ro Yeriko, fnoḇek kawasa ḇeḇor kaku, snon ḇesaḇarar ma ḇepraf isoine Timeus mandaḇen ḇye ḇenir ḇe Bartimeus kyain ro nyan andir ya. 47Rofyor imnaf Yesus snon Nazaret anya irya, dor naba ḇo doḇe: “Yesus Daud mandaḇen ḇyedi au, waswar aya!”
48Kawasa sibor se wef i insa ḇye fasis, ḇape dor naba syadi wer ḇo doḇe: “Daud mandaḇen ḇyedi au waswar aya!”
49Ma Yesus imnai ḇo ikofen faro si ḇo doḇe: “Mkori ma!” Sor snon ḇepraf anya ma sikofen faroi ḇo soḇe: “Wepen snembri, ma wayor au, snar Yesus dor au.”
50Inja doḇes syatu ḇyeja ma iyori beri fa rya isrow Yesus.
51Yesus Ifuken i ḇo doḇe: “Rosai wamarisen fa insa yafrur faro au?”
Snon ḇepraf anya kyarem ḇo doḇe: “Rabuni, yor fa insa yakmam e!”
52Inja Yesus ikofen faro i ḇo doḇe: “Rwa mura, kakyar beja ḇyuk aski faro au!”
Ro fafisu ya kako myam beri, ma iso Yesus ro marandan Ḇyedi.
Currently Selected:
MARKUS 10: LAIBHW
Highlight
Share
Copy
Want to have your highlights saved across all your devices? Sign up or sign in
