MARKUS 9
9
1Ikofen wer faro si ḇo doḇe: “Yakofen wos ḇekaku faro mko, ro fandu snonkaku ḇeryur sine ono nari simar ḇa isof sakmam Ḇaḇesasoser Allah ḇerama kuker papok kwar.”
Yesus isma payamyum ro bonya bori
9:2-13
(Mat. 17:1-13; Luk. 9:28-36)
2 #
2 Ptr. 1:17-18
Ras riwonem nawas ido Yesus dun Petrus, Yakobus ma Yohanes sko ḇo skek bon ḇekaki oso. Ro moḇ anya skerer monda. Rofyor anya Yesus Fyadwer mankundi ro ḇarpon mamam skoḇena, 3ma syatu Ḇyena napioper bos ma nasnaper. Bepapap sansun ro supswan ine oso fa nari pyap saranden rarirya ḇa. 4Skomam wer Elia ma Moses suyawawos kuker Yesus. 5Petrus ikofen faro Yesus ḇo doḇe: “Raḇi, marisen ḇefnak ḇa koro moḇ ine. Iḇye kada nkofrur aḇdares rikior, oso ḇe au, oso ḇe Elia ma oso ḇe Moses.” 6Ikofen rarirya, snar ikmom rosaiso iḇe ikofenya, snar skomkak mankenem.
7 #
Mat. 3:17; Mrk. 1:11; Luk. 3:22 Fyor anya mandep oso ryama isawoḇ sko ma mkarem oso ryok ro mandep anya ḇo doḇe: “Ine ma Manfun saswar ayedirya, mkomnaf I.” 8Fyoro ḇa skomam snonkaku ono sisya sifnoḇek sko ḇa ḇoi Yesus derer. 9Rofyor skado bur bon ani, Yesus ḇyeasas insa skofar awer faro snonkaku oso ro roi ḇeḇor skomam anna isof Rumkun Snonkaku diḇri ro kubir ro fandu ḇemar sya resari.
10Skoswarepen asas ani ma skofuken yae sko ro rosai Yesus ikofen ḇe “aḇiḇer ro fandu ḇemar sya.” 11#Mal. 4:5; Mat. 11:14Inja skofuken Yesus ḇo skoḇe: “Snaro snon ḇefawi nananem Refo Yahudi sikofen ḇo soḇe, nari Nabi Elia pyonma resari?”
12Yesus Kyarem ḇo doḇe: “Imboi Elia nari pyonma fa ḇye user roi ḇeḇor na kam resari. Imboi rariso kuker rakrok fasfas ḇekur Rumkun Snonkaku ḇeyoḇe: Nari Yesus isma marindi nabor ma sonefi? 13Ḇape Yakofen ḇe mko: kaku Elia pyon ma kwar, ḇoi snonkaku sya sifrur marisen sena faro i raris moḇ nabisya ssfas kwar fa ḇekuri.”
Yesus iyaw rur ḇemaḇakya ḇur romawa awer oso
9:14-29
(Mat. 17:14-21; Luk. 9:37-43)
14Ro fafisu Yesus, Petrus, Yakobus ma Yohanes skokaḇer faro manfamyan ḇese ansi, skomam kawasasya sibor siyaryar manfamyan ansya ma snon ḇefawi nananem Refo Yahudi ono sisya sfamfaḇri roi oso kuker si. 15Fyor kawasa ansya smam Yesus, sikandor ma srama sisrow I. 16Ma Yesus ifuken si ḇo doḇe: “Rosai mkawos faro si?”
17Snon oso ro fandu kawasa ansya ikofen faroi ḇo doḇe: “Mankor ari ye, yun romawa yedine faro au, snar rur ḇemaḇak ya isawoḇeri. 18Ma rofyor rur anya isawoḇeri ipyas i ro saprop ya bori ma sbari kyaḇaḇus, darek fafais nasi ma ipadadorem. Yor kwar faro manfamyan Besya, fa siyau rur anya fama sipok ḇa.”
19Ma Yesus ikofen faro manfamyan Ḇyesya ḇo doḇe: “Ne syos ḇekyar ḇa mko ine, fafisu rosai nari yarous kaker mko? Fafisu rosai kaker yakbab mko? Mkun romawa anya muma!” 20Ma ssun romawa anya faro Yesus. Rofyor rur ḇemaḇak anya myam Yesus, isasas romawani, ipyas i ro saprop ya bori ma isuwayafer ḇo ḇyai kaḇaḇus. 21Raimnai Yesus Ifuken faro romawa anya kmari ḇo doḇe: “Inja iduf fyoro kwar ke?” Romawani kmari kyarem ḇo doḇe: “Ro fyor ibaḇa ya. 22Indo rur ḇemaḇak ya ismeri fa ikuni ro for, isaweni ro war fa iḇe myuni. Inja au ma Wapok fa Wafrur roi ḇeḇorna kam, yor fa wafnoḇeki ma Waswar inko.”
23Yesus Kyarem faro i ḇo doḇe: “Inja woḇe: na wapok ido? Faro snonkaku ḇekyar sya roi ḇeḇor na kam nari ndarirya.”
24Romawa ani kmari dar naba ḇo doḇe: “Yakyare. Wafnoḇek snonkaku ḇekyar ḇa aya ine!”
25Rofyor Yesus myam kawasa sya sibor siryur yoḇ sko, iyau rur ḇemaḇak ani: “Ne, au rur ḇemaḇak ḇefrur fa snonkaku sya seawer ma siproi, Yayau au wasasyar bur romawa ine, wapok wawer wer fa swun ro i ḇa!”
26Ma rur ḇemaḇak anya isasyar ma dar naba ḇo kyakiker romawa ani namsin ḇaḇeri. Romawa ani isnai imnis ḇemar, inja kawasa sya sibor soḇe: “Imar kwar.” 27Ḇape Yesus kyin romawa anya ḇrasi ma ikḇok ro mankundi.
28Rofyor Yesus syun ro rum oso, ma derer kuker manfamyan Ḇyesi, sifuken i ḇo soḇe: “Rosai ḇeḇe wari nkopok nkoyau rur ḇemaḇak anya ḇa ya?”
29Yesus kyarem faro si ḇo doḇe: “Rur ḇeḇesneya koyaui kuker nyan ḇese ḇa, ḇoi kuker nadi monda.”
Ḇaryas ḇeḇe suru ro Yesus marindi ḇyena
9:30-32
(Mat. 17:22-23; Luk. 9:43-45)
30Yesus ma manfamyan Ḇyesya simbran ro dia ma ssunuk Galilea ma imewer oso ifawi marandan skoḇedine; 31snar imarisen fyarkor manfamyan Ḇyesya ma ikofen faro si ḇo doḇe: “Rumkun Snonkaku nari sḇoḇi faro snonkaku sya fa smun i ma ro ras rikior nawas nari diḇri.”
32Sikmom roi Yesus ikofen ya, fama simkak sifuken faroi.
Manfamyan ansya sfamfaḇri mansei ro si ḇebka syadiya
9:33-37
(Mat. 18:1-5; Luk. 9:46-48)
33Yesus ma manfamyan Ḇyesya skorama wer ro Kapernaum. Ro fyor syun kwar ro rum oso, ifuken faro manfamyan Ḇyesya: “Rosaiso insandi mkofamfabri ro nyan ya?”
34 #
Luk. 22:24
Ḇape sefasis snar insandi ro marandan seja sfamfabri mansei ḇeba syadi ro si. 35#Mat. 20:26-27, 23:11; Mrk. 10:43-44; Luk. 22:26Inja Yesus kyain ma dor manfamyan samfur seser risuru ḇyansya ma ikofen faro si ḇo doḇe: “Mko no doḇe fyabri fa iso ḇepon ya, iḇye syadi iso ḇepur kaku ya fa duf farmyan ḇese sya kam.” 36Raimnai Yesus dun romawa kasun oso fa dores fandu si, posa fyorepen romawa anya ma ikofen ḇo doḇe: 37#Mat. 10:40; Luk. 10:16; Yoh. 13:20 “Mansei ḇefaduru romawa ḇera dine snar snonsnon ayedi, i kada dakfaduru aya. Ma mansei ḇefaduru aya ido, ayaiso fyaduru ya ḇa ḇoi bewan ayanya iso fyaduru ya.”
Snon ḇeyakḇe manfamyan faro Yesus ḇaya iyaw rur ḇemaḇak
9:38-41
(Luk. 9:49-50)
38Yohanes ikofen faro Yesus I ḇo doḇe: “Mankorari ye, nkomam snon oso ḇeyakso ko ḇa ḇape iyaw rur ḇemaḇak kuker snonsnon ḇedi, inja nkomun warek i snar dakso ko ḇa.”
39Ḇape Yesus ikofen faro si ḇo doḇe: “Mkomun warek awer i! Snar snonkaku oso ḇefrur aḇyair kanandor kuker snonsnon ayedi, ipok donef aya ro fafisu ya ḇa. 40#Mat. 12:30; Luk. 11:23 Mansei ḇesampum ko ḇa ikada ifnoḇek ko. 41#Mat. 10:42 Yakofen wos ḇekaku faro mko, mansei ḇeḇuk war aninem sek oser faro mko snar mkuser faku Kristus i nari isma ḇaḇyak.”
Mansei ḇefarkor ninyan snonkaku ro yar karumasen
9:42-50
(Mat. 18:6-9; Luk. 17:1-2)
42“Mansei ḇefarkor ninyan oso ro fandu romawa kasun ḇekyar aya sine, ipyum syadi sfes karui ḇeba ro sasuri ḇo simsaweri ro soren. 43#Mat. 5:30 Ma ḇramin ḇe suiya oso daw ninyan au ido kwaruki, snar iḇye wer swun ro kankenem ya kuker ḇaramuk, imbude sisawen au rofor ḇembrer ḇa kuker ḇramin ḇesiper. [44Ro moḇ anya karom sya simar ḇa ma for anya ipok imbrer ḇa.] 45Ma rofyor wemin besu suyau ninyan au kwaruk su, snar iḇye wer swun ro kankenem ya kuker wemuk, ipyum syadi ro sisawen au rofor ḇembrer ḇa kuker wemin besu; [46rofor anya karom sya sinanem ḇa ma for anya ipok imbrer ḇa.] 47#Mat. 5:29 Ma rofyor mkamsu suyau ninyan au, wer oso, snar iḇye swun ro Ḇaḇesasoser Allah kuker mka oser ipyum syadi sisawen au ro for ḇembrer ḇa kuker mkamsu. 48#Yes. 66:24 Ro moḇ anya karom sya simar ḇa ma for anya ipok imbrer ḇa.
49Snar snonkaku oser-oser nari sḇuḇrei kuker karumasen for.
50 #
Mat. 5:13; Luk. 14:34-35 Fainda ro karumasen ipyum kaku ḇape rofyor ḇyuar, kuker rosai mkofruri fa miasen wer? Iḇye syadi mkomasmasen ma mkokenem kuker aski fandu min mkoḇesi.”
Currently Selected:
MARKUS 9: LAIBHW
Highlight
Share
Copy
Want to have your highlights saved across all your devices? Sign up or sign in
