MARKUS 13
13
FASAL 13 FAYA ḆEKUR AWAR BEPUPESYA
Rum Allah nari ḇyeḇekakok
13:1-2
(Mat. 24:1-2; Luk. 21:5-6)
1Fyor Yesus isasyar bur Rum Allah, manfamyan Ḇyesya oso ikofen faro i ḇo doḇe: “Mankor ari ye, wakmam kada karui nane nadoser bos beri ma rum anna napduk fafaya ḇa!”
2Inja Yesus ikofen faro i ḇo doḇe: “Wakmam rum-rum ḇepduk nane? Na karui nane oso ḇyeḇe mam monda fa isyos ro oso bori ḇa, na kam nari skakok na.”
Randak marindi supswanya
13:3-13
(Mat. 24:3-14; Luk. 21:7-19)
3Ro fafisu Yesus kyain ro urek Zaitun bori ḇo myam ḇe Rum Allah, Petrus, Yakobus, Yohanes ma Andreas skofuken fasis faro i ḇo skoḇe: 4“Wakofen ḇair fafisu saiso roi ḇeḇor nane nari ne jadi ya faro inko, ma aḇyair saiso nari ḇefasna nakam ndama ro ras fawar ya.”
5Inja Yesus dawos faro si ḇo doḇe: “Mkepen mko insa snonkaku ono sfarkor ninyan awer mko! 6Snar nari snonkaku sibor srama kuker snori ma soḇe: Aya ine Yesus, ma nari sfarkor ninyan snonkaku sibor. 7Ma ro fyor mkorower ruran mbroḇ roḇa abar ro mbroḇ, mkokoḇer awer. Nakam nari ndarirya, ḇape ras fawar isya ḇaim. 8Snar nari er nefamfaḇri kuker er ma ḇaḇesasoser na nefamfaḇri kuker ḇaḇesasoser. Nari rim ḇeba na nmun ro moḇ-moḇ ono ma nari basbiser ya myun. Nakam nfasna randak marindi kam ḇeyun ḇe awar babo.
9 #
Mat. 10:17-20; Luk. 12:11-12 Ḇape mko ine mkepen pyum mko! Snar nari ssḇuk mko faro fananjur agama ma nari siprer mko ro rum ari, ma ssun mko ḇe ḇarpon besma papok wairek sya snar aya, insa ne saksi faro si. 10Ḇape Ankankinem Ḇeḇye ya kada nari ḇyeḇe ḇaryas faro er sya kam. 11Ma ro fyor ssun mko ma sḇoḇ mko, mkokarsosen awer rosai nari mkokofen na ḇape mkokofen rosai Rur-ḇesren ya ikofen faro mko ro fafisu anya kako, snar mkoi ḇeyawawos ya ḇa, ḇoi Rur-ḇesren ya. 12Naek oso nari ḇyoḇ naekri fa smuni ma rarirya kako kma oso kuker romawa ḇyedi, ma romawa sya nari srakrok kuker sinan sesi ma nari smun si. 13#Mat. 10:22 Nari snonkaku sya kam sfafardun mko snar snonsnon ayedi. Ḇape mansei befarmku nako isof ro ras fawar ya i kada nari isma koreri.”
Marindi ḇemarḇak ma Wairek ḇekaku ḇasya
13:14-23
(Mat. 24:15-28; Luk. 21:20-24)
14 #
Dan. 9:27, 11:31, 12:11 “Rofyor mkomam fafardun ḇeyun raro ya dores ro moḇ napnapes ya iḇye kada ḇeḇe wasya mkoya mkokara naḇye – rarirya kawasa ro Yudea iḇye syadi sifrar sibur ḇe bon na. 15#Luk. 17:31 Snonkaku ḇeyun wam ro rum ya bori iḇye isabu awer fa dun roi oso ro rum ḇyedi. 16Mansei ḇero yaf ya na kyaḇer fa dun sansun ḇyena ḇa. 17Susa marindi faro bin ḇemoḇes ḇa roḇaido ḇesasus sya ro fafisu ya. 18Inja mkoḇe nadi insa susa marindi nakam na nanyanem awer rofyor pnunek ya myun. 19#Dan. 12:1; Why. 7:14 Snar ro fafisu anya nari susa marindi myun, roi ḇera dine nmun ro ras no ḇaim ro randak Allah ifrur supswan ine isof babo ine ma nari ḇye jadi wer ḇa. 20Ma Manseren Ḇyuk fa fafisu ya iknampu ḇa kada, nari roi ḇekenem nakam oso isma aski ḇa; ḇape snar snonkaku kyinfir kwarsya Manseren Ḇyuk fafisu ḇeknampu.
21Ro fafisu anya oso ikofen faro mko ḇo doḇe: Mam kada Wairek isya ro dine, roba ido: Mam kada Wairek isya ro diwa, mkokyar awer. 22Snar Wairek ḇekaku ḇa ma nabi ḇekaku ḇa sya nari sikḇawes ma sifrur aḇyair ḇefrur kanandor kuker karkara ya isoine imba kada se ḇirḇar snonkaku Allah Kyinfir sya. 23Mkepen mko! Snar Yakofen ḇadir ḇepon roi nane kam faro mko kwar.”
Rumkun Snonkakuya fayafyafer ḇyedi
13:24-32
(Mat. 24:29-36; Luk. 21:25-33)
24 #
Yes. 13:10; Yeh. 32:7; Yl. 2:10, 31, 3:15; Why. 6:12 “Ḇape rofyor anya ḇarpur ro susa marindi, ori nari pyampan ma paiki isnai ḇa 25#Yes. 34:14; Yl. 2:10; Why. 6:13 ma mak sya kam nari skapaf bur nanki ma kuasa nanki na nari namarmer. 26#Dan. 7:13; Why. 1:7 Ro fafisu anya nari kawasasya smam Rumkun Snonkaku ryama ro mandep kuker kuasa ḇeḇor kam ma payamyum Ḇyedi. 27Ma ro fafisu anya kako nari iwan malaikat Ḇyesya fa sisasyar ma nari siryur snonkaku kankinfir Ḇyesi ro ḇar wambarek wamurem-wambraw ma wambrur ro dunya pember isof nanki pember.
28Mkun farkarkor ro sarḇer ara knam. Rofyor snau-snau na nakpirew ma nkakyei randak mkofawi fafisu ryas ya fyanam kwar. 29Rarirya kako rofyor mkomam roi ḇeḇor nane ne jadi mkofawi bos beri fafisu ḇyedi fyanam kaku kwar ro kedwa ya ḇarpondi. 30Yakofen faro mko: Syos ine nari isyof ḇaim ḇoi nari roi nane kam ne jadi kaku ḇeri. 31Nanki ma supya nari nasyof ḇape wos ayeja nari kyon fyoro.
32 #
Mat. 24:36
Ḇape ras anya roḇa ido fafisu anya snonkaku yo ifawi ḇa, malaikat ḇero boiyaswa sya sifawi ḇa ma Rumkun ya kako roḇa, Sinan Kma ya derer monda.”
Ananun ḇekur wadwaren
13:33-37
33“Mkosasor mko ma mkwaren! Snar mkofawi fafisu ya ryama nya ḇa. 34#Mat. 25:14; Luk. 12:36-38 Moḇ ine imnis bos kaku snon ḇewadwa, ḇebur rum ḇyedi ma ḇeḇe asas manfamyan ḇyesya oser-oser kuker fararur ḇyeja ma ḇeyanun faro ḇewaren kedwaya insa iwaren. 35Rarirya mkowadwaren snar mkofawi fafisu rosai ḇena rum ya kyaberya ḇa, ifyafer ro mandira babo ke roḇa ido romfauru ke, roḇa ido ḇyarḇir meser muryas ke roḇa ido arwo babo, 36inja rofyor ryama kanandor mko isrou awer mkoisya mkenef. 37Rosai yakofen faro mko, yakofen na faro kawasa kam: Insa mkowaren!”
Currently Selected:
MARKUS 13: LAIBHW
Highlight
Share
Copy
Want to have your highlights saved across all your devices? Sign up or sign in
