MARKUS 14

Saw nyan fa ssḇukmun Yesus

14:1-2

(Mat. 26:1-5; Luk. 22:1-2; Yoh. 11:45-53)

1 # Kel. 12:1-27 Ras ḇeḇa munara Paskah ma ras ḇeḇa Mamami ḇeḇe roi ḇefrurpis ḇa, ras risuru kaker insape sifrur su. Mananir imam-imamsya ma snon ḇefawi nananem Refo Yahudisya sesewar insa sfor ma smun Yesus kuker nyan ankar, 2snar sikofen ḇo soḇe: “Ro fafisu munara awer, insa kawasa sya sifrur mbrus awer.”

Yesus isma ramrem

14:3-9

(Mat. 26:6-13; Yoh. 12:1-8)

3 # Luk. 7:37-38 Ro fafisu Yesus isya ro Betania, ro rum Simon ḇeḇe pado ḇyedi ma sisya skain sanan, bin oso ryama faro Yesus dun paranai oso ḇese mani spum bekakur kaku. Ikob kar paranai anya kwar, isbawer mani anya ma ḇyukrem Yesus ḇruri. 4Snonkaku ono simsor ma sikofen yae faro si ḇo soḇe: “Snar mani spum ine ḇyeḇe fnak fromo monda? 5Snar mani ine sḇoḇi kada maeja ḇyedi dinar utin rikior isyadi ma pipi ansya koḇuk si faro kawasa ḇesaḇarar sya.” Raimnai simsor bin ani.

6Ḇape Yesus ikofen ḇo doḇe: “Mkomam mondai. Snaro mkosnuki? Ifrur fararur ḇepyum oso faro aya kwar. 7#Ul. 15:11 Snar snonkaku ḇesaḇarar sisya faswef kuker mko ma mkofnoḇek si rofyor mkomarisen, ḇape aya ma nari Yabesya faswef kuker mko ḇa. 8Ifrur roi jadi fa ifrur kwar. Baken ayeja ryemi kwar imnis fasasos faro kardir ayedi. 9Yakofen faro mko: Kaku ḇeri moḇ rosai Ankankinem Ḇeḇye ya ssḇaḇdas i ro supswan ḇesiper, rosai ifrur ine nari sakapi kako fa ssḇukswarepen i.”

Yudas ḇyoḇ Yesus

14:10-11

10Raimnai Yudas Iskariot oso ro fandu manfamyan samfur seser risuru ansi rya faro mananir imam-imamsya kuker kakara fa ḇyoḇ Yesus faro si. 11Simarisen namsin baḇeri rofyor simnafi inja se asas ḇei nai ssḇuk pipi faro i. Ḇarpur Yudas syawar fafisu ḇepyum oso fa ḇyoḇ Yesus.

Yesus dan Paskah kuker manfamyan ḇyesi

14:12-21

(Mat. 26:17-25; Luk. 22:7-14, 21-23; Yoh. 13:21-30)

12Ro ras randak ras ḇeba munara Mamami ḇepisen ḇa fafisu skaruk domba Paskah, Yesus manfamyan Ḇyesya sikofen faro i ḇo soḇe: “Moḇ sai Wawarisen nkora nkofasos meja sren Paskah ḇe au?”

13Inja iwan manfamyan risuru ma danun faro su ḇo doḇe: “Mura ḇe mnu ḇeba iwa, ro diwa nari musrou snon ḇeyun war ro fyom Muso i. 14Ma mukofen faro ḇena rum syun ro ya ḇo muyoḇe: Mankor ari danun: sim rosai fasos kwar faro aya insa Yan Paskah fnoḇek kuker manfamyan ayesi? 15Ma snon anya nari fyasnai sim ḇeba oso ḇe mu ro ḇo ḇefasos kwar. Mufasos meja sren Paskah ḇe ko ro dia!”

16Inja manfamyan ansuya sura ro mnu ḇeba ani, susrou rosai Yesus ikofen faro su anna. Ro diya sufasos Paskah ani.

17Roḇ kwar ido Yesus ryama kuker manfamyan samfur seser risuru ḇyansi. 18#Mzm. 41:10 Ro fafisu skokon skonan Yesus ikofen ḇo doḇe: “Yakofen faro mko, kaku ḇeri ro fandu mko nari oso ḇyoḇ aya, isoine ḇeyanan kuker aya.”

19Inja se susa ma oser-oser ikofen faro Yesus ḇo doḇe: “Aya rya ke roḇa, sye Manseren?”

20Yesus ikofen ḇo doḇe: “Snon anya isoine oso ro fandu mko samfur seser risuru ine, iso besowen mamami ro ben oser kuker aya. 21Rumkun Snonkaku nari rya imnis kuker fas-fas ḇekur i, ḇape susa ḇefnak ḇa faro snonkaku ḇeḇoḇ Rumkun Snonkaku ani. Ipyum syadi snon anya ḇyeḇeyaḇen awer kada.”

Farkarkor ḇekur meja sren

14:22-25

(Mat. 26:26-29; Luk. 22:15-20; 1 Kor. 11:23-25)

22Ro fafisu Yesus kuker manfamyan Ḇyesya skonan, Yesus dun mamami, ḇye barakas na raimnai pyanasnis na ma ḇyuk na faro si ḇo ikofen ḇo doḇe: “Mkun ma mkan, ine baken ayedirya.”

23Raimnai dun sek aninem ya, ma ikofen kasumasa raimnai Ḇyuki faro si, ma si kam sinem ro sek aninem ani. 24#Kel. 24:8; Yer. 31:31-34 Ma ikofen faro si ḇo doḇe: “Ine rik ayedi, rik ḇeḇe asas esbawer faro kawasa kam. 25Yakofen faro mko: Kaku ḇeri nari yinem wer ro anggur bon ḇa isof ro ras yinem wer ya, isoine ro anggur babo, ro Ḇaḇesasoser Allah.”

Petrus nari fyamyun Yesus

14:26-31

(Mat. 26:30-35; Luk. 22:31-34; Yoh. 13:36-38)

26Raimnai skodisen dow sanandik ra posa, skora ḇe urek Zaitun.

27 # Za. 13:7 Ma Yesus ikofen faro si ḇo doḇe: “Mko kam nari mkoḇe ḇirḇar ro kakyar mkoḇena. Snar fas-fas oso isya ro refo: Nari yaprer manfarandous ya ma domba sya skakek. 28#Mat. 28:16 Ḇape nari yiber aya kwar ido, nari Yapon mko ḇe Galilea.”

29Petrus ikofen faro Yesus ḇo doḇe: “Naek ansine ma nari se ḇirḇar ro rakyar sena ḇoi aya ma oroḇa.”

30Inja Yesus ikofen faro i ḇo doḇe: “Yakofen faro au, kaku ḇeri ro roḇ ine beri nari mankoko sya sor ḇe suru baim, famyun epen aya ḇe kior kwar.”

31Ḇape Petrus fyaḇri syadi we ḇo doḇe: “Ne, nari yamar warpu au, yapok yafamyun au ḇa.” Bese sya kako sakkofen rarirya.

Ro yaf Getsemani

14:32-42

(Mat. 26:36-46; Luk. 22:39-46)

32Raimnai Yesus kuker manfamyan Ḇyesya skora ro moḇ ḇenir ḇe Getsemani. Yesus ikofen faro manfamyan Ḇyesya ḇo doḇe: “Mkokon ro dine, insa Yara Yaḇe nadi.”

33Ma dun Petrus, Yakobus ma Yohanes fa skoso i. Fafisu anya Yesus imkak ra ryadadai, 34inja ikofen faro sko ḇo doḇe: “Sneri iswar fafaya ḇa, Yaḇaḇir imnis ra Yaḇe yamar. Mkokon ro dine ḇo mkowaren.”

35Imbran ḇe barpon knik ḇyan suba ro saprop ya bori ma Ḇye nadi insa jadi kada fafisu eḇesyanya isyonde bur i. 36Ikofen ḇo doḇe: “Sye Kamamo roi nakam naisya ro kwasa ḇedi, wun sek aninem ine bur Aya, ḇape jadi awer imnis marisen Ayedi imboi raris marisen ḇedi.”

37Raimnai kyaḇer ma, isrou manfamyan rikior ansko ya skenef. Ma Ikofen faro Petrus i ḇo doḇe: “Ne Simon, wenef ke? Jadifa mkowaren oras oser ḇa ke? 38Mkowaren ma mkoḇe nadi, insa mkosapi awer ro fafrowes; rur iso user ḇape kraf ya ma ipok ḇa.”

39Raimnai rya wer ma inadi nadi insandi anya wer. 40Ma rofyor kyaḇer wer isrou skenef wer snar skomkasna napok ḇa ma skofawi rosai skoḇe skokarem faro Yesus.

41Ḇarpur kyaḇer ḇe ḇeḇekiorya ma ikofen faro sko ḇo doḇe: “Mkenef mura fa mkomnai su mko. Imnis kwar. Fafisuya ryama kwar, mkomam kada, sḇoḇ Rumkun Snonkaku ya faro snonkaku ḇesasar. 42Mkokḇok e, mkorama kora. Ḇeḇoḇ aya nya fyanam kwar.”

Sfor Yesus

14:43-52

(Mat. 26:47-56; Luk. 22:47-53; Yoh. 18:1-11)

43Ro fafisu Yesus dawos kaker, Yudas ro fandu manfamyan samfur seser risuru Yesus ḇyansya, ryama kuker rak ḇeyun sumber ma karbere ḇesma wawan ro mananir imam-imamsya, ḇefawi nananem Refo Yahudisya, ma snon ḇebarara. 44Snon ḇeḇoḇ Yesus ḇyuk aḇyair faro si kwar, isoine: “Snon nari yasyum ya, irya, mkofori ma mkuni kuker ḇaḇye.”

45Ma rofyor ryama kwar ro dia, pyon fa isrou Yesus ma ikofen ḇo doḇe: “Rabi”, raimnai isyumi. 46Ro dia siserepen Yesus ma sfori. 47Snon oso ro fandu sko ro moḇ anya, pyas sumber ḇyeja ma pyerem Imam Ḇeba ya manfamyan ḇyeja knasi fa imuk. 48Yesus ikofen faro si ḇo doḇe: “Mkoḇe snon mamun ri aya ke, inja mkorama kuker sumber ma karbere fa mkofor aya? 49#Luk. 19:47, 21:37 Rasras na kam aya sya ro fandu mko ma Yaḇuk farkarkor ro rum Ari, ḇesya ḇo mkofor Aya ḇa. Ḇape rarirya kwar insa namnis fas-fas ḇero refo ya.”

50Ro dia manfamyan ansya sifrar siburi kam.

51Ro fafisu ya snon kbor oso isya syabusuni kuker kruḇen ḇepioperya iso Yesus. Siḇe sfor i, 52ḇape pyupes kruḇen anya ma ifrar ibur ḇaḇer.

Yesus ro ḇarpon Kankain Karkara Agama

14:53-65

(Mat. 26:57-68; Luk. 22:54-55, 63-71; Yoh. 18:12-14, 19-24)

53Ḇarpur wer ssun Yesus I ḇe ḇarpon Imam Ḇeba sya. Ma mananir imam-imamsya, snon ḇebarara sya ma ḇefawi nananem Refo Yahudisya sfanjur kam. 54Ma Petrus dakso Yesus ro ḇarpur kaku, isof dakrandum ro buḇes Imam Ḇeba ya ma kyon fandu ḇewaren sya ḇo dakdapen forya. 55Mananir imam-imamsya, isyadi wer Kankain Kakara Agama ansya sesewar saksi ro sasar Yesus, insa nari smuni fa imar, ḇape sisma sasar oso ro i ḇa. 56Snonkaku sya sibor sikofen saksi ankar ro Yesus, ḇape ḇaḇesaksi ro Yesus wos sena namnis ḇa snar nun ḇesisye.

57Inja snonkaku ri ḇeso sek saksi fa se karak Yesus, kuker saksi ankar ḇera dine: 58#Yoh. 2:19 “Nkomnaf snon ine ikofen kwar ḇo doḇe: Nari Yakakok Rum Ḇesren snonkaku sya sifrur ine ma nari yaḇausi ro ras rikior wer, ḇyeḇe frur ro ḇramin snonkaku ḇa.” 59Ro yar ine kako ḇeḇesaksi sya wos sena namnis ḇa kaker.

60Inja Imam Ḇeba ya dores ro fandu kankain anya ma ifuken Yesus ḇo doḇe: “Jadi fa kwarem roi oso ro saksi ḇeḇe karak Au sine ḇa ke?” 61Ḇape ḇye fasis monda ma kyarem woso ḇa. Imam Ḇeba ya ifuken wer ḇo doḇe: “Wairek i so au ke, Rumkun Allah ḇesma sanandikya?”

62 # Dan. 7:13 Yesus kyarem ḇo doḇe: “Ayai rya ḇaḇoi, ma nari mkomam Rumkun Snonkaku kyain ro ḇar raku Allah ḇepoik syadi ma ḇerama ker mandep ro nanki.”

63Mura Imam Ḇeḇa ani pyansawsawek mar ḇyena ma ikofen ḇo doḇe: “Fainda rosai kosewar saksi kaker ya? 64#Im. 24:16 Mkorower donef Allah kwar. Inja mkokara rariso?” Rarirya sawos namuk kuker mkarem oser, insa se ukumi fa Imar.

65Randak ro dia beri ḇo snon ono saninefi, span warek mkasi skuki ma sikofen faroi ḇo soḇe: “Ne nabi, indo wakofen ḇaii pan!” Ma snon ḇewaren warek sya sakḇaseri kako.

Petrus fyamyunepen Yesus

14:66-72

(Mat. 26:69-75; Luk. 22:56-62; Yoh. 18:15-18, 25-27)

66Ro fafisu anya Petrus isya ro sop ro buḇes. Ma Imam Ḇeḇa infyan ḇyesya ia ryama, 67ma rofyor infyan anya myam Petrus dakdapen for ya myam bos i, ma ikofen ḇo doḇe: “Au kako ḇeso sawawek Yesus, snon Nazaret ani.”

68Ḇape fyamyunepen ḇo doḇe: “Aya ine yafawi ḇa, ma yaḇor fnom roi wakofeni.” Raimnai ryaḇe rum ya ḇarpondi [ma mankoko sya sor].

69Rofyor infyan anya myam Petrus wer ikofen faro snonkaku ḇero diansya ḇo doḇe: “Snon ine oso ro fandu si.” 70Ḇape Petrus fyamyun epen wer. Fyoro ḇa wer kawasa ḇero diansya sikofen faro Petrus ḇo soḇe: “Kaku ḇeri au ine snon oso ro fandu si, snar snon Galilea ri sau!”

71Fyor anya Petrus ifras ma fyores ḇo doḇe: “Yafawi snon mkokofen ine ḇa kaku!”

72Ma rofyor ya mankoko sya sor ḇe suru. Insape Petrus iswar epen ro Yesus Ikofen kwar faroi ḇo doḇe: “Mankoko sya sor ḇe suru ḇaim, fyamyunepen aya ḇe kior kwar.” Mura Petrus kyanes.

Currently Selected:

MARKUS 14: LAIBHW

Highlight

Copy