MARKUS 15

Yesus ro ḇarpon Pilatus

15:1-15

(Mat. 27:1-2, 11-26; Luk. 23:1-5, 13-25; Yoh. 18:28–19:16)

1Arwo prim kaku mananir imam-imamsya fnoḇek sinan ḇeḇarara ma ḇefawi nananem Refo Yahudisya ma Kankain Karkara Agama sya sna wos oser kam kwar. Se wanka Yesus raimnai ssuni ma ssḇuki faro Pilatus. 2Pilatus ifuken Yesus ḇo doḇe: “Au ido wairek kawasa Yahudi ke?” Yesus kyarem ḇo doḇe: “Imnis wos bedi.”

3Ma mananir imam-imamsya se karak Yesus kuker roi nabor. 4Pilatus ifuken wer faroi ḇo doḇe: “Kwarem ḇa? Wamnaf kada karak sena nabor kaku nkur au!”

5Ḇape Yesus kyarem ḇa beri isof Pilatus ikandor.

6Ro ras ḇeba na indo ssfaspar snonkaku ḇesmai sya oser raris fararyor kawasasya. 7Ro fafisu anya snon oso snori Barabas ismai fnoḇek min ḇye ḇemamun ma ḇefrur mbrus. 8Inja kawasa ḇeḇor ansya srama ma sor, insa sfaspar ḇesma oso imnis ḇepon kwar. 9Pilatus kyarem ḇe si ma ifuken ḇo doḇe: “Mkomarisen fa yafaspar wairek kawasa Yahudi ine ke?” 10Ifawi kwar mananir imam-imamsya sḇoḇ Yesus snar simsori.

11Ḇape mananir imam-imamsya sfarkor ninyan kawasa ḇeḇor ansya sor fa Barabas ḇyeḇe faspar faro si. 12Pilatus kyarem wer ma ifuken faro si ḇo doḇe: “Rarirya ido rosai mkomarisen yafrur faro snon mkor ḇe wairek Yahudi ine?”

13Inja siyiw naba wer ḇo soḇe: “Ḇyeḇe pai ro aprop!”

14Raimnai Pilatus ikofen faro si ḇo doḇe: “Ḇape sasar rosai ifrur kwar?” Ḇape ssibras naba syadi ḇo soḇe: “Ḇyeḇe pai ro aprop!”

15Snar Pilatus iḇe ifrur sneprei kawasa ḇeḇor ansya sisnes na, inja fyaspar Barabas faro si. Ḇape Yesus sipreri, ma Pilatus ḇyuki fa spai i ro aprop.

Yesus isma anonef

15:16-20a

(Mat. 27:27-31; Yoh. 19:2-3)

16Ḇarpur wer snonmamun sya ssun Yesus ḇe rum karkara ḇenapes, ma sor snonmamun ḇese sya kam fa sfanjur. 17Ssansun i kuker syatu ḇefuk ma siyanem wower ḇeḇe borek ma srir i ro ḇruri. 18Raimnai insape ssḇansuba faroi ḇo soḇe: “Jow suba, wairek kawasa Yahudi!” 19Siprer ḇruri kuker doker fyor, ma saninefi ḇo sḇan suba ma ssomi. 20aSonefi raimnai sper ssansun syatu ḇefuk anya buri ma ssansuni wer kuker sansun Ḇyena.

Spai Yesus ro aprop

15:20b-32

(Mat. 27:32-44; Luk. 23:26, 33-43; Yoh. 19:17-24)

20bḆarpur kaku ssun Yesus randi spai i ro aprop ya. 21#Rm. 16:13 Fafisu ya snon oso snori Simon, snon Kirene Alexander ma Rufus suyor ḇe kma ḇebur ker yaf imbran uk, ma sidif snon anya fa ḇyar Yesus aporop Ḇyedi. 22Ssun Yesus ḇe moḇ ḇenir ḇe Golgota, isoine: Moḇ ḇukor ḇei. 23Raimnai ssḇuk anggur sfaunai kuker roi ḇefrurpis mamami faroi, ḇape imewer si. 24#Mzm. 22:19 Posa spai i ro aprop ma sirarwas sansun Ḇyena kuker sisawen onde fa sifawi oser-oser rarwas ḇyedi. 25Ras anya oras siw arwo spai i ro aprop. 26Ma sfas ḇair knam eḇedar se ukum i ro aprop ya pum ya isoine: “Wairek kawasa Yahudi.” 27Spai snonmamun risuru fnoḇek Yesus, oser ro ḇar raku Ḇyedi ma oser ro ḇar rasar Ḇyedi. [28Rarirya isrou bos rakrok refo isoine: “Nari skori ro fandu snonkaku ḇarḇor.”]

29 # Mzm. 22:8, 109:25; Mrk. 14:58; Yoh. 2:19 Snonkaku ḇeyunuk ro diwa sya sonefi ma skakiker siḇrusna ma sikofen ḇo soḇe: “Ye, au ḇeyoḇe ḇekakok rum ḇesren ma nari Bawesi wer ro ras rikior, 30faspar mankundau bur aprop ya ma Wasabu!”

31Rarirya kako mananir imam-imamsya fnoḇek ḇefawi nananem Refo Yahudisya sonefi ro mankun si ḇo sikofen ḇo soḇe: “Fyaspar snonkaku ḇese sya, ḇape ipok fa Fyaspar mankundi ḇa! 32Wairek, Wairek Israel iya iḇye kada isabu bur aprop insa nkomam ma nkokyar e.” Ma snon risuru spai ro aprop fnoḇeki ansu ya suyakkofen kako.

Yesus imar

15:33-41

(Mat. 27:45-56; Luk. 23:44-49; Yoh. 19:28-30)

33Ro oras samfur seser suru orkok, pampan ya ikawef sup ya mnuk ani, isof oras kior. 34#Mzm. 22:2 Ma ro oras kior ya Yesus dor naba ḇo doḇe: “Eloi, Eloi lama sabakhtani?” isoine: Allah Yedi, Allah Yedi, snaro wabur Aya?

35Simnaf rarirya snon diḇeso ḇeyores ro moḇ anya sikofen ḇo soḇe: “Mkomam kada, dor Elia.” 36#Mzm. 69:22 Ma snon oso dun bunek ya ma syoweni ro anggur ḇemnir posa kyuki ro doker baken ya ma ḇye fa Yesus dinem ma ikofen ḇo doḇe: “Indo kowaf ma komampan Elia ryama isabu i.”

37Raimnai Yesus dor kuker mkarem ḇeba ma ryir nyawa Ḇyedi.

38 # Kel. 26:31-33 Ro fafisu ya eruk kruḇen ro rum ḇesren ya imsap ra ḇye suru ro ḇo isof ro sop. 39Fyor mananir snonmamun ḇeyores ro Yesus ḇarpondi myam marmar Yesus Ḇyeja riarirya, ikofen ḇo doḇe: “Kaku ḇeri snon ine Rumkun Allah!”

40 # Luk. 8:2-3 Bin ono sisya sakmam ro swaf ḇeḇinkwan, ro fandu si Maria Magdalena, Maria snonkbor Yakobus i ma Yoses sna suḇedi, kuker Salome. 41Si kam siso farma Yesus ma suf farmyani rofyor isya ro Galilea. Ma ro dia bin ḇerama kwar ro Yerusalem ḇembran so Yesus sibor kaku.

Sḇekubir Yesus

15:42-47

(Mat. 27:57-61; Luk. 23:50-56; Yoh. 19:38-42)

42Ro fafisu anya fanam roḇ, ma ras anya ras fasasos isoine ras ḇeyuser mufa ro ras Mananai ya. 43Eḇedari Yusuf, snon Arimatea, snon ḇebarara ro Kankain Karkara Agama, ḇewaf kako Ḇaḇesasoser Allah, imku fa rya dor Yesus baken Ḇyeja ro Pilatus. 44Pilatus ikandor rofyor imnaf Yesus imar kwar. Inja dor mananir snonmamun ma ifuken faroi, kaku Yesus imar kwar ke? 45Rofyor imnaf wos mananir snonmamunya ḇyena kwar, insape ḇyuk fa Yusuf dun Yesus baken Ḇyedi. 46Inja Yusuf kyoḇes kruḇen bepioper ya raimnai, isabu Yesus baken Ḇyeja bur aprop ya, ma ryuren I kuker kruḇen ḇepioper ani. Posa bye kubiri ro ureren byai ro urek karui oso raimnai ikris karui oso fa isisen kubir ya kedwa i. 47Maria Magdalena ma Maria Yoses snari, sumamepen moḇ se kubir Yesus ro ya.

Currently Selected:

MARKUS 15: LAIBHW

Highlight

Copy