MARKUS 16
16
Yesus diḇri ro kubir
16:1-8
(Mat. 28:1-10; Luk. 24:1-12; Yoh. 20:1-10)
1Ras Mananai Yahudi isyonde kwar, Maria Magdalena ma Maria Yakobus snari, kuker Salome skokoḇes kefi-kefi insa skora ḇe kubir fa skoḇuk isfu Yesus. 2Ma arwo babo kaku ro ras Ari ani ori dek kwar ido skora ḇe kubir. 3Skokofen yae faro sko ḇo skoḇe: “Mansei nari ḇekris karui ḇeba anya bur kubir ya?” 4Ḇape fyor skofanam ido skomam karui ḇeba ani ikris kwar. 5Inja skosun randum ro kubir ya dori ma skomam snonkbor oso syansun syatu ḇepioper ḇo kyain ro ḇar raku. Skokandor fafaya ḇaḇeri,
6ḇape snonkbor anya ikofen faro sko ḇo doḇe: “Mkomkak awer! Mkosewar Yesus snon Nazaret, spai ro aprop anya. Diḇri kwar. Isya ro dine ḇa. Mkomam e! Mob srir i fa Ḇyarek ro ya isoine. 7#Mat. 26:32; Mrk. 14:28Inja mkora mkokofen faro manfamyan Ḇyesya ma faro Petrus: Pyon mko ḇe Galilea; ro diwa nari mkomami, imnis ikofen faro mko kwar.”
8Raimnai skosasyar ma skofrar bur kubir, snar radadai ma kanandor ya isawob sko. Skokofen roi oso ḇa faro mansei rya kaker, snar skomkak.
Yesus fyasnai mankundi ḇe ḇeso ma iwan manfamyan ḇyesi – Yesus dek ḇeboiyaswa
16:9-20
9Rofyor Yesus diḇri ro arwo babo ras Ari anya, fyasna mankundi bepon faro Maria Magdalena. Bin ine Yesus iyaw rur ḇemaḇak rifik buri kwar. 10Raimnai bin anya rya, ma ikofen ḇair faro ḇeso sawawek Yesus ansi snar ro fafisu anya sisya ro mandak ma skanes. 11Ḇape rofyor simnaf Yesus ikenem ma fyasnai i kwar faro bin ine sikyar ḇa.
12Raimnai Yesus fyasnai mankundi wer kuker sananai ḇese faro skomin risuru ro marandan besasyar bur mnu ḇeba ya. 13Inja sukaḇer wer fa sukofen ḇair faro min ḇese suḇesi ḇape sikyar su ḇa kako.
14Ḇarpur ya fyasna mankundi faro snon samfur seser oser ansya ro fafisu sanan, ma Ikofen ḇaḇe kakyar ḇa ma sne ḇepakrek sena faro si, snar sikyar faro snonkaku ḇemam i kwar ro ḇarpur aḇiḇer Ḇyeja ḇa. 15#Kis. 1:8 Raimnai ikofen faro si ḇo doḇe: “Mkora ḇe supswan ḇesiper, mkoḇaryas Ankankinem Ḇeḇye ya faro roi ḇekenem sya kam. 16Mansei ḇekyar ma ḇesma masi sren nari isma koreri, ḇape mansei ḇekyar ḇa nari ismai ukum. 17Aḇyair nane nari nafnoḇek snonkaku ḇekyar sya: nari siyau rur ḇemaḇak sya kuker Snori, ma nari sawos ro wos-wos ḇeḇaḇo faro si, 18ma nari suf ikak ma sinem roi ḇeyinem mamur ḇeyun ḇe marmar ya, ḇape nari simar ḇa; nari sirir ssibras na ro ḇeduf sya ma nari siprei.”
19 #
Kis. 1:9-11
Fyor Yesus dawos rarirya yoḇ si raimnai, diryor ḇe boiyaswa ma Kyain ro Allah ḇar raku Ḇyedi. 20Si kako sra sḇaryas Ankankinem Ḇeḇye ro moḇ na kam, ma Manseren ifararur fnoḇek si ma syoser wos ya kuker aḇyair ḇefnoḇek si.
Currently Selected:
MARKUS 16: LAIBHW
Highlight
Share
Copy
Want to have your highlights saved across all your devices? Sign up or sign in
