MARKUS 5
5
Yesus iyaw rur ḇemaḇak ḇesower snon Gerasa
5:1-20
(Mat. 8:28-34; Luk. 8:26-39)
1Ma skofyafer ro danosen ya ḇar iwara ro sup kawasa Gerasa sya sedi. 2Yesus dado bur waiya rande beri, snon rur ḇemaḇak sisower oso rya ker kubir na muma fa isrou Yesus. 3Snon anya ikenem ro kubir anna snar snonkaku yo syambraḇ fa iyaḇek i ḇa, snar siyaḇek i kwar kuker wanka, 4apyaur fama pyauk ma imerdawdiwer na, isof snonkaku yo syambraḇ fa fyadurui ḇa. 5Ras roḇ imbran ḇyediwai ro kubir ma urek na ḇo ḇoi fyararar ma ikoḇ mankundi kuker karui.
6Yesus ḇyinkwan kaker ḇesya ḇo myam raroi, inja ifrar fa isroui ma ḇyan suba faro Yesus, 7ma dar naba ḇo doḇe: “Nyaki rosai ḇekur au ma aya, ne Yesus Manfun Allah ḇekaki syadi? Kuker snonsnon Allah Wafrur susa awer aya!” 8Snar rofyor Yesus ikofen kwar faro i ḇo doḇe: “Ne, au rur ḇemaḇak, wasasyar bur snon ine!”
9Raimnai ifuken snon ani: “Snombri so?” Kyarem ḇo doḇe: “Snonsnon ayeja isoine syaran-syaran snar inkobore.” 10Snon rur ḇemaḇak sya ssour anya dor samsom insa Yesus iyaw awer rur ḇemaḇak ansya bur sup ani.
11Ro diya randip nai yo simbran ssewar nanan ro urek fuwar oso, 12inja rur ḇemaḇak ansya ssor faro Yesus ḇo soḇe: “Wawan inko fa inkosun ro randip siwa!” 13Yesus ḇyuk raris fararyor seja ma rur ḇemaḇak ansya sisasyar bur snon anya fa ssun ro randip ansi. Randip nai anya soper ro fofen ya ma simsar kam ro danosen ya ma simar: barbor seja fanam syaran risuru.
14Raimnai ḇewaren warek randip ansya sifrar ḇe mnu ḇeḇa ma mnu-mnu mawa fa sḇaryas inja kawasa ansi sisasyar fa sakmam rosai ḇeḇe jadi kwar ya. 15Srama faro Yesus ma smam snon rur ḇemaḇak sya ssour anya kyain, syansun i ma iknon dam, ḇape simkak. 16Snonkaku ḇemam roi ḇeḇe jadi anna sfarfyar faro ḇerama babo ansya rosai ḇeḇe jadi kuker snon rur ḇemaḇak sya ssower anya ma randip ansi. 17Simnaf rarirya sor faro Yesus insa ibur sup sedi.
18Rofyor Yesus dek wer ro waiya snon insanja rur ḇemaḇak ssour anya dor faro Yesus insa imarisen ido iso I.
19Yesus iso marisen ḇyedi ḇaḇoi ikofen faro i ḇo doḇe: “Wabur ḇe rum bedi ma kawasa ḇero mnu bedi ma ḇaryas faro si roi ḇeḇor Manseren Allah ifrur kwar faro au ma rariso Allah fyasna saswar ḇyedi faro au.”
20Snon anya ibur ma fyawar ro sup Dekapolis roi ḇeḇor Yesus ifrur kwar faro i ma si kam sikandor.
Yesus ḇyawes Yairus inai ḇyedi ma ḇyuk pararei faro bin ḇeduf rik oso
5:21-43
(Mat. 9:18-26; Luk. 8:40-56)
21Yesus skokaḇer ker Gerasa skofyafer ro Kapernaum wer kawasa sibor srama sisrou i. Isya kaker ro danosen andir ya. 22Mananir rum nadi oso ryama, snonsnon ḇyedi isoine Yairus. Fyor myam Yesus, ḇyan suba ro ḇarpon ḇyedi, 23ma dor faro i ḇo doḇe: “Inai iyeja iduf marḇak ma fyanam imar, rwama kada insa pan ro i fa iprei ma ikenem wer.”
24Inja Yesus iso snon ani. Kawasa donek ḇefnak ḇa sakso i, ma sifyos epen Yesus.
25Ro fandu kawasa ansya bin oso isya iduf dafduf rik taun samfur seser risuru kwar, 26rarwan nabor kwar ifrauk dokter sibor fa ssḇuk aryawin ro dafduf ḇyedi isof nana ḇyena naḇro fama iprei ḇa ḇoi dafduf anya iba syadi wer ro randak ya. 27Imnaf abar kwar ro naek ḇyesi ro Yesus fararur ḇyena inja ro fandu kawasa ḇeḇor ansya ryama fyanam Yesus kruri ma pyan ro sansun syatu Yesus ḇyena, 28snar kyara ḇo doḇe: “Rofyor yapan monda ro sansun ḇyena nari yaprei.”
29Fafisu ya beri dafduf ḇyeja imnai ma ḇyaḇir baken ḇyeja iprei kwar. 30Ro fafisu ya beri Yesus ḇyaḇir samambraḇ ono nasasyar bur i, inja isiḇer fa myam sewar ro fandu kawasa ansya ma ifuken: “Mansei ḇepan ro sansun syatu ayena?”
31Manfamyan ḇyesya sikofen ḇo soḇe: “Mam kawasa ḇeḇor sine sifyos apepen au ḇesya ḇo: wafuken mansei ḇepan ro aya?”
32Ḇape Yesus myam yar-yar fa fyawi manseiso ḇepan ro i nya. 33Bin anya imkak snar ifawi rosai ḇeḇe jadi kwar ro i, inja ḇyan suba ro Yesus ḇarpon ḇyedi ma kuker napnapes ikofen ḇadir faro Yesus. 34Yesus ikofen faro bin anya ḇo doḇe: “Ne, inai Yedi, kakyar beja ḇyuk aski faro au. Wabur kuker aski ma waprei ro dafduf bedi!”
35Rofyor Yesus dawawos kaker, snonkaku ono kina mananir rum nadi anya ḇyansya srama sikofen ḇadir ḇo soḇe: “Inai banya imar kwar inja wafrur susa awer mankorari I.”
36Ḇape Yesus ḇyefandun wos sena ḇa ḇoi ikofen faro mananir rum Ari anya ḇo doḇe: “Wamkak awer, wakyar monda!” 37Raimnai Yesus damrer ono siso indi, ḇoi derer kuker Petrus, Yakobus ma Yohanes Yakobus ḇedari ḇyedi. 38Skorama ro mananir rum nadi anya rum ḇyedi ma Yesus myam kawasa sya sembrus, skanes kuker mkarem ḇeba. 39Yesus syun ro rum anya ma ikofen faro kawasa ansya ḇo doḇe: “Snaro mkoḇe mbrus ma mkokanes? Inai ine imar ḇa ḇoi denef!”
40Ḇape simbrif i. Ma iyaw kawasa ansya raimnai dun inai anya snari ma kmari ma suiso ḇeso i randum ro sim inai anya ḇyedi. 41Ma Yesus kyin inai anya ḇrasi ḇo ikofen ḇo doḇe: “Talita kum,” isoine: “Ne inai aune, yakofen faro au, wakḇoke!”
42Fyor ya beri inai anya ikḇok fa dores ma imbrane, snar ḇye umur taun samfur seser risuru kwar. Kawasa ḇero diya nansya kam sikandor fafaya ḇa. 43Yesus danun pakrek kaku faro si insa oso ifawi awer roi nane ma iwan fa sfan inai ani.
Currently Selected:
MARKUS 5: LAIBHW
Highlight
Share
Copy
Want to have your highlights saved across all your devices? Sign up or sign in
