MARKUS 6
6
Siyaw Yesus ro Nazaret
6:1-6a
(Mat. 13:53-58; Luk. 4:16-30)
1Ḇarpur Yesus kuker manfamyan ḇyesya ssraḇe mnu marin ḇyedi. 2Ro ras Mananai Yahudi, Yesus ḇyuk farkarkor ro rum Ari ḇero Nazaret ma kawasa Jemaat ḇeba anya sikandor snar simnaf farkarkor ḇyena, inja sikofen ḇo soḇe: “Moḇ saiso isma roi ḇeradine ro ya? Fawawi sanaiso ssḇuk faroi? Isof ifrur aḇyair ḇefrur kanandor ḇera dine kuker ḇramin ḇye suine? 3Ko kam kofawi i ḇe sukan ai, Maria romawa ḇyedi, naek ḇyesi so Yakobus, Yoses, Yudas ma Simon? Ma kofawi kako srar ḇyesya sisya ro fadu ko?” Ro diya snar siwarki i mura siyaw i.
4 #
Yoh. 4:44
Inja Yesus ikofen faro si ḇo doḇe: “Nabi oso se mafi ro moḇ na kam, ḇoi ro mnu ḇyedi ma fandu kawasa ḇyesi ma rum ḇyedi, sefandun mankuni ḇa.”
5Yesus Imewer ifrur aḇyair kanandor oso ro diya ri, imboi ḇyuk pararei faro ḇeduf ri ḇeso monda kuker pyan ro si. 6aYesus Kyara si ma ikandor snar kakyar ḇa sena.
Yesus iwan manfamyan samfur seser risuru
6:6b-13
(Mat. 10:5-15; Luk. 9:1-6)
6bRaimnai Yesus Imbran yar mnu ḇe mnu fa ḇyuk farkarkor. 7Yesus dor manfamyan samfur seser risuru ansya ma iwan si fa se suru-suru. Ḇyuk samambraḇ faro si fa ssḇuki yau rur ḇemaḇak sya, 8#Luk. 10:4-11 ma danun faro si insa ssun awer roino ro marandan sedi, ankyon na manda, mboi ssun awer mamami, ssun awer roi ḇeḇaryam, ssun awer kako pipi ma ḇeḇoḇek sena. 9Mkowemna kada mkosower na mboi mkun sansun risuru ḇa. 10Yesus dawos pdef faro si ḇo doḇe: “Mkorafa ro moḇ oso ra simarisen fa mkosun ro rum oso ido mkokain ro dia isof mkosasyar bur wer ro moḇ ani. 11#Kis. 13:51 Imboi ro moḇ oso simarisen mko ḇa ma simewer srower mko ido ro moḇ anya mkokokef fafen ḇero mkowemna fa ne aḇyair faro si.”
12Inja sra ma ssḇaḇdas faro kawasa sya fa simbror, 13#Yak. 5:14 ma siyaw rur ḇemaḇak sibor ma ssrem ḇeduf sibor kuker mani ma ssḇuk pararei faro si.
Smun Yohanes Ḇemasi
6:14-29
(Mat. 14:1-12; Luk. 9:7-9)
14 #
Mat. 16:14; Mrk. 8:28; Luk. 9:19 Wairek Herodes i kako dakmnaf Yesus snar Ḇye snonsnon ma kawasa sikofen ḇo soḇe: “Yohanes Ḇemasi diḇri ro fandu ḇemar sya ḇefnai samambraḇ-samambraḇ na nafararur roi.”
15Ono soḇe: “Elia i ri!”
Ḇese sya wer soḇe: “Nabi sya oso irya ke imnis raris nabi ro ḇepon iwara.”
16Rofyor Herodes imnaf rarirya ikofen ḇo doḇe: “Roḇa, Yohanes yaperem uk sasukor anya irya, i so ḇeyiḇer wer i.”
17 #
Luk. 3:19-20
Snar kaku Herodes i ḇewan fa sfor Yohanes fa se wanka i ḇo ismai ro bui snar dun Herodias ḇedar ḇyeja Filipus swar i, fa fyakawini. 18Snar fafisu oso Yohanes fyarkor Herodes ḇo doḇe: “Swasar snar wun ḇedar beja swa ḇyedi!”
19Knam ḇeḇedar fa Herodias imsor famyun Yohanes ro sneri ḇo syewar nyan fa iḇe myun i fama jadi ḇa, 20snar Herodes ḇyemaf Yohanes i snar ifawi Yohanes snonkaku ḇenapes ma ḇesren inja fyadiren i. Ḇape rofyor imnaf sap Yohanes sneri ḇyefisfyas, rarirya no imarisen imnaf i.
21Herodias insape isma fafisu ḇepyum ya rofyor Herodes ifrur munara ya warek ras ḇyeja faro ḇebarara ḇyesi, mambri sya ma snonkaku ḇeḇe snonsnon ro sup Galilea sya. 22Ro munara anya Herodias inai dojaru ḇyedi Salome ryarpon ifyer ro ḇebarara ansya ḇarpon sedi. Wairek ikofen faro inai anya ḇo doḇe: “Wor rosai wamarisen ya ro aya imba na yaḇuk na ḇe au!” 23Ma ḇye syasi faro inai ḇyanya ḇo doḇe: “Rosai waḇe wor kaker ro aya, nari yaḇuk i faro au, ḇaḇesasoser ayeja ḇar ya iryano yaḇuk i kako!”
24Inja inai anya rya ifuken snari ḇo doḇe: “Rosai nari yor ḇesyani?” Snari doḇe: “Wor Yohanes Ḇemasi ḇruri!”
25Rarirya fasau kaku inai anya rya faro wairek ma dor ḇo doḇe: “Yamarisen insa ro knikine beri buk Yohanes Ḇemasi ḇruri ro ben oso ḇe aya!”
26Fafisu anya wairek sneri ḇye susa namsin ḇa, ḇape snar syasi ḇyedi, ma snar ḇebarara sya fyadwer fararyor anya ḇa. 27Wairek iwan fasau snon-mamun ya ḇe bui, kuker sasoser insa rya pyerem uk Yohanes ḇruri. Snon anya rya pyerem uk Yohanes ḇruri ro bui. 28Snon anya dun Yohanes ḇruri ro ben ya ma ḇyuk i faro inai ani, ma inai anya dakun i faro snar i. 29Rofyor Yohanes manfamyan ḇyesya simnaf marmar ḇyeja srama ssun baken ḇyeja fa serak i ro kubir.
Yesus fyan snon syaran ririm 6:30-44
(Mat. 14:13-21; Luk. 9:10-17; Yoh. 6:1-13)
30Fyoro ḇa manfamyan Yesus ḇyansya sisiḇer ma siryur kuker Yesus wer ma sfarfyar faro i roi ḇeḇor sifrur ma sfarkor na. 31Inja ikofen faro si ḇo doḇe: “Mkorama kosewar moḇ ḇeḇeursḇa insa kemir ma komnaisu ko resari!” Snar snonkaku ḇeramuma ma ḇeramura sibor kaku isof skosma fafisu ḇa kako fa skonan. 32Inja skek wai ya ḇo skora ḇe moḇ ḇeḇeursḇa oso.
33Ḇape ro fyor skek wai ya kawasa sibor smam sko, ma sifawi moḇ skora yoḇ ya. Inja simbran ro nyan bera ḇande ya ma fasaw monda kawasa ḇera ker mnu ḇeba sibor spon sko raro moḇ skoḇe skora yoḇ ani. 34#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36 Ro fyor Yesus isabu ro wai ya munde, myam kawasa dandonek ḇefnak ḇa ansya inja iswar si, ḇyuk simnis domba ḇena manfakwak ḇa. Inja fyarkor si ro roi nabor. 35Snar fanam roḇ kwar manfamyan ḇyansya sra faro i ma sifuken ḇo soḇe: “Moḇ ine ḇyeursḇa ma fanam roḇ kwar. 36Inja wawan si fa sibur insa sskoḇes roḇeyan ḇesi ro mnu-mnu ḇefanam-nam nane.”
37Ḇape Kyarem faro si ḇo doḇe: “Mkoiso nari ḇeḇuk nanan faro si!” Sikofen faro i ḇo soḇe: “Donek ḇeḇa ḇera dine koḇoḇ dinar utin risuru wer kako fa kofan si nari imnis ḇa kako.”
38Ḇape ikofen faro si ḇo doḇe: “Mamami rifisi mkun ya? Indo mkomam pan!” Rofyor smam kwar sikofen ḇo soḇe: “Mamami ririm ma in risuru.”
39Rarirya Yesus iwan fa kawasa ansya skain fa se uk-ukem ro aḇris sya bonsi. 40Ma uk-ukem anna ono ne utin oser ono wer ne samfur ririm. 41Ma Yesus dun mamami ririm ma in risuru kwar, iwakwaker ḇe nanki ma isawar dofen roḇean anna posa, pyanasnis na ma ḇyuk na faro manfamyan ḇyansi, insa sirarwas na faro kawasa ansya kam; rarirya kako in risuru ansui. 42Kawasa ansya sanan kam isof sarbor. 43Raimnai siryur roḇeyan ḇedawer na ma sisma inawen samfur seser risuru nafo, in sya ḇeso. 44Kawasa snon ḇeyan mamami ro ras anya sya si kam se syaran ririm.
Yesus Imbran ro warya bori
6:45-52
(Mat. 14:22-33; Yoh. 6:16-21)
45Posa kwar Yesus iwan fasaw manfamyan Ḇyesya fa sek ro wai ḇo spon i ḇe danosen ya ḇar iwara ḇe Betsaida, ma iwan kawasa ḇeḇor ansya fa sibur. 46Rofyor sibur ḇesisye kwar, Yesus dek urek ya fa ḇye nadi. 47Roḇ kwar wa anya isya ro danosen ya faduri, ḇoi Yesus demir ro ḇande. 48Rofyor ya myam doḇer ya myun manfamyan ḇyansi, simbrar ḇe moḇo ḇa snar wam ya iso ro wai rawer, ma indokada oras kior, imbran ro war ya bori fa rya warek si. 49Snar imbran ro war ya bori, soḇeda faknik riri, inja simkak ḇo sar naba kam.
50Snar smam kami eḇedari sikandor. Ḇape Yesus ikofen faro si ḇo doḇe: “Mkoknon! Ayairya, mkomkak awer!” 51Rarirya dek ro wai ya fa isrow si ma wam anya iḇrin bos beri. Sisnesna ne fesfyas ma sikmom. 52Snar nanan mamami ḇefrur kanandor anya isya ḇye karkara kaker faro si ma siwarki ro sisnesna.
Yesus ḇyuk pararei faro ḇeduf ono ro Genesaret
6:53-56
(Mat. 14:34-36)
53Skofyafer kwar Yesus ma manfamyan Ḇyesya skorande skopyar ro Genesaret. 54Fafisu ya skado bur wai ya, kawasa ansya smam bir Yesus I. 55Inja sifrar sikofen ḇair faro kawasa sya kam ro sup ani, ma sun ḇeduf sesya ro waryar faro Yesus ro moḇ simnaf Yesus isya ryo ya. 56Moḇ rya yoḇ na kam ḇe mnu-mnu ma mnuḇeba-mnuḇeba kawasa srir ḇeduf sesya ro nyan andir ma sor samsom faroi, insa imarisen fa span monda ro syatu Ḇyeja pusyom na. Ma kawasa kam ḇepan roi siprei.
Currently Selected:
MARKUS 6: LAIBHW
Highlight
Share
Copy
Want to have your highlights saved across all your devices? Sign up or sign in
