MARKUS 7
7
Allah sasoser ḇyena ma Yahudi nari sena
7:1-23
(Mat. 15:1-20)
1Fyor oso snon Farisi ono ma ḇefawi nananem Refo Yahudi ono ḇera ker Yerusalem srama faro Yesus. 2Smam Yesus manfamyan ḇyesya ono sanan kuker ḇramin bemamas, isoine sḇan ssibras na ḇa.
3Snar Yahudi Farisi ansya simnis Yahudi ḇesesya, sanan ḇa ro fyor sḇan ssibras na ḇaim, snar se user rari up sesi ro ḇepon. 4Ma rofyor skaḇer ker pasar sipok sanan ḇa kako snar simasisren si ḇaim. Rari ḇeḇe waris ḇera dine nabor kaker, ḇeraris ḇan-ḇan sek, fyom, ma rosaser sifrur ro kansai.
5Naiso ḇeḇe knam fa Farisi ma ḇefawi nananem Refo Yahudi sifuken Yesus ḇo soḇe: “Snaro manfamyan ḇesya sakḇe user kpu koḇesya rari sena ḇa, ḇoi sinan kuker ḇramin ḇemamas?”
6 #
Yes. 29:13
Yesus Kyarem faro si ḇo doḇe: “Kaku ra moḇ Nabi Yesaya ḇyardi mko ra ya, snonkaku ḇarḇor ḇekenem kuker rari ḇekaku ḇa! Snar fas-fas oso ryok ḇo doḇe: Kawasa sine ssom aya kuker sḇardip monda, ḇape sisnesna nnḇinkwan bur aya. 7Fainda oso ḇa sḇe ari faro aya, snar farkarkor sḇukna sasoser snonkaku nairi.
8Allah sasoser ḇyena mkoḇe rer na, ḇoi mkuf rari snonkaku.”
9Yesus ikofen faro si wer ḇo doḇe: “Mkofawi nananem kaku isof mkosaun Allah sasoser Ḇyena insa mkofaduru rari mankun mkoḇena.” 10#Kel. 20:12, 21:17; Im. 20:9; Ul. 5:16 Snar Moses dakkofen kako ḇo doḇe: “Be maf kmami ma snami! Imboi: mansei ḇefras kmari roḇa snari kada na imar. 11Ḇape mkokofen ḇo mkoḇe: Rofyor oso ikofen faro kmari roḇa snari: rosai yana fa yaḇuki fyaduru mu, yaḇuk na nnfarser isoine samsom faro Allah, 12imboi mkorir si ḇaḇeri fa sifrur roi oso faro kma sesi roba sna sesi. 13Rariya Allah wos ḇye mkofarkor ya mkoso i ḇa, snar mkoso syadi rari mkoḇena. Ma roi ḇerarirya kaker naiso mkofrur na.”
14Raimnai Yesus dor kawasa ansya ma ikofen faro si ḇo doḇe: “Mko kam mkomnaf faro aya, ma mkokram pyum wos Yakofen nane. 15Rosai rya wer ḇero ḇondi, ma ḇesun ro snonkaku sya oso, napok nafrur mamas si ḇa, ḇoi roi ḇesasyar ro snonkaku sya naiso ḇefrur mamas na. [16Mansei ḇeḇe knaram fa ḇyukrower iḇye ryower pyum!]”
17Ro fyor Yesus syun ro rum oso fa ryir kawasa ḇeḇor ansya, manfamyan ḇyesya srama fa sifuken kankunes ḇero wos sarḇer ani. 18Rarirya Yesus kyarem faro si ḇo doḇe: “Inja mko kako mkakfawi kankunes ḇyeja ḇa ke? Mkofawi roi ḇeḇor ḇero ḇandi fa ḇesun ro snonkaku sya napok nafrur mamas snonkaku sya ḇa. 19Snar roi ḇesun anna nnsun ro kakara sena ḇa ḇoi nnsun ro sasop sena posa sisawen na ro akyek!” Rarirya Yesus fyasna roḇean nakam nasren.
20Ikofen wer ḇo doḇe: “Rosai ḇesasyar ro snonkaku sya na kada nafrur mamas si. 21snar roi ḇero sne snonkaku nasasyar ro swaruser ḇarḇor, nafsu kraf, karau, mamun, 22farḇakḇuk, rmomen, ḇarḇor, ankarkar, nafsu kraf, masasor anonef, kafkofen, marares, ḇaḇe dip. 23Roi ḇeḇyeḇa ḇera dine nek ro sne karkara ma naiso ḇefrur mamas snonkaku sya.”
Bin Siria-Fenisia ḇekyar Yesus
7:24-30
(Mat. 15:21-28)
24Raimnai Yesus imbran ro dia ma ryaḇe sup Tirus. Rya ro Tirus syun ro rum oso ro mnu ifyafer ro ya kuker kankunes, insa kawasa sya sifawi awer raramuma Ḇyedi. 25Imboi bin oso inai ḇyeja rur ḇemaḇak ya isawoḇer i, imnaf Yesus ryama, mura ryama ḇyansuba ro wessu. 26Bin anya bin Yunani er Siria-Fenisia. Bin anya dor samsom faro Yesus insa Iyau rur ḇemaḇak ḇesawoḇer inai ḇyedi. 27Ma Yesus ikofen faro i ḇo doḇe: “Ipyum syadi romawa ḇena roḇean na sya sarbor resari, snar roḇean ḇefasos faro romawa sya kopok kosawen na faro naf sya ḇa.”
28Ḇape bin anya kyarem faro Yesus ḇo doḇe: “Kaku ḇaḇoi Manseren, ḇape naf ḇero meja ya baḇdi sya kako sakan roḇean mom romawa sya san ḇo ḇesapi na.”
29Inja Yesus ikofen faro bin anya ḇo doḇe: “Snar wos ḇena, rwamura beri, inari rur ḇemaḇak anya isasyar kwar bur inai bani.”
30Bin anya ibur ḇe rum ḇyedi, ma isrow inai ḇyeja ḇyarek ro anenef ḇyedi ḇoi rur ḇemaḇak ya ibur i kwar.
Yesus ḇyuk pararei faro snon ḇepro oso
7:31-37
31Raimnai Yesus ibur sup Tirus imbran uk Sidon fa ryaḇe danosen Galilea, dun uk sup Dekapolis faduri. 32Ro diya kawasa sya ssun snon ḇepro ma ḇewos kir ḇa faro Yesus ma sor faro Yesus insa Isawar dofen snon ani. 33Ma rofyor Yesus dun snon anya fa subur kawasa ḇeḇor ansya raimnai isu ḇrampinsi ro snon anya knaram ḇyeja ma daninef ro ḇrasi posa pyan ro ramar ḇyedi. 34Raimnai Yesus myam ḇe nanki ma imnai ḇe do ma ikofen faro snon anya ḇo doḇe: “Efata!” isoine: Base!
35Rofyor anya beri knasi ḇyas ma ramar ḇyeja kako imarmer ma dawos pyum. 36Yesus ikofen faro kawasa ḇero moḇ ya insa sfarfyar awer faro manseirya wer kako. Ḇape rofyor Yesus myun warek si insape sḇaryas syadi wer. 37Sikandor ma sikmom ma sikofen ḇo soḇe: “Ifrur roi ḇeḇor nakam napyum kaku, ḇepro sya srower, awer sya ḇyuk fa sawos wer.”
Currently Selected:
MARKUS 7: LAIBHW
Highlight
Share
Copy
Want to have your highlights saved across all your devices? Sign up or sign in
