1 Johani 4
4
Moya wa ditshuri ni moya wa makuhu
1Vorandeka, mi nga kholweni ka yotshe mimoya, aniko, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko. 2Moya wa Txizimu mi na wu zivisa tiya: Wotshe moya wu wu fakazako ti to Jesu Kristu a tile ha mafuni ngu wutumbu wakwe, mbwa Txizimu. 3Se wotshe moya wu wu si fakazeliko Jesu, hi nga wa Txizimu; awuwa ngu wona moya wa mkaneti wa Kristu, mi ti engisile ti to wu nata, se konkuwa wa hoha ditikoni.
4Sivananananu, anu mi va Txizimu, se mi xute vaprofeti va makuhu. Nguko Moya wu wu ku kwanu mbwa hombe kupinda wule wu ku ka vathu va ha ditikoni. 5Vona mba ha ditikoni, ngu toneto va womba-womba ngu ta ha mafuni, se mafu ma va engisa. 6Athu hi va ka Txizimu, awu a zivako Txizimu wa hi engisa. Awu i si nga wa Txizimu kha hi engisi. Ngu toneto, hi wu zivisako tona Moya wa ditshuri, ni moya wa makuhu.
Txizimu Lirando
7Vorandeka, he randaneni, nguko lirando lita ngu ka Txizimu, votshe va vo randeka, va velekilwe ngu Txizimu, se va txi ziva Txizimu. 8Awu asi randiko, kha txi zivi Txizimu, nguko Txizimu, Lirando. 9Lirando la Txizimu li ti wonekisisile tiya kwathu: Txizimu txi rumete Mwanana wa txona wammweyo ekha ha mafuni, kasi ku athu hi hanya ngu ngene. 10Lirando la Txizimu ngu liya: Hi nga athu hi nga randa Txizimu, txona ngu txona txi nga hi randa, txi hi rumela Mwanana wa txona, ku ta maha mhamba ya kudihela sionho sathu. 11Vorandeka, ngako Txizimu txi nga hi randisa tiya, nathu hi fanete kurandana. 12#Wona ni ka: Joh. 1:18. A walo wu a nga wona Txizimu ni ditshiku ni da dimwedo, aniko, ngako hi txi randana, Txizimu txi zumba ni nathu, se lirando la txona li hetisekile kwathu.
13Hi tiziva ti to athu hi zumba ka Txizimu, ni ti to txona txi zumba kwathu, ngu kuwa txi nga hi ninga Moya wa txona. 14Se athu hi ti woni, kambe ha fakaza ti to Tate a rumete Mwanana wakwe ku ta maha Muhanyisi wa ditiko. 15Awu a fakazako ti to Jesu Mwanana wa Txizimu, Txizimu txi zumba kwakwe, se nene a zumba ka Txizimu. 16Se athu hi li zivile ni ku li tumela lirando li Txizimu txi ku nalo ni nathu. Txizimu lirando; awu a zumbako lirandoni, a zumba ka Txizimu, se Txizimu txi zumba kwakwe. 17Ngako lirando li di hetisekile kwathu, hi nava ni kutsana ka ditshiku da kulamulwa, nguko atiya Kristu a ku ngu tona, nathu hi zumbisile toneto ha ditikoni. 18Ku walo kuthava amu ka lirando, nguko lirando la kuhetiseka li tovela kuthava. Kuthava kutsimbilelana ni kutsayiswa; se awu a thavako kha nga ni lirando lo hetiseka. 19Athu hi na ni lirando, nguko txi khatile Txizimu txi hi randa. 20Ngako m'thu a txi khene: “Ani na randa Txizimu,” na a txi vengela mwanawe, mthuyo ana ni makuhu: Nguko awu asi randiko mwanawe, awu a mu wonako, kha na kusikota kuranda Txizimu txi asi txi woniko. 21Txirumo txi hi nga txi amukela kwakwe Jesu Kristu ngu txiya: Awu a randako Txizimu, a na rande ni mwanawe.
Currently Selected:
1 Johani 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.