1 Johani 5
5
Likholo la xula mafu
1Wuhi ni wuhi a kholwako ti to Jesu i Mesiya, a velekilwe ngu Txizimu; se awule a randako m'veleki, wa m'randa kambe awule a nga velekwa ngu ngene. 2Ati taku ha va randa vanana va Txizimu, hi ti zivisa tiya: Ngako hi txi randa Txizimu ni kuengisa sirumo sa txona. 3#Wona ni ka: Joh. 14:15. Nguko kuranda Txizimu ti womba kuveketa milayo ya txona; kambe milayo ya txona kha yi nemeli. 4Txihi ni txihi txi nga velekwa ngu Txizimu txa xula ditiko; se atxi txi xulako ditiko ngu likholo lathu. 5I mani a xulako ditiko hahanze ka wule a kholwako ti to Jesu Mwana wa Txizimu kani?
Wufakazi wa kufakazela Mwanana
6Jesu Kristu ngene wu a nga ta kwathu ngu mati a kubhabhatiswa kwakwe ni mnoha. Moya ngu wona wu fakazako, nguko Moya ngu wona i ku ditshuri. 7Nguko ku na ni tifakazi tiraru: 8Moya ni mati ni mnoha. Kambe sotshe siya sa siraru, si fakaza mhaka yimweyo. 9Ngako hi txi tumela wufakazi wa vathu, he ziveni ti to wufakazi wa Txizimu mbwa hombe ngutu kupinda wa vathu. Nguko wufakazi wa Txizimu ngu wu txona txi nga wu mahela Mwanana wa txona. 10Awu a kholwako ka Mwanana wa Txizimu, wufakazi wu kwakwe. Awu asi kholwiko ka Txizimu txi maha Txizimu txa makuhu, nguko kha kholwi ka wufakazi wu txi nga mahela Mwanana wa txona. 11#Wona ni ka: Joh. 3:36. Se wufakazi wa kona ngu wuwa: Txizimu txi hi ningile wutomi wo mbi guma, wutomi wuwa wu ka Mwanana wa txona. 12Awu a ku ni Mwanana wa Txizimu ana ni wutomi; awu a ku si nga ni Mwanana wa Txizimu, kha nga ni wutomi.
Wutomi wo mbi guma
13Timhaka tiya totshe ni bhalela anu mi kholwako ditinani ka Mwanana wa Txizimu, kasi ku mi txi tiziva ti to mi na ni wutomi wo mbi guma. 14Kuthemba ku ni ku nako masoni ka Txizimu ngu kuwa: Ngako hi txi txi kombela txo maha, madingano ni kuranda ka Txizimu, txa hi engisa. 15Ngako hi ti zivako ti to Txizimu txa hi engisa ka totshe ti hi txi kombelako, ha tiziva kambe ti to asi hi nga si kombela ka txona hi si mani.
16Ngako m'thu a txi wona mwanawe a txi maha txionho, atxi txi si yisiko kufani, a na mkombelele; se Txizimu txi na mninga wutomi, ngako kha ditshuri txionho txiya i si nga txa kuyisa kufani. Txiho txionho txi txi yisako kufani, kambe hi nga txona txi ni ku khani a na mkombelela ngu txona. 17Wotshe wubihi njionho, kambe txiho txionho txi txi si yisiko kufani.
18Ha tiziva ti to votshe va va nga velekwa ngu Txizimu, kha va hanyeli kuonha, nguko Mwanana wa Txizimu wa va veketa, se m'bihi kha na ku va gwesa. 19Athu ha tiziva ti to hi va ka Txizimu, ni ti to ditiko dotshe di mtamoni ka m'bihi.
20Athu ha tiziva ti to a tile Mwanana wa Txizimu, e ta hi ninga mapimo, kasi kuziva Txizimu txa ditshuri. Se athu hi maneka hi di tshangani ni Txizimu txi i ku txa ditshuri, ngu konaho ka Mwanana wa txona Jesu Kristu. Awuwa ngene i ku Txizimu txa ditshuri ni wutomi wo mbi guma.
21Sivananananu, tshuralelani sizimu sa walo! Amen!
Currently Selected:
1 Johani 5: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.