1 Samuwele 7
7
1 # Wona ni ka: 2 Sam. 6:2-4; 1 Mak. 13:5-7. Sekoko vathu va Kiriyate-Jeyarimi va to ta, ve ta teka dibhokiso da Mkoma, ve tsula nado nyumbani ka Abhinadhabhi, mmangoni; se va to sawulekisa Eleyazari, mwana Abhinadhabhi, kuva mxayisa wa dibhokiso da Mkoma.
Samuwele wa fuma Israyeli
2Se ku to maheka tito, kukhukhela ka ditshiku dile, dibhokiso di to zumba Kiriyate-Jeyarimi, kupinda masiku o tala, kala kuhoka magumi mambidi a malembe; se yotshe nyumba ya ka Israyeli yi to dila ka Mkoma.
3Sekoko Samuwele a to womba ka votshe va nyumba ya ka Israyeli, a txi khene:
Ngako mi txi hundukela ka Mkoma ngu totshe timbilu tanu, thavisani sizimu sa vamatiko ni sa astarote hagari kwanu, mi lulamisela Mkoma timbilu tanu totshe, kambe mi thumela ene dwe, se a na mi hulukisa manzani ka Vafilista.
4Sekoko vanana va ka Israyeli va to thavisa sizimu sa va ka bhahali ni sa astarote hagari kwawe, ve thumela Mkoma dwe.
5Samuwele a to engeta, a txi khene: Sengeletani votshe va ka Israyeli kona Misipa, aniko na mi kombelela ka Mkoma. 6Se va to sengeletana kona Misipa, ve reka mati ve ma theletela masoni ka Mkoma, kambe ka ditshiku donedo va to titona kudya, va txi kha vona:
Hi onhete Mkoma.
Se Samuwele a to lamula vanana va ka Israyeli kona Misipa.
7Va di ti pfite koko Vafilista taku, vanana va ka Israyeli va ti sengeletanile kona Misipa, vahombe va Vafilista va to kwelela veya wukela va ka Israyeli; se mbimo yile vanana va ka Israyeli va nga tipfa va to thava ngu mhaka ya Vafilista. 8Ngu kumaha keto, vanana va ka Israyeli va to kha vona ka Samuwele:
U nga karale ku hi pekela huwa ka Mkoma Txizimu txathu, kasiku a txi hi hulukisa manzani ka Vafilista.
9Sekoko Samuwele a to teka txinvutana txo ngadi txi txi mama, e maha ngu txona txotshe mphaxo wo hiswa ka Mkoma; Samuwele a to kombelela va ka Israyeli ka Mkoma, se Mkoma a to mu engisa. 10Se ku to maheka taku, ngako Samuwele a txi ngadi e maha mningelo wa kuhiswa, Vafilista va to bwaka ve ta lwa ni va ka Israyeli; se ka ditshiku dile, Mkoma a to dhinda ngu kudhinda ka hombe txitimwi ka Vafilista, e va vhinganyisa ha koza ve xulwa masoni ka vanana va ka Israyeli. 11Se vathu va ka Israyeli va to khukha Misipa, ve londeta Vafilista, ve va dayela an'ze hahatshi ka Bheti-Kari. 12Sekoko Samuwele a to teka dirigwi e di emisa hagari ka Misipa ni Semi, kambe a to raya ditina#7:12 Ti wombako taku dirigwi da txivhuno. daku Ebhenezeri, a txi khene:
Kala hawa, Mkoma a hi vhuni. 13Ngu kumaha keto, Vafilista va to xulwa ve si swi ve wuya kambe mihinganoni ka Israyeli, nguko dianza da Mkoma di to wukela Vafilista ka otshe masiku a Samuwele. 14Se madhoropa ale Vafilista va nga ti honyote ka va ka Israyeli, ma tshumetetwe ka va ka Israyeli, kukhukhela Ekroni an'ze Gati; ni mihingano ya Israyeli yi txhatxhisilwe manzani ka Vafilista; se ku to maneka kudikha hagari ka va ka Israyeli ni ka Vaamori.
15Se Samuwele a to lamula Israyeli ka otshe masiku a kuhanya kwakwe. 16Se dilembe ni dilembe Samuwele a ti ti tsula eya rendelekela Bheteli, ni Giligali, ni Misipa; se e lamula va ka Israyeli ka otshe makhalo ale. 17Aniko a ti ti tshumelela Rama, nguko nyumba yakwe yi ti ti koneyo, a ti ti lamula kona va ka Israyeli, se a to aka koneyo txiluvelo txa Mkoma.
Currently Selected:
1 Samuwele 7: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.