1 Samuwele 8
8
Vathu va kombela mfumeli
1Se ku to maheka taku, ngako Samuwele a di kumbile, a to veka vanana vakwe kuva valamuli txitimwi ka Israyeli. 2Se ditina da mwanana wakwe wa matiwula i ti ti Joyeli, kambe ditina da wa wumbidi i ti ti Abhiya; i ti valamuli kona Bherisebha. 3Aniko vanana vakwe kha va tsimbila ngu tinzila takwe; kambe va to wekelela ka timale, ve tumela kuxawa, ve hambanisa wululamo.
4Sekoko otshe madhota a ka Israyeli ma to sengeletana, me ta ka Samuwele, kona Rama, 5#Wona ni ka: Dhewut. 17:14. se va txi kha vona kwakwe:
Wona taku se u kumbile, kambe vanana vako kha va tsimbile ngu tinzila tako; hi emisele mfumeli koko, konkuwa, kasiku ene a na hi lamula, kufana ni kule otshe matiko ma ku ni vafumeli.
6Kambe dipswi e do di manekile di di bihile masoni ka Samuwele, mbimo yile va nga kha vona: Hi ninge mfumeli, kasiku e hi lamula. Se Samuwele a to maha mkombelo ka Mkoma. 7Se Mkoma a to khene ka Samuwele:
Engisa mapswi a vathu ka toshe ti va no kugela, nguko kha va lambi awe; kambe ngani va ni lambako, kasiku ani ni si fumi txitimwi kwawe. 8Madingano ni yotshe mithumo yile va nga yi maha, kukhukhela ka ditshiku dile ni nga va humisa Egipta kala ka ditshiku da nyamsi, va ni lekile koko, kambe veya thumela simwani sizimu, ngu toneto va nga kumaha nawe. 9Konkuwa, koko, engisa dipswi dawe, kambe gela vathu vava, ti to i nava txihi txihena txa mfumeli, wu a no fuma txitimwi kwawe.
10Se Samuwele a to womba otshe mapswi a Mkoma ka vathu, vale va nga ti kombela mfumeli, 11a txi khene: Txihena txa mfumeli wu a no fuma txitimwi kwanu, ngu txiya:
A na teka vanana vanu e va maha va tsimbitisi va sikotxikani sakwe ni kuva vagadhi va mahantxhi akwe, kasiku ve tutuma masoni ka sikotxikani sakwe. 12Se a na va veka kuva vathangeli va magumi a mazana ni va mtxhanu wa magumi; ni kuva vadimi va tithembwe takwe, ni kuelula siyalo sakwe, kambe va na mmahela matxhari a yimbi ni tisimbi ta sikotxikani sakwe. 13Se a na teka vanana vanu vamahorana e va maha vamahi va mafura o bhumula, ni vabhiki, ni vayoki va mapawu. 14Kambe a na teka tithembwe tanu to nona, ni mivhinya yanu, ni miolivha yanu, e si ningela ka sithumi sakwe. 15Se a na teka sa wugumi ka timbewu tanu ni ka mivhinya yanu e si ningela ka mithenwa yakwe#8:15 Mwendo vathangeli. ni ka sithumi sakwe. 16Kambe sithumi sanu sa txiwamna ni sithumi sanu sa txisikati, ni majaha anu o tshura, ni timbongola tanu, a na si teka, e si veka ka mithumo yakwe. 17A na teka sa wugumi ka mitxhambi yanu, se anu mi na va sithumi sakwe. 18Sekoko ka ditshiku donedo, mi na dila ngu mhaka ya mfumeli wanu, awu anu mi no va mi di msawute; kambe Mkoma kha na mbi mi engisa ka ditshiku donedo.
19Hambi keto, vathu kha va lava kuengisa dipswi da Samuwele; se va to kha vona:
Ahim-him, kambe ku na ve ni mfumeli txitimwi kwathu. 20Se nathu hi na fana ni otshe mamwani matiko; se mfumeli wathu a na hi lamula, kambe a na thangela masoni kwathu, ni ku hi lwela ka tiyimbi tathu.
21Ngako koko, Samuwele a di pfite otshe mapswi a vathu, a toya ma womba masoni ka Mkoma. 22Sekoko Mkoma a to khene ka Samuwele:
Engisa dipswi dawe, u va emisela mfumeli.
Sekoko Samuwele a to khene ka vanana va ka Israyeli: Mmwani ni mmwani a na tsule didhoropani kwakwe.
Currently Selected:
1 Samuwele 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.