1 Vatesalonika 2
2
Mthumo wa Paulo aniya Tesalonika
1Anu mipune, vanathu, ma tiziva ti to kha ma hi amukela mahala. 2#Wona ni ka: Mith. 16:19-24; 17:1-9. Aniko, hambiko hi nga thanga ngu kuxaniseka ni kuruketelwa aniya Filipiya, nga ti mi ti zivisako tona, Txizimu txathu txi hi ningile mtamo wa ku mi txhumayela Evhangeli yi yi tako ngu ka txona, hagari ka kulwa ka hombe. 3Nguko, kukhongotela kwathu hi nga mhaka yo ta ngu kudyelelani mwendo nzambwani, kambe hi nga mhaka ya kuta ngu kukanganyisani. 4Aniko ngako Txizimu txi nga hi wona hi di ni fanelo ya kuningwa mthumo wa Evhangeli, ngu toneto hi yi txhumayelisako tona. Hi nga to lava kutsakisa vathu, aniko ndo tsakisa Txizimu, atxi txi xolako timbilu tathu. 5Ngu toneto, anu ma tiziva ti to kha hi zivi kuthumisa mapswi o kanganyisa, mwendo mapswi o dyelela. Txizimu i fakazi yathu. 6Kambe kha ha lava kupfaliswa ngu vathu, hambi ngu nganu mwendo ngu vamwani, 7hambiko hi nga ti fanete ku mi nemeta, aku hi ku Vapostoli va Kristu. Aniko hi ti mahile nga sivananana hagari kwanu, mwendo kufana ni mame wu a mamisako vanana va a nga va veleka. 8Ngu nzila yo nga toneto, nanathu kota nga ti hi nga ti mi dhunda, hi xuvile kuabana ni nanu i si nga dipswi da Evhangeli ya Txizimu, dokha, aniko hambi ni wona wutomi hi ti ti lava ku wu ningela ngu kota yanu, nguko anu mi vo randeka ngutu kwathu. 9Alakanyani, vanathu, mithumo yathu ni mikaralo yathu! Hi thumile wusiku ni mitshikari kufela ku hi si nemeti ni mmweyo wanu, mbimo yi hi nga ti txhumayela Evhangeli ya Txizimu hagari kwanu. 10Anu mi tifakazi tathu, ni Txizimu ni txona, ka ti to mahanyelo athu ni nanu mi kholwako i ti mahanyelo o sawuleka, o lulama, ni o mbina txisolo. 11Ma tiziva kambe ati Tate a xayisisako tona vanana vakwe. 12Ngu toneto, nanathu hi nga ti mi gondisa tona, ni ku mi tsanisa, ni kukhongotela mmweyo ni mmweyo wanu, kasiku mi tsimbila ngu fanelo masoni ka Txizimu, atxi txi nga mi dhanela ka mfumo wa txona ni kupfaliswa ka txona. 13Ngu toneto, nanathu ha bonga yotshe mbimo ka Txizimu, nguko msana ka kuva mi di amukete dipswi da Txizimu, adi hi nga txhumayela, mi di amukete kota nga dipswi da Txizimu mpela, i si nga ku di fananisa ni dipswi da kuhuma ka m'thu. Atiya ngu tona ti ti mi ningako mtamo anu mi kholwako. 14#Wona ni ka: Mith. 17:5. Vanathu, anu mi ti mahile vaeteteli va mabanza a Txizimu ma ku Judheya, ngu ka Kristu Jesu; nguko na nanu mi xanisilwe ngu va ka kwanu, kufana ni vona va nga xanisiswa toneto ngu Vajudha. 15#Wona ni ka: Mith. 9:23,29; 13:45,50; 14:2,5,19; 17:5,13; 18:12. Ngu vona kambe va nga daya Mkoma Jesu ni vaprofeti, ve xanisa ni nathu, vona va si tsakisiko Txizimu, nguko i valala va votshe vathu. 16Va hi tsimbisela kutxhumayela Evhangeli yo hanyisa ka vamatiko. Se ngu toneto, va to tatisela sionho sawe si va nga si maha. Se konkuwa ngu kugwitisa, kuhenya ka Txizimu kuwite txitimwi kwawe.
Paulo a navela kutshumela eya Tesalonika
17I di athu, vanathu, ngako hi nga phawuswa ni nanu, ngu mbimwanyana, hi si wonani ngu khohe ni khohe, hambiko hi mananako ngu mbilu, ha karateka ngutu ni kunavela ka hombe, kuwona khohe yanu. 18Ngu toneto, hi lavile kuta kheyo kwanu, ngutu-ngutu ani Paulo ni duketile ta tinene i si nga txikhati tximwetxo, aniko Sathani, a hi tsivete. 19Nguko, i mani mmwani, hahanze kwanu, awu i ku txithembo txathu, litsako lathu, m'bhoti wathu wa kupfaliswa masoni ka Mkoma wathu Jesu, ngu ditshiku da kuta kwakwe, kani? 20Kha ditshuri, anu mi kupfaliswa kwathu ni litsako lathu.
Currently Selected:
1 Vatesalonika 2: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.