Amosi 1
1
1Mapswi a Amosi, i ku mmweyo wa vadyisi va Tekowa, ati a nga ti wona madingano ni Israyeli, ka masiku a Uziya, mfumeli wa ka Judha, ni ka masiku a Jerobhowamu, mwana Jowasi, mfumeli wa ka Israyeli, malembe mambidi ku sinzi ku deka-deka mafu. 2Se Amosi a to khene:
Mkoma a na bhonga a di Siyoni,
se a di Jerusalema, a na pfalisa dipswi dakwe;
amu va zumbako kona vadyisi,
ku nava ni kudila,
kambe ku na oma tshokani ka mmango wa Karmeli.
Txizimu txa sola matiko a vaakelani Siriya
3 Mkoma a womba tiya:
Ngu kuhambunyeta kuraru ka Dhamasku ni ka wumune, kha ni na mbi thavisa txitsayiso, nguko va xanisile Gileyadhi ngu mikondo ya tisimbi to thola. 4Ngu toneto, ni na veka mndilo mitini ka Hazayeli, se wu na tshokomisa tinyumba ta wukoma ta Bheni-Hadhadi. 5Ni na faya matimba a tisimbi a Dhamasku, kambe ni na heta va va zumbako Bhikeyati-Avheni, ni va Bheti-Edheni; se vathu va Siriya va na tekwa ve yiswa wukhumbini, kona Kiri, kuwomba Mkoma.
Filista
6 Mkoma a womba tiya:
Ngu kuhambunyeta kuraru ka Gaza ni ka wumune, kha ni na mbi thavisa txitsayiso, nguko va yisile wukhumbini totshe tikhumbi, ve ti ningela ka Edhomi. 7Ngu toneto, na veka mndilo ka diguma da Gaza, se wu na tshokomisa tinyumba ta wukoma. 8Kambe ni na heta va va zumbako Asidhodhe, ni wule a ku ni ndonga ya Asikaloni, se ni tshumeta dianza dangu di txi ya ka Ekroni; se Vafilista va va no sala va na lova, kuwomba Mkoma Txizimu.
Tiro
9 Mkoma a womba tiya:
Ngu kuhambunyeta kurarau ka Tiro ni ka wumune, na mbi thavisa txitsayiso, nguko va ningete totshe tikhumbi ka Edhomi, kambe kha alakanya txitumelelano txa vanawe. 10Ngu toneto, ni na veka mndilo ka diguma da Tiro, se wu na tshokomisa tinyumba tawe ta wukoma.
Edhomi
11 # Wona ni ka: Isa. 34:5-17; 63:1-6; Jer. 49:7-22; Eze. 25:12-14; 35:1-15; Obha. 1-14; Mal. 1:2-5. Mkoma a womba tiya:
Ngu kuhambunyeta kuraru ka Edhomi ni ka wumune, kha ni na mbi thavisa txitsayiso, nguko a tutumisile ndiyakwe ngu ditxhari, kambe a thavisile wotshe wumbilu; ni ku mtshatulela ngu txiviti ngu ha ku si gwitiko, e xayisa kuhenya kwakwe ngu ha ku si gwitiko. 12Ngu toneto, ni na veka mndilo kona Temani, se wona wu na tshokomisa tinyumba ta wukoma ta Bhozira.
Amoni
13 Mkoma a womba tiya:
Ngu kuhambunyeta kuraru ka vanana va ka Amoni ni ka wumune, kha ni na mbi thavisa txitsayiso, nguko va dolete sirumbu sa Gileyadhi, kasi kuve engetela mihingano yawe. 14Ngu toneto, ni na veka mndilo ka diguma da Rabha, wu na tshokomisa tinyumba tawe ta wukoma, ngu diguwa da sidilo, ka ditshiku da kulwa, ni moya wa hombe, ka ditshiku da xomulo. 15Se mfumeli wawe a na ya wukhumbini, ene ni vathangeli vakwe, kuwomba Mkoma.
Currently Selected:
Amosi 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.