Joyeli 3
3
Txizimu txi na lamula matiko
1Wona taku, ka oneyo masiku, ni ka mbimo yoneyo, ni no thavisa wukhumbi ka Judha ni ka Jerusalema, 2Ni na tshanganisa otshe matiko, ni txi ma releta mkovani ka Josafati, ni wulela nawo kulamulani, ngu mhaka ya vathu vangu ni thomba yangu Israyeli, awu vona va nga mu hangalasa hagari ka matiko, va txi ambanisa ditiko dangu. 3Va xaxuvile tixolo ka vathu vangu, ve ningela mfana ka digelegele, va xavisile dihorana ngu vhinya ve sela.
4Kambe mi ni mhaka muni ni nani awe Tiro ni Sidhoni, ni otshe madhawa a Fenikiya kani? Ngu yona hakhelo yi mi ni ningako kani? Nguko mi txi ni hakelisa tiya, ngu txikuluveta, ni na tisa hakhelo txitimwi ka misungo yanu. 5Mi tekile silivhela ni nzalama yangu, ni siya sangu so naveleka, ni kutshura mi txi si wuleta mathepelani kwanu. 6Mi xavisile vanana va ka Judha ni va Jerusalema ka vanana va Vagriki, kasi ku va yisa kule ni mihingano yawe. 7Wonani ti to ni na va thavisa ka wukhalo wu mi nga ya va xavisa ka wona, se ni na wisa hakhelo yanu txitimwi ka misungo yanu. 8Kambe ni na xavisa vanana vanu va mazambi ni vamahorana ngu manza a vanana va ka Judha, va no ya va xavisela ka va Sebha, ditiko da kwa mbi alakaywa, nguko Mkoma a wombile.
9Huwelelani eto ka matiko
sawulekisani yimbi yokari;
humisani tindena;
kwelani mi tshuketelana,
anu motshenu vavamna va yimbi.
10Mahani matxhari ngu mikwati yanu;
ni mipaxwa ngu masikela anu;
wa kwa mbi na mtamo a ne khene: Ni ni mtamo.
11Patanani mi txi ta motshenu
anu matiko a madhawani sengeletanani
(Mkoma txhikisa tindena tako koneho);
12ma na khukhe ma txi ema matiko
ma naye mkovani ka Josafati;
nguko ni na khalahatsha koneyo
ni lamula otshe matiko a madhawani
13Rinzani disikela nguko timbewu ti vitilwe;
ngonani, relelani, nguko dipipa di tate
ni mapipa ma thekelela;
nguko wubihi wawe mbwa hombe.
14Mabutho, ni mabutho, mkovani ko Tsanisa!
Nguko ditshiku da Mkoma di hafuhi,
mkovani ko Tsanisa.
15Ditambo ni mtxima si na maha sa mtima
ni tinyeleti ti na thavisa kuwonekela ka tona.
Txizimu txi na katekisa vathu va txona
16 # Wona ni ka: Amo. 1:2. Se Mkoma a na bhonga a di Siyoni.
Dipswi dakwe di na pfala Jerusalema,
se nzuma ni mafu si na dhudhumela;
aniko Mkoma a na va wuthavelo wa vathu vakwe
ni mkhokhola wa vanana va ka Israyeli.
17Se anu mi na tiziva ti to
ani ngani Mkoma, Txizimu txanu,
ni zumbako Siyoni,
mmangoni kwangu ko sawuleka;
kambe Jerusalema a na va msawuleki;
vamatiko kha va na mbiswa ve pinda ngu ka kona.
18Se ku na maheka taku ka ditshiku dile,
mimango yi na vhelisa vhinya ya yiphya,
simangwanani ku na khulunga masi,
yotshe minambo ya ka Judha yi na va yi di tate ngu mati;
se ku na huma txisima ngu Nyumbani ka Mkoma
txi theletela mkovani ka Sitime.
19Egipta a na tshumela e va txisapa,
se Edhomi a na va txiwula txa txiwunda,
ngu kule va nga lwisa vanana va ka Judha
ve theketa mnoha ka matiko a kona.
20Aniko Judha ku na zumbwa ngu vathu yotshe mbimo,
ni Jerusalema, ka liveleko ni liveleko.
21Se ni na sawulekisa mnoha wa va ni nga sa va sawulekisa:
Nguko Mkoma a na zumba Siyoni.
Currently Selected:
Joyeli 3: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.