Amosi 6
6
Kutsayiswa ka Israyeli
1Dikhombo ka va va humulako Siyoni, ni va va tipfako va di zumbisekile mmangoni ka Samariya, va ku ni ditina hagari ka matiko o khata, ni vale vatako nyumbani ka Israyeli. 2Pindani ngu Kalini mi wona, ngu niya, tsulani ka Hamati wa hombe; mi gwita mi relela mi ya Gati ka Vafilista: Mi nava vatxhuko kupinda mifumo yiya kani? Mwendo i nava ya hombe mihingano yakwe kupinda mihingano yanu kani? 3Anu mi kulisako ditshiku do biha, mi ya ka wukhalo wo thisa. 4Mi otelako ka mibhedhu ya makwasa a tinzofu, mi ti gwimba ha matahoni kwanu, mi dya tinvuta ta mitxhambi, ni marole ya hagari ka mitxhambi; 5mi embelela ngu mpfumawulo wa harpa, mi ti mahela sitxaya txaya sanu so embelela ku nga Dhavhidha: 6Mi selako vhinya ngu magombe, mi tola mafura a lisima, kambe mi ka pandiseki ngu ku wa ka Josefa: 7Ngu koneho, konkuwa, mi na ya wukhumbini, ku va vo khata va ku na maha tikhumbi, se mi na gwita ni mibuso ya mipipi.
8A xambanyile Mkoma Txizimu, ngu dihika dakwe, Mkoma, Txizimu txa Mabutho a Tiyimbi, a khene:
Na nyenya kutikulisa ka va ka Jakobe, ni venga ni tinyumba tawe ta wukoma; na ningela didhoropa ni sotshe si si ku ka dona.
9Se ku na maheka taku, ku txi sala digumi da vavamna ka m'ti, va na fa. 10A wu a no teka sirumbi mwendo awu a no wu hisa, taku e teka marambu e huma nawo nyumbani, a na gela awule a ku magwito ka nyumba a txi khene: Kha ku nga ni m'thu. Se ene a na khene: Malala, nguko hi nga thuke hi gwesa ditina da Mkoma. 11Wonani taku Mkoma wa ruma, m'ti wa hombe wu na khundumuselwa, se m'ti wa wudotho wu na bhandekela.
12Ina mahantxhi ma nga tutuma marigwini kani? Mi nga kudima ngu tihomu kani? Ngu kutxani mi hindula wulamuli wa wunene ngu wubihi, ni mihando ya wululamo ngu wukanganyisi kani? 13Anu mi ti tsakiswako ngu ta walo, anu mi ku khanu: Ina athu kha ha ti maha tindena ngu mtamo wathu kani?
14Nguko wonani taku ni na wusa vathu hagari kwanu, anu va nyumba ya ka Israyeli,
kuwomba Mkoma, Txizimu txa Mabutho a Tiyimbi, ava va no mi khozisa, kukhukhela txidingeni ka Hamati, kala ka txinambwana txa libalani.
Currently Selected:
Amosi 6: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.