Amosi 9
9
Txiwoniso txa kuwa ka dithepele da Bheteli
1Ni woni Mkoma a nga ti emeli hafuhi ni txiluvelo se a txi ni gela a txi khene:
Peka txitimwi ka tiphande u dekadekisa matimba otshe, sotshe u si maha sikhwemu txitimwi ka misungo ya votshe; se ani ni na va daya ngu ditxhari kala ka wo gwitisa khawe; a wu a ku na tutuma kwawe, kha na mbi huluka, hambi wu a no huluka kha na mbi hanya. 2Hambi va txo kela kuza kuya hoka diphalani ka vafi, dianza dangu di na va thavisa kona haleya; se ngako va txi kwela nzumani, ani na va txhikisa. 3Hambi ngako va txo ya barama tshokani ka mmango wa Karmeli, na ya va teka, se ni va thavisa kona niya; se ngako va txi ti sisa ka maso angu hahatshi ka linene, aho koko na ruma mnyoka, se wona u na va luma. 4Se ngako va txiya kukhotelwani masoni ka valala vawe, ani na rumisa taku ve dawa ngu ditxhari; ani na veka diso dangu txitimwi kwawe, ti taku ve maneka ha kubihani, na i si nga wunene.
5Nguko Mkoma, Mkoma wa Mabutho a Tiyimbi, a gwesa mafu, me nyivilika,
se votshe va va hanyako ka ona va na dila;
kambe ma na kwela nga mnambo wa hombe
ni kubhwabhwamela nga Egipta.
6Ngene a akako tinyumba takwe nzumani,
e tsanisa nzuma mafuni
a dhanako mati a linene,
e ma nisa txitimwi ka mafu;
ditina dakwe ngene Mkoma.
7Ina hi nga anu vanana va ka Israyeli kwangu, nga vanana va Vaetiyopia kani? Kuwomba Mkoma. Ina kha na kwelelisa vanana va ka Israyeli ngu ditikoni ka Egipta, ni Vafilista ngu Kafitori, ni Vasiriya ngu Kiri kani? 8Wonani ti to maso a Mkoma Txizimu malwa ni mfumo wa sionho, se ani na wuhoxota wotshe txitimwi ka mafu; kambe kha ni na mbi hoxota nyumba ya Jakobe do gwita: Kuwomba Mkoma.
9Nguko ni na rumisa ni kuzuza nyumba ya ka Israyeli hagari ka otshe matiko, ku nga tile yi zuziswato tona fulaho amu ka txiselo, ku siwi ni tshenda ni ya yimweyo ha mafuni. 10Votshe vaonhi va ditiko dangu va na fa ngu ditxhari, ava va ku kha vona: Wubihi kha wu na mbi gwatama ni nathu, hambi ku hi mana.
Kudikha ko tsakisa kutako ko lumba Israyeli
11 # Wona ni ka: Mith. 15:16-18. Ka ditshiku dile, ni na tshumela ni guleta ditenda da Dhavhidha, di nga wa, ni vhaletela amule ku nga vharuka, ni tshumela ni wusa marumbi, ni ma aketa kufana ni masiku a kale; 12kasi kuve mana asi si nga sala ka ditiko da Edhomi, ni otshe matiko ale ma dhanwako ngu ditina dangu, kuwomba Mkoma, a mahako timhaka tiya.
13Wonani ta ku mata masiku, kuwomba Mkoma, a ya awu a dimako, a na manela wule a elulaka; ni wule a ganyatelako mauvha, a na manela wule a phayako mbewu; mimango yi na vilisa vhinya, sotshe simangwana si na nyuka. 14Ni na thavisa wukhumbi wa vathu vangu va ka Israyeli, kambe va na aketa madhoropa o xaselwa, se va na zumba ka ona, ve phaya mivhinya, ve sela vhinya ya kona, ve phaya mipeto ya mindonga, ni kudya mihando ya kona. 15Na va simeka ditikoni kwawe, kha va na mbi thaviswa kambe ka ditiko di ni nga va ninga, kuwomba Mkoma, Txizimu txako.
Currently Selected:
Amosi 9: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.