Obhadhiya 1
1
Txizimu txi na tsayisa Edhomi
1 # Wona ni ka: Isa. 34:5-17; 63:1-6; Jer. 49:7-22; Eze. 25:12-14; 35:1-15; Amo. 1:11-12; Mal. 1:2-5. Txiwoniso txa Obhadhiya: Mkoma Txizimu a womba tiya madingano ni Edhomi:
Hi pfite txhumayelo ya Mkoma, ni ku kurumetwe txirumwa ka matiko, kuya womba tiya:
“Khukhani, hi khukhela kulwa ni Edhomi.”
2Wona taku ni kumahile wam'dotho hagari ka matiko;
awe wa eyiseka ngutu.
3Kutikulisa ka mbilu yako ku ku kanganyisile,
kufana ni va va hanyako tiphakoni ka marigwi,
ka dizumbo dako do guleka,
u wombako mbiluni kwako ku khawe:
I mani a no ni wisa ha mafuni kani?
4Ngako u txi ti guleta kufana ni digama,
u veka txisaka txako hagari ka tinyeleti,
ngu koneho ni na kuwisa, kuwomba Mkoma.
5Ngako makhamba mwendo vahoxoti va txi ta ni wusiku (u hoxotilwe njani!)
Ina kha va handi so tala ngutu kani?
Ngako va txi ta kwako vahapheli va mauvha,
ina va si siyi sizangwa sokari kani?
6Eto ti nga teketeliswa tona tithomba ta Esawu!
Eto ma nga tumbuliswa tona makhalo akwe o sisala ka ona!
7Vangana vako votshe va kutekile u ya hahanze ka mihingano yako;
avale va ti tsakisako ngu kuthutha kwako, va kuxengile, va kuwukete;
a vale vadyako dipawu dako, va kuriyete ngu mlawu;
Ka Edhomi kuwalo kupfana.
8Kambe kha ti na mbi humelela ka edo ditshiku, kuwomba Mkoma;
dile ni no lovisa titxhari ta Edhomi,
ni kupfana mmangoni ka Esawu kani?
9Se tindena tako, awe Temani, ti na dhukiswa,
kasiku ngu mmangoni ka Esawu, ti txi dawa, yimweyo-yimweyo.
Mnandu wa Edhomi
10Ngu mhaka ya ku u nga lwiswa mwananu Jakobe,
u na fenengetwa ngu pfilu-pfilu,
se u na fuviswa do gwita.
11Ka ditshiku dile u nga maneka masoni kwakwe,
ka ditshiku dile vamatiko va nga yisa wukhumbini dibutho dakwe,
se valala va ti ti wulelela ngu sike sakwe,
va ti ti xaxuvela tixolo xungetano ngu Jerusalema,
awe upune u ti ti mmweyo wawe.
12Aniko awe u ti sa fanela kuwonetela ditshiku da mwananu,
ka ditshiku da kuthaviswa kwakwe ditikoni,
hambi kutsaka ngu vanana va ka Judha,
ka ditshiku da kufuviswa kwawe;
hambi kulaphisa txisofu txako,
ka ditshiku da kupandiseka;
13mwendo kuwulela ngu txike txa vathu vangu, ka ditshiku da dikhombo dawe;
ina, awe u ti si faneli ku ti wona u tsaka, ngu wubihi wawe, ka ditshiku da dikhombo dawe;
hambi kunawuluta manza ako u wukela mabutho awe, ka ditshiku da dikhombo dawe;
14hambi kuema mahandakanyani,
kasi kufuvisa avale va no huluka,
mwendo kuningela va va no sala, ngu ditshiku da xomulo.
Kukonwa ka matiko
15Nguko ditshiku da Mkoma di hafuhi, txitimwi ka otshe matiko;
ku nga ti u nga maha tona, nawe u na mahiswa toneto;
wubihi wako wu na wela txitimwi ka msungo wako.
16Nguko aku anu mi nga sela mmangoni kwangu ko sawuleka,
ma na selisa toneto otshe matiko;
ma na sela, me mita, ma txi nga kha ma zivi ku nga vaho.
Kuxula ka Israyeli
17Kambe mmangoni ka Siyoni ku nava ni vahuluki,
se mmango wu na va wo sawuleka;
va nyumba ya ka Jakobe va na teka tithomba tawe.
18Se nyumba ya Jakobe yi na va mndilo,
nyumba ya Josefa yi na maha dituro,
ni nyumba ya Esawu yi na maha mwasi,
se va na va hisa, va txihya ve guma;
ni wammweyo kha na mbi sala ka nyumba ya ka Esawu,
nguko Mkoma a ti wombile.
19Se va Wulambwe va na teka mmango wa Esawu; va tibalani va na tekela Vafilista; ve teka kambe tithembwe ta Efrayime, ni tithembwe ta Samariya, se Bhejamini a na teka ta Gileyadhi. 20Se tikhumbi ta dibutho da vanana va ka Israyeli, ti ku hagari ka Vakanana, ti na teka kala Zarefati; tikhumbi ta Jerusalema ati ti ku Sefaradhi, ti na teka madhoropa a Wulambwe. 21Se ku na wuka vahanyisi mmangoni ka Siyoni, ku ta thethisa va mmangoni ka Esawu; se wukoma wu na va wa Mkoma.
Currently Selected:
Obhadhiya 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.