Dhaniyeli 1
1
Mazambi a va ka Israyeli nyumbani ka wukoma ka Nebhukodhonosori
1 # Wona ni ka: 2 Vafu. 24:1; 2 Mak. 63:5-7. Ka dilembe da wuraru da kufuma ka Jehoyakimi, mfumeli wa Judha, Nebhukodhonosori mfumeli wa Bhabhilona, a toya randela Jerusalema. 2Se Mkoma a to ningela Jehoyakimi, mfumeli wa Judha, manzani ka Nebhukodhonosori, e ningela kambe ni siya sokari sa Nyumbani ka Txizimu. Se Nebhukodhonosori a to si teka e tsula naso ditikoni ka Sinari eya si wuletisa nyumbani ka txizimu txakwe, e si veka kumweko nyumbani ka thomba ya txizimu txakwe.
3Se mfumeli Nebhukodhonosori a to gela Aspenazi, mthangeli wa mithenwa yakwe, taku e tisa vokari va vanana va ka Israyeli, va lixaka la vafumeli, ni va tinganakana, 4mazambi a kwa mbi na wulima ni wawumwewo, a tikhohe totshura, o tala ngu wutxhari, o txhariha amu ko gonda, va mapimo amu ka wuzivi, a ma sikotako kumaha mithumo ya nyumbani ka mfumeli, ve gondiswa kubhala ni kuwombawomba lidimi la Vakaldheya. 5Se mfumeli a to leleta to ditshiku dimwani ni dimwani va fanela kuningwa sakudya sile ene a dyako sona, ni vhinya yi a selako yona, ve wunjiswa toneto ngu txipimo txa malembe mararu, kasi ku msana ka ona veya maneka masoni ka mfumeli. 6Se hagari kwawe ku ti maneka, ka vanana va ka Judha, Dhaniyeli, Hananiya, Misayeli ni Azariya. 7Se mthangeli wa mithenwa a to va raya matina mamwani, i ku awa: Dhaniyeli a to mraya ditina daku i Bheltexazari, Hananiya e mraya ditina daku i Xadrake, Misayeli e mraya ditina daku i Mixake, se Azariya a to mraya ditina daku i Abhedhi-Nego.
8Se Dhaniyeli a to xambanya mbiluni kwakwe ti to kha na mbi thuka e ti nyenyezisa ngu kudya sakudya sa mfumeli, hambi kusela vhinya yakwe; ngu kumaha keto, a to kombela kuvhunwa ngu mthangeli wa mithenwa ku asi ti nyenyezisi. 9Txizimu txi to maha ti to Dhaniyeli e mana dithomo ni wumbilu masoni ka mthangeli wa mithenwa. 10Se mthangeli wa mithenwa a to khene ka Dhaniyeli:
Ni thava mfumeli, nyamne wangu, a nga leleta kudya kwanu ni kusela kwanu; a ndi na wonela txani tikhohe tanu ti di wunile, kupinda ta mazambi kuloni kani? Ngu kumaha keto, mi na beta msungo wangu ka mfumeli.
11Sekoko Dhaniyeli a to gela muwoneleli wa sakudya, awule a nga ti sawutwe ngu mthangeli wa mithenwa kasiku a txi xayisa Dhaniyeli, ni Hananiya, ni Misayeli, ni Azariya, a txi khene:
12Na ku kombela, duka sithumi sako mndani ka digumi da masiku, u hi ninga matawa hidya, ni mati hi sela. 13Sekoko ti na woneka tikhohe tathu masoni kwako ni tikhohe ta mazambi ale ma dyako sakudya sa mfumeli, u na maha ka sithumi sako madingano ni ti u no ti wonisa tona.
14Se ene a to amukela txikombelo txawe, e va duka digumi da masiku. 15Ngako ku dipindile digumi da masiku, tikhohe tawe ti to woneka ti di tshurile ngutu, vona va ti enile ngutu kupala otshe mazambi ale ma nga ti tidya sakudya sa mfumeli. 16Ngu kumaha keto, muwoneleli a to thavisa sakudya sile va nga ti dingana kudya ni vhinya ya kona, e va ninga matawa dwe.
17Txizimu txi to ninga mazambi awa a mune wuzivi ni mapimo wo ziva yotshe mibhalo ya wutxhari; kambe Dhaniyeli txi to mninga mapimo o txhamusela sotshe siwoniso ni miloro.
18Se msana ka masiku ale mfumeli a nga ti wombile taku ve yiswa kwakwe, mthangeli wa mithenwa a to va yisa masoni ka Nebhukodhonosori. 19Se mfumeli a to womba-womba navo, hagari kwawe votshe kha kwa maneka vamwani vo fana ni Dhaniyeli, Hananiya, Misayeli ni Azariya; ngu kumaha keto, va to ningwa kuthumela mfumeli. 20Ka timhaka totshe ta wutxhari ni mapimo ka tile mfumeli a nga va wotisa, a to mana ti taku va pinda ngu ka digumi, totshe tiñanga ni titxhari tile ti nga titiho ka mfumo wakwe wotshe.
21Se Dhaniyeli a to manekisa eto an'ze ka dilembe do khata da mfumeli Siro.
Currently Selected:
Dhaniyeli 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.