Ezekhiyele 48
48
Kuabaniselwa ka ditiko ngu tihunzu
1Se matina a tihunzu ta kona ngu awa: Kukhukhela didhawa da muhingano wa wulambwe, ngu didhawa da nzila ya Hetlomi, kuta Hamati, Hazeri-Enomi, muhingano wa Dhamasku, kuya wulambwe, hafuhi ni Hamati; va na va ni didhawa da wulambwe ni da mswa-ditambo; Dhani njikhwemu tximwetxo. 2Kambe hafuhi ni muhingano wa Dhani, kukhukhela ka didhawa da wutxani, kala mswa-ditambo, Aseri njikhwemu tximwetxo. 3Se hafuhi ni muhingano wa Aseri, kukhukhela ka didhawa da wutxani kala mswa-ditambo, Naftali njikhwemu tximwetxo. 4Se hafuni ni muhingano wa Naftali, kukhukhela ka didhawa da wutxani kala mswa-ditambo, Manasi njikhwemu tximwetxo. 5Se hafuhi ni muhingano wa Manasi, kukhukhela ka didhawa da wutxani kala mswa-ditambo, Efrayime njikhwemu tximwetxo. 6Se hafuhi ni muhingano wa Efrayime, kukhukhela ka didhawa da wutxani kala mswa-ditambo, Rubheni njikhwemu tximwetxo. 7Se hafuhi ni muhingano wa Rubheni, kukhukhela ka didhawa da wutxani kala mswa-ditambo, Judha, njikhwemu tximwetxo.
Matiko o lumba Txizimu
8Se hafuhi ni muhingano wa Judha, khukhela ka didhawa da wutxani kala mswa-ditambo, i nava mningelo wu mi no wu maha wa 25.000 wa tipimo ta kuanama, ni kulapha ko fana ni ka txikhwemu tximwetxo, kukhukhela didhawa da wutxani kala mswa-ditambo; kambe wukhalo wo sawuleka wu na va ngu hagari ka kona.
9Mningelo wu mi no wu maha ka Mkoma, i nave wa 25.000 wa tipimo kulapha, ni 10.000 wa tipimo kuanama. 10Se mningelo wo sawuleka wu na lumba vaphaxeli; ngu wulambwe i nava 25.000 wa tipimo kulapha, se wutxani 10.000 wa tipimo kuanama, ni kuya wuphemba 25.000 wa tipimo kulapha; kambe wukhalo wo sawuleka wa Mkoma wu na va ngu hagari ka kona. 11Wukhalo wuwa wu na lumba vaphaxeli vale va nga sawulwa, hagari ka vanana va ka Zadhoki, avale va nga veketa mlayo wangu, va nga mbi timela, mbimo yile vanana va ka Israyeli va nga timela, kufana ni va ka Levhi vale va nga nga timela. 12Se wukhalo wule va nga ningwa, i nava wa Kusawuleka ka Kusawuleka, hafuhi ni muhingano wa va ka Levhi. 13Se va ka Levhi va na va ni wukhalo wa 25.000 wa tipimo kulapha, ni 10.000 wa tipimo kuanama; kulapha ka kona kotshe i nava ka 25.000 wa tipimo, se ni kuanama ka 10.000 wa tipimo. 14Kambe kha va na mbi xavisa txilo ka esso, hambi kutxitxisa, mwendo kuningela mihando yo khata ya mafu, nguko njo sawuleka sa Mkoma.
15Aniko 5.000 wa tipimo tile ti nga sala ka kuanama masoni ka 25.000 wa tipimo, ku na thumiswa ngu didhoropa, kasi kuzumba kona, ni kudyisa kona sifuyo; se didhoropa di na va ngu hagari ka kona. 16Tipimo ta kona i nava tiya: Didhawa da wulambwe 4.500 wa tipimo, didhawa da wuphemba 4.500 wa tipimo, didhawa da wutxani 4.500 wa tipimo, ni didhawa da mswa-ditambo 4.500 wa tipimo. 17Wudyiselo wa didhoropa, wulambwe 250 wa tipimo, wuphemba 250 wa tipimo, wutxani 250 wa tipimo, ni mswa-ditambo 250 wa tipimo. 18Se amu ku nga sala ka didhawa da kulapha, ko longoloka ni wukhalo wo sawuleka wa mningelo, i nava ka 10.000 wa tipimo ngu wutxani, 10.000 wa tipimo ngu mswa-ditambo; ku na dingana ni wukhalo wo sawuleka wa mningelo; se mihando ya kona yi na lumba vale va thumelako didhoropa. 19Se avale va thumelako didhoropa, va na di thumela ka totshe tihunzu ta ka Israyeli.
20Otshe makhalo ma no ningelwa ma nava 25.000 wa titshava, ni 25.000 kambe ka mune wa makhona mi na ningela mningelo wo sawuleka, ni thomba ya didhoropa.
Matiko o lumba mfumeli
21Se amu ku no sala ku na lumba mthangeli; ka diya ni ka dile didhawa da wukhalo wo sawuleka wa mningelo, ni thomba ya didhoropa, masoni ka 25.000 wa titshava ta mningelo, ngu tshungameto ya m'hingano wa wutxani ni mswa-ditambo, masoni ka 25.000, ngu kukomba m'hinganoni ka mswa-ditambo, madingano ni sikhwemu, wu na lumba mthangeli; se txiningo txa mningelo wo sawuleka, ni wukhalo wo sawuleka, wa nyumba, si na va hagari ka kona. 22Kambe kukhukhela ka thomba ya va ka Levhi, ni thomba ya didhoropani, hagari ka sile si no lumba mthangeli, ngu hagari ka muhingano wa ka Judha ni wa Bhenjamini, esso si na va sa mthangeli.
Matiko o lumba timwani tihunzu
23Se ngu ka tihunzu tile ti no sala, kukhukhela ka didhawa da wutxani kala mswa-ditambo, Bhenjamini txikhwemu tximwetxo. 24Se hafuhi ni muhingano wa ka Bhenjamini, kukhukhela ka didhawa da wutxani kala ka didhawa da mswa-ditambo, Simiyoni njikhwemu tximwetxo. 25Se hafuhi ni muhingano wa ka Simiyoni, kukhukhela ka didhawa da wutxani kala ka didhawa da mswa-ditambo, Isakari njikhwemu tximwetxo. 26Se hafuhi ni muhingano wa ka Isakari, kukhukhela ka didhawa da witxani kala ka didhawa da mswa-ditambo, Zebhuloni njikhwemu tximwetxo. 27Se hafuhi ni muhingano wa ka Zebhuloni, kukhukhela ka didhawa da wutxani kala ka didhawa da mswa-ditambo, Gadhi njikhwemu tximwetxo.
28Se hafuhi ni muhingano wa ka Gadhi, kukhukhela ka didhawa da wuphemba, muhingano wu na khukhela ka Tamari kala matshanganoni ka mati a Kadhesi, kuya didhawa ka txinambwana kala ka Linene la Hombe.
29Adiya ngu dona ditiko di mi no abanisela di maha thomba ya tihunzu ka Israyeli; se asiya ngu sona sikhwemu sa kona, kuwomba Mkoma Txizimu.
Sike sa Jerusalema
30 # Wona ni ka: Mtu. 21:12-13. Se sike so huma ngu sona didhoropani ngu siya, kukhukhela wulambwe: 4.500 wa tipimo. 31Se sike sa didhoropa si na va madingano ni matina a tihunzu ta va ka Israyeli: Sike siraru so rendekela wulambwe: Txike txa ka Rubheni njimwetxo, txike txa ka Judha njimwani, txike txa ka Levhi njimwani; 32ka didhawa da wutxani 4.500 wa tipimo, ni sike siraru i ku siya: Txike txa ka Josefa njimwetxo, txike txa ka Bhenjamini njimwani, txike txa ka Dhani njimwani; 33ngu didhawa da wuphemba 4.500 wa tipimo, ni sike siraru: Txike txa ka Simiyoni njimwetxo, txike txa ka Isakari njimwani, txike txa ka Zebhuloni njimwani; 34ngu didhawa da mswa-ditambo 4.500 wa tipimo, ni sike sa kona sasiraru: Txike txa ka Gadhi njimwetxo, txike txa ka Aseri njimwani, txike txa ka Naftali njimwani. 35Kuranganyetwa ngu 18.000 wa tipimo; kambe ditina da didhoropa kukhukhela ditshiku dile i nava: Mkoma Waho Hale.
Currently Selected:
Ezekhiyele 48: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
