Ezekhiyele 47
47
Txinambwana amu Dithepeleni
1 # Wona ni ka: Zak. 14:8; Joh. 7:38; Mtu. 22:1. Msana keto, a to ni wuyiswa ka txike txo wulela ngu txona nyumbani, se ku ti ti huma mati ngu hahatshi ka msasimo wa nyumba, ngu wutxani; nguko masoni ka nyumba ku ti ti rendekete wutxani, mati ma ti ti ta ngu hahatshi, kukhukhela ka didhawa da txinene ka nyumba, ni didhawa da wuphemba kala txiluveloni. 2Se a to ni humisa ngu nzila ya txike txa wulambwe, a txi ni horolokisa ngu nzila ya hahanze, kala ka txike txa hahanze, ngu nzila yo rendekela wutxani; eho ma ti ti khulunga mati ngu didhawa da txinene. 3Wamwamna wule a to huma e komba wutxani, manzani kwakwe a ti ti ni ngoti yo pima ngu yona; se a to pima 1.000 wa mikono, a txi ni tshawunyetisa ka mati, o gwitile ka tikhunguti ta mikondo. 4A to pima kambe 1.000, a txi ni tshawunyetisa ngu ka mati, o hoka txiwununi. 5A to pima kambe 1.000, se i ti ti txinambwana, txa ku vaninga si ti koti ku txi tshawunyeta, nguko mati i ti ti a hombe, o dingana kupinda ngu kusambela, txinambwana txi nga ti si koteki ku txi txhatuka. 6Se a to khene kwangu:
U ti woni awe mwanana wa m'thu kani? Sekoko a to ni wuyisa likasani ka txinambwana. 7Mbimo yi ni nga txi tshumela, likasani ka txinambwana ku ti ti ni mindonga yayingi ngutu, ka didhawa dimwedo ni dimwani. 8Sekoko a to khene kwangu:
Mati awa ma khulungela kuya wutxani, ma relela me ya tithembweni, ma txi ya wulela lineneni; se ma txi hoka lineneni, ma na ya va mrende ka mati a lineneni. 9Se ti na maheka taku, ni sihi sivangwa so hanya si txi ta ngu ni hayi mu si no wulela ngu kona sinambwana siya, si na hanya, kambe ku nava ni sihaka sasingi ngutu; nguko koneyo ma na hoka ona matiyo ma txi ya va mrende, niku sina hanya sotshe ni hayi txi no wulela txinambwanetxo. 10Vadoti ni vona va na va hafuhi ka txinambwana; kukhukhela Eni-Gedhi, kala Eni-Eglayime, ku nava ni wukhalo wo nawuluta tikoka; sihaka sa kona, ngu tixaka ta sona, si na nga sihaka sa Linene la Hombe, ngu kutala ngutu. 11Aniko maziva a kona ni lidhaka la kona, kha si na mbi basiswa; si na lekwa si txi maha mnyu. 12Se hafuhi ni txinambwana, likasani ka kona, ka didhawa dimwedo ni dimwani, ku na mila totshe tixaka ta mindonga yo ninga mihando yo dingana kudyiwa; mazokoro a yona kha ma na mbi mora, hambi kuluzeka mihando ya kona; ngu mitxima ya kona yi na veleka mihando ya yiphya, nguko mati a kona ma huma ngu ko sawuleka; se mihando ya kona yi na maha yo dyiwa, aniko dizokoro da kona mrende.
Mihingano ya ditiko
13 Mkoma Txizimu a khene:
Awuwa wu na va m'hingano wa ti mi no tekisa tona ditiko ni thomba, madingano ni digumi da tihunzu ni timbidi ta ka Israyeli. Josefa a na va ni madhawa mambidi. 14Se di na va thomba yanu, a kheno ni kheya; nguko ni gute dianza txitimwi ka dona, kasi ku di ningela ka vatate vanu; ngu kumaha keto, edo ditiko, di na va thomba yanu.
15Se m'hingano wa ditiko ngu didhawa da wulambwe ngu wuwa: Kukhukhela ka mnambo wa Hombe, ngu nzila ya Hetiloni, kala kuya wulela Zedhadhi, 16Hamati, Bherota, Sibrayimi (di ku hagari ka m'hingano wa Dhamasku, ni m'hingano wa Hamati), ni didhoropa da Hazeri-Hatikomi (di ku hafuhi ni muhingano wa Hawurami.) 17Se muhingano wa kukhukhela lineneni i nava Hazeri-Enomi, muhingano ni Dhamasku, se ngu thungameto ni wulambwe, ku ni muhingano wa Hamati; ngu wuwa wu no va muhingano wa wulambwe.
18Se muhingano wa wutxani, hagari ka Hawurami, ni Dhamasku, ni Gileyadhi, ni ditiko da ka Israyeli, i nava Jordhani; mi na pimeletela kukhukhela muhinganoni ka wulambwe kala ka Linene la wutxani; awuwa i nava muhingano wa wutxani.
19Se muhingano wa wuphemba wu na khukhela Tamari, kala matshanganoni ka mati a Kadhesi, hafuhi ka txinambwana, kala ka Linene la Hombe.
20Se muhingano wa mswa-ditambo i nava Linene la Hombe, kukhukhela muhinganoni ka wuphemba, kala kuya wulela Hamati; awuwa i nava muhingano wa mswa-ditambo.
21Mi na abanela koko, ditiko diya, madingano ni tihunzu ta ka Israyeli. 22Eko mi na xola maabanelo a thomba, ni yi yo ninga valuveli vale va ku hagari kwanu, va nga veleka vanana hagari kwanu; va na nga sizikwa hagari ka va ka Israyeli; va na mana thomba kumweko ni nanu, hagari ka tihunzu ta ka Israyeli. 23Ku na maheka taku, ka lihunzu lile mluveli a no va a di ka lona, mi na mninga koneho thomba yakwe, kuwomba Mkoma Txizimu.
Currently Selected:
Ezekhiyele 47: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
