Ezekhiyele 46
46
Mfumeli ni mibuso
1 Mkoma Txizimu a khene:
Txike txa mtendela wa mndani, txa kurendekela wutxani, txi na sekwa mndani ka mtxhanu wa masiku ni dimwedo a mthumo; aniko ka ditshiku da Sabbata txi na tulwa; txi tulwa kambe ngu ditshiku da kumeka ka mtxima. 2Mthangeli a na wulela ngu nzila ya m'hubhe wa txikenini, ngu hahanze, a na simama hafuhi ni msasimo wa ditimba; se vaphaxeli va na lulamisela mningelo wa kuhiswa, ni miphaxo ya kona ya kudikha, kambe ene a na nama ha msasimoni, a txi huma; aniko txike kha txi na mbi sekwa kala minova. 3Se vathu va ditiko va na nama txikenini ka dona ditimba dile, ngu Masabbata ni kumekani ka mtxima, masoni ka Mkoma. 4Se mningelo wa kuhiswa a no ningela mthangeli ka Mkoma, ku nava ngu ditshiku da Sabbata, mtxhanu wa sinvutana ni tximwetxo sa kwa mbi na sibawa, ni hamba yimweyo ya kwa mbi na txibawa. 5Se mningelo wa sakudya, i nava wa efa yimweyo ngu hamba; ngu nvuta yimweyo, mningelo wa sakudya i nava wu a no sikota kuningela wona; ni hini yimweyo ya mtona, ka efa yimweyo ni yimweyo. 6Aniko ka ditshiku da kumeka ka mtxima, i nava dirole da kwa mbi na txibawa, ni mtxhanu wa sinvutana ni tximwetxo, ni hamba yimweyo; sa kwa mbi na sibawa. 7Mthangeli a na lulamisa efa yimweyo kasi ku va mningelo wa sakudya ngu dirole dimwedo, ni efa yimweyo ngu hamba, aniko ngu sinvutana, a na ninga si a no si mana manzani kwakwe; ni hini yimweyo ya mtona ngu efa yimweyo. 8Se ngako a txi wulela mthangeli, a na wulela ngu nzila ya m'hubhe wa txikenini, e tshumela e huma ngu yona kambe.
9Aniko mbimo yi vathu va ditiko va nota ka mpipi wa Mkoma masoni kwakwe, awule a no wulela ngu nzila ya txike txa wulambwe ku ta khozela, a nata huma ngu nzila ya txike txa wuphemba; se awule a no wulela ngu nzila ya txike txa wuphemba, a nata huma ngu nzila ya txike txa wulambwe; kha na mbi tshumela ngu nzila ya txike txile a nga wulela ngu txona, aniko a na huma ngu ni a nga rendekela kona. 10Se mthangeli a na wulela ni vathu mbimo yile va wulelako, e huma kumweko navo mbimo yile va humako. 11Amu ka mibuso, ngu mbimo ya mipipi, ku nava mningelo wa sakudya wa efa yimweyo, ka dirole dimwedo, ni efa yimweyo ka hamba yimweyo; aniko ngu txinvutana, a na ningela si a no si mana; ngu mtona i nava hini yimweyo ka efa yimweyo.
12Se ngako mthangeli a txi maha mningelo wa kuhiswa, ni mphaxo wa kuthutha, ngu kutilava kwakwe ka Mkoma, sekoko va na mtulela ditimba do rendekela wutxani, se a na maha mningelo wakwe wo hiswa, ni miphaxo yakwe ya kudikha, nga tile a no va a di mahile ngu ditshiku da Sabbata; a na huma, ku txi sekwa ditimba, na a di humile.
Mningelo wa ditshiku ni ditshiku
13Se u na lulamisa txinvutana txa dilembe dimwedo, txa kwa mbi na txibawa, ku va mningelo wa kuhiswa ka Mkoma, ditshiku ni ditshiku; u na maha eto mixo ni mixo. 14Kumweko ni mningelo wule, u na lulamisa mningelo wa sakudya ka Mkoma, mixo ni mixo, lipimo la wutxhanu ni limwelo la efa yimweyo, ni la mtona, lipimo la wuraru la hini, kasi ku patela ni mpupu; atxiya njileleto txa kwa mbi gwita, txo simama. 15Ngu kumaha keto, mi na lulamisa txinvutana, ni mningelo wa sakudya, ni mtona, mixo ni mixo, i ku mningelo wa kuhiswa wo simama.
Mfumeli ni mafu
16 Mkoma Txizimu a khene:
Ngako mthangeli a txi ninga txokari ka mmweyo wa vanana vakwe, eyo i thomba yakwe, yi lumba vanana vakwe; txi na va txyavelo txa thomba yawe. 17Aniko ngako a txi ninga thomba yokari ka khumbi yokari yakwe, yi na yi lumba kala dilembe da kutxhatxheka ka yona; 18Kambe mthangeli kha na mbi teka txilo ka thomba ya vathu, kha na mbi va kanganyisa ka sile si va lumbako; ka thomba yakwe apune, a na siyela thomba vanana vakwe, kasi ku vathu vangu va si tekelwi, m'thu ni m'thu ni thomba yakwe.
Sikho sa Dithepeleni
19Msana keto, a to ni wuyisa ngu txike txi nga ti ti didhawa ka ditimba, ka tinyumba to sawuleka ta vaphaxeli, atile ti nga ti rendekete wulambwe; wona taku kona hale ku ti ni wukhalo ka madhawa mambidi, ngu didhawa da mswa-ditambo. 20Se ene a to khene kwangu:
Awuwa mbukhalo wu vaphaxeli va no bhikela ka wona mphaxo wa kuthavisa sionho mwendo minandu, kambe va na yoka kona mningelo wa sakudya, kasi ku va si wu tisi ka mtendela wa hahanze, kasi ku ta phaxela vathu.
21Sekoko a to ni yisa ka mtendela wa hahanze, a txi ni pindisa ngu ka mune wa makhona a mtendela; se ka dikhona dimwedo ni dimwedo ku ti ti ni mtendela. 22Ka mune wa makhona a mtendela, ku ti ti ni mitendela yo sekwa, ni siroro sa mune wa magumi a mikono kulapha, ni magumi mararu kuanama; makhona awa a mune ma ti ti ni lipimo limwelo. 23Madhawani ka makhona awa a mune, ku ti ti ni maguma; hahatshi ka maguma ale ma nga ranganyeta ku ti ti ni sikho sa sidotho. 24Se a to khene kwangu:
Atiya ndinyumba ta vabhiki, amu ava vo thuma nyumbani va no bhikela kona mphaxo wa vathu.
Currently Selected:
Ezekhiyele 46: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
