Ezekhiyele 45
45
Didhawa da ditiko do lumba Txizimu
1Ngako koko mi txi abanela mafu kasi kuva thomba yanu, mi na ningela mningelo ka Mkoma, wukhalo wo sawuleka wa mafu; kulapha ku nava ka 25.000 wa tipimo ta litshava, ni kuanama ka 10.000 wa tipimo; wukhalo wuwa wu na va i di wo sawuleka kotshe madhawani ka wona. 2Wu nava wukhalo wo sawuleka wa 500 ni 500 ka otshe mune wa makhona, madhawani ka kona ku nava ni mtxhanu wa magumi wa mikono kuanama. 3U na pima wukhalo wuwa ngu kulapha ka 25.000 wa mikono, ni kuanama ka 10.000; koneyo ku nava ni wukhalo wo sawuleka, ni wukhalo wo sawuleka ngutu. 4Awuwa wu na va wukhalo wo sawuleka ha mafuni; wu na va wukhalo wa vaphaxeli, i ku vathumi va wukhalo wo sawuleka, va tshuketako kuya thumela Mkoma; ku nava wukhalo wa nyumba yawe, ni wukhalo wo sawuleka wa nyumba yo sawuleka. 5Se Valevhi va na va ni vo thuma nyumbani, ngu ku va lumba, 25.000 wa tipimo kulapha, to dingana magumi mambidi a tinyumba. 6Se ka thomba ya didhoropa mi na ningela wukhalo wa kuanama ko dingana 5.000 wa tipimo ta titshava, kulapha ku nava ka 25.000 wa tipimo, masoni ka mningelo wo sawuleka, wu no dingana yotshe nyumba ya ka Israyeli.
Ditiko do lumba mfumeli
7Aniko mthangeli a na va ni ko mlumba, ka diya ni ka dimwani didhawa da mningelo wuwa wo sawuleka, ni da thomba ya didhoropa, ka dikhona da mswa-ditambo, ngu tshungameto ya mswa-ditambo, ni ka dikhona da wutxani ngu tshungameto ya wutxani; se kulapha ka dimwedo da madhawa da masoni, kukhukhela magwito ka mswa-ditambo, kala magwito ka wutxani. 8Se ditiko diya, di na va thomba yakwe, kona Israyeli; kambe vathangeli vangu, kha va na mbi dhuka ve xanisa vathu vangu; vona va na leka ditiko ka nyumba ya ka Israyeli, madingano ni tihunzu tawe.
Kunemela ni mipimo
9 Mkoma Txizimu a khene:
Ti dinganile, anu vathangeli va ka Israyeli; yisani kule timboyinga ni kulovisa, lamulani ngu wululamo, kambe thavisani mikhinyavezo yanu ka vathu vangu, kuwomba Mkoma Txizimu.
10Mi nava ni sikalo so lulama, efa yo lulama, ni bhato yo lulama.
11Efa ni bhato si na va mpimo wumwewo, ati taku, bhato yi na va ni mpimo wa wugumi wa omeri ni yona efa mpimo wa wugumi wa omeri; nga ti yi ku ngu tona omeri, wu na va mpimo wa kona.
12Se dixekele di na va da magumi mambidi a magera; magumi mambidi a maxekele, ni magumi mambidi ni mtxhanu wa maxekele, ni digumi da maxekele ni mtxhanu, ma nava “arateli.”
13Mningelo wu mi no ningela ngu wuwa: Lipimo la wutxhanu ni limwelo la efa yimweyo ka omeri yimweyo ni yimweyo ya fulaho; ni lipimo la wutxhanu ni limwelo la efa yimweyo ni yimweyo ya omeri ya sevhadha. 14Txileleto txa mtona ka bhato yimweyo ya mtona, mi na ningela lipimo la wugumi la bhato ya koro, i ku omeri ya digumi da tibhato; nguko digumi da tibhato ti dingana omeri yimweyo. 15Ni txinvutana txa mtxhambini, hagari ka mtxhambi ni mtxhambi wa 200.
Ka mafu o nakana ngutu a ka Israyeli, ku va mningelo wa sakudya, ni mningelo wa kuhiswa, ni mphaxo wa kudikha; kasi ku ta va mningelo wa kudivalela sionho, kuwomba Mkoma Txizimu.
16Votshe vathu va ditiko va na yisa mningelo wuwa, ka mthangeli wa ka Israyeli. 17Kambe miningelo yiya yo hiswa, yi na va manzani ka mthangeli, ni miningelo ya sakudya, ni sa kusela, amu ka mipipi, ni kumeka ka mtxima, ni Masabbata, ni ka yotshe mipipi ya nyumba ya ka Israyeli; i nava wa kudivalela sionho, ni mningelo wa sakudya, ni mningelo wa kuhiswa, ni mphaxo wa kudikha, kasi kukuwula sionho sa nyumba ya ka Israyeli.
Pasika
(Eksodha 12:1-20)
18 Mkoma Txizimu a khene: Ka mtxima wo khata, ngu ditshiku do khata ka mtxima, u na teka dirole da kwa mbi na txibawa, u txi sawulekisa nyumba yo sawuleka. 19Se mphaxeli a na teka mnoha wa mphaxo wa kudivalela ka sionho, a txi wu totela amu ka misasimo ya nyumba, ni ka mune wa makhona a mabambe ka txiluvelo, ni mu ka misasimo ya ditimba da mtendela wa mndani. 20U na maha toneto kambe ka ditshiku da wutxhanu ni mambidi ka mtxima, ngu mhaka ya vale va hohetako, ni vale va ti timelelako; mi na divaleliseto yotshe nyumba.
21Ka mtxima wo khata, ngu ditshiku da digumi ni mune ka mtxima, mi na va ni Pasika, i ku mpipi wa mtxhanu wa masiku ni mambidi; ku na dyiwa dipawu da kwa mbi tshumbelwa. 22Se mthangeli ka dona ditsikuedo da dimwedo, ngu mhaka yakwe, ni mhaka ya vathu votshe va ditiko, a na lulamisa dirole da kudivalela sionho. 23Kambe amu ka mtxhanu wa masiku ni mambidi a m'buso, a na lulamisa mningelo wa kuhiswa, ka Mkoma, wa mtxhanu wa marole ni mambidi, ni mtxhanu wa sinvutana ni simbidi, sa kwa mbi na sibawa, ditshiku ni ditshiku, kala mtxhanu wa masiku ni mambidi; ni mphaxo wa kudivalela sionho ngu mabhongwe ditshiku ni ditshiku. 24Kambe a na lulamisa mningelo wa sakudya: Efa yimweyo ka dirole dimwedo, ni efa yimweyo ka txinvutana tximwetxo, ni hini yimweyo ka efa yimweyo ni yimweyo.
M'buso wa midhuti
(Valevhi 23:33-43)
25Ka mtxima wa wutxhanu ni yimbidi, ngu ditshiku da digumi ni mtxhanu ka mtxima, m'busoni, a na maha toneto tatimweto ka otshe masiku a mtxhanu ni mambidi, ka mphaxo wa kudivalela sionho, ni ka mningelo wo hiswa, ni ka mningelo wa sakudya, ni mtona.
Currently Selected:
Ezekhiyele 45: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
