Ezekhiyele 44
44
Txike txa wutxani
1Sekoko a to ni wuyisa ka nzila ya txike txa nyumba yo sawuleka, ngu hahanze, yo rendekela wutxani, txi nga ti sekilwe. 2Se Mkoma a to ni gela ku khene:
Txike txiya, txi na va txi di sekilwe, kha txi na mbi tulwa; ni wammweyo kha na mbi wulela ngu txona, nguko Mkoma, Txizimu txa ka Israyeli, a wulete ngu txona; ngu kumaha keto, txi na va txi di sekilwe. 3Se mfumeli a na khalahatsha kota mfumeli, a txi dya dipawu masoni ka Mkoma; a na wulela ngu nzila ya txike txa m'hubhe, e huma kambe ngu yona nzileyo.
Milayo ya kuwulela Dithepeleni
4Ngu msana a to ni tisa ka nzila ya txike txa wulambwe, masoni ka nyumba; se ni to wona taku kuphatima ka Mkoma ku tatile Nyumba ya Mkoma; sekoko ni to wa ngu khohe yangu. 5Se Mkoma a to khene kwangu:
Awe mwanana wa m'thu, ti veke mbiluni kwako, u txi ti wona ngu maso ako, u engisa ngu tinzeve tako, totshe tile ni no ku gela ta Nyumba ya Mkoma ni ta milayo ya kona yotshe; se ninga lisima txike txako txo wulela ngu txona nyumbani, ni sotshe sike so huma ngu ka nyumba yo sawuleka.
6Kambe gela vale va ku ti lambisa, va nyumba ya ka Israyeli: Mkoma Txizimu a khene: Ma na eme otshe manyala anu, anu va nyumba ya ka Israyeli! 7Nguko mi dhani vamatiko, va timbilu ta makhutu, kambe va makhutu nyamani kwawe, va txi ta maneka nyumbani kwangu ko sawuleka, ku ta yi nyenyezisa, mbimo yi mi no ni ninga dipawu, mafura ni mnoha; vona va txhipisile txitumelelano txangu, ngu mhaka ya kotshe kunyenyeza kwanu. 8Aniko kha ma vekisa silayelo sa simaha sangu so sawuleka; kambe anu mipune mi ti mahile vaxayise va silayelo sangu, nyumbani kwangu ko sawuleka.
9 Mkoma Txizimu a khene: Ni wammweyo wu i ku dikhutu mbiluni mwendo nyamani, kha na mbi wulela nyumbani kwangu ko sawuleka, ka ni wihi wa vamatiko vale va no maneka hagari ka vanana va ka Israyeli.
10Kambe va ka Levhi vale va nga ya kule ni nani, mbimo yile Israyeli i nga ti mpepeseki, va nga ti ti maneka va di hambukile, ve hambana ni nani, va txi londetela sithombe sawe, evo va na rwala wubihi wawe vapune. 11Hambi keto, va na thuma nyumbani kwangu ko sawuleka, va txi xayisa sike sa nyumba, va na thuma nyumbani; va na daya mningelo wa kuhiswa, ni mphaxo wa vathu, kambe va na va masoni ka vathu, kasi ku va thumela. 12Nguko va va thumete masoni ka sithombe sawe, ve maha ti to nyumba ya ka Israyeli yi txi nyenyeza; ngu tona eto, ni gute dianza txitimwi kwawe, kuwomba Mkoma Txizimu, se vona va na rwala wubihi wawe vapune. 13Kambe kha va na mbi tshuketa kwangu, ku ta ni thumela amu ka wuphaxeli, hambi kutshuketa ni ka txa tximwetxo, ka sotshe siya sangu so sawuleka, ka Wusawuleki wa Kusawuleka, aniko va na rwala vapune tingana tawe, ni kunyenyeza kwawe kule va nga kumaha. 14Hambi keto, ni na va maha vaxayisi va sileleto sa nyumba, ka yotshe mithumo ya kona, ni totshe tile ti no thumwa ka yona.
Vaphaxeli
15Aniko vaphaxeli vale va ka Levhi, i ku vanana va Zadhoki, vale va nga xayisa txileleto txa nyumba yangu yo sawuleka, mbimo yile vanana va ka Israyeli va nga hambuka kwangu, Valevhi va tshuketile kwangu, ku ta ni thumela, va na va masoni kwangu, ku ta ni ninga mafura ni mnoha, kuwomba Mkoma Txizimu. 16Va na wulela nyumbani kwangu ko sawuleka, kambe va na tshuketa mezani kwangu, ku ta ni thumela, ni kuvekisa txileleto txangu. 17Se mbimo yi va no wulela ngu sike sa mtendela wa mndani, va ambala syambalo sa linyu; kambe kha ku na mbi sanzekwa sa matoya txitimwi kwawe, mbimo yi va no thuma sikenini, ka mtendela wa mndani, mndani ka nyumba. 18Hamisungo kwawe va na ambala sigoko sa linyu, ni simolowani sa linyu siwununi kwawe; kha va na mbi ambala so va dhunukisa. 19Se mbimo yi va no huma ka mtendela wa hahanze, ka vathu, mtendelani ka hahanze, va na ambula syambalo sile va nga thuma ngu sona, va txi si veka ka tinyumba to sawuleka, ve ambala simwani simaha, kasi ku va si sawulekisi vathu va di ni syambalo sawe.
20Aniko, vaphaxeli kha va na mbi yola misisi, hambi kuleka misisi yi txi kula; kambe va na kaya misisi. 21Ni wammweyo mphaxeli kha na mbi sela vhinya, mbimo yi a no wulela ka mtendela wa mndani. 22Kha va na mbi teka noni, hambi wo lekwa wukati, aniko va na teka mahorana o tuma ka lihunzu la nyumba ya ka Israyeli, mwendo tinoni ti i ku tinoni ta vaphaxeli.
23Se vaphaxeli va na gondisa vathu vangu, kuhambanisa hagari ka kusawuleka ni kunyenyeza, ni kuhambanisa kusawuleka ni kwa mbi sawuleka. 24Ngako ku ti ni mahungu, va na ma lamula; va na ma lamula ngu malamulelo angu; ngu milayo yangu ni sileleto sangu, va na vekisa yotshe mipipi yangu, va na sawulekisa Masabbata angu.
25Vaphaxeli kha va na mbi tshuketa hafuhi ka m'thu wa kufa, nguko va nga ti nyenyezisa; aniko va na gwesa tate, mame, mwanana wa dizambi, mwanana wa dihorana, mwendo mwanawe, mwendo ndiyawe ya kwa mbi na mwamna, va na ti nyenyezisa. 26Se msana ka ku ti sawulekisa kwawe, va na heta mtxhanu wa masiku ni mambidi. 27Ka ditshiku dile mphaxeliyo a wulelako ka wukhalo wo sawuleka, ka mtendela wa mndani, kasi kuthuma ka wukhalo wo sawuleka, a na ningela mningelo wa kudivalelwa kwakwe sionho, kuwomba Mkoma Txizimu.
28Vaphaxeli va na va ni thomba; ani ni na va thomba yawe; kha mi na mbi va ninga thomba kona Israyeli; ani ngani thomba yawe. 29Se miningelo ya sakudya, ni mningelo wa kudivalela txionho, ni mningelo ngu mhaka ya mnandu, va na dya; sotshe so sawuleka kona Israyeli i nava sawe. 30Kambe matiwula a yotshe mihando yo khata ka sotshe, ni yotshe miningelo ya sotshe ka sotshe sa miningelo yanu, si na lumba vaphaxeli; ni so khata ka silo sanu, mi na si ningela ka mphaxeli, kasi ku a na txhikisa makatekwa txitimwi ka nyumba yako. 31#Wona ni ka: Levh. 22:8. Ni txa tximwetxo txa kuva txi di fite, mwendo txo maha ngu kudawa, ka sinyana ni ka sihari, kha na mbi dya mphaxeli.
Currently Selected:
Ezekhiyele 44: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
