Dhaniyeli 12
12
Mbimo yo gwitisa
1 # Wona ni ka: Mat. 24:21; Mar. 13:19; Mtu. 7:14; 12:7. Se ka mbimo yoneyo, ku na humelela Migeli, mthangeli wa hombe, a wuselwako vanana va ditiko dako, kambe ku nava ni mbimo ya kuxaniseka, ko mbi khala kuhumelela, kukhukhela ku nga va ni mfumo kala ka mbimo yile; aniko ka yoneyo mbimo, vathu vako va na hulukiswa, votshe vale va no maneka va di bhatwe amu ka dibhuku. 2#Wona ni ka: Mat. 25:46; Job. 5:29. Se wungi wa vale va nga otela ha mafuni va na wuka, vamwani va na wuka ve yiswa ka wutomi wo mbi guma; kasi vamwani va na yiswa kueyiswani ni tinganani to mbi guma. 3Titxhari koko ti na phatima kufana ni kuphatima ka mzuma; ni vale va kombako vathu nzila ya kululama va na woninga ku nga tinyeleti, mbimo yotshe ni ha ku si gwitiko. 4#Wona ni ka: Mtu. 22:10. Se awe, Dhaniyeli, vhala mapswi awa, u lema dibhuku diya, kala ka mbimo yo gwita; votala va na tutuma-tutuma va txiya kheya ni kheya, kambe wutxhari u na anda.
5Se ani Dhaniyeli ni to wona, se ni wona vamwani vavambidi, mmweyo ka didhawa da kheno, ngu mabambe ka mnambo, mmwani ka didhawa dimwani, ngu mabambe ka mnambo. 6Se ene a to khene ka wamwamna wule a nga ambala syambalo sa linyu, wule a nga ti ti emile txitimwi ka mnambo:
Ku nava ni mbimo muni kala magwito ka sixamaliso kani?
7 # Wona ni ka: Mtu. 10:5. Se ni to pfa wamwamna wule a nga ambala syambalo sa linyu, a nga ti ti emile txitimwi ka mati a mnamboni, mbimo yi a nga guleta dianza dakwe da txinene, ni dianza dakwe da txibhabha e komba nzumani, se a to xambanya ngu wule a hanyako ngu ha ku si gwitiko, ti to msana ka mbimo yokari, ka timbimo ni ka hafu ya mbimo, ni mbimo yile va nova va di hetile kuhoxota mtamo wa vathu vo sawuleka, totshe timhaka tiya ti nava ti di humelete.
8Ani koko, ni ti pfite kambe kha na ti pfisisa, ngu konaho, ni ti khani:
“Awe Nyamne wangu, ngu ahi magwito a timhaka tiya kani?”
9Se ene a to khene:
Tsula Dhaniyeli, nguko mapswi awa mavhatwe ni kulemwa kala ka mbimo yo gwita. 10#Wona ni ka: Mtu. 22:1. Vathu vavangi va na sawulekiswa, ve basa, ve dukwa; kambe vabihi va na simama ve maha wubihi, ni wammweyo wa vabihi kha na mbi ma pfisisa, aniko titxhari ti na ma pfisisa. 11#Wona ni ka: Dhan. 9:27; 11:31; Mat. 24:15; Mar. 13:14. Se kukhukhela ka mbimo yi mphaxo wa ditshiku ni ditshiku wu no thaviswa wu txi vekwa ka makhalo o nyenyeza, ku nava ku di pindile 1.290 wa masiku. 12Va katekile avale va rinzelako kala kuva txi hoka ka 1.335 wa masiku.
13Awe koko, Dhaniyeli, tsanisela kala magwito; nguko u na humula kambe u na zumba ka dikato dako, ngu magwito ka masiku.
Currently Selected:
Dhaniyeli 12: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.